Аменге тано шукар те ова попаше е јаверенцар

1-2. Која тани јекх таро буќа која со е Јеховаске тани бут важно, хем со мангела ов те кера?

ЈЕКХ таро буќа кола сој бут важна е Јеховаске тано о начин сар понашинаја амен е јаверенцар. О Исус сикавѓа кај ваљани те манга амаре пашутнен сар коркори амен (Мат. 22:37-39). Ко адава тано вклучимо чак те понашина амен шукар околенцар со на верујнена ко иста буќа сар аменде. Ако сикаваја асавки љубезност, ка џа пало пример е Јеховаскоро о Девел кова со „дела лескоро кхам те светинел упро лошна хем упро шукар хем дела те перел бршим упро праведна хем упро неправедна“ (Мат. 5:45).

² Иако мангела са е манушен, о Јехова тано посебно поврзимо околенцар сој тане леске послушна (Јован 14:21). Ов мангела те џа пало лескоро пример. Адалеске поттикнинела амен те сикава баро мангипе таро вило спрема амаре пхраља хем пхења (1. Пет. 4:8; Рим. 12:10). Кеда размислинаја со значинела асавко мангипе хем те овел пе поврзимо некасаја, шај авела аменге ки годи о паше однос со иси амен некасаја тари фамилија коле со бут мангаја ле или несаве мангле амалеа.

3. Со ваљани те овел амен ки годи башо мангипе?

³ Те шај јекх лулуди со аракхаја ла кхере те бајрол, ваљани те грижина амен лаке. Исто аѓаар, те шај амаро мангипе понадари да те овел баро спрема о јавера мора те кера бути ки лесте. О апостол Павле денѓа акава совет е христијаненге: „Понадари да манген тумен јекх јекхеа сар пхраља“ (Евр. 13:1). О Јехова мангела цело време те трудина амен те шај амаро мангипе спрема о јавера те бајрол. Ки акаја статија ка кера лафи башо адава соске ваљани те ова паше амаре пхраленцар хем пхењенцар хем сар шај те ова ленцар панда попаше.

СОСКЕ ВАЉАНИ ТЕ ОВА ПОПАШЕ ЈЕКХ ЈЕКХЕА

4. Спрема Псалм 133:1, со ка поможинел амен понадари да те ценина амаро пхралипе кова сој ко јекхипе? (Дикх хем о слике.)

⁴ Читин Псалм 133:1. Сложинаја амен адалеа со пишинѓа о псалмисти кај „тано шукар хем пријатно“ те ова амала околенцар со мангена е Јехова. Ама исто сар со некој шај више те на приметинел јекх шужо каш адалеске со дикхела ле секова диве, амен да шај ако на пазинаја те почмина те на ценина добором бут о шужипе со иси ко амаро христијанско јекхипе. Амен дикхаја амаре пхрален хем пхењен често, шај некобор пути ко курко. Сар шај понадари да те ценина лен? Амаро мангипе спрема о пхраља хем о пхења ка бајрол ако одвојнаја аменге време те размислина башо адава кобор секова јекх лендар тано скапоцено е собраниеске хем аменге.

5. Сар шај те влијајнел упро јавера о мангипе со иси ко амаро пхралипе?

⁵ Несаве со прво пути авена ко амаре состанокија тане воодушевиме таро мангипе со сикаваја јекх јекхеске. Адалеске шај ка хаљовен кај аракхле о чачипе. О Исус вакерѓа: „Аѓаар сарине ка џанен кај сиен мле ученикија, ако иси тумен мангипе машкар туменде“ (Јован 13:35). Размислин башо искуство јекхе чхајакоро со викинела пе Четра, која со проучинела сине е Јеховаскере сведоконцар. Ој прифатинѓа и покана те џал ко јекх регионално конгрес. Ко крајо таро прво диве и Четра вакерѓа е пхењаке која со проучинела сине лаја: „Мле родителија никогаш на гушинѓе ман, ама ко тумаро конгрес сиум сине гушими 52 пути само јекхе дивеске. Осетинѓум е Јеховаскоро мангипе преку акаја духовно фамилија. Ме да мангава те овав дело тари акаја фамилија“. И Четра понадари да напредујнѓа хем крстинѓа пе ко 2024 берш. Чаче кеда дикхена амаре шукар постапке, машкар коленде сој хем о мангипе со иси амен јекх јекхеске, о неве бут пути тане поттикниме те служинен е Јеховаске (Мат. 5:16).

