Те живина спрема и вера

1. Соске о апостол Павле шај сине те овел задоволно пле животоја?

О АПОСТОЛ Павле џанља кај панда хари ка овел мудардо, ама шај сине те овел задоволно е животоја со живинѓа ле. Адалеске вакерѓа: „Прастандиљум и трка џи ко крајо, мли вера аракхљум“ (2. Тим. 4:6-8). О Павле анѓа мудра одлуке ки служба башо Јехова хем сине уверимо кај ов тано задоволно лестар. Амен да мангаја те ана шукар одлуке те шај о Девел те овел амендар задоволно. Со ка поможинел амен ко адава?

2. Со значинела те живина спрема и вера?

² Баши песте ама хем башо јавера верна христијања, о Павле вакерѓа: „Живинаја спрема и вера, а на спрема адава со дикхаја“ (2. Кор. 5:7). Со мангља те вакерел о Павле акалеа? Кеда некој живинела само спрема адава со дикхјола, ов анела одлуке со темелинена пе само ко адава со дикхела, со шунела хем со осетинела. Тари јавер страна, окова со живинела спрема и вера анела одлуке кола со темелинена пе ки лескири доверба ко Јехова, о Девел. Таро лескере постапке дикхјола кај ов тано уверимо кај о Девел ка наградинел ле ки иднина, ама хем кај панда акана тано башо лескоро шукарипе адава со икерела пе ко е Јеховаскере советија тари Библија (Пс. 119:66; Евр. 11:6).

3. Сар користинела аменге адава со живинаја спрема и вера? (2. Коринќања 4:18).

³ Џанѓола пе, сарине амен понекогаш анаја одлуке спрема адава со дикхаја, шунаја или осетинаја. Ама, шај те овен амен проблемија ако, кеда анаја важна одлуке лаја ко предвид само адава со дикхаја или шунаја. Соске? Понекогаш, адава со дикхаја хем шунаја шај те ховавел амен. Ама, чак хем те на ховавел амен, ако анаја одлуке само спрема адава со дикхаја, шај те почмина те кера нешто со о Јехова на мангела (Проп. 11:9; Мат. 24:37-39). Ама, кеда живинаја спрема и вера, поверојатно тано кај ка ана одлуке кола сој спрема адава сој прифатливо е Господареске (Еф. 5:10). Ако сием послушна ко советија е Девлескере, ка овел амен андруно мир хем ка ова чаче среќна (Пс. 16:8, 9; Иса. 48:17, 18). А ако понадари да живинаја спрема и вера, аџикерела амен вечно иднина. (Читин 2. Коринќања 4:18.)

4. Сар ка џана дали живинаја спрема и вера или спрема адава со дикхаја?

⁴ Сар ка џана дали живинаја спрема и вера или спрема адава со дикхаја? Шај те пуча амен: „Кола буќа водинена ман кеда анава одлуке? Дали анава одлуке само спрема адава со дикхава? Или иси ман доверба ко советија е Јеховаскере?“ Те дикха со ка поможинел амен те живина спрема и вера ко трин важна подрачја: кеда биринаја бути, кеда биринаја брачно партнери хем кеда добинаја упатствија тари организација. Башо секова таро акала подрачја ка дикха кола буќа ваљани те ла ко предвид те шај те ана шукар одлука.

КЕДА БИРИНАЈА БУТИ

5. Со ваљани те ла ко предвид кеда биринаја бути?

⁵ Секој амендар мангела те аракхел бути колаја со ка грижинел пе башо пле потребе хем о потребе пле фамилијакере (Проп. 7:12; 1. Тим. 5:8). Иси буќа кола сој тане шукар платиме хем коленцар со шај те учхара амаре трошакија, па чак хем нешто те чхива ки страна. Јавера буќа нане добором шукар платиме, хем о работникија шај те дозволинен песке само о основна буќа. Кеда ваљани те одлучина дали ка прифатина несави бути, нормално тано те ла ко предвид кобор ка овел и плата. Ама, ако некаске само и плата тани и најважно бути кеда одлучинела, адава сикавела кај живинела само спрема адава со дикхела.

6. Сар шај те сикава кај живинаја спрема и вера кеда биринаја бути? (Евреија 13:5).

