Сикав е манушен е брошураја Шукар хабери
1. Сар тани керди и брошура Шукар хабери?
1 Сар со сине вакердо ки Амари служба башо Царство таро јули, јекх важно алати со користинаја ле те сикава е манушен тани и брошура Шукар хабери таро Девел! О стихија со и тане пишиме ки лате нане цитириме хем адалеске о мануша шај те сикљон директно тари Библија. Бут публикацие со користинаја лен те проучина е манушенцар тане пишиме ко асавко начин те шај адава со читинела коркори да те хаљовел. Ама, акаја брошура тани керди ко асавко начин те водинел пе дискусија машкар о интересенти хем адава со проучинела леа. Адалеске, кеда даја и брошура, ваљани те сикава е станареске сар шај те проучинел пе лаја те шај ов те дикхел кобор тано интересно те сикљол пе о шукар хабери тари Библија (Мат. 13:44).
2. Сар шај ко нево тхан те користина и брошура Шукар хабери?
2 Ко нево тхан: Шај те вакере: „Бут мануша тане секириме башо адава со ка овел акале сумналеа. Со мислеа, ка овел ли пошукар? [Мукх те одговоринел о станари.] Ки Библија иси шукар хабери со дела амен надеж. Акате иси некобор пучиба коленге и Библија дела одговор“. Де јекх брошура е станареске хем замолин ле те биринел јекх пучибе тари палуни страна. Тегани сикав сар проучинела пе аѓаар со ка користине о прво пасус тари лекција со ка биринел о станари. Јавер начин тано те пуче е станаре несаво интересно пучибе тари лекција со ту ка бирине ла, хем тегани сикав сар шај и брошура те поможинел те аракха о одговор ки Библија. Кеда ки jw.org иси видеоклипи баши адаја лекција, несаве објавителија мукхена о клипи е станареске сар дело тари презентација.
3. Објаснин сар ваљани те водинел пе и студија е брошураја Шукар хабери.
3 Сар шај те водинел пе студија: 1) Читин о пучибе со иси ле број хем со и покале буквенцар те шај о станари те концентриринел пе ки главно мисла. 2) Читин о пасус теледер о пучибе. 3) Читин о стихија кола со пишинела кај ваљани те читинен пе хем пуч тактична пучиба те дикхел о станари сар о стихија дена одговор ко пучибе со читинѓан ле ко почеток таро пасус. 4) Ако иси панда јекх пасус тело пучибе, повторин и 2 хем и 3 точка. Ако башо адава пучибе иси видеоклипи со о станари панда на дикхља ле, мукх о клипи џикоте керена лафи. 5) Ко крајо, пуч е станаре о пучиба со читинѓан ле ко почеток те шај те ове сигурно кај шукар халило.
4. Со ка поможинел амен шукар те користина и брошура?
4 Трудин тут шукар те џане со иси ки акаја брошура. Користин ла секогаш кеда шај. Англедер секоја студија, размислин башо интересенти хем сар шај најшукар те дискутирине леа аѓаар со ка користине о стихија тари лекција (Изр. 15:28; Дела 17:2, 3). Акаја брошура шај те овел туке јекх таро те омилена публикацие те сикаве е манушен башо чачипе ако сиклиљан шукар те користине ла.