О мангипе спрема о Јехова ка поттикнинел тут те крстине тут

1-2. Спрема Дела 8:27-31, 35-38, со поттикнинѓа е етиопско службенико те крстинел пе?

ДАЛИ мангеа те крстине тут сар ученико е Христосескоро? Бут џене сине поттикниме те керен акава таро мангипе хем благодарност спрема о Јехова. Те дикха о пример јекхе манушескоро со служинела сине ко дворо е етиопско царицакоро.

² Акава Етиопјани халило таро света списија кај ваљани те крстинел пе, хем одма керѓа адава. (Читин Дела 8:27-31, 35-38.) Со поттикнинѓа ле те керел адава? Ов најверојатно више ценинела сине е Девлескоро лафи адалеске со читинела сине дело таро лил Исаија џикоте возинела пе сине ки пли кочија. А адава со керѓа е Филипеа лафи поможинѓа леске те ценинел адава со о Исус керѓа баши лесте. Ама, соске акава службенико сине ко Ерусалим? Адалеске со ов више мангела сине е Јехова. Котар џанаја? О извештај вакерела кај ов гело ко Ерусалим те обожавинел е Јехова. Веројатно менинѓа пли религија хем почминѓа те служинел е чачутне Девлеске заедно лескере народоја. О исто адава мангипе спрема о Јехова, поттикнинѓа ле те керел панда јекх бут важно бути — те крстинел пе хем те овел е Христосескоро ученико (Мат. 28:19).

3. Со шај те чхинавел некас те крстинел пе? (Дикх и рамка „Саво тано тло вило?“)

³ Оја, о мангипе спрема о Јехова шај те поттикнинел тут те крстине тут. Ама, о мангипе спрема нешто јавер шај те чхинавел тут те кере адава. Ки која смисла? Те дикха некобор примерија. Веројатно бут мангеа тле фамилија или тле амален кола со на служинена е Јеховаске, хем адалеске дараја кај, ако крстинеа тут, нане више те манген тут (Мат. 10:37). Или шај мангеа несаве буќа кола со мрзинела о Девел, хем пхаро туке те чхинаве те кере лен (Пс. 97:10). Јавер бути со шај те чхинавел тут тани адаја со панда таро тикнипе шај славинеа несаве празникија сој поврзиме е ховавне религијаја, хем шај бут значинена туке о шуже моментија таро адала празникија. Адалеске, шај те овел туке пхаро те чхинаве те кере несаве обичаија кола со о Јехова на одобринела лен (1. Кор. 10:20, 21). Ама мора те одлучине: „Со или кас мангава највише?“

КАС ВАЉАНИ ТЕ МАНГА НАЈВИШЕ

4. Кова ваљани те овел о најважно мотиви те шај те крстине тут?

⁴ Англедер те почмине те проучине е Јеховаскере сведоконцар шај мангеа сине те шуне башо Девел хем башо са о буќа со керѓа аменге. А акана откеда запознајнѓан е Јеховаскере сведокон, шај мангеа те дружине тут ленцар. Сепак, са акала буќа на значинена кај ка поттикнинен тут те де лафи кај ка служине е Јеховаске хем те крстине тут. О најважно мотиви со ка поттикнинел тут те крстине тут тано о мангипе спрема о Јехова. Ако мангеа е Јехова највише таро са, нане те мукхе никој хем ништо те чхинавел тут те служине леске. О мангипе спрема о Јехова ка поттикнинел тут те крстине тут хем те ачхове леске верно.

5. Со ка дикха ки акаја статија?

⁵ О Исус вакерѓа кај мора те манга е Јехова цело вилеа, душаја, гоѓаја хем силаја (Мар. 12:30). Со ка поможинел туке те овел тут баро мангипе хем поштовање спрема о Јехова? Ако размислинеа башо адава кобор ов мангела амен, ка манге те иране леске мангипаја (1. Јов. 4:19). Ки акаја статија ка дикха некобор предлогија со ка поможинен туке те кере адава. Исто аѓаар, ка дикха со ка поттикнинел тут те кере акава мангипе, хем саве јавера чувствија ка керел ки туте.b

6. Спрема Римјаните 1:20, кова тано јекх начин сар шај те сикљове башо Јехова?

⁶ Сикљов башо Јехова таро буќа со створинѓа. (Читин Римјаните 1:20; Отк. 4:11.) Размислин башо растенија хем о животне со керѓа лен о Јехова хем сар ола сикавена кај ов тано бут мудро. Сикљов нешто повише башо чудесно начин сар тано створимо тло тело (Пс. 139:14). Хем размислин кобор бари енергија иси ко Кхам, кова тано само јекх таро милијарде черења со створинѓа лен о Девелc (Иса. 40:26). Џикоте размислинеа башо са акава, ка ценине е Јехова са повише. Ама, те шај те ове леа паше амал, нане доволно само те џане кај ов тано мудро хем моќно. Те шај те бајраре тло мангипе спрема о Јехова, ваљани те џане панда нешто баши лесте.

