СТАТИЈА ПРОУЧИБАСКЕ 20

О лил Откровение — со значинела е Девлескере душманенге

Кхединѓе лен ко тхан кова со ко хебрејски викинела пе Армагедон (ОТК. 16:16)

ГИЛИ 150 О Јехова тано амаро Спасители

БАШО СО КА КЕРА ЛАФИa

1. Со вакерела о лил Откровение башо е Девлескоро народо ки пхув?

КО ЛИЛ Откровение дознајнаја кај е Девлескоро Царство владинела хем кај о Сатана сине фрдимо таро небо (Отк. 12:1-9). Адава значинѓа мир околенге сој ко небо, ама анѓа проблемија аменге со сием акате ки пхув. Соске? Адалеске со о Сатана тано хољамо хем нападинела е Јеховаскере слуген акате ки пхув (Отк. 12:12, 15, 17).

2. Со ка поможинел аменге те ачхова верна?

² Сар шај те ачхова верна иако о Сатана нападинела амен? (Отк. 13:10). Јекх бути со ка поможинел аменге тани ако џанаја со ка случинел пе ки иднина. На пример, ко Откровение о апостол Јован опишинела несаве таро берекетија коленде со панда хари ка уживина. Јекх таро адала берекетија тано кај е Девлескере душмања ка овен уништиме. Те дикха акана сар о Откровение опишинела акале душманен хем со ка случинел пе ленцар.

Е ДЕВЛЕСКЕРЕ ДУШМАЊА ОПИШИМЕ „КО ЗНАКИЈА“

Табела која со сикавела сар о змеј дела сила е ѕверонге сој спомниме ко лила Даниел хем Откровение. О штар баре ѕверија таро Даниел 7 поглавје икљона таро манушикано море хем тане поврзиме е ѕвероја е ефта шеренцар кова со исто аѓаар икљола таро манушикано море. О ефтато шеро таро ѕверо е ефта шеренцар тано поврзимо е ѕвероја е дује шингенцар, кова со тано поврзимо е лоле ѕвероја упри колесте со бешела јекх блудница. О змеј, о ѕверо е дује шингенцар хем о лоло ѕверо ка овен фрдиме ко езеро тари јаг. Акала слике тане објасниме ко 4, 6, 9, 10 хем 19 пасус тари акаја статија.

3. Кола тане несаве таро знакија сој спомниме ко лил Откровение?

³ Панда таро прво стихо о лил Откровение вакерела аменге кај о информацие со ка читина лен тане денде „ко знакија“, јавере лафенцар ки симболично чхиб (Отк. 1:1). Е Девлескере душмања тане симболично опишиме, сар некобор дива ѕверија. На пример, иси јекх „ѕверо кова со икљола таро море“ ле иси ле „деш шинга хем ефта шере“ (Отк. 13:1). Пали лесте иси панда јекх јавер „ѕверо кова со икљола тари пхув“. Акава ѕверо керела лафи сар змеј хем „мукхела јаг таро небо“ (Отк. 13:11-13). Пало адава дикхаја јекх јавер „лоло ѕверо“ упри колесте со бешела јекх блудница. Акала трин ѕверија претставинена е душманен кола со веконцар боринена пе против о Јехова хем лескоро Царство. Адалеске тано бут важно те џана кој тане ола (Отк. 17:1, 3).

О штар баре ѕверија таро Даниел 7 поглавје, икљона таро манушикано море. О прво ѕверо тано сар лафи коле со иси орлоскере пака. О дујто тано сар мечка хем иси ле ребре ко муј. О трито тано сар леопарди хем иси ле штар пака хем штар шере. О штарто тано бут силно ѕверо хем иси ле састрнале данда хем деш шинга. — **ШТАР БАРЕ ЅВЕРИЈА**

Ола икљона „таро море“ (Дан. 7:1-8, 15-17). Ола претставинена о светска силе кола со почминдор таро е Даниелескоро време влијајнѓе упро е Девлескоро народо. (Дикх ко пасусија 4, 7)

4-5. Сар адава сој пишимо ко Даниел 7:15-17, поможинела аменге те хаљова со значинена акала симболија?

