Пучиба таро читателија

Со значинела и заповед тари 3. Мојсеева 19:16 коте со пишинела „Ма ушти против о живото“ јавере манушескоро, хем сави поука шај те сикљова латар?

О Јехова вакерѓа е Израелцонге те овен света. Те шај те поможинел лен ко адава, ов вакерѓа ленге: „Ма ширин клевете машкар тло народо. Ма ушти против о живото тле пашутнескоро. Ме сиум о Јехова“ (3. Мој. 19:2, 16).

Со значинена о лафија „ма ушти против“ кова сој превод таро јекх хебрејско израз? Јекх изучувачи баши хебрејско чхиб башо акава стихо вакерела: „Акава дело таро стихо тано пхаро те хаљовел пе соске на џанела пе точно со значинела акава хебрејско израз, кова со дословно значинела ’ма ушти паше, ма ачхов узо‘“.

Несаве изучувачија мислинена кај акава израз тано поврзимо е 15 стихоја, коте со пишинела: „На смејнена те судинен неправедно. Ма ов пристрасно спрема о чороло хем ма де предност е барвалеске. Судин праведно те пашутнеске“ (3. Мој. 19:15). Ко акава случај, некој шај те мислинел кај и заповед сој пишими ко 16 стихо, те на уштел пе против о рат несаве манушескоро, би значинела сине кај о Израелција на ваљани сине те постапинен неправедно ко судска случаија, ки бути хем ки фамилија. Освен адава, на ваљани сине те керен нешто со нане поштено баши пли лично корист. Точно тано кај на ваљани те кера акала буќа, ама иси пологично објаснување башо адава со значинена о лафија таро 16 стихо.

Размислин башо прво дело таро адава стихо. О Девел заповединѓа пле народоске те на ширинел клевете. Точно тано кај кеда оговоринаја е јаверен адава шај те анел џи ко проблемија, ама ако некој клеветинела некас адава тано бут посериозно (Изр. 10:19; Проп. 10:12-14; 1. Тим. 5:11-15; Јак. 3:6). Окова со клеветинела обично намерно вакерела ховавне буќа некаске те шај те каљарел некаскоро анав. Асавко мануш обично ховавела кеда сведочинела против некасте, чак ако адалеа о јавер добинела казна те мерел. Сетин тут кај несаве клеветникија вакерѓе ховајба против о Навутеј хем адалеске сине неправедно каменујмо (1. Цар. 21:8-13). Спрема адава, сар со читинаја ко дујто дело тари 3. Мојсеева 19:16, о клеветнико шај те уштел против о рат пле пашутнескоро ако ов тано криво башо лескоро мерибе.

Освен адава, некој шај те клеветинел некас само адалеске со мрзинела ле. Ко 1. Јованово 3:15 пишинела: „Секој со мрзинела пле пхрале тано убијцо, а тумен џанена кај нијекх убијцо нане те добинел о вечно живото“. Приметин кај откеда о Девел вакерѓа о лафија сој пишиме ко 16 стихо, ов исто аѓаар вакерѓа: „Ма мрзин тле пхрале ко тло вило“ (3. Мој. 19:17).

Значи, ки необично заповед сој пишими ки 3. Мојсеева 19:16 иси силно предупредување е христијаненге. На смејнаја негативно те дикха ко јавера, а ни те клеветина лен. Ако уштаја против о живото амаре пашутнескоро, јавере лафенцар ако клеветинаја некас адалеске со на свиџинела пе аменге или сием леске љубоморна, тегани адава шај те сикавел кај мрзинаја ле. О христијања на смејнена те мрзинен некас! (Матеј 12:36, 37).