6. Сар адава со ка ова попаше амаре пхраленцар хем пхењенцар шај те заштитинел амен?

⁶ Адава со ка ова панда попаше амаре пхраленцар хем пхењенцар шај те заштитинел амен. О Павле е пхраленге хем е пхењенге вакерѓа: „Охрабринен тумен јекх јекхеа секова диве... те шај нијекхескоро вило те на овел зорало таро грево коле со иси ле моќ те ховавел“ (Евр 3:13). Ако добором бут обесхрабринаја амен со почминаја те цида амен таро друмо со ингарела ки праведност, о Јехова шај те поттикнинел несаве пхрале или пхења кола со ка приметинен адава, те ден амен и помош со ваљани аменге (Пс. 73:2, 17, 23). Асавко охрабрување уствари тано аменге шукар.

7. Сар тане поврзиме о мангипе хем о јекхипе? (Колошања 3:13, 14).

⁷ Амен сием дело тари јекх група мануша кола со бут трудинена пе те сикавен мангипе јекх јекхеске хем адалеске иси амен бут благословија (1. Јов 4:11). На пример, о мангипе поттикнинела амен те трпина амен јекх јекхеа, а адава керела те ова ко јекхипе амаре пхраленцар хем пхењенцар. (Читин Колошања 3:13, 14; Еф. 4:2-6.) Адалеске ко амаре состанокија шај те дикхел пе јекхипе саво со нане машкар ки нијекх јавер група мануша ки пхув.

ТЕ СИКАВА ПОШТОВАЊЕ ЈЕКХ ЈЕКХЕСКЕ

8. Сар о Јехова поможинела амен те ова ко јекхипе амаре пхраленцар хем пхењенцар?

⁸ О јекхипе со иси машкар е Јеховаскере слуге ко цело свето тано баро чудо. О Јехова поможинела амен те ова ко јекхипе иако сием несовршена (1. Кор. 12:25). Ки Библија пишинела кај сием сикавде таро Девел те манга амен јекх јекхеа (1. Сол. 4:9). Јавере лафенцар, ко пло лафи о Јехова вакерела аменге со точно ваљани те кера те шај те ова попаше јекх јекхеа. Шај те мукха те ова сикавде таро Девел аѓаар со шукар ка проучина лескере сикљојба хем ка применина лен (Евр. 4:12; Јак. 1:25). Е Јеховаскере сведокија трудинена пе те керен баш адава!

9. Со сикљоваја таро Римјања 12:9-13, башо адава те сикавел пе поштовање е јаверенге?

⁹ Сар е Девлескоро Лафи сикавела амен те ова попаше јекх јекхеа? Те дикха со вакерѓа о Павле башо акава ко Римјања 12:9-13. (Читин.) Те пазина посебно ко лафија „овен прва ко адава те сикавен кај поштујнена јекх јекхе“. Со значинела акава? Ваљани те рода прилике те сикава кај таро вило мангаја е јаверен ко различна начинија, сар на пример, те простина, те ова гостопримлива хем дарежлива (Еф. 4:32). На ваљани те аџикере тло пхрал или тли пхен те керен нешто те шај те овен туја попаше, наместо адава ту шај те кере о прво чекори. Тегани ка осетине кобор тане чаче о лафија е Исусескере: „Повише радост иси кеда дела пе, него кеда лела пе“ (Апо. 20:35).

10. Сар шај те ова буќарне кеда керела пе лафи башо адава те сикава поштовање јекх јекхеске? (Дикх хем и слика.)

