Со сикљоваја таро е Исусескере последна 40 диве ки пхув

1-2. Со случинѓа пе е Исусескере дује учениконге џикоте џана сине ко Емаус?

ЗАМИСЛИН кај тано 16 нисан 33 берш а.е. Е Исусескере ученикија тане бут тажна хем ки дар. Дуј џене лендар икљона таро Ерусалим хем џана ко Емаус, јекх гав кова сој дур околу 11 километре таро Ерусалим. Ола сине бут обесхрабриме адалеске со о Исус, касте со слединена сине, само со сине мудардо. Ола надинена пе сине кај о Месија ка керел бут шуже буќа е Евреенге, ама ов акана нане више џивдо. Ама тегани случинела пе нешто со на очекујнѓе.

² Јекх мануш коле со на пенџарена ле сине ало узи ленде хем почминѓа те пхирел ленцар. О ученикија вакерена леске кобор тане разочариме башо адава со случинѓа пе е Исусеа. Пало адава, о мануш почминела те вакерел ленге буќа кола со ола никогаш нане те бистрен лен. „Почминдор таро Мојсеј хем таро са о Пророкија“, ов објаснинела ленге соске о Месија мора сине те овел мучимо хем те мерел. Кеда ресена ко Емаус, о дуј ученикија хаљовена кај акава мануш уствари тано о Исус, кова со воскреснинѓа! Шај само те замислина аменге кобор сине радосна о ученикија кеда дознајнѓе кај о Месија тано џивдо! (Лука 24:13-35).

3-4. Со случинѓа пе е Исусескере учениконцар хем со ка дикха ки акаја статија? (Апостолија 1:3).

³ Џикоте о Исус сине ко пле последна 40 диве ки пхув, ов бут пути појавинѓа пе е учениконге. (Читин Апостолија 1:3.) Ов охрабринѓа пле ученикон кола со сине тажна хем ки дар. Адалеске, ола уле радосна хем почминѓе храбро те проповединен о шукар хабери хем те сикавен е манушен башо Девел.a

⁴ Шај бут те користинел аменге адава со ка проучина акава интересно периоди таро е Исусескоро живото. Ки акаја статија ка дикха сар о Исус користинѓа адава време 1) те шај те охрабринел пле ученикон, 2) те шај те поможинел ленге пошукар те хаљовен о света списија хем 3) те шај те обучинел лен те прифатинен побаре одговорностија. Баши секоја таро акала буќа, ка дикха сар шај те џа пало е Исусескоро пример.

ОХРАБРИН Е ЈАВЕРЕН

5. Соске е Исусескере учениконге ваљанѓа охрабрување?

⁵ Е Исусескере учениконге ваљанѓа охрабрување. Соске? Несаве лендар мукхле пло кхер, пле фамилија или пли бути те шај цело време те овен е Исусеа (Мат. 19:27). А јавера сине отфрлиме тари околина адалеске со уле е Исусескере ученикија (Јован 9:22). Ола керѓе акала жртве соске верујнена сине кај о Исус тано о ветимо Месија (Мат. 16:16). Ама кеда о Исус муло, ола нашавѓе пли надеж хем бут обесхрабринѓе пе.

6. Со керѓа о Исус откеда воскреснинѓа?

⁶ Џанѓола пе, о Исус на мислинѓа кај лескере ученикија тане духовно слаба адалеске со сине тажна. Ов халило кај ола тане тажна башо лескоро мерибе. Адалеске, панда ко исто диве кеда воскреснинѓа, почминѓа те охрабринел пле амален. На пример, ов појавинѓа пе е Марија Магдаленаке џикоте ој ровела сине ко лескоро гробо (Јован 20:11, 16). Ов исто аѓаар, појавинѓа пе е дује учениконге колен со спомнинѓем лен ко почеток тари акаја статија. А појавинѓа пе хем е апостол Петареске (Лука 24:34). Со шај те сикљова таро е Исусескоро пример? Размислин со случинѓа пе кеда ов појавинѓа пе е Марија Магдаленаке.

7. Спрема Јован 20:11-16, со керѓа и Марија сабајле ко 16 нисан, хем со керѓа о Исус откеда приметинѓа адава? (Дикх хем и слика.)

