Дали иси тут доверба кај о Јехова секогаш керела адава сој исправно?

1-2. а) Соске авдиве буте џененге тано пхаро те сикавен доверба спрема окола со иси лен авторитети? б) Со ка дикха ки акаја статија?

АВДИВЕ буте џененге тано пхаро те сикавен доверба спрема окола со иси лен несаво авторитети. Ола бут пути дикхена сар о владе хем о законија заштитинена е барвален хем околен со иси лен моќ, а тари јавер страна тане неправедна спрема о чороле. И Библија јасно вакерела: „О мануш владинела упро мануш ки лескири штета“ (Проп. 8:9). Исто аѓаар, бут религиозна водачија керена лошна буќа хем адава керѓа бут мануша те нашавен пумари доверба ко Девел. Адалеске кеда проучинаја и Библија некасаја, ваљани те поможина леске те овел ле доверба ко Јехова хем ко пхраља касте со чхивѓа те предводинен.

² Џанѓола пе, на ваљани само интересентија те сикљовен те овел лен доверба ко Јехова хем ки лескири организација. Чак окола со бершенцар тане ко чачипе на смејнена те бистрен кај е Јеховаскоро начин сар керела о буќа тано секогаш најшукар. Понекогаш случинела пе нешто со шај те чхивел ко испит амари доверба ко Јехова. Ки акаја статија ка кера лафи башо трин подрачја коте со шај те овел испитими амари доверба: 1) кеда читинаја несаве библиска извештаија, 2) кеда добинаја упатствија тари е Јеховаскири организација хем 3) кеда ка овен амен испитија ки иднина.

НЕКА ОВЕЛ ТУТ ДОВЕРБА КО ЈЕХОВА ЏИКОТЕ ЧИТИНЕА И БИБЛИЈА

3. Сар шај несаве библиска извештаија те чхивен ко испит амари доверба ко Јехова?

³ Кеда читинаја е Девлескоро Лафи шај пучаја амен соске о Јехова постапинѓа несаве манушенцар аѓаар хем соске анѓа несаве одлуке. На пример, ки 4. Мојсеева читинаја кај о Јехова казнинѓа јекхе Израелцо мерибаја адалеске со кхединѓа кашта ко сабат. А ки 2. Самоилова читинаја кај веконцар покасно о Јехова простинѓа е цареске, е Давидеске, иако керѓа прељуба хем нарединѓа те овел мудардо јекх мануш (4. Мој. 15:32, 35; 2. Сам. 12:9, 13). Шај пучаја амен: „Соске о Јехова простинѓа е Давидеске иако мударѓа хем керѓа прељуба а казнинѓа јавере мануше мерибаја башо нешто со дикхјола сар потикно грево?“ Те шај те одговорина ко акава пучибе, те дикха трин буќа кола со на ваљани те бистра лен кеда читинаја и Библија.

4. Сар о стихија тари 1. Мојсеева 18:20, 21 хем 5. Мојсеева 10:17 бајрарена амари доверба ко е Јеховаскере одлуке?

⁴ Ки Библија на пишинела секогаш са о деталија башо јекх извештај. На пример, џанаја кај о Давид искрено каинѓа пе башо пле постапке (Пс. 51:2-4). Ама, сави личност сине о мануш кова со на икерѓа пе ко закони башо сабат? Дали сине леске жал башо адава со керѓа? Дали англедер да на шунѓа е Јеховаскере законија? Дали на мангља те шунел па чак отфрлинѓа несаве советија англедер да? И Библија на вакерела ништо башо адава. Ама, шај те ова сигурна ки јекх бути: О Јехова „никогаш нане неправедно“ (5. Мој. 32:4). Обично о мануша анена одлуке спрема адава со вакерена о јавера, спрема предрасуде или спрема било со јавер, хем адалеске бут пути анена погрешна одлуке. Ама о Јехова анела одлуке аѓаар со лела ко предвид са о буќа. (Читин 1. Мојсеева 18:20, 21; 5. Мојсеева 10:17.) Со повише сикљоваја башо Јехова хем башо лескере мерилија, добором повише ка бајрол амари доверба ко лескере одлуке. Чак ако несаво библиско извештај нане аменге јасно авдиве, амен џанаја доволно шукар амаре Девле те шај те ова сигурна кај ов „тано праведно ко са пле друмија“ (Пс. 145:17).

5. Сар амари несовршеност влијајнела упро адава сар дикхаја ки правда? (Дикх хем и рамка „Амари несовршеност керела те на дикха јасно ки правда“.)