7. Те шај те бајраре тло мангипе спрема о Јехова, ко со ваљани те ове уверимо?

⁷ Ваљани те уверине тут кај о Јехова чаче мангела тут. Дали туке пхаро те верујне кај о Створители со керѓа о небо хем и Пхув тано свесно кај ту постојнеа хем кај грижинела пе туке? Ако тано аѓаар, сетин тут кај о Јехова „нане дур никастар амендар“ (Дела 17:26-28). Ов „испитинела са о виле“, хем ветинела туке кај, „ако родеа ле, ка мукхел те аракхе ле“, баш сар со пхенѓа о Давид пле чхавеске е Соломонеске (1. Лет. 28:9). Уствари, адава со ту акана проучинеа и Библија сикавела кај о Јехова привлечинѓа тут (Ерем. 31:3). Кобор повише хаљовеа со керела о Јехова баши туке, добором повише ка бајрол тло мангипе спрема лесте.

8. Сар шај те сикаве е Јеховаске кај мангеа ле?

⁸ Јекх начин сар шај те сикаве е Јеховаске кај мангеа ле тано аѓаар со ка кере леа лафи ки молитва. Тло мангипе спрема о Девел ка бајрол кеда ка вакере леске со мучинела тут хем кеда ка благодарине леске башо са со керела туке. Џикоте дикхеа сар одговоринела ко тле молитве, тумаро амалипе ка овел са позорало (Пс. 116:1). Ка уверине тут кај ов хаљовела тут. Ама те шај те ове е Јеховаја панда попаше, ваљани те хаљове сар размислинела хем со аџикерела тутар. Ка дознајне адава само ако проучинеа лескоро Лафи, и Библија.

9. Сар шај те сикаве кај ценинеа и Библија?

⁹ Сикљов те ценине е Девлескоро Лафи, и Библија. Само латар шај те џане о чачипе башо Јехова хем баши лескири намера туја. Ка сикаве кај ценинеа ла аѓаар со ка читине ла секова диве, ка спремине тут англедер те авел окова со проучинеа леа хем ка применине адава со сикљовеа (Пс. 119:97, 99; Јован 17:17). Дали иси тут тло распоред башо читибе и Библија секова диве? Дали икереа тут ки лесте?

10. Која тани јекх бути со керела и Библија те овел посебно?

¹⁰ Јекх бути со керела и Библија те овел посебно тани адаја со ки лате иси извештаија башо Исус кола со пишинѓе лен мануша со дикхле ле. Адала тане о единствена точна извештаија кола со објаснинена со керѓа о Исус баши туке. Џикоте сикљовеа башо адава со вакерѓа хем со керѓа о Исус, веројатно ка манге те ове лескоро амал.

11. Со ка поможинел туке панда повише те манге е Јехова?

¹¹ Сикљов башо Исус, хем тло мангипе спрема о Јехова ка бајрол. Соске? Адалеске со о Исус совршено сикавела пле Дадескере особине (Јован 14:9). Спрема адава, кобор повише сикљовеа башо Исус, добором повише ка хаљове хем ка ценине е Јехова. Размислин башо сочувство со сикавѓа о Исус спрема о мануша колен со о јавера дикхена сине потеле пестар адалеске со сине чороле, насвале, хем слаба. Исто аѓаар, размислин башо практична советија со денѓа амен, хем башо адава кобор тло живото овела пошукар кеда шунеа лен (Мат. 5:1-11; 7:24-27).

12. Ко со најверојатно ка поттикнинел тут адава со понадари да ка сикљове башо Исус?

¹² Тло мангипе спрема о Исус најверојатно ка бајрол са повише кеда хор ка размислине баши жртва со денѓа ла те шај те овен простиме амаре гревија (Мат. 20:28). Кеда ка хаљове кај о Исус спремно муло туке, веројатно ка ове поттикнимо те каине тут хем те молине е Јехова те простинел туке (Дела 3:19, 20; 1. Јов. 1:9). А кеда ка почмине те манге е Јехова хем е Исусе, ка манге те ове околенцар со исто аѓаар мангена лен.

13. Со дела тут о Јехова?