⁶ Ако живинаја спрема и вера, ка ла ко предвид исто аѓаар сар адаја бути шај ка влијајнел упро амаро амалипе е Јеховаја. Шукар тано те пуча амен: „Дали адаја бути ка родел мандар те керав нешто со о Јехова мрзинела?“ (Изр. 6:16-19). „Дали и бути ка влијајнел ко мле духовна активностија хем дали баши бути ка ваљани побаро периоди те овав одвојмо тари мли фамилија?“ (Фил. 1:10). Ако о одговор ко акала пучиба тано оја, ка овел мудро те на прифатина адаја бути, чак ако нане локхо те аракхел пе бути. Адалеске со живинаја спрема и вера, анаја одлуке колендар со дикхјола кај сием увериме кај о Јехова ко несаво начин ка грижинел пе те овел амен адава со ваљани аменге (Мат. 6:33; читин Евреија 13:5).

7-8. Сар јекх пхрал тари Јужно Америка сикавѓа кај живинела спрема и вера? (Дикх хем и слика.)

⁷ О Хавиер,a јекх пхрал тари Јужно Америка, џанља кобор тано важно те живинел спрема и вера. Ов вакерела: „Аплициринѓум ки јекх бути коте со ка лав сине дупло побари плата таро англедер хем ка керав сине нешто колесте со ка уживинав“. Ама, о Хавиер бут мангела сине те овел пионери. Ов исто вакерела: „Сине ман закажимо интервју е директореа тари фирма. Англедер о интервју, молинѓум е Јехова те поможинел ман хем сиум сине уверимо кај ов џанља со сине манге најшукар. Мангљум те напредујнав ки бути хем те лав побари плата, ама на сиум сине спремно те прифатинав адаја бути ако чхинавела ман те исполнинав мле духовна целија“.

⁸ О Хавиер исто вакерела: „Џикоте трајнела сине о интервју, о директори вакерѓа манге кај редовно ка ваљани те керав бути прекувремено. Ме љубезно вакерѓум леске кај баши мли служба адава нашти те прифатинав“. Оја, о Хавиер одбинѓа адаја бути. Пало дуј курке почминѓа е пионерско службаја. А покасно о исто берш аракхља бути похари саатенцар. Ов вакерела: „О Јехова шунѓа мле молитве хем поможинѓа ман те аракхав бути колаја со шај те овав пионери. Бут сиум среќно со иси ман бути која со дозволинела манге те одвојнав повише време те шај те служинав е Јеховаске хем мле пхраленге“.

9. Со сикљовеа таро искуство е Трезорескоро?

⁹ Со ако хаљоваја кај и бути со акана иси амен керела аменге попхаро те живина спрема и вера? Те дикха со случинѓа пе е Трезореа таро Конго. Ов вакерела: „Адаја сине бути таро суне. Заработинава сине трин пути повише таро адава со заработинава сине англедер хем сиум сине бут поштујмо“. Ама, о Трезор на џала сине редовно ко состанокија адалеске со керела сине бути прекувремено. Исто аѓаар, понекогаш сине ле баро притисок те ховавел е манушен те шај те гаравел нешто со нане чесно. О Трезор мангља те дел отказ ама дарала сине кај нане те аракхел јавер бути. Со поможинѓа ле? Ов вакерела: „О Авакум 3:17-19 поможинѓа ман те хаљовав кај, чак хем те ачховав бизи бути, о Јехова ка аракхел начин те грижинел пе манге. Хем аѓаар денѓум отказ“. Ов ко крајо вакерела: „Бут газдија мислинена кај баши јекх шукар платими бути о мануш ка жртвујнел са, чак пле фамилија хем о духовна буќа. Бут сиум радосно со ачхиљум паше е Јеховаја хем мле фамилијаја. Јекх берш пало адава, о Јехова поможинѓа ман те аракхав стабилно бути колаја со ка шај скромно те живинав хем те овел ман повише време башо духовна активностија. Кеда чхиваја е Јехова ко прво тхан шај несаво време ка мучина амен те шај те икљова ко крајо. Ама, о Јехова ка грижинел пе аменге“. Оја, ако иси амен доверба ко е Јеховаскере советија хем ко лескере ветувања, понадари да ка живина спрема и вера, а ов ка благословинел амен.