⁴ Те шај те дознајна кој тане акала душмања ваљани те хаљова кас претставинена о ѕверија хем и блудница. Најшукар начин сар шај те открина адава тано те дозволина и Библија те објаснинел аменге. Бут таро симболија со аракхљовена ко Откровение тане објасниме ко јавера лила тари Библија. На пример, о пророко о Даниел дикхља ко суно „штар баре ѕверија сар икљона таро море“ (Дан. 7:1-3). О Даниел вакерела аменге со претставинена ола. Акала баре ѕверија претставинена штаре „царен“ или владен. (Читин Даниел 7:15-17.) Акава објаснување поможинела аменге те хаљова кај хем о ѕверија сој опишиме ко Откровение исто аѓаар претставинена владен.

⁵ Те дикха акана несаве таро симболија сој опишиме ко Откровение. Џикоте кераја адава ка дикха сар и Библија поможинела аменге те хаљова со значинена акала симболија. Ка почмина е ѕверонцар хем ка дикха кас претставинена ола. Пало адава, ка дикха со ка случинел пе акале ѕверонцар. Ко крајо ка кера лафи башо адава со значинена акала настанија аменге.

КОЈ ТАНЕ Е ДЕВЛЕСКЕРЕ ДУШМАЊА

О ѕверо е ефта шеренцар таро Откровение икљола таро манушикано море. Иси ле деш шинга хем деш круне ко лескере шере хем личинела сар леопарди, иси ле пре сар мечкакере хем сар лавескоро муј. — **О ЅВЕРО ЕФТА ШЕРЕНЦАР**

Ов икљола „таро море“ хем иси ле ефта шере, деш шинга хем деш круне (Отк. 13:1-4). Претставинела са е политичка силен кола со џи акана владинѓе. О ефта шере претставинена ефта светска силе кола со владинѓе упро е Девлескоро народо. (Дикх ко пасусија 6-8)

6. Кас претставинела о ѕверо е ефта шеренцар кова сој спомнимо ко Откровение 13:1-4?

⁶ Кас претставинела о ѕверо ефта шеренцар? (Читин Откровение 13:1-4.) Акате приметинаја кај акава ѕверо личинела сар леопарди ама иси ле сар мечкакере пре, сар лавескоро муј хем иси ле деш шинга. О штар ѕверија сој тане спомниме ко ефтато поглавје таро лил Даниел, исто аѓаар иси лен акала карактеристике. Ама, ко лил Откровение акала карактеристике аракхљона ко јекх ѕверо, а на ко штар посебна ѕверија. Акава ѕверо на претставинела само јекхе влада или светско сила. Баши лесте тано вакердо кај владинела упро „секова племе хем народо хем чхиб хем нација“. Значи ов мора те претставинел нешто побаро тари било која јавер посебно влада (Отк. 13:7). Акава ѕверо сигурно претставинела са е политичка силен кола со владинѓе е манушенцар ки цело историја џи аканаb (Проп. 8:9).

7. Со претставинела секова јекх таро ефта шере?

⁷ Со претставинела секова јекх таро ефта шере акале ѕвероскере? О 17 поглавје таро Откровение поможинела аменге те открина о одговор соске ки лесте тано опишимо о кипи е ѕвероскоро кова сој спомнимо ко 13 поглавје. Ко Откровение 17:10 читинаја: „Ола тане ефта царија: панџ лендар пеле, јекх владинела, а о јавер панда на ало, ама кеда ка авел ка ачховел само кратко време“. Таро са о политичка силе колен со о Сатана користинѓа, ефта лендар тане споредиме „шеренцар“ соске иси лен бари моќ. Акала тане о светска силе колен со сине лен баро влијание упро е Девлескоро народо. Џи ко време е апостол Јованескоро, панџ лендар више владинѓе: О Египет, и Асирија, о Вавилон, и Медо-Персија хем и Грција. И шовто светско сила о Рим панда владинела сине џикоте о Јован добинѓа о визие таро Откровение. Која влада ваљани сине те овел о ефтато шеро, јавере лафенцар и последно светско сила?

8. Кас претставинела о ефтато шеро таро ѕверо?

⁸ Сар со ка дикха, о пророштвија таро Даниел поможинена аменге те открина кој тано о ефтато или о последно шеро таро ѕверо. Која светско сила владинела ко последна диве, јавере лафенцар ко е „Господарескоро диве“? (Отк. 1:10). И Англо–Американско светско сила. Ки акаја светско сила соработинена дуј моќна владе, и Велика Британија хем о Соединетите Американски Држави. Адалеске шај те вакера кај ој тани о ефтато шеро таро ѕверо сој спомнимо ко Откровение 13:1-4.