¹³ Сикљов те манге околен со мангена е Јехова. Шај тли фамилија или о амала со сине тут англедер нане те хаљовен соске мангеа те де лафи кај ка служине е Јеховаске. Шај чак ка противинен пе туке. О Јехова ка поможинел туке аѓаар со ка дел тут духовно фамилија. Ако ачховеа паше е пхраленцар хем е пхењенцар ко собрание, ола ка ден тут о мангипе хем и поддршка кола со ваљанена туке (Мар. 10:29, 30; Евр. 10:24, 25). Сар со ка накхел о време, шај некој тари тли фамилија ка почминел те служинел е Јеховаске хем ка живинел спрема лескере мерилија (1. Пет. 2:12).

14. Со сикљовеа башо е Јеховаскере мерилија таро 1. Јованово 5:3?

¹⁴ Сикљов те ценине е Јеховаскере мерилија хем те икере тут ки ленде. Англедер те пенџаре е Јехова, шај коркори одлучинеа сине сој шукар а сој лошно, ама акана хаљовеа кај лескере мерилија тане пошукар (Пс. 1:1-3; читин 1. Јованово 5:3). Размислин башо советија кола со и Библија дела лен е роменге, е ромњенге, е родителенге хем е чхавенге (Еф. 5:22 — 6:4). Дали тли фамилија тани побахтали адалеске со шунеа акала советија? Дали уљан пошукар мануш адалеске со шунеа о мудра советија таро Јехова башо адава саве амала ваљани те овен тут? Дали сиан побахтало? (Изр. 13:20; 1. Кор. 15:33). Веројатно тано аѓаар.

15. Со шај те поможинел туке ако на џанеа сар те применине несаво библиско начело?

¹⁵ Понекогаш шај туке пхаро те хаљове сар те применине несаво библиско начело. Адалеске о Јехова преку пли организација дела амен библиска публикацие кола со шај те поможинен аменге те разликујна о исправно таро погрешно (Евр. 5:13, 14). Џикоте читинеа лен хем проучинеа лен, ка дикхе кобор тане практична хем корисна о советија ки ленде, хем веројатно ка манге те ове дело тари е Јеховаскири организација.

16. Сар о Јехова организиринѓа пле слуген?

¹⁶ Сикљов те манге хем те поддржине е Јеховаскере организација. О Јехова организиринѓа пле слуген ко собранија. Поглавари упро са о собранија тано о Исус (Еф. 1:22; 5:23). Ов мукхља јекх тикни група помазиме мурша те организиринен и бути баши која со денѓа заповед те керел пе авдиве. О Исус баши акаја група вакерѓа кај тани „верно хем разборито робо“. Адала пхраља сериозно керена пли одговорност те ден амен духовно храна хем заштита (Мат. 24:45-47). Јекх начин сар о верно робо грижинела пе секоле јекхеске амендар тано аѓаар со чхивѓа способна мурша те служинен сар старешине кола со предводинена хем заштитинена амен (Иса. 32:1, 2; Евр. 13:17; 1. Пет. 5:2, 3). О старешине тане спремна те керен са со шај баши туте, те ден тут и утеха со ваљанела туке хем те поможинен туке те ове панда попаше е Јеховаја. Ама, јекх таро најважна буќа со шај те керен туке тани те поможинен тут те сикаве е јаверен башо Јехова (Еф. 4:11-13).

17. Спрема Римјаните 10:10, 13, 14, соске вакераја е јаверенге башо Јехова?

¹⁷ Поможин е јаверенге те заманген е Јехова. О Исус вакерѓа пле следбениконге те сикавен е јаверен башо Девел (Мат. 28:19, 20). Шај те случинел пе некој те шунел акаја заповед само адалеске со осетинела пе должно. Ама, сар со бајрола тло мангипе спрема о Јехова, ка овен тут о иста чувствија сар со сине е апостолен е Петаре хем е Јоване, кола со вакерѓе: „Амен нашти те на кера лафи башо адава со дикхлем хем шунѓем“ (Дела 4:20). Уствари, иси ли нешто пошукар таро адава те поможине некаске те мангел е Јехова? Замислин туке кобор сине бахтало о проповеднико о Филип кеда поможинѓа е Етиопјанеске те дознајнел о чачипе таро света списија хем те крстинел пе! Ако ту да сар о Филип сиан послушно ки е Исусескири заповед те проповедине, сикавеа кај мангеа те ове е Јеховаскоро сведоко. (Читин Римјаните 10:10, 13, 14.) Слично сар о Етиопјани, ко крајо веројатно ка вакере: „Со чхинавела ман те крстинав ман?“ (Дела 8:36).

18. Со ка дикха ки наредно статија?

¹⁸ Кеда ка одлучине те крстине тут, ка ане и најважно одлука ко тло живото. Адалеске со акава чекори тано бут сериозно, мора шукар те размислине со значинела. Со ваљани те џане башо крстибе? Со ваљани те кере англедер хем откеда ка крстине тут? Акала пучиба ка овен одговориме ки наредно статија.