⁵ Амари несовршеност влијајнела упро адава сар дикхаја ки правда. О Девел керѓа амен спрема пло лико, адалеске очекујнаја о јавера те постапинен праведно аменцар хем е јаверенцар (1. Мој. 1:26). Ама, адалеске со сием несовршена шај погрешно те дикха ко буќа чак кеда мислинаја кај џанаја са о информацие. На пример, сетин тут кобор сине разочаримо о Јона кеда о Јехова сикавѓа милост е манушенге тари Ниневија (Јона 3:10-4:1). Ама размислин со случинѓа пе адалеске со о Јехова сикавѓа ленге милост. Повише таро 120.000 Ниневијција кола со каинѓе пе сине спасиме. Спрема адава, о Јона сине адава со погрешно проценинѓа е манушен, а на о Јехова.

6. Соске о Јехова нане дужно те објаснинел аменге пле одлуке?

⁶ О Јехова нане дужно те објаснинел е манушенге соске анела несаве одлуке. Точно тано адава кај о Јехова англедер дозволинѓа пле слугенге те вакерен пло мислење башо несаве одлуке со анѓа лен или со мангела сине те анел лен (1. Мој. 18:25; Јона 4:2, 3). Понекогаш чак објаснинѓа соске анѓа несаве одлуке (Јона 4:10, 11). Сепак, о Јехова нане дужно те објаснинел аменге таро кола причине керела несаве буќа. Адалеске сој тано амаро Створители, на ваљани леске амари дозвола — ни англедер те анел несави одлука а ни пало адава (Иса. 40:13, 14; 55:9).

НЕКА ОВЕЛ ТУТ ДОВЕРБА КО ЈЕХОВА КЕДА ДОБИНЕА УПАТСТВО

7. Со шај те овел аменге пхаро те кера, хем соске?

⁷ Сарине амен сием целосно увериме кај о Јехова секогаш керела адава сој исправно. Ама, понекогаш шај те овел аменге пхаро те овел амен доверба ко мануша касте со ов мукхља те предводинен. Шај пучаја амен дали о пхраља со иси лен несаво авторитети ки е Јеховаскири организација чаче постапинена спрема е Јеховаскере упатствија, или керена ола сар со мислинена? Шај аѓаар мислинена песке сине несаве со живинѓе ко пурано време. Размислин башо примерија со спомнинѓем лен ко трито пасус. Шај некој тари фамилија е манушескири со на икерѓа о сабат пучела пе сине дали чаче о Мојсеј пучља е Јехова англедер те анел и казна те овел мудардо. Хем шај несаво амал е Уријаскоро, каскири со ромни керѓа прељуба е Давидеа, мислинѓа песке кај о Давид користинѓа пло авторитети сар цари те шај те избегинел и казна која со заслужинела ла сине. Ама е Јехова иси ле доверба ко мануша касте со ов чхивѓа те предводинен ки лескири организација хем ко собрание. Адалеске, ако нане амен доверба ко пхраља со предводинена нашти те вакера кај иси амен доверба ко Јехова.

8. Сави сличност иси машкар адава со пишинела ко Дела 16:4, 5 хем о начин сар тано организиримо авдиве о собрание?

⁸ Авдиве о Јехова водинела пли организација сој ки Пхув преку „о верно хем разборито робо“ (Мат. 24:45). Слично сар о водечко тело ко прво веко, о робо надглединела е Девлескере народо ко цело свето хем дела упатствија е старешиненге. (Читин Дела 16:4, 5.) А о старешине, трудинена пе те применинен адала упатствија ко собранија. Амен сикаваја кај иси амен доверба ко е Јеховаскоро водство аѓаар со шунаја о упатствија кола со добинаја лен преку и организација хем о старешине.

9. Кеда шај те овел аменге пхаро те поддржина несави одлука е старешиненгири, хем соске?

⁹ Понекогаш шај те овел аменге пхаро те поддржина несаве одлуке со анена о старешине. На пример, ко последна берша ко бут собранија хем покраине сине керде несаве промене. Ко несаве случаија о старешине замолинѓе е објавителен те џан ко јавер собрание те шај најшукар те користинен пе о тхана бешибаске ко амаре дворане. Ако сиан замолимо те џа ко јавер собрание, шај ка овел туке пхаро те мукхе тле амален хем тле фамилија. Дали о Јехова директно вакерела е старешиненге коте те чхивен секоле јекхе објавителе? На. Хем баш адалеске шај те овел аменге пхаро те шуна о упатство со добинаја ле. Ама ма те бистра кај е Јехова иси ле доверба ко е старешиненгере одлуке хем аменде да ваљани те овел амен доверба ки ленде.b

10. Спрема Евреите 13:17, соске ваљани те поддржина е старешинен?

