Е Девлескоро Царство више владинела!

1. Ко со шај те ова увериме, хем соске?

КЕДА дикхеа о проблемија ко свето шај туке пхаро те верујне кај о буќа ка овен пошукар. Ки фамилија о мангипе шудрола, о мануша овена са понасилна хем посебична хем буте џененге тано пхаро те верујнен околенге сој ки власт. Ама са акава шај те уверинел тут кај о буќа ка овен пошукар. Соске? Адалеске со о мануша тане баш асавке сар со сине вакердо ко пророштво башо „последна диве“ (2. Тим. 3:1-5). Нијекх искрено мануш нашти те вакерел кај акава пророштво на исполнинела пе. А адава сикавела кај о Исус више владинела сар цари ко е Девлескоро Царство. Ама акава тано само јекх таро бут пророштвија башо Царство. Амари вера ка овел позорали ако дикхаја јавера да пророштвија со исполнинена пе ко амаро време.

2. Со ка дикха ки акаја статија, хем соске? (Коментирин и слика тари насловно страна.)

² Ки акаја статија ка дикха: 1) Јекх пророштво со поможинела амен те хаљова кеда о Царство почминѓа те владинел, 2) јекх пророштво со поможинела амен те хаљова кај о Исус уло цари ко е Девлескоро Царство ко небо хем 3) о пророштвија со сикавена сар о душмања таро е Девлескоро Царство ка овен уништиме. Ка дикха кај акала пророштвија одговоринена јекх јекхеа сар делија тари сложувалка те шај те ден амен јасно слика ко кова време живинаја.

КОТАР ЏАНАЈА КЕДА ПОЧМИНЃА О ЦАРСТВО ТЕ ВЛАДИНЕЛ

3. Ко со уверинела амен о пророштво таро Даниел 7:13, 14 башо цари таро е Девлескоро Царство?

³ О Пророштво со аракхљола ко Даниел 7:13, 14 уверинела амен кај о Исус ка овел о најшукар владетели ко е Девлескоро Царство. О мануша тари секоја нација ка манген „те служинен леске“ хем никој нане те лел лескоро тхан сар владетели. Јавер пророштво таро лил Даниел вакерела кај о Исус ка почминел те владинел ко Царство кеда ка завршинел о периоди со викинела пе ефта времија. Дали шај те џана кеда случинѓа пе адава?

4. Објаснин сар о Даниел 4:10-17 поможинела амен те џана ко кова берш о Христос уло Цари. (Дикх хем и фуснота.)

⁴ Читин Даниел 4:10-17. О „ефта времија“ претставинена периоди таро 2.520 берша. Адава периоди почминѓа ко 607 берш а.а.е., кеда о Вавилонција цидинѓе е последно царе таро е Јеховаскоро престол ко Ерусалим. А завршинѓа ко 1914 берш а.е., кеда о Јехова чхивѓа е Исусе — окова со иси ле законско право — те овел Цари ко е Девлескоро Царствоb (Езек. 21:25-27).

5. Кова тано јекх начин сар користинела аменге о пророштво башо „ефта времија“?

⁵ Сар користинела аменге акава пророштво? Ако хаљоваја о пророштво башо „ефта времија“, ка ова увериме кај о Јехова исполнинела пле ветувања точно ко време. О Јехова одрединѓа време кеда ка керел е Исусе Цари ко е Девлескоро Царство. Хем кеда ало адава време, о Јехова керѓа адава. Адалеске шај те ова сигурна кај о јавера да пророштвија ка исполнинен пе ко време кова со одрединѓа ле. Шај те ова увериме кај е Јеховаскоро диве „нане те каснинел“! (Авак. 2:3).

КОТАР ЏАНАЈА КАЈ О ИСУС УЛО ЦАРИ КО НЕБО

6. а) Саве јасна доказија иси кај о Исус владинела ко небо? б) Сар о пророштво таро Откровение 6:2-8 потврдинела акава?

⁶ Англедер те завршинел пли служба ки пхув, о Исус вакерѓа кола буќа ка случинен пе ко свето со ка поможинен лескере следбениконге те џанен кај ов почминѓа те владинел сар Цари ко небо. Несаве таро адала буќа со вакерѓа кај ка овен сине о војне, о бокхалипе хем о земјотресија. Ов исто аѓаар вакерѓа кај ка овен заразна насвалипа „ко разна тхана“ сар сој на пример и пандемија КОВИД-19. И Библија вакерела кај акала настанија тане дело таро „знако“ баши е Христосескири присутност (Мат. 24:3, 7; Лука 21:7, 10, 11). Откеда накхле повише таро 60 берш сар со муло хем иранѓа пе ко небо, о Исус панда јекх пути вакерѓа е Јованеске кај ка случинен пе акала настанија. (Читин Откровение 6:2-8.) Са акава случинѓа пе откеда о Исус уло Цари ко 1914 берш.