¹⁰ Интересно тано со одма откеда вакерѓа те ова прва ко адава те сикава поштовање јекх јекхеске, о Павле советинѓа амен те на ова мрзале, него те ова буќарне. Окова сој буќарно тано ревно хем бут трудинела пе. Кеда ка добинел несави задача ов дела пестар са те шај шукар те керел ла. О Изреки 3:27, 28 поттикнинела амен: „Ма чхинав те кере шукарипе околенге со ваљани, ако шај те кере адава“. Спрема акала лафија кеда ка приметина кај некаске ваљани нешто, кераја са со шај те поможина ле. Амен на одложинаја, а ни палем на мислинаја кај некој јавер ка поможинел ле (1. Јов 3:17, 18).

11. Со шај те поможинел амен те ова попаше јекх јекхеа?

¹¹ Јавер начин сар шај те сикава поштовање е јаверенге тано аѓаар со сигате ка простина ленге кеда ка поврединен амен. Ко Ефешања 4:26 пишинела: „Ма мукхен те накхел о диве, а тумен панда те овен хољаме“. Соске те на икера холи? Ако икераја холи, спрема о 27 стихо ка мукха тхан е Бенгеске те влијајнел. Ко пло лафи о Јехова цело време вакерела аменге те простина аменге машкар аменде. Ко Колошања 3:13 сием поттикниме спремно те простина јекх јекхеске. О простибе е јаверенгере грешке тано јекх таро најшукар начинија те ова попаше ленцар. Кеда кераја адава поможинаја те икера о јекхипе кова со добинаја ле преку е Девлескири сила, а керела те ова ко мир е јаверенцар (Еф. 4:3). Значи, о простибе тани главно бути која со керела машкар е Јеховаскоро народо те овел јекхипе хем мир.

12. Сар о Јехова поможинела амен те простина?

¹² Нормално, шај те овел аменге пхаро те простина околенге со поврединѓе амен. Ама шај адава те кера ле адалеске со поможинела амен е Девлескири сила. Откеда о Павле поттикнинѓа амен те манга амен таро вило јекх јекхеа хем те на ова мрзале, ов вакерѓа акава да: „Е Девлескири сила нека поттикнинел тумен те овен ревна“. Адава значинела кај е Девлескири сила шај те поможинел амен те ова ревна хем те манга те кера са адава со о Јехова родела амендар. А о Јехова родела амендар те манга амен таро вило јекх јекхеа хем спремно те простина аменге. Адалеске, вилестар молинаја е Јехова те поможинел амен ко адава (Лука 11:13).

„МАШКАР ТУМЕНДЕ ТЕ НА ОВЕН ПОДЕЛБЕ“

13. Со шај те керел поделбе машкар аменде?

¹³ Ко собрание иси различна мануша колен со иси лен различно потекло (1. Тим. 2:3, 4). Ако на пазинаја, о разлике шај те керен поделбе машкар аменде кеда керела пе лафи башо буќа коленге со ваљани коркори те одлучина, сар на пример сар ка урава амен, сар ка дотерина амен, сар ка грижина амен башо амаро састипе или сави забава ка бирина (Рим. 14:4; 1. Кор. 1:10). Адалеске со о Девел сикавѓа амен те манга амен таро вило јекх јекхеа, мора те пазина те на чхива е јаверен те дикхен ко асавке буќа исто сар аменде, соске мислинаја кај амаро мислење тано пошукар (Фил. 2:3).

14. Со ваљани секогаш те трудина амен те кера, хем соске?

¹⁴ Исто аѓаар, шај те чхинава те авел џи ко поделбе ко собрание аѓаар со ка трудина амен секогаш те утешина хем те изградина е јаверен (1. Сол. 5:11). Ко последно време, бут баро број таро адала со на сине активна или со сине цидиме таро собрание, иранѓе пе. А амен мангипаја доџакераја лен! (2. Кор. 2:8). Приметин со случинѓа пе јекхе пхењаке која со али ко состанок ки дворана откеда деш берш на сине активно. Ој вакерѓа: „Сарине асандиле манцар хем поздравинѓе пе“ (Апо. 3:19). