Сар пример те овен туменге о пророкија — Авакум
1. Соске шај амен да те осетина амен сар о Авакум?
1 Кеда дикхаја кобор бајрола о лошнипе ко сумнал, шај осетинаја амен исто сар о Авакум кова со пучља е Јехова: „Соске чхивеа ман те дикхав лошнипе хем соске дикхеа о муке?“ (Авак. 1:3; 2. Тим. 3:1, 13). Ако размислинаја баши порака со вакерѓа ла о Авакум хем башо лескоро верно пример, адава ка поможинел амен те издржина џикоте авела е Јеховаскоро диве кеда ка судинел (2. Пет. 3:7).
2. Сар шај те сикава кај иси амен вера?
2 Те овел тут вера: Наместо те мислинел само кобор сине леске пхаро, о Авакум ачхило верно е Девлеске хем сине активно (Авак. 2:1). О Јехова уверинѓа ле кај лескоро лафи ка овел чаче ко време кеда ваљани хем кај „о праведно мануш ка ачхол џивдо адалеске со и тано верно“ (Авак. 2:2-4). Со значинела акава е христијаненге со џивдинена ко крајо таро последна диве? Бут поважно тано те ова сигурна кај ка авел о крајо, него те џана кеда ка авел. И вера ваљани те поттикнинел амен те ачхова духовно џангавде хем те чхива и служба ко прво тхан (Евр. 10:38, 39).
3. Соске ваљани те ачхова бахтале џикоте служинаја е Јеховаске?
3 Ов бахтало башо Јехова: Кеда о Гог таро Магог ка нападинел е Јеховаскере народо, тегани амари вера ка овел испитими (Езек. 38:2, 10-12). О марибе секогаш анела пхарипе, чак околенге да со побединена. Шај бут хари те овел хајбаске, те нашава са со иси амен хем те џивдина ко бут почороле условија. Сар ка реагирина кеда ка авен асавке проблемија? О Авакум џанља кај ка авен асавке пхаре диве, адалеске ов сине одлучно те ачхол бахтало џикоте служинела сине е Јеховаске (Авак. 3:16-19). Адава со џанаја кај кераја е Јехова бахтало, ка поможинел аменге да те издржина о искушенија со ка авен (Неем. 8:10; Евр. 12:2).
4. Со шај те керел амен бахтале акана хем ки иднина?
4 О мануша со ка овен заштитиме таро Јехова ко судно диве, понадари да ка џивдинен сар ов со ка сикавел лен (Авак. 2:14). Адала со ка воскреснинен ка овен сикавде башо Јехова. Панда акана, те користина секоја прилика те кера лафи башо Јехова хем башо са о шукар буќа со керела лен! (Пс. 34:1; 71:17).