О ѕверо е дује бакхрескере шингенцар сој опишимо ко Откровение. Ов икљола таро ефтато шеро таро ѕверо е ефта шеренцар хем тано фрдимо ко езеро тари јаг. — **О ЅВЕРО ДУЈЕ БАКХРЕСКЕРЕ ШИНГЕНЦАР**

Икљола „тари пхув“ хем керела лафи „сар змеј“. Ов керела „јаг те хулел таро небо“ хем керела знакија сар „о ховавно пророко“ (Отк. 13:11-15; 16:13; 19:20). И Англо-Америка тани претставими сар ѕверо дује шингенцар хем сар ховавно пророко соске ховавела е манушен тари пхув хем вакерела ленге „те керен кипи“ таро „диво ѕверо“ коле со иси ефта шере хем деш шинга. (Дикх ко пасус 9)

9. Кас претставинела о ѕверо коле со иси сар „дуј бакхрескере шинга“?

⁹ О 13 поглавје таро лил Откровение понадари вакерела аменге кај адава ефтато шеро, и Англо–Американско светско сила, исто аѓаар тано сар јекх ѕверо коле со иси сар дуј бакхрескере шинга, ама керела лафи сар змеј. Акава ѕверо керела сине „баре чудија, чак мукхела сине јаг таро небо ки пхув англо е манушенгере јакхја“ (Отк. 13:11-15). О 16 хем о 19 поглавје таро лил Откровение опишинела акале ѕверо сар „ховавно пророко“ (Отк. 16:13; 19:20). О Даниел спомнинела нешто слично, кај и Англо–Американско светско сила ка анел баро уништибе (Дан. 8:19, 23, 24). Баш акава случинѓа пе ки дујто светско војна. О дуј атомска бомбе кола со анѓе крајо е војнаке, сине керде таро британска хем таро американска научникија. Адалеа со керѓе акала бомбе, и Англо–Американско светско сила уствари „мукхле јаг таро небо ки пхув“.

Јекх блудница бешела упро лоло ѕверо коле со иси ефта шере хем деш шинга. О ѕверо тано фрдимо ко езеро тари јаг. — **О ЛОЛО ЅВЕРО**

И блудница — о Баро Вавилон бешела упро акава ѕверо. Акава ѕверо тано опишимо сар о офтото цари (Отк. 17:3-6, 8, 11). Ко почеток и блудница контролиринела акале ѕверо, ама покасно ов уништинела ла. Акаја блудница претставинела е светско царство тари ховавни религија. Авдиве о ѕверо претставинела е Обединета нациен кола со поддржинена е светско политичко системе. (Дикх ко пасусија 10, 14-17)

10. Кас претставинела „о кипи е ѕвероскоро“? (Откровение 13:14, 15; 17:3, 8, 11)

¹⁰ Пало адава дикхаја јекх јавер ѕверо. Акава ѕверо личинела скоро слично сар о ѕверо е ефта шеренцар, само со акава тано лоло. Ов тано викимо „о кипи е ѕвероскоро“ хем тано опишимо сар „о офтото цари“.c (Читин Откровение 13:14, 15; 17:3, 8, 11.) Башо акава цари вакерела пе кај појавинѓа пе, пало адава нашавдило хем покасно палем појавинѓа пе. Акава бут шукар опишинела е организација таро Обединета нацие кола со поддржинена е светско политичко системе. Ко почеток акаја организација викинела пе сине Лига е народонгири. Пало адава џикоте трајнела сине и дујто светско војна ој нашавдили. Покасно ој палем појавинѓа пе ама акава пути сар Обединета нацие.

11. Ко со поттикнинена о ѕверија, хем соске на ваљани те дара лендар?

¹¹ Преку пли пропаганда, о ѕверија или о владе, поттикнинена е манушен те противинен пе е Јеховаске хем лескере народоске. Ко симболично начин, ола кхедена е царен таро цело свето ки војна Армагедон, јавере лафенцар башо „баро диве е Семоќно Девлескоро“ (Отк. 16:13, 14, 16). Ама амен нане соске те дара. Амаро Девел, о Јехова, сигате ка реагиринел те шај те спасинел са околен со поддржинена лескере влада (Езек. 38:21-23).

12. Со ка случинел пе са е ѕверонцар?