7. Соске случинена пе бут лошна буќа ки пхув откеда о Исус уло Цари?

⁷ Соске о условија ко свето уле полошна откеда о Исус уло Цари? Ко Откровение 6:2 иси јекх важно детали — е Исусескири прво задача сар Цари сине те почминел војна. Против касте? Против о Сатана хем лескере демонија. Спрема Откровение 12 поглавје, о Сатана сине победимо. Ов хем лескере демонија сине фрдиме теле ки пхув. Адалеске о Сатана тано бут хољамо хем нападинела е манушен, а адава керела те овел пхаро сариненге ки пхув (Отк. 12:7-12).

8. Сар поможинела амен адава со дикхаја сар исполнинена пе о пророштвија башо Царство?

⁸ Сар користинена аменге акала пророштвија? О настанија ко свето хем и промена ко е манушенгоро понашибе поможинена аменге те хаљова кај о Исус уло Цари. Адалеске, наместо те ова вознемириме кеда дикхаја кај о мануша тане себична хем сурова ваљани те на бистра кај адалеа исполнинела пе о библиско пророштво. Е Девлескоро Царство више владинела! (Пс. 37:1). Хем шај те очекујна побаре неволје џикоте о Армагедон авела са попаше (Мар. 13:8; 2. Тим. 3:13). Сием бут благодарна со амаро Дад сој ко небо поможинела амен те хаљова соске иси добором бут проблемија ко свето.

САР О ДУШМАЊА ТАРО Е ДЕВЛЕСКОРО ЦАРСТВО КА ОВЕН УНИШТИМЕ

9. Сар о пророштво таро Даниел 2:28, 31-35 опишинела е последно светско сила, хем кеда почминѓа те владинел?

⁹ Читин Даниел 2:28, 31-35. Амен дикхаја сар акава да пророштво исполнинела пе авдиве. О суно со дикхља ле о Навуходоносор сикавела со ка случинел пе „ко последна диве“ џикоте о Исус владинела. Јекх таро е Исусескере душмања сој ки пхув тани исто аѓаар и последно светско сила сој пророкујми ки Библија хем тани претставими пренцар таро састрн хем глина. Акаја светско сила више владинела. Ој почминѓа те владинел џикоте трајнела сине и Прво светско војна кеда и Британија хем о САД почминѓе заедно те соработинен хем уле и англо-американско светско сила. О кипи таро суно со дикхља ле о Навуходоносор исто аѓаар сикавела најхари дуј буќа кола со разликујнена акале светско сила таро царствија со сине англедер лате.

10. а) Сар исполнинела пе е Даниелескоро пророштво баши англо-американско светско сила? б) Тари сави опасност ваљани те пазина амен? (Дикх и рамка „Пазин тут тари глина!“)

¹⁰ Прво, различно таро англуне светска силе сој спомниме ки визија, и англо-американско светско сила нане претставими цврсто металеа сар сој о злато или о сребро, него сар састрн мешимо глинаја. И глина претставинела е обична манушен (Дан. 2:43). Авдиве шај јасно те дикха кај е манушен иси лен баро влијание упро гласибе, родена пумаре правија, керена протестија хем иси лен синдикатија. А адава керела пхаро околенге сој ки власт те керен адава ола со мангена.

11. Сар адава со владинела и англо-американско светско сила уверинела амен кај живинаја ко време е крајоскоро?

¹¹ Дујто, и англо-америка која сој претставими е пренцар таро баро кипи тани и последно светско сила која сој пророкујми ки Библија. Пали лате нане те постојнел јавер светско сила. Наместо адава, е Девлескоро Царство ка уништинел ла ко Армагедон заедно е јавере владенцарc (Отк. 16:13, 14, 16; 19:19, 20).

12. Кова јавер доказ таро е Даниелескоро пророштво дела амен надеж хем утеха?

¹² Сар користинела аменге акава пророштво? Е Даниелескоро пророштво дела амен јавер да доказ кај живинаја ко време е крајоскоро. Повише таро 2.500 берша англедер, о Даниел пророкујнѓа кај пало о Вавилон ка овен јавера штар светска силе колен со ка овел баро влијание упро е Девлескоро народо. Освен адава, ов вакерѓа кај и англо-американско светско сила, ка овел и последно лендар. Акава утешинела амен хем дела амен надеж кај панда хари е Девлескоро Царство ка уништинел са е манушикане владен хем ка владинел упри цели пхув (Дан. 2:44).

