Шукар користин о лил Што учи Библијата
Кобор побутер о интересенти џанела со чаче сикавела и Библија хем керела адава со сикљовела, добором побутер ка бајрол духовно (Пс. 1:1-3). Шај те поможина е интересентеске те напредуњел ако користинаја несаве корисна буќа со иси ко лил Што учи Библијата.
Пучиба со иси ко почеток таро поглавје: Ко почеток таро секова поглавје иси пучиба, а о одговорија аракхљона ко поглавје. Акала пучиба шај само те читине лен бизо те аџикере одговор, аѓаар шај те поттикнине о интерес. Или, шај те замолине ле те дел кратко коментари башо секова пучибе. Ако о буќа со вакерѓа лен нане точна, на ваљани одма те поправине ле. Таро лескере коментарија башо адала пучиба ка хаљове кола буќа ваљани побутер те објаснине леске хем со ваљани те нагласине (Изр. 16:23; 18:13).
Додаток: Ако о интересенти хаљовела адава со проучинена хем прифатинела ле, тегани шај те поттикнине ле ов коркори те читинел о додаток башо поглавје со дикхлен ле. Јавер пути кеда ка проучинен, шај некобор минутија те повторинен несаве мисле таро додаток те шај те дикхе дали халило адава со читинѓа ле. Ама, ако мислинеа кај побутер ка користинел леске те дикхен заедно о додаток, тегани читинен о пасусија хем пуч пучиба кола со спреминѓан лен англедер.
Рамка повторибаске: Ки рамка повторибаске со и тани ко крајо таро секова поглавје иси одговорија башо пучиба со и тане ко почеток. Акаја рамка шај те поможинел туке те дикхе дали о интересенти халило хем дали шај те објаснинел о главна мисле. Читин ко гласо са о одговорија хем о стихија. Пало адава, замолин е интересенте те користинел о стихија те шај те објаснинел соске адава одговор тано точно (Дела 17:2, 3).