Сарине шај те поможина е интересентенге те крстинен пе

1-2. Кој шај те поможинел јекхе интересентеске те напредујнел хем те крстинел пе?

„БУТ мангава сине адава со сикљовава сине ко мло библиско курси“, вакерела и Еми која со живинела ко Фиџи. „Џанљум кај адава тано о чачипе ама кеда почминѓум те дружинав ман е пхраленцар хем е пхењенцар адава поможинѓа манге те керав промене хем те крстинав ман“. Акава сикавела амен нешто важно. Јекх интересенти веројатно шај пошукар те напредујнел хем те крстинел пе ако поможинена леске о јавера таро собрание.

² Секова објавители шај те поможинел е интересентенге те овен дело таро собрание (Еф. 4:16). Јекх пионерка со викинела пе Лејлани, која со живинела ко Вануату пхенела: „Јекх изрека вакерела кај ваљани цело гав те шај те бајрарел пе јекхе чхаве. Исто акава важинела кеда керена пе ученикија. Ваљани цело собрание те шај те анел пе некас ко чачипе“. Те шај јекх чхаво те овел зрело мануш леске ваљани те поможинен лескере родителија, јавера ки фамилија, о амала хем о учителија ки школа. Ола керена адава адалеа со охрабринена е чхаве хем сикавена ле важна поуке. Слично аѓаар, о објавителија шај те охрабринен, те ден совет хем шужо пример е интересентенге хем аѓаар ка поможинен ленге те напредујнен хем те крстинен пе (Изр. 15:22).

3. Со сикљовеа таро адава со вакерѓе и Ана, о Давид хем и Лејлани?

³ Соске јекх објавители кова со проучинела е интересентеа ваљани те овел бахтало кеда о јавера ко собрание поможинена е интересентеске? Приметин со вакерѓа и Ана, јекх специјално пионерка тари Молдавија: „Бут тано пхаро само јекх мануш те грижинел пе башо са о потребе е интересентескере кеда почминела те напредујнел духовно“. О Давид, сој тано исто аѓаар специјално пионери ки Молдавија, вакерела: „Бут пути о објавителија вакерена нешто со кхувела е интересентенге ко вило, нешто башо со ме на размислинѓум“. И Лејлани вакерела јавер причина: „Кеда о интересенти осетинела о мангипе хем и грижа со о јавера пхраља хем пхења сикавена леске, адава поможинела леске те хаљол кај ола тане чаче е Девлескоро народо“ (Јован 13:35).

4. Со ка дикха ки акаја статија?

⁴ Ама, шај пучеа тут: „Сар шај ме те поможинав е интересентеске те напредујнел ако ме на проучинава леа?“ Те дикха со шај те кера кеда некој канинела амен те џа леа ко јекх библиско курси хем со шај те кера кеда о интересенти почминела те авел ко состанокија? Исто аѓаар, ка дикха сар шај о старешине те поможинен е интересентеске те напредујнел хем те крстинел пе.

КЕДА ПРИСУСТВУЈНАЈА КО ЈЕКХ БИБЛИСКО КУРСИ

5. Со ваљани те кере кеда сиан канимо те ове присутно ко јекх библиско курси?

⁵ О објавителе со водинела о библиско курси иси ле главно одговорност те поможинел е интересентеске те хаљол е Девлескоро Лафи. Ако о објавители канинела тут те џа леа, тегани ту сар лескоро партнери ки служба ваљани те поможине леске (Проп. 4:9, 10). Ама, со шај конкретно те кере те шај те поможине е објавителе џикоте водинела о библиско курси?

6. Кеда сиан присутно ко јекх библиско курси, сар шај те применине о начело таро Изреки 20:18?

⁶ Спремин тут башо библиско курси. Прво, пуч е објавителе со проучинела е интересентеа те вакерел туке нешто башо интересенти. (Читин Изреки 20:18.) Шај те пуче: „Шај ли те вакере манге нешто башо интересенти? Која тема ка проучинен хем со мангеа те истакнине тари адаја тема? Иси ли нешто со ваљани или на ваљани те керав или те вакерав кеда проучинена? Сар шај те охрабринав е интересенте те напредујнел?“ Џанѓола пе, о објавители нане те вакерел туке приватна информацие башо интересенти, ама адава со ка вакерел ка овел туке корисно. Јекх мисионерка, и Џои, керела лафи башо акала буќа кеда канинела некас те овен присутна кеда ој водинела библиско курси. Ој вакерела: „Акала информацие поможинена околеске сој манцар ки служба те мангел те поможинел е интересентеске хем те размислинел со ка вакерел џикоте проучинаја“.

