„Акала лафија... чхив лен те вилесте“
О родителија тане сар пастирија. Ола ваљани бут шукар те грижинен пе пумаре чхавенге, кола со локхе шај те џан ко лошно друмо хем те анен пе ки опасност (Изр. 27:23). Сар шај о родителија те овен шукар пастирија? Аѓаар со секова диве ка одвојнен време те керен лафи пумаре чхавенцар те шај те џанен сар ола размислинена хем со иси лен ко вило (Изр. 20:5). Исто аѓаар, о родителија ваљани те градинен материјалеа со шај те издржинел ки јаг те шај е чхавенгири вера те овел зорали (1. Кор. 3:10-15). О филми „Акала лафија... чхив лен те вилесте“ сикавела кобор тано важно редовно те икерел пе и Фамилијарно рат. Дикхен акава филми заедно сар фамилија хем пало адава керен лафи башо акала пучиба:
1) Со анѓа џи ко адава и фамилија Роман те почминел те бистрел о духовна буќа? 2) Соске о Томас на успејнѓа о прво пути кеда мангља те овел лен и Фамилијарно рат? 3) Кова совет тари Библија шај најшукар те поможинел е родителенге кеда воспитинена пумаре чхавен? (5. Мој. 6:6, 7). 4) Со шај те поможинел ки фамилија те овел пошукар комуникација? 5) Саве жртве ваљани те керен о родителија пумаре чхавенге? 6) Сар шукар влијајнѓе о пхрал хем и пхен Бароу ки фамилија Роман? (Изр. 27:17). 7) Со ваљани англедер те керел о поглавари е фамилијакоро те шај те овел шукар и Фамилијарно рат? 8) Со керѓа о Томас те шај те менинен пе о буќа ки фамилија? 9) Соске тано важно редовно те икерел пе и Фамилијарно рат? (Еф. 6:4). 10) Кола тане несаве практична предлогија баши Фамилијарно рат? 11) Сар о Томас сине смиримо хем на премукља кеда мангља те поможинел е Маркусеске те хаљовел кобор тано важно те керел адава со и исправно? (Ерем. 17:9). 12) Сар о Томас хем и Моника поможинѓе е Ребекаке те анел шукар одлука башо Џастин? (Мар. 12:30; 2. Тим. 2:22). 13) Сар о Томас хем и Моника сикавѓе вера кеда керѓе промене ко пло џивдипе? (Мат. 6:33). 14) Сар акава филми сикавела кобор тано важно о поглаварија ки фамилија те грижинен пе башо духовна потребе е фамилијакере? (1. Тим. 5:8). 15) Со сиан одлучно те кере сар поглавари ки фамилија?
ЗАБЕЛЕШКА Е ПОГЛАВАРЕНГЕ КИ ФАМИЛИЈА: Акаја драма сине сикавди ко регионално конгрес ко 2011 берш. Дали тегани приметинѓан кај ваљани пошукар те керен тумари Фамилијарно рат? Сар тано акана? Ако панда ваљани те керен промене, тегани молинен тумен башо адава хем керен адава со ваљани башо шукарипе тумаре фамилијаке (Еф. 5:15-17).