И послушност спрема о Девел анела берекетија

О пекамбери о Муса вакерѓа кај, ако шунаја е Девлескере заповедија, о Девел ка дел амен берекетија (5. Мојсеева 10:13; 11:27). Амен на сием е Девлеске послушна тари дар кај ка казнинел амен. Наместо адава, лескере бут шуже особине поттикнинена амен те ова леске послушна таро мангипе хем те на кера нешто со ка разочаринел ле. Ко е Девлескоро Лафи пишинела: „Те мангел пе е Девле значинела те икерен пе лескере заповедија, а лескере заповедија нане пхаре“ (1. Јованово 5:3).

Ама, сар шај и послушност спрема о Девел те анел аменге берекетија? Те дикха дуј начинија.

1. АДАВА СО СИЕМ ПОСЛУШНА Е ДЕВЛЕСКЕ ПОМОЖИНЕЛА АМЕН ТЕ ОВА МУДРА

„Ме, о Јехова, сиум тло Девел, кова со сикавела тут башо тло шукарипе, окова со водинела тут ко друмо колесте со ваљани те џа“ (ИСАИЈА 48:17).

О Јехова, амаро Девел хем Створители, шукар џанела амен хем дела амен о водство со ваљанела аменге. Ако мангаја лескере советија те поможинен аменге те ана мудра одлуке, мора те дознајна таро лескоро Лафи со мангела те кера хем пало адава те постапина спрема адава.

2. АКО СИЕМ ПОСЛУШНА Е ДЕВЛЕСКЕ КА ОВА БАХТАЛЕ

„Бахтале тане окола со шунена е Девлескоро лафи хем икерена ле!“ (ЛУКА 11:28).

Авдиве, милиоња мануша со икерена пе ко адава со пишинела ко е Девлескоро Лафи чаче тане бахтале. На пример, размислин башо јекх мануш тари Шпанија со бут локхесте хољанела сине хем понашинела пе грубо е јаверенцар, па чак пле ромњаја. Јекх диве, џикоте читинела сине со пишинѓа о пекамбери о Муса, приметинѓа кобор кротко сине о Јусуф (Јосиф), о чхаво е Јакупескоро (Јаковескоро). О Јусуф сине бикимо сар робо хем неправедно чхивдо ко затвор. Иако доживинѓа са акава, о Јусуф сепак ачхило кротко, мирољубиво хем простинела сине е јаверенге (1. Мојсеева, поглавја 37-45). Ов признајнѓа: „Адава со размислинава сине башо пример е Јусуфескоро, поможинѓа манге те овав кротко, љубезно хем те овел ман самоконтрола. Адалеске, акана сиум чаче бахтало“.

Ко е Девлескоро Лафи иси јавера да советија башо адава сар ваљани те понашина амен е јаверенцар. Ки јавер статија ка дикха несаве лендар.