Сар те користина о аудиоснимке
1. Освен о публикацие со шај те читина лен, со шај панда те аракха ки амари интернет-страница?
1 Бут мануша уживинена те користинен и jw.org те шај те читинен о шукар хем о точна лафија башо чачипе (Проп. 12:10). Ама, ки амари интернет-страница иси хем аудиоснимке кола со поможинена амен те шуна бут информацие. Сар шај те користинен аменге о аудиоснимке?
2. Сар шај те користина аудиоснимке кеда проучинаја коркори или сар фамилија?
2 Кеда проучинаја коркори или сар фамилија: Амаро време шај те користина ле пошукар аѓаар со ка шуна о аудиоснимке тари Библија, списанија или публикацие џикоте џаја негде или џикоте кераја амаре обврске со иси амен секова диве (Еф. 5:15, 16). Амари Фамилијарно рат шај те кера ла интересно аѓаар со ка шуна сар читинела пе несаво дело тари публикација џикоте дикхаја ко амаро примерок. Адава со ка користина аудиоснимке кеда проучинаја коркори, шај бут те поможинел аменге кеда мангаја пошукар те читина или кеда сикљоваја несави чхиб.
3. Коле манушенге ко амаро подрачје шај те користинен о аудиоснимке?
3 Ки служба: О мануша таро амаро подрачје со нане лен време те читинен, шај ка манген те шунен аудиоснимке. Или палем, ко подрачје шај те аракха несаве манушен со керена лафи ки јавер чхиб хем шај ола ка манген те шунен о хабери башо Царство „ки пли чхиб“ (Дела 2:6-8). Ко несаве тхана, о шунибе тано важно ки ленгири култура. На пример, о мануша таро народо Хмонг на пишинена пли историја, него е потерненге вакерена ла мујеа хем ола памтинена бут таро адава со шунена. Ко бут африканска културе о мануша бут мангена те сикљовен аѓаар со шунена парамиса.
4. Те шај те поможина е манушенге таро амаро подрачје, кола пучиба ваљани те пуча амен?
4 Те размислина башо мануша таро амаро подрачје. Дали иси некој каске со шај те мукха аудиоснимке ки лескири чхиб? Дали шај некаске те бичхала аудиоснимке преку имејл? Дали шај те перава несави аудиопубликација хем те чхива ла ко CD те шај те да е интересентенге заедно е штампиме публикацијаја? Секова лил, брошура, списание или трактати ко електронско формати со ка да ки служба, шај те пишина ле ко извештај баши служба. О аудиоснимке тане керде те користина лен кеда проучинаја коркори хем кеда садинаја о семе башо Царство (1. Кор. 3:6).