Размислин палем башо главна мисле

Дали некогаш туке пхаро те памтине адава со читинѓан ко моменти? Понекогаш акава случинела пе сариненге. Со шај те поможинел туке? Размислин палем башо главна мисле.

Џикоте проучинеа, ачхов некобор пути хем дикх кола тане о главна мисле. О апостол Павле поттикнинѓа е пхрален хем е пхењен те керен баш адава џикоте проучинена лескоро писмо. Ов пишинѓа: „Акаја тани главно мисла“ (Евр. 8:1). Акале лафенцар о Павле поможинѓа лен те хаљовен со мангља те вакерел ленге хем сар тане поврзиме машкар песте о буќа со вакерѓа лен.

Шај те одвојне туке време, на пример 10 минутија ко крајо таро тло проучибе те шај те размислине башо главна мисле. Ако нашти те сетине тут ко главна мисле, дикх о поднасловија или о прва реченице таро секова пасус те шај те поможинен туке те сетине тут. Ако сиклиљан нешто нево, трудин тут те објаснине ле тле лафенцар. Адава со палем ка иране тут ко главна мисле, ка поможинел туке полокхе те памтине хем пошукар те хаљове сар шај те применине лен ко тло живото.