¹⁰ Соске ваљани те соработина е старешиненцар хем те поддржина ленгере одлуке, чак кеда на сием баш задоволна таро адала одлуке? Кеда кераја адава поможинаја те икера о јекхипе машкар е Девлескоро народо (Еф. 4:2, 3). О собранија напредујнена кеда сарине понизно прифатинена о одлуке кола со о старешинство анела лен. (Читин Евреите 13:17.) А сој најважно, кеда поддржинаја околен касте со о Јехова чхивѓа те грижинен пе аменге, тегани сикаваја кај иси амен доверба ки лесте (Дела 20:28).

11. Со шај те поможинел аменге те бајрара амари доверба ко упатствија со добинаја лен таро старешине?

¹¹ Шај те бајрара амари доверба ко упатствија со добинаја лен таро старешине ако на бистраја кај ола молинена пе башо свети дух кеда ваљани те анен одлуке кола со ка влијајнен упро собрание. Исто аѓаар, шукар истражинена библиска начелија хем слединена упатствија кола со дела лен е Јеховаскири организација. Ола чаче мангена те керен е Јеховаскири волја хем те грижинен пе најшукар со шај лескере народоске. Акала верна мурша тане свесна кај тане одговорна англо Девел башо начин сар керена пле задаче (1. Пет. 5:2, 3). Размислин башо акава. Иако живинаја ко свето кова сој поделимо баши раса, религија хем политика, е Јеховаскоро народо обожавинела е јекхе чачутне Девле заедно хем ко мир. Акава шај те овел само адалеске со о Јехова дела берекети пле организацијаке!

12. Башо кола буќа ваљани шукар те размислинен о старешине кеда мангена те откринен дали некој каинела пе?

¹² О Јехова денѓа е старешиненге и важно одговорност те икерен о собрание чисто. Ако јекх објавители керела сериозно грево, тегани о Јехова очекујнела таро старешине те одлучинен дали шај адава објавители ка ачхол ко собрание или на. Машкар о бут буќа со ваљани те дикхен, ваљани исто аѓаар те откринен дали леске чаче жал башо адава со керѓа. Ов шај те вакерел кај каинела пе, ама дали чаче мрзинела адава со керѓа? Дали тано одлучно те на керел више адава грево? Ако керѓа адава грево адалеске со иси ле лошно друштво, дали тано спремно те чхинавел те дружинел пе ленцар? О старешине молинена пе, дикхена о доказија хем адава со вакерела и Библија, хем дикхена саво стави иси е објавителе башо адава со случинѓа пе. Пало адава, ола одлучинена дали шај те ачховел ко собрание или на. Ко несаве случаија мора те овел исклучимо (1. Кор. 5:11-13).

13. Саве мисле шај те авен аменге ки годи ако несаво амаро амал или некој тари амари фамилија тано исклучимо?

¹³ Сар шај те овел испитими амари доверба ко старешине? Ако исклучинена некас со нане аменге паше амал или фамилија, шај те овел аменге локхо те прифатина ленгири одлука. Ама со ако исклучинена некас сој аменге паше? Шај те мислина аменге кај о старешине на џанена са о информацие башо адава случај, или шај пучаја амен дали акаја одлука со анѓе ла тани исто аѓаар е Јеховаскири да одлука. Со шај те поможинел аменге те овел амен о исправно стави баши адаја одлука?

14. Со шај те поможинел аменге ако о старешине одлучинѓе кај некој таро амаре амала или фамилија ваљани те овел исклучимо?

¹⁴ На ваљани те бистра кај о исклучибе тано јекх начин сар о Јехова воспитинела амен хем кај адава тано шукар хем е собраниескоро хем околеске со грешинѓа. Ако некој со грешинѓа на каинела пе хем ачховела ко собрание, тегани ов шај лошно те влијајнел упро јавера (Гал. 5:9). Исто аѓаар, ов шај нане те хаљовел кобор сериозно грево керѓа хем шај нане те мислинел кај ваљани те менинел пло стави хем постапке те шај о Јехова палем те дикхел ки лесте шукар (Проп. 8:11). Шај те ова сигурна кај о старешине дикхена бут сериозно ки пли одговорност кеда одлучинена дали некој ваљани те овел исклучимо или на. Слично сар о судие таро пурано Израел, ола тане свесна кај „на судинена ко анав несаве манушескоро, него ко анав е Јеховаскоро“ (2. Лет. 19:6, 7).