⁷ Читин Јован 20:11-16. Сабајле ко 16 нисан, некобор џувља геле ко е Исусескоро гробо (Лука 24:1, 10). Јекх лендар сине и Марија Магдалена. Кеда ој ресља атхе, дикхља кај о гробо тано чучо. Адалеске, ој гели те вакерел адава е Петареске хем е Јованеске. Ола дуј џене прастандор геле ко гробо, а и Марија гели пали ленде. Откеда о Петар хем о Јован дикхле кај о гробо чаче тано чучо, иранѓе пе кхере. Ама на хем и Марија. Ој ачхили атхе хем ровела сине. Ој ни на сине свесно кај о Исус дикхела ла. Е Исусе бут погодинѓа ле адава со дикхља сар ој ровела. Адалеске појавинѓа пе е Маријаке хем керѓа нешто со бут охрабринѓа ла. Ов керѓа лаја лафи хем денѓа ла јекх важно задача — те вакерел лескере пхраленге кај воскреснинѓа (Јован 20:17, 18).

8. Сар шај те џа пало е Исусескоро пример?

⁸ Сар шај те џа пало е Исусескоро пример? Џаја пало е Исусескоро пример кеда охрабринаја амаре пхрален хем пхењен понадари да те служинен е Јеховаске. Исто сар о Исус, ваљани те приметина саве проблемија иси е јаверен, те пробина те хаљова сар осетинена пе хем те утешина лен. Те дикха о пример јекхе пхењакоро со викинела пе Џоселин, која со нашавѓа пле пхења ки јекх несреќа. Ој вакерела: „Масеконцар осетинава сине бари туга“. Ама, јекх пхрал заедно пле ромњаја викинѓе ла ки песте, шукар шунѓе ла, постапинѓе лаја љубезно хем вакерѓе лаке кобор о Јехова ценинела ла. И Џоселин вакерела: „Осетинава ман сине бут лошно, сар те пхене тасљовава ко јекх темно море коте со иси бари бура. Ама, пало адава о Јехова користинѓа акале брачно паре те шај те спасинел ман. Ола сине мло чамцо спасибаске. Поможинѓе манге те иранав мли желба понадари да те служинав е Јеховаске“. Амен да шај те охрабрина е јаверен аѓаар со ка мукха лен те вакерен сар осетинена пе хем шукар ка шуна лен џикоте керена лафи. Аѓаар, ка шај те утешина лен хем ка поможина ленге понадари да те служинен е Јеховаске (Рим. 12:15).

ПОМОЖИН Е ЈАВЕРЕНГЕ ТЕ ХАЉОВЕН Е ДЕВЛЕСКОРО ЛАФИ

9. Саве пхарипа сине е Исусескере ученикон хем сар ов поможинѓа ленге?

⁹ Е Исусескере ученикон сине лен доверба ко е Девлескоро Лафи хем дена пестар сине са те применинен лескере советија ко пумаро живото (Јован 17:6). Сепак, нашти сине те хаљовен соске о Исус сине мудардо сар криминалцо ко стубо мучибаске. О Исус халило кај адава со ола сумнинена пе на значинела кај иси лен лошно вило, него кај ола на хаљовена доволно о света списија (Лука 9:44, 45; Јован 20:9). Адалеске, ов поможинѓа ленге те хаљовен со значинела адава со читинѓе ко е Девлескоро Лафи. Те дикха сар керѓа адава кеда појавинѓа пе е дује учениконге со џана сине ко Емаус.

10. Сар о Исус поможинѓа пле учениконге те хаљовен кај ов тано чаче о Месија? (Лука 24:18-27).

¹⁰ Читин Лука 24:18-27. Приметин кај о Исус на вакерѓа одма е дује учениконге кој тано ов. Наместо адава, ов пучела лен сине пучиба. Соске? Шај мангела сине те мукхел лен те вакерен со мислинена ола хем сар осетинена пе. Хем баш адава керѓе. Вакерѓе леске кај очекујнѓе о Исус те спасинел е Евреен таро римско владибе. Откеда вакерѓе со секиринела лен, о Исус преку о Списија поможинѓа ленге те хаљовен со случинѓа пе.b Покасно, и исто рат, о Исус дикхља пе е јавере учениконцар хем ленге да објаснинѓа акала чачипа (Лука 24:33-48). Со шај те сикљова таро акава извештај?

11-12. а) Со шај те сикљова таро начин сар о Исус сикавела сине е јаверен башо библиска чачипа? (Дикх хем о слике.) б) Сар поможинѓа е Нортееске о пхрал со проучинела сине леа?