13. Со претставинена о „офтото цари“ хем о „деш царија“ сој спомниме ко Откровение 17:9-12, хем сар исполнинѓа пе акава пророштво?

¹³ Читин Откровение 17:9-12. Адалеске со и Прво светско војна керѓа бари штета, случинѓа пе нешто со керѓа те исполнинел пе јавер библиско пророштво башо последна диве. О светска владетелија мангле те анен мир ко свето, хем адалеске ко јануари 1920 берш сине керди и Лига е народонгири која со сине заменими таро Обединета нацие ко октомври 1945 берш. Акаја организација тани о „офтото цари“. Ама ој нане светско сила, ла иси ла сила само адалеске со о владе поддржинена ла. И Библија башо акала владе вакерела кај тане о „деш царија“.

14-15. а) Со дознајнаја таро Откровение 17:3-5 башо „Баро Вавилон“? б) Со овела е манушенцар со поддржинена сине е ховавне религија?

¹⁴ Читин Откровение 17:3-5. Ки визија о апостол Јован дикхља јекхе блудница, „о Баро Вавилон“, која со претставинела о светско царство е ховавне религијакоро. Со дознајнаја тари акаја визија? О ховавне религие соработинена заедно е светска владенцар бут време хем поддржинена лен. Ама панда хари о Јехова ка чхивел е политичка владенге ко вило те керен адава „со ов мангела“. Со ка овел о резултати таро акава? О политичка силе, јавере лафенцар, „о деш царија“ ка нападинен е ховавне религиен хем ка уништинен лен (Отк. 17:1, 2, 16, 17).

¹⁵ Котар џанаја кај о крајо таро Баро Вавилон тано паше? Те шај те одговорина ко акава пучибе на ваљани те бистра кај јекх бути со заштитинела сине и диз Вавилон сине и река Еуфрат. О лил Откровение спорединела е милиоња манушен со поддржинена е Баре Вавилоне сар „пања“ со заштитинена ле (Отк. 17:15). Исто аѓаар вакерела кај о пања ка шуќон, а адава значинела кај о светско царство е ховавне религијакоро ка нашавел буте манушен со поддржинена ле сине (Отк. 16:12). Авдиве акава пророштво исполнинела пе аѓаар со бут мануша мукхле и ховавни религија хем родена јавертхе решение башо пумаре проблемија.

16. Сави корист ка овел амен ако хаљоваја о пророштвија башо Обединета нацие хем башо крајо таро Баро Вавилон?

¹⁶ Сар користинена аменге акала пророштвија? Адава со појавинѓе пе о Обединета нацие хем адава со бут мануша на поддржинена е ховавне религија докажинела кај живинаја ко последна диве. Иако е Вавилонескере симболична пања шуќона, адаја нане те овел и причина соске ка овен уништиме о ховавне религие. Сар со дикхлем поупре, о Јехова ка чхивел ко виле таро „деш царија“ — о политичка силе кола со поддржинена е Обединета нациен — „те керен адава со ов мангела“. О Обединета нацие таро јекх пути ка уништинен е Баре Вавилоне, а адава ка изненадинел е цело светоd (Отк. 18:8-10). О уништибе е Баре Вавилонескоро ка тресинкерел е цело свето хем адава ка анел баро пхарипе. Ама е Девлескере народо ка овел ле најхари дуј причине соске те овел бахтало. И ховавни религија која сој тани бершенцар душмани е Јеховаске нане више те постојнел хем панда хари ка ова ослободиме таро акава лошно свето (Лука 21:28).

ПОНАДАРИ ДА НЕКА ОВЕЛ ТУТ ДОВЕРБА

17-18. а) Сар шај понадари да те бајрара амари вера? б) Со ка дикха ки следно статија?

¹⁷ О Даниел пророкујнѓа кај о „чачутно пенџарибе ка бајрол“. Хем чаче барило! Амен акана хаљоваја кај о пророштвија исполнинена пе ко амаро време (Дан. 12:4, 9, 10). Адава со акала пророштвија тане добором точна керена те овел амен панда побаро поштовање спрема о Јехова хем лескоро Лафи (Иса. 46:10; 55:11). Адалеске понадари да бајрар тли вера аѓаар со хор ка проучине и Библија хем ка поможине е јаверенге те овен паше амала е Јеховаја. Ов ка заштитинел околен со иси лен целосно доверба ки лесте хем ка дел лен „мир со трајнела“ (Иса. 26:3).

¹⁸ Ки следно статија ка дикха пророштвија башо христијанска собранија ко време е крајоскоро. Сар со ка дикха, адала пророштвија исто аѓаар докажинена кај живинаја ко последна диве. Исто аѓаар ка дикха јавера да доказија кај о Исус — амаро Цари кова со више владинела — водинела пле верна слуген.