КЕДА БИРИНЕА БРАЧНО ПАРТНЕРИ

10. Кеда биринаја брачно партнери, со ка сикавел кај шај живинаја спрема адава со дикхјола?

¹⁰ О брако тано поклон таро Јехова хем нормално тано те манга те женина амен. Кеда јекх пхен размислинела дали јекх пхрал ка одговоринел лаке сар брачно партнери, шај ка приметинел лескоро карактер, сар изглединела, саво анав иси ле англо јавера, сар тано ко материјално поглед, дали грижинела пе пле фамилијаке хем дали осетинела пе леа шукар.b Акала тане важна буќа. Ама, ако лела ко предвид само акала буќа, ка сикавел кај шај живинела спрема адава со дикхјола.

11. Сар ка сикава кај живинаја спрема и вера кеда биринаја брачно партнери? (1. Коринќања 7:39).

¹¹ О Јехова бут дичинела пе амаре пхраленцар хем пхењенцар кола со икерена пе ко лескере советија кеда биринена брачно партнери. На пример, ола бут сериозно хаљона о совет те аџикерен те шај „те овен зрела ко тело хем ки годи“ англедер те почминен врска (1. Кор. 7:36). Кеда размислинена дали некој ка одговоринел ленге сар брачно партнери, ола највише концентриринена пе ко особине кола со о Јехова вакерела кај ваљани те овел јекхе шукар роме или јекхе шукар ромња (Изр. 31:10-13, 26-28; Еф. 5:33; 1. Тим. 5:8). А ако некој со нане Сведоко сикавела ленге интерес, ола тане послушна ко совет те женинен пе некасаја само сој „тано следбенико е Господарескоро“. (Читин 1. Коринќања 7:39.) Ола живинена спрема и вера, увериме кај о Јехова ка грижинел пе башо ленгере емоционална потребе пошукар таро било кој јавер (Пс. 55:22).

12. Со сикљовеа таро пример е Росакоро?

¹² Те дикха о искуство е Росакоро, јекх пхен тари Колумбија која со служинела сар пионери. Ој керела сине бути јекхе манушеа кова со на сине е Јеховаскоро сведоко хем кова со почминѓа те интересинел пе лаке. Ов свиџинела пе сине е Росаке. Ој вакерела: „Изглединела сине кај тано бут шукар мануш хем поможинела сине е јаверенге ко тхан коте со живинела сине. Бут шукар понашинела пе сине манцар. Ле сине ле са адава со би мангава сине те овел мле роме, само со на сине е Јеховаскоро сведоко“. И Роса понадари вакерела: „На сине манге локхо те одбинав ле, соске мло вило вакерела сине појавер. Ко адава време осетинава ман сине коркори хем мангава сине те женинав ман, ама нашти сине те аракхав пхрал колеа со шај те женинав ман“. Сепак, и Роса на концентриринѓа пе само ко адава со дикхјола. Размислинела сине сар адаја одлука ка влијајнел упро лакоро амалипе е Јеховаја. Адалеске, чхинавѓа са о контактија адале манушеа хем трудинѓа пе те овел зафатими е духовна буќенцар. Кратко пало адава сине каними ки Школа башо полновремена објавителија хем акана служинела сар специјално пионери. И Роса вакерела: „О Јехова бут благословинѓа ман хем керѓа ман бут среќно!“ Шај нане локхо те живина спрема и вера, посебно кеда нешто бут мангаја, ама адава секогаш тано амаре шукарипаске.

КЕДА ДОБИНАЈА УПАТСТВИЈА ТАРИ ОРГАНИЗАЦИЈА

13. Соске шај те почмина те живина спрема адава со дикхјола кеда добинаја упатствија тари организација?

¹³ Амен бут пути добинаја упатствија тари организација кола со поможинена аменге ко амаро обожавибе, сар на пример таро амаре локална старешине, таро покраинско надгледнико, тари подружница или таро Водечко тело. Ама, со ако некогаш на хаљоваја соске добинаја асавке упатствија? Шај само ка концентририна амен ко адава кобор тано пхаро те применинен пе адала упатствија. Шај чак те почмина те концентририна амен ко слабостија е пхраленгере кола со денѓе адала упатствија.

14. Со ка поможинел амен те живина спрема и вера кеда добинаја упатствија тари организација? (Евреија 13:17).