¹² Со ка случинел пе са е ѕверонцар? Ко Откровение 19:20 аракхаја о одговор: „Сине астардо о ѕверо, а леа хем о ховавно пророко кова со англи лесте керела сине знакија коленцар со ховавѓа околен со приминѓе о белего е ѕвероскоро хем околен со поклонинена пе лескере кипеске. О солдуј сине фрдиме џикоте панда сине џивде ко јекх езеро тари јаг со тхабљола сулфуреа“. Значи, акала владе сој тане душмања е Девлескере, ка овен уништиме џикоте панда владинена.

13. Саве проблемија керена несаве владе са е Девлескере слугенге?

¹³ Со значинела акава аменге? Адалеске со сием христијања мора те ачхова верна е Девлеске хем лескере Царствоске (Јован 18:36). Мора те ачхова неутрална хем те на бирина нисави страна ки политика. Ама те ачховел пе неутрално шај те овел бут пхаро соске о светска владе родена целосно те поддржина лен амаре лафенцар хем постапкенцар. Окола со перена ко притисок акале владенгоро добинена о белего таро диво ѕверо (Отк. 13:16, 17). А сарине окола со добинена адава белего нане те овен прифатиме таро Јехова хем нане те добинен вечно живото (Отк. 14:9, 10; 20:4). Адалеске бут тано важно те ачхова целосно неутрална, бизи разлика кобор баро притисок керена аменге о владе!

О КРАЈО Е БАРЕ БЛУДНИЦАКОРО

14. Сар сој пишимо ко Откровение 17:3-5, со јавер дикхља о апостол Јован?

¹⁴ О апостол Јован спомнинела кај сине „бут изненадимо“ таро нешто јавер со дикхља. Со сине адава? Ов дикхља сар јекх џувли бешела упро јекх таро акала опасна ѕверија (Отк. 17:1, 2, 6). Ој личинела сар јекх „бари блудница“ хем лакоро анав тано „о Баро Вавилон“. Ој керела „блуд е царенцар тари пхув“. (Читин Откровение 17:3-5.)

15-16. Сој тано о „Баро Вавилон“ хем котар џанаја адава?

¹⁵ Кас претставинела о „Баро Вавилон“? Акаја џувли нашти те претставинел е политичко организација соске баши лате вакерела пе кај керела блуд е светско политичко водаченцар (Отк. 18:9). Уствари, адава сој тани упро о ѕверо сикавела кај мангела те контролиринел акале владетелен. Исто аѓаар, ој нашти те претставинел о алчно трговско систем таро е Сатанаскоро свето. Ола тане спомниме ко јавер тхан ко Откровение хем тане викиме „о трговција е пхувјакере“ (Отк. 18:11, 15, 16).

¹⁶ Ки Библија о лафи „блудница“ понекогаш користинела пе околенге со вакерена кај служинена е Девлеске ама ко несаво начин керена идолопоклонство, или ко јавера начинија овена амала е светоја (1. Лет. 5:25; Јак. 4:4). Бут појавер лендар, околенге со обожавинена е Јехова вакерела пе кај тане „чиста“ хем тане викиме „девице“ (2. Кор. 11:2; Отк. 14:4). О пурано Вавилон сине центар башо ховавно обожавибе. Значи, о Баро Вавилон сигурно претставинела са о врсте ховавно обожавибе. Уствари, ој тани и светско сила тари ховавни религија. (Отк. 17:5, 18; дикх и статија „Што е Големиот Вавилон?“ ки амари интернет-страница.)

17. Со ка случинел пе е Баре Вавилонеа?

¹⁷ Со ка случинел пе е Баре Вавилонеа? Ко Откровение 17:16, 17 аракхаја о одговор: „А о деш шинга со дикхљан лен хем о ѕверо ка мрзинен е блудница, ка уништинен ла хем ка хуљавен ла нанги, хем ка хан лакоро мас хем ка тхарен ла ки јаг. Соске о Девел чхивѓа ленге ко вило те керен адава со ов мангела“. Оја, о Јехова ка поттикнинел е нациен те користинен е лоле ѕверо, јавере лафенцар о Обединета нацие, те нападинен е ховавне религиен хем целосно те уништинен ле (Отк. 18:21-24).

18. Сар шај те сикава кај ко нисаво начин на поддржинаја е Баре Вавилоне?

