Дали џанљан?

Солеа патујнѓа о етиопско службенико кеда о Филип ресља ле?

О ЛАФИ кова со ко Превод Нево свето тано преведимо сар „врда“, ки изворно чхиб шај те мислинел пе ко различна врсте кочие (Апо. 8:28, 29, 38). Ама, мислинела пе кај о Етиопјани возинѓа пе ки кочија која со сине побари таро окола со користинена пе сине ки војна или башо трке. Те дикха несаве причине со анена амен ко асавко заклучок.

О Етиопјани сине баро службенико кова со цидинѓа ко јекх баро друмо. Ов сине службенико е етиопско царицаке хем сине чхивдо те аракхел цело лакоро барвалипе (Апо. 8:27). О авдисутно Судан хем о најјужно дело таро авдисутно Египет англедер сине дело тари Етиопија. Иако о Етиопјани најверојатно на возинѓа пе цело време ки исто кочија џикоте патујнела сине, ама сигурно леља бут буќа пеа со ваљанѓе леске башо баро друмо. Ко прво веко тари а.е., несаве кочие кола со користинена пе сине башо превоз сине лен штар тркалакија хем сине учхарде. Ко јекх лил пишинела: „Асавке кочиенцар шај сине те ингарел пе бут багажи хем о патујбе сине удобно аѓаар о мануша најверојатно шај сине те патујнен бут подур“ (Acts—An Exegetical Commentary).

О Етиопјани читинела сине кеда о Филип ресља ле. Ко извештај пишинела: „О Филип прастандило џи ки кочија хем шунѓа сар [о службенико] читинела ко гласо таро пророко о Исаија“ (Апо. 8:30). Ко адава време, о кочие башо патујбе на сине керде те возинел пе ленцар сигате. Адалеске со акала кочие патујбаске сине бавна, о службенико шај сине те читинел, а о Филип шај сине те ресел ле прастандор.

О Етиопјани „замолинѓа е Филипе те уклел ки кочија хем те бешел узи лесте“ (Апо. 8:31). Обично ки јекх кочија тркаке, о возачија терѓовена сине. Ама, ки јекх кочија патујбаске сине доволно тхан те шај те бешен хем о службенико хем о Филип.

Ко склад адалеа со пишинела ко Апостолија 8-то поглавје хем о историска доказија сој тане достапна, ко амаре поневе публикацие о Етиопјани тано сикавдо ки кочија која сој побари таро окола со користинена пе сине баши војна или баши трка.