¹⁴ Кеда живинаја спрема и вера, иси амен доверба кај е Јехова иси ле контрола упро са хем кај шукар џанела амари ситуација. Адалеске одма прифатинаја о неве упатствија хем шунаја адала упатствија соске иси амен позитивно стави. (Читин Евреија 13:17.) Свесна сием кај кеда сием послушна поможинаја те овел јекхипе ко собрание (Еф. 4:2, 3). Иси амен доверба ко Јехова хем џанаја кај иако о пхраља кола со предводинена тане несовршена, ако сием послушна, ов ка благословинел амен (1. Сам. 15:22). А тари јавер страна, чак ако нешто чаче ваљани те поправинел пе, ко пло време о Јехова ка поправинел ле (Мих. 7:7).

15-16. Со поможинѓа јекхе пхралеске те живинел спрема и вера, иако на сине баш сигурно ко упатствија со добинѓа лен? (Дикх хем и слика.)

¹⁵ Те дикха јекх пример кова со сикавела сави корист иси амен кеда живинаја спрема и вера. Иако ко Перу скоро сарине керена лафи шпански, бут мануша керена лафи ко несаве локална чхибја. Јекх лендар тани и чхиб кечуа. Бут берша, о пхраља хем о пхења со керена лафи ки чхиб кечуа, ко пло подрачје родена е манушен кола со керена лафи ки адаја чхиб. Ама, адалеске со але несаве промене ко закони, сине керде промене ко упатствија башо адава сар те рода е манушен (Рим. 13:1). Адалеске, несаве мислинена сине кај адава лошно ка влијајнел упри ленгири служба. Сепак, адалеске со о пхраља прифатинѓе о неве упатствија, о Јехова благословинѓа ленгоро трудо адалеа со успејнѓе те аракхен буте манушен кола со керена сине лафи ки чхиб кечуа.

¹⁶ Машкар окола со сине секириме сине хем о Кевин, кова со служинела сар старешина ко јекх собрание ки чхиб кечуа. Ов објаснинела: „Мислинѓум манге: ’Сар акана ка аракха е манушен со керена лафи ки чхиб кечуа?‘“ Со керѓа о Кевин? „Сетинѓум ман ко лафија таро Изреки 3:5, а размислинѓум хем башо Мојсеј. Ов ваљани сине те икалел е Израелцон таро Египет хем пало адава те водинел лен ко тхан кова со изглединела сине сар те пхене нане лестар излез, коте со о Египќања шај сине бут локхе те астарен лен. Сепак, ов шунѓа хем о Јехова благословинѓа лескири послушност адалеа со спасинѓа е Израелцон јекхе баре чудоја“ (2. Мој. 14:1, 2, 9-11, 21, 22). О Кевин сине одлучно те прилагодинел пе ки пли служба. Саво сине о резултати? Ов вакерела: „Нашти сине те верујнав сар о Јехова благословинѓа ман. Англедер, кеда џаја сине ки служба бут пхираја сине хем понекогаш аракхаја сине само јекхе или дује џенен со керена лафи ки чхиб кечуа. Акана концентриринаја амен ко адава те обработина подрачја коленде со живинена повише мануша со керена лафи ки чхиб кечуа. Адалеске, иси амен повише прилике те кера лафи е манушенцар, иси амен повише посете хем повише библиска курсија. А хем ко состанокија акана иси амен повише присутна“. Оја, кеда живинаја спрема и вера, о Јехова секогаш наградинела амен.

17. Со сиклиљан тари акаја статија?

¹⁷ Дикхлем со ка поможинел амен понадари да те живина спрема и вера ко трин важна подрачја. Ама, мора те живина спрема и вера ко секова подрачје таро амаро живото, на пример, кеда биринаја забава или рекреација хем кеда анаја одлуке баши школа или воспитибе е чхавен. Кеда ваљани те ана несави одлука, на ваљани те ана ла само спрема адава со дикхаја. Мора те ла ко предвид хем амаро амалипе е Јеховаја, лескере советија хем лескоро ветување кај ов ка грижинел пе аменге. Аѓаар, ка шај те „џа ко анав е Јеховаскоро, амаро Девел, ко са о време, ки цело вечност“ (Мих. 4:5).