7. Соске ваљани те спремине тут кеда сиан присутно ко некаскоро библиско курси?

⁷ Ако сиан канимо те ове присутно ко јекх библиско курси, ка овел шукар ако англедер спреминеа тут баши и тема со ка керел пе лафи (Езра 7:10). О Давид, кова со спомнинѓем ле поангле, вакерела: „Ценинава кеда мло партнери сој манцар ки служба спреминела пе башо курси, тегани шај те вакерел нешто сој корисно“. Освен адава, о интересенти веројатно ка приметинел кај солдуј џене сиен шукар спремиме хем адава ка овел леске шукар пример. Чак ако на успејнеа темелно те спремине тут башо материјали, шукар ка овел те одвојне туке време те дикхе о главна мисле тари тема.

8. Сар шај те охрабрине е интересенте тле молитваја?

⁸ И молитва тани јекх важно дело ко јекх библиско курси. Адалеске, ако сиан замолимо те молине тут размислин англедер со ка вакере. Тегани ка џане со те вклучине ко тле молитве (Пс. 141:2). И Хана, тари Јапонија, панда сетинела пе ко молитве јекхе пхењакере со присуствујнѓа ко библиско курси џикоте ој сине интересентка. Ој вакерела: „Приметинѓум кај ој сине бут паше е Јеховаја хем ме да мангљум те овав сар лате. Исто аѓаар, осетинѓум кај мангела ман кеда спомнинѓа мло анав ко молитве“.

9. Спрема Јаков 1:19, сар шај те поможине е објавителеске со водинела о библиско курси?

⁹ Поддржин е објавителе џикоте водинела о библиско курси. И пхен Омамујови, која со служинела сар специјално пионери ки Нигерија, вакерела: „Јекх шукар партнери ки служба шунела шукар џикоте трајнела о библиско курси. Ов дела шукар коментарија ама на керела бут лафи соске хаљола кај ов нане одговорно те водинел о библиско курси“. Тегани, сар шај те џане кеда ваљани нешто те вакере, хем со шај те вакере? (Изр. 25:11). Шун внимателно џикоте о објавители со водинела и студија хем о интересенти керена лафи. (Читин Јаков 1:19.) Тегани ка ове спремно те вакере нешто ко исправно моменти. Џанѓола пе, мора шукар те проценине и ситуација. На пример, нане те кере бут лафи хем те чхинаве е објавителе со водинела о курси џикоте објаснинела нешто или те почмине те кере лафи баши јавер тема. Ама, ако вакереа јекх кратко коментари, деа јекх споредба или пучеа несаво пучибе, шај те поможине те хаљол пе и главно мисла. Понекогаш шај ка мислине кај нане тут више со те додајне баши тема, ама ако пофалинеа е интересенте хем сикавеа леске лично интерес ту поможинеа леске те напредујнел.

10. Сар шај тло искуство те поможинел јекхе интересентеске?

¹⁰ Вакер тло искуство. Ако тано соодветно кратко вакер е интересентеске сар запознајнѓан о чачипе, сар накхавѓан јекх предизвик или сар поможинѓа туке о Јехова ко тло живото (Пс. 78:4, 7). Тло искуство шај те овел баш адава со ваљани те шунел о интересенти. Адава шај те керел лескири вера те овел позорали или те охрабринел ле понадари да те напредујнел хем те крстинел пе. Исто аѓаар, шај те сикавел леске сар те накхавел јекх искушение со иси ле (1. Пет. 5:9). О Габриел, кова со живинела ко Бразил хем акана служинела сар пионери, сетинела пе со поможинѓа леске кеда ов проучинела сине и Библија. Ов вакерела: „Кеда шунава сине о искуствија е пхраленгере, халиљум кај о Јехова џанела саве проблемија иси амен. Хем ако ола шај сине те накхавен лен, тегани шај ме да!“

КЕДА О ИНТЕРЕСЕНТИ АВЕЛА КО СОСТАНОКИЈА

11-12. Соске ваљани љубезно те доџакера е интересенте со авела ко состанокија?

