Пучиба таро читателија

Кеда о Исус воспоставинѓа е Господарескири вечера, кај сине о 70 ученикија колен со англедер бичхалѓа лен те проповединен? Дали ола мукхле ле?

На ваљани те мислина кај о Исус на прифатинѓа адале 70 ученикон или кај ола мукхле ле, само адалеске со ола на сине присутна кеда ов воспоставинѓа е Господарескири вечера. Едноставно, ки адаја прилика о Исус мангља те овел пле апостоленцар.

Сар пле ученикија, о Исус прифатинѓа хем адале 70 џенен хем е 12 апостолен. Иако е Исусе сине ле бут ученикија, ов најангле биринѓа 12 муршен колен со викинѓа лен апостолија (Лука 6:12-16). Ов сине ки Галилеја кеда „викинѓа е 12 апостолен... хем бичхалѓа лен те проповединен е Девлескоро Царство хем те сасљарен е насвален“ (Лука 9:1-6). Пало адава, кеда ало ки Јудеја, о Исус „биринѓа јавере 70 џенен хем бичхалѓа лен дуј по дуј“ (Лука 9:51; 10:1). Адалеске, е Исусе сине ле ученикија ко различна тхана кола со проповединена сине о шукар хабери баши лесте.

О Евреија кола со уле е Исусескере ученикија, панда славинена сине и Пасха јекх пути ко берш, најверојатно адава керена ле сине заедно пумаре фамилиенцар (2. Мој. 12:6-11, 17-20). Кратко англедер те мерел, о Исус гело ко Ерусалим заедно пле апостоленцар. Ама, ов на викинѓа са пле ученикон тари Јудеја, тари Галилеја хем тари Переја те авен ко Ерусалим хем заедно те славинен и Пасха. Јасно тано кај о Исус ки адаја прилика мангља те овел само пле апостоленцар. Ов вакерѓа ленге: „Едвај аџикерѓум те хав туменцар акаја пасхално вечера англедер те овав мучимо“ (Лука 22:15).

Е Исусе сине ле шукар причина башо адава. Панда хари, ов ваљани сине те мерел „сар е Девлескоро Бакхро кова со цидела о грево таро свето!“ (Јован 1:29). Адава ваљани сине те случинел пе ко Ерусалим коте со бут време дена пе сине жртве е Девлеске. О бакхро со дела пе сине ки Пасха, сетинкерела сине е Израелцон кај о Јехова икалѓа лен таро Египет. Ама пле жртваја, о Исус ка керел сине нешто бут повише. Ов ка спасинел сине са е манушен таро грево хем таро мерибе (1. Кор. 5:7, 8). Адалеске со сине денди е Исусескири жртва, о 12 апостолија ка овен сине дело таро темели е христијанско собраниескоро (Еф. 2:20-22). Интересно тано со ки свето диз Ерусалим иси „дешудуј бара ко темели“ упро коленде сој пишиме о „дешудуј анава таро дешудуј апостолија е Бакхрескере“ (Отк. 21:10-14). Значи, е верна апостолен ка овел лен сине важно улога џикоте исполнинела пе е Девлескири намера. Хаљоваја соске о Исус мангља те овел ленцар ки последно Пасха хем ки е Господарескири вечера која со сине воспоставими одма пали Пасха.

Ки адаја вечера, о 70 ученикија хем о јавера на сине заедно е Исусеа. Сепак, са е верна ученикон сине лен корист тари е Господарескири вечера која со воспоставинѓа ла о Исус. Са о ученикија кола сој помазиме христијања ка овен вклучиме ко сојуз башо Царство, кова со о Исус спомнинѓа ле е апостоленге адаја рат (Лука 22:29, 30).