1 | Молитва — „Са тумаре гриже фрден леске“
И БИБЛИЈА ВАКЕРЕЛА: „Са тумаре гриже фрден [е Девлеске], соске ов грижинела пе туменге“ (1. ПЕТРОВО 5:7).
Со значинела акава
О Јехова мангела те кера леа лафи башо са о гриже со мучинена амен (Псалм 55:22). Нијекх проблеми нане добором баро, а ни добором тикно те шај те молина амен баши лесте. Ако тано адава важно аменге, важно тано е Јеховаске да. Јекх важно бути те шај те овел амен андруно мир тани те молина амен е Девлеске (Филипјаните 4:6, 7).
Сар шај акава те поможинел аменге
Кеда иси амен проблеми е емоционално састипаја, шај осетинаја амен коркори адалеске со о јавера нашти целосно те хаљовен амен таро со накхаја (Изреки 14:10). Ама, ако ки молитва искрено вакераја е Девлеске сар осетинаја амен, ов сочувствително ка шунел амен хем ка хаљовел амен. О Јехова дикхела амен, џанела таро со накхаја хем џанела амари дукх хем мангела те молина амен башо са адава со мучинела амен (2. Летописи 6:29, 30).
Кеда молинаја амен е Јеховаске панда повише бајрола амари доверба кај ов грижинела пе аменге. Шај те осетина амен исто сар о псалмисти, кова со молинѓа пе акале лафенцар: „Ту дикхљан мли неволја. Ту џанеа о муке мле душакере“ (Псалм 31:7). Адава со џанаја кај о Јехова дикхела со случинела пе аменге ко живото, шај бут те поможинел амен кеда накхаја таро пхаро периоди. Ама, ов на само со дикхела таро со са накхаја, него керела нешто повише. Ов хаљола амен пошукар него било кој јавер хем утешинела амен хем охрабринела амен тари Библија.