¹⁸ Со значинела акава аменге? Ваљани те икера амаро обожавибе чисто хем свето англо амаро Девел (Јак. 1:27). Никогаш на ваљани те дозволина те влијајнен упри аменде о ховавне сикљојба, о спиритизам, о паганска празникија хем о слаба морална мерилија таро Баро Вавилон! Амен понадари да предупрединаја е манушен те икљовен лестар те шај те на овен крива башо лескере гревија (Отк. 18:4).

СО КА СЛУЧИНЕЛ ПЕ Е ДЕВЛЕСКЕРЕ НАЈБАРЕ ДУШМАНЕА?

Јекх змеј јагале бојаја со иси ле ефта шере, деш шинга хем ефта круне дела моќ е ѕверонге сој опишиме ко Даниел хем Откровение. О змеј тано фрдимо ко езеро тари јаг. — **О ЗМЕЈ ЈАГАЛЕ БОЈАКОРО**

О Сатана дела власт е диво ѕвероске (Отк. 12:3, 9, 13; 13:4; 20:2, 10). Е Јеховаскоро најбаро душмани о Сатана ка овел пханло ки бездна милја берша. Пало адава, о Сатана ка овел фрдимо ко „езеро тари јаг коте со иси сулфур“. (Дикх ко пасусија 19-20)

19. Кој тано о „баро змеј јагале бојакоро“?

¹⁹ О лил Откровение исто аѓаар керела лафи башо јекх „баро змеј јагале бојакоро“ (Отк. 12:3). Акава змеј боринела пе против о Исус хем лескере ангелија (Отк. 12:7-9). Ов нападинела е Девлескере народо хем дела моќ е ѕверонге, јавере лафенцар е манушикане владенге (Отк. 12:17; 13:4). Кој тано акава змеј? Адава тано о „најпурано сап, кова со викинела пе Бенг хем Сатана“ (Отк. 12:9; 20:2). Ов контролиринела са е Јеховаскере душманен.

20. Со ка случинел пе е змееја?

²⁰ Со ка случинел пе е змееја? Ко Откровение 20:1-3 пишинела кај јекх ангели ка фрдел е Сатана ки бездна, адава ка овел леске сар затвор. Кеда ка овел ки адаја бездна, о Сатана нане „те ховавел више е народо џикоте на накхена 1.000 берша“. Ко крајо, о Сатана хем лескере демонија ка овен фрдиме ко езеро „коте со иси јаг хем сулфур“ (Отк. 20:10). Адава значинела кај ола ка овен уништиме засекогаш! Шај ли те замислине туке јекх свето бизо Сатана хем лескере демонија? Кобор шукар време само ка овел адава!

21. Соске шај те ова бахтале башо адава со читинѓем ко лил Откровение?

²¹ Кобор тано охрабрувачко адава со хаљоваја со значинена о симболија сој тане пишиме ко лил Откровение. На само со откринѓем кој тане е Јеховаскере душмања, него исто аѓаар дикхлем со ка случинел пе ленцар. Чаче, „бахтало тано окова со читинела ко гласо хем окола со шунена о лафија таро акава пророштво“ (Отк. 1:3). Ама откеда ка овен уништиме е Девлескере душмања, ко саве берекетија ка уживинен о верна мануша? Башо акава ка кера лафи ки следно статија.

ГИЛИ 23 О Јехова почминела те владинел

a О лил Откровение користинела знакија или симболија те шај те откринел аменге кој тане е Девлескере душмања. А о лил Даниел поможинела аменге те хаљова со значинена адала симболија. Ки акаја статија ка споредина несаве пророштвија таро лил Даниел е слична пророштвонцар таро лил Откровение. Адава ка поможинел аменге те дознајна кој тане е Девлескере душмања. Пало адава ка дикха со ка случинел пе ленцар.

b Панда јекх доказ кај о ѕверо е ефта шеренцар претставинела са е политичка силен тано адава со иси ле „деш шинга“. Ки Библија о број деш бут пути користинела пе те сикавел пе кај нешто тано целосно.

c Бут појавер таро прво ѕверо, е кипе нане ле круне ко лескере шинга (Отк. 13:1). Акава тано аѓаар соске ов авела таро ефта јавера царија кола со ола дена ле авторитети. (Дикх и статија ки амари интернет-страница jw.org „Шта преставлја скерлетна црвена звер од 17 поглавлја из Откривенја?“ ко српски.)