¹¹ Те шај јекх интересенти те крстинел пе, мора редовно те присуствујнел ко состанокија соске адава бут ка користинел леске (Евр. 10:24, 25). Веројатно о објавители со проучинела леа ка канинел ле те авел прво пути ко состанок. Кеда тано присутно сарине амен шај те охрабрина ле понадари да те авел ки дворана. Сар шај те кера адава?

¹² Љубезно доџакер е интересенте (Рим. 15:7). Ако љубезно доџакераја е интересенте ко состанокија ов веројатно ка мангел понадари да те авел ки дворана. Бизо те кере леске те осетинел пе незгодно љубезно поздравин ле хем запознајн ле е јаверенцар. Кер леа лафи соске о објавители со проучинела леа шај панда на ресља или шај тано зафатимо несаве задаченцар ки дворана. Внимателно шун со вакерела о интересенти хем сикав леске лично интерес. Сар шај адава со љубезно ка доџакере ле те поможинел е интересентеске? Те дикха о пример таро Димитри, кова со крстинѓа пе англедер некобор берша хем акана служинела сар слуга-помошнико. Кеда размислинела башо пло прво состанок ов вакерела: „Џикоте аџикерава сине англи дворана, јекх пхрал дикхља кај сине манге незгодно те кхував. Адалеске викинѓа ман заедно те кхува. Бут џене але те поздравинен пе манцар. Сиум сине бут изненадимо. Добором свиџинѓа пе манге со мангљум те овел амен состанокија секова диве. Никогаш на доживинѓум нешто асавко“.

13. Сар шај тло шукар пример те поможинел е интересентеске?

¹³ Ов шукар пример. Тло шукар пример шај те поможинел е интересентеске те уверинел пе кај аракхља о чачипе (Мат. 5:16). О Виталиј, кова со служинела сар пионери ки Молдавија, вакерела: „Дикхљум сар о јавера ко собрание живинена, сар размислинена хем сар понашинена пе. Адава уверинѓа ман кај е Јеховаскере сведокија служинена е Девлеске ко исправно начин“.

14. Сар шај тло пример те поможинел некаске те напредујнел?

¹⁴ Те шај те крстинел пе, о интересенти ваљани те применинел ко пло живото адава со сикљола. Адава нане секогаш локхо. Кеда о интересенти ка дикхел кобор користинела туке адава со применинеа о библиска начелија ов ка мангел те џал пало тло пример (1. Кор. 11:1). Те дикха о пример тари Хана, со спомнинѓем ла англедер. Ој вакерела: „О пхраља хем о пхења сине манге пример соске керена сине о буќа коленге со сикљовава сине. Дикхљум сар шај те охрабринав, те простинав хем сар шај те сикавав мангипе. Ола секогаш керена сине лафи позитивно башо јавера. Мангљум те џав пало ленгоро пример“.

15. Кеда керела пе лафи башо интересенти, сар шај те применина о стихо таро Изреки 27:17?

¹⁵ Ов амал е интересентеа. Кеда о интересенти редовно авела ко состанокија сикав леске лично интерес хем трудин тут пошукар те запознајне ле (Фил. 2:4). Шај те вакере леске кобор сиан бахтало кеда дикхеа о промене со керела лен. Исто аѓаар, шај те пуче ле башо лескоро библиско курси, баши лескири фамилија или лескири бути. Акала разговорија шај те керен тумен те овен попаше. Ама, пазин те на пуче бут лична пучиба коленцар со ка чхиве ле ки незгодно ситуација. Кеда овеа лескоро амал ту поможинеа леске те напредујнел хем те крстинел пе. (Читин Изреки 27:17.) И Хана акана служинела сар општо пионери. Ој сетинела пе кеда почминѓа те џал ко состанокија хем вакерела: „Кеда керѓум манге амала ко собрание едвај аџикерава сине те џав ко состанокија, чак сиум сине присутно кеда сиум сине уморно. Уживинава сине те дружинав ман мле неве амаленцар хем адава поможинѓа манге те чхинавав о амалипе околенцар со на служинена сине е Јеховаске. Мангљум те овав попаше е Јеховаја, е пхраленцар хем е пхењенцар, хем адалеске одлучинѓум те крстинав ман“.

