Буќа со ваљани те избегине лен кеда проучинеа некасаја

Бут те кере лафи: На ваљани са ту те објаснине. О Исус пучела сине пучиба те шај те поттикнинел е манушен те размислинен хем те анен исправно заклучок (Мт 17:24-27). О пучиба керена те овел поинтересно и студија хем поможинена тут те дикхе ко со верујнела о интересенти хем дали хаљола о материјали (be 253, 3-4 пас.). Кеда пучеа пучибе, ов стрпливо хем аџикер те одговоринел. Ако дела погрешно одговор, наместо одма те вакере о точно одговор, пуч ле јавера пучиба те шај коркори те ресел џи ко точно одговор (be 238, 1-2 пас.). Ма сиѓар џикоте објаснинеа нешто нево те шај о интересенти те сватинел тут (be 230, 4 пас.).

Те комплицирине: Избегин те вакере са о буќа со џанеа баши тема со читинена ла (Јвн 16:12). Наместо адава, концентририн ту ко главана мисле таро пасус (be 226, 4-5 пас.). Ако вакереа бут деталија, иако шај тане бут интересна, адава ка керел ма те овен јасна о главна мисле (be 235, 3 пас.). Ако о интересенти хаљовела и главно мисла, тегани шај те џан ко следно пасус.

Само те накхавен о материјали: Амари цел тани те реса џи ко вило, а на само те накхава о материјали (Лу 24:32). Користин и сила со иси ле е Девлескоро Лафи аѓаар со ка концентририне тут ко главна стихија таро материјали (2Ко 10:4; Ев 4:12; be 144, 1-3 пас.). Вакер едноставна споредбе (be 245, 2-4 пас.). Ле ко предвид о верувања хем о потребе е интересентескере хем прилагодин о материјали спрема лесте. Пуч ле пучиба, сар на пример: „Со мислинеа ту башо акава?“, „Со сикљоваја башо Јехова таро акава?“, „Сави корист ка овел ту ако икереа тут ко акава совет?“ (be 238, 3-5 пас.; 259, 1 пас.).