¹¹ Сар шај те џа пало е Исусескоро пример? Прво, кеда сикавеа некас башо чачипе пуч ле тактична пучиба те шај те поттикнине ле те вакерел со мислинела хем сар осетинела пе (Изр. 20:5). Откеда ка хаљове сар осетинела пе, поможин ле те аракхел библиска стихија со ка поможинен леске ки лескири ситуација. Ма вакер леске со ваљани те керел. Наместо адава, пуч ле пучиба сој поврзиме е библиска стихонцар хем поттикнин ле те размислинел сар шај те применинел о библиска начелија ко пло живото. Те дикха о пример јекхе пхралескоро тари Гана, со викинела пе Нортеј.

¹² О Нортеј почминѓа те проучинел и Библија кеда сине ле 16 берш. Ама кратко време пало адава, лескири фамилија почминѓа те противинел пе леске. Со поможинѓа леске те на чхинавел е проучибаја? О пхрал кова со проучинела сине леа више англедер објаснинѓа леске таро Матеј 10 поглавје кај о чачутне христијања ка овен прогониме. О Нортеј вакерела: „Адалеске, кеда почминѓа о противибе ме више сиум сине уверимо кај аракхљум о чачипе“. О пхрал исто аѓаар сикавѓа леске о стихо таро Матеј 10:16, коте со пишинела кај мора те ова претпазлива. Пало адава, ола керѓе лафи башо адава сар акава стихо шај те поможинел е Нортее те сикавел поштовање џикоте објаснинела пле фамилијаке ко со верујнела. Откеда крстинѓа пе, о Нортеј мангља те овел пионери, ама о дад лескоро очекујнела сине те џал ко факултети. Наместо о пхрал те вакерел е Нортееске со те керел, ов пучља ле пучиба те шај те поможинел леске те размислинел башо библиска начелија хем те анел исправно одлука. Саво сине о резултати? О Нортеј одлучинѓа те почминел е полновремено службаја. Адалеске о дад лескоро бркинѓа ле кхералдан. Со мислинела о Нортеј башо са адава со случинѓа пе леске? Ов вакерела: „Уверимо сиум кај анѓум и исправно одлука“. Кеда амен да одвојнаја време те шај те поможина е јаверенге те хаљовен е Девлескоро Лафи, поможинаја ленге те керен позорали пумари вера хем те овен зрела христијања (Еф. 3:16-19).

ОБУЧИН Е ПХРАЛЕН ТЕ ОВЕН МАНУША „САР ПОКЛОН“

13. Со керѓа о Исус те шај откеда ка џал ко небо понадари да те овел проповедимо? (Ефешања 4:8, 11).

¹³ Џикоте сине ки пхув, о Исус совршено керела сине и задача со денѓа ле лескоро Дад (Јован 17:4). Ама е Исусе на сине ле о стави: „Ако мангеа те керел пе нешто сар со ваљани, ту мора коркори те кере адава“. Ки пли служба ки пхув која со трајнѓа трин текваш берш, ов исто аѓаар обучинѓа е јаверен да те керен адава. Англедер те иранел пе ко небо, о Исус денѓа пле учениконге и одговорност те грижинен пе башо е Јеховаскере скапоцена бакхре хем те предводинен ко проповедибе хем сикајбе. Несаве таро адала ученикија кола со предводинена сине ко проповедибе, веројатно сине лен похари таро 30 берш. (Читин Ефешања 4:8, 11.) Сар о Исус користинѓа пле последна 40 диве ки пхув те шај те обучинел акале верна хем буќарне муршен хем адалеа те поможинел ленге те овен мануша „сар поклон“?

14. Сар о Исус поможинѓа пле учениконге те бајрон ко духовно поглед ко пле последна 40 диве ки пхув? (Дикх хем и слика.)

¹⁴ О Исус денѓа советија пле учениконге кола со ваљанѓе ленге, ама адава керела сине ко љубезно начин. На пример, ов приметинѓа кај несаве лендар сумнинена пе сине дали ов чаче муло хем воскреснинѓа, хем адалеске денѓа лен совет башо адава (Лука 24:25-27; Јован 20:27). Ов исто аѓаар истакнинѓа ленге кобор тано важно повише те концентриринен пе ко адава те грижинен пе е Јеховаскере народоске него ки пумари световно бути (Јован 21:15). О Исус сетинкерѓа лен кај на ваљани те секиринен пе башо адава саве задаче шај ка добинен о јавера ки служба башо Јехова (Јован 21:20-22). Исто аѓаар, ов поможинѓа ленге те менинен несаве погрешна размислувања со сине лен башо Царство хем поможинѓа ленге те концентриринен пе ко проповедибе о шукар хабери (Апо. 1:6-8). Со шај о старешине те сикљовен таро Исус?