16. Со ваљани јавер те кере те шај те поможине е интересентеске те осетинел пе шукар ко собрание?

¹⁶ Џикоте о интересенти напредујнела хем керела промене, поможин леске те осетинел пе сар дело таро собрание. Адава шај кереа ле аѓаар со ка ове гостопримливо (Евр. 13:2). О Денис, кова со служинела ки Молдавија, сетинела пе кеда сине интересенти хем вакерела: „Некобор пути ми ромни хем ме сием сине каниме те дружина амен е пхраленцар. Вакерена сине аменге сар о Јехова поможинѓа ленге хем адава охрабринѓа амен. Акала прилике уверинѓе амен кај мангаја те служина е Јеховаске хем кај ки иднина аџикерела амен јекх бут шужо нево живото“. Кеда о интересенти овела објавители ту шај те канине ле те џа леа ки служба. О Диего, јекх објавители таро Бразил, вакерела: „Бут пхраља викинена ман сине те џав ленцар ки служба. Адава сине најшукар начин те запознајнав лен пошукар. Аѓаар шај сине повише те сикљовав хем уљум панда попаше е Јеховаја хем е Исусеа“.

САР ШАЈ О СТАРЕШИНЕ ТЕ ПОМОЖИНЕН?

17. Сар шај о старешине те поможинен е интересентенге?

¹⁷ Одвојн време башо интересентија. Тумен о старешине шај те поможинен е интересентенге те напредујнен хем те крстинен пе кеда сикавена ленге искрено интерес. Шај ли редовно те кере е интересентенцар лафи ко состанокија? Ола ка приметинен кај грижинеа тут ленге ако сетинеа тут ко ленгоро анав, посебно кеда почминена те коментиринен. Шај ли те одвојне туке време те џа јекхе објавителеа ки служба кеда проучинела јекхе интересентеа? Ту шај те поможине е интересентеске повише него со мислинеа. И Џеки, јекх пионерка која со живинела ки Нигерија, вакерела: „Бут пхраља тане изненадиме кеда дознајнена кај о пхрал сој тано манцар ки студија тано старешина. Јекх интересенти вакерѓа: ’Мло свештенико никогаш на би керела сине адава. Ов џала само ко барвале хем само ако платинена ле‘“. Акава интересенти акана авела ко состанокија.

18. Сар шај о старешине те исполнинен пли одговорност сој ленге денди спрема Дела 20:28?

¹⁸ Обучин хем охрабрин е објавителен со водинена библиско курси. Тумен о старешине иси тумен важно одговорност те поможинен е објавителенге те овен шукар проповедникија хем учителија. (Читин Дела 20:28.) Ако некој лаџала те водинел о библиско курси џикоте сиан ту присутно, тегани нудин ту те водине. И Џеки, сој спомними поангле, вакерела: „О старешине често пучена ман сине башо мле интересентија. Кеда соочинава ман несаве предизвиконцар џикоте водинава о библиско курси, ола дена ман корисна советија“. О старешине шај бут те охрабринен хем те мотивиринен е објавителен со водинена библиска курсија (1. Сол. 5:11). И Џеки, исто аѓаар вакерела: „Ценинава кеда о старешине охрабринена ман хем вакерена манге кај ценинена адава со дава са мандар ки служба. Акала лафија освежинена ман сар јекх чаша шудро пани ко јекх тато диве. Ленгере љубезна лафија поможинена манге те бајрарав мли доверба ки манде хем те овав бахтали џикоте поможинава е интересентенге“ (Изр. 25:25).

19. Соске сарине амен шај те ова бахтале?

¹⁹ Иако шај ко моменти на водинаја библиско курси, амен шај те поможина некаске те напредујнел духовно. Бизо те кера бут лафи, амен шај амаре шукар спремиме коментаренцар те поддржина е објавителе џикоте водинела о библиско курси. Амен шај те ова амала е интересентенцар кеда авена ки дворана хем те ова ленге шукар пример. О старешине ка охрабринен е интересентен аѓаар со ка одвојнен ленге време. Исто аѓаар, о старешине ка охрабринен е објавителен со проучинена е интересентенцар аѓаар со ка обучинен лен хем ка пофалинен лен. Амен сием бут бахтале кеда шај нешто те кера, чак ако адава тано хари, те шај те поможина некаске те мангел е Јехова хем те служинел леске.