АДАВА СО АКАНА ИСИ АМЕН ДОВЕРБА КО ЈЕХОВА СПРЕМИНЕЛА АМЕН БАШИ ИДНИНА

15. Соске тано важно панда акана те овел амен доверба ко е Јеховаскоро водство?

¹⁵ Сар аваја са попаше ко крајо акале светоскоро, ваљани те овел амен доверба ко е Јеховаскоро водство сар никогаш англедер. Соске? Ки бари неволја шај те добина упатствија кола со шај те овен аменге чудна или нелогична. Џанаја кај о Јехова нане лично те керел аменцар лафи. Веројатно ка дел амен упатствија преку о пхраља колен со чхивѓа те предводинен. Тегани ни хари на ваљани те сумнина амен ко упатствија или те пуча амен: „Дали акава упатство чаче авела таро Јехова, или тано лично мислење е пхраленгоро кола со предводинена?“ Дали ка овел тут доверба ко Јехова хем ки лескири организација ко адава бут важно време? О одговор шај те дознајне ле ако размислинеа сар дикхеа акана ко упатствија со добинаја лен. Ако иси тут доверба ко упатствија авдиве хем спремно прифатинеа лен, веројатно ка кере о исто ки бари неволја (Лука 16:10).

16. Сар шај панда хари те овел чхивди ко испит амари доверба ко е Јеховаскере осуде?

¹⁶ Иси панда јекх јавер бути баши која со ваљани шукар те размислина — сар ка реагирина ки е Јеховаскири осуда ко крајо таро акава лошно свето. Амен панда надинаја амен кај бут џене со на служинена е Јеховаске, машкар кола сој несаве тари амари фамилија, ка почминен те прифатинен о чачипе англедер те авел о крајо. Ама ко Армагедон, о Јехова, преку о Исус, ка анел и конечно одлука баши ленгири иднина (Мат. 25:31-33; 2. Сол. 1:7-9). Нане амен те одлучина каске о Јехова ка сикавел милост а каске на (Мат. 25:34, 41, 46). Дали ка овел амен доверба ко е Јеховаскере осуде, или ка чхинава те служина леске адалеске со на сложинаја амен лескере одлукенцар? Јасно тано кај панда акана ваљани те бајрара амари доверба ко Јехова те шај ки иднина те овел амен целосно доверба ки лесте.

17. Сави корист ка овел амен таро е Јеховаскере осуде ко крајо таро акава свето?

¹⁷ Замислин туке сар ка осетина амен ко е Девлескоро нево свето кеда ка дикха о резултатија таро е Јеховаскере осуде. Нане више те постојнен и ховавни религија, о алчно трговско систем ни о политичко систем кова со веконцар малтретиринѓа е народон хем мучинѓа лен. О насвалипе, о пхурипе хем о мерибе нане више те овен дело таро амаро живото. О Сатана хем о демонија ка овен пханле милја берша. О последице тари ленгири побуна нане те постојнен више (Отк. 20:2, 3). Кобор ка ова само благодарна со сине амен доверба ко е Јеховаскере одлуке!

18. Со сикљоваја таро е Израелцонгоро пример? (4. Мојсеева 11:4-6; 21:5).

¹⁸ Дали о живото ко нево свето шај те овел аменге пхаро хем аѓаар те чхивел ко испит амари доверба ко е Јеховаскоро начин сар керела о буќа? На пример, размислин со случинѓа пе кратко откеда о Израелција сине ослободиме таро Египет. Несаве почминѓе те жалинен пе соске фалинела ленге сине о хајбе со сине адари, а и мана со дела лен сине о Девел на ценинѓе ла. (Читин 4. Мојсеева 11:4-6; 21:5.) Шај ли аменге да те појавинен пе слична мисле одкеда ка завршинел и бари неволја? На џанаја кобор бути аџикерела амен те шај те чистина и Пхув хем хари по хари те кера ла ко рај. Веројатно ка овел амен бут бути хем шај ко почеток о живото нане те овел локхо. Дали ка жалина амен башо буќа кола со о Јехова ка дел амен тегани? Јекх бути тани сигурно: Ако акана ценинаја о буќа со дела амен о Јехова, побари тани и веројатност кај тегани да ка ценина о буќа кола со ка дел амен.

19. Кола тане о главна мисле тари акаја статија?

¹⁹ Ваљани те ова увериме кај о Јехова секогаш постапинела ко исправно начин. Исто аѓаар, ваљани те овел амен доверба околенде каске со о Јехова денѓа одговорностија. Никогаш ма те бистра е Јеховаскере лафија кола со вакерѓа лен преку пло пророко о Исаија: „Ачховен смириме хем сикавен доверба, адава ка овел тумари сила“ (Иса. 30:15).