15-16. а) Ко саве начинија о старешине шај те џан пало е Исусескоро пример? б) Сави корист сине јекхе пхрале таро совет со добинѓа ле?

¹⁵ Сар шај о старешине те џан пало е Исусескоро пример? Ола мора те обучинен е пхрален хем те поможинен ленге, машкар коленде сој хем о терне, те шај те пхерен о условија те прифатинен повише одговорностија.c О старешине на очекујнена совршенство околендар со обучинена лен. Ола ваљани ко јекх љубезно начин те ден лен совет те шај е терне пхрален те овел лен искуство хем те хаљовен кај ваљани те овен понизна, те заслужинен е јаверенгири доверба хем спремно те служинен ленге (1. Тим. 3:1; 2. Тим. 2:2; 1. Пет. 5:5).

¹⁶ Размислин сар јекхе пхралеске со викинела пе Патрик поможинѓа леске о совет со добинѓа ле. Кеда сине потерно, ле сине ле навика те керел грубо лафи е јаверенцар хем те на овел ленцар љубезно, па чак е пхењенцар. Јекх старешина приметинѓа лескере слабостија хем денѓа ле јасно совет ама адава керѓа ле ко јекх љубезно начин. О Патрик вакерела: „Благодарно сиум со о старешина сикавѓа манге коте те поправинав ман. Англедер обесхрабринава ман сине кеда ка дикхав сар о јавера пхраља добинена одговорностија кола со ме мангава лен сине. Ама о совет е старешинаскоро поможинѓа манге те хаљовав кај ваљани те овел манге поважно понизно те служинав е пхраленге хем е пхењенге наместо те добинав несави побари одговорност или задача ко собрание“. Адалеске со прифатинѓа о совет, о Патрик почминѓа те служинел сар старешина кеда сине ле 23 берш (Изр. 27:9).

17. Сар о Исус сикавѓа кај иси ле доверба ко пле ученикија?

¹⁷ О Исус денѓа пле учениконге и одговорност те проповединен о шукар хабери ама хем те сикавен е јаверен (Мат. 28:20). О ученикија шај мислинена песке сине кај нане доволно способна те керен акаја задача. Ама о Исус на сумнинѓа пе кај ка шај те керен ла, хем вакерѓа ленге адава. Ов сикавѓа целосно доверба ки ленде акале лафенцар: „Сар со о Дад бичхалѓа ман, аѓаар ме бичхалава тумен“ (Јован 20:21).

18. Сар шај о старешине те џан пало е Исусескоро пример?

¹⁸ Сар шај о старешине те џан пало е Исусескоро пример? О мудра старешине обучинена е јаверен аѓаар со дена лен задаче (Фил. 2:19-22). На пример, о старешине шај те замолинен е потернен те поможинен ко чистибе хем ко одржибе и дворана. Откеда ка ден несави задача ола шај те сикавен доверба околенде каске со денѓе ла аѓаар со ка обучинен лен, а пало адава нане те сумнинен пе кај шукар ка завршинен ла. Јекх пхрал кова со викинела пе Метју, кова со сигенде уло старешина, вакерела кај бут ценинела е искусна старешинен кола со шукар обучинена ле баши несави задача ко собрание, а пало адава иси лен доверба кај шукар ка керел ла. Ов вакерела: „Бут користинела манге сине адава со ко мле грешке дикхена сине сар дело тари обука, а пало адава поможинена ман сине те овав пошукар“.d

19. Со ваљани те ова одлучна те кера?

¹⁹ О Исус користинѓа пле последна 40 диве ки пхув те шај те охрабринел, те сикавел хем те обучинел е јаверен. Те ова одлучна те да са амендар те џа пало лескоро пример (1. Пет. 2:21). Ов ка поможинел аменге те кера адава. Уствари, о Исус ветинѓа: „Ме сиум туменцар ко са о диве џи ко крајо акале светоскоро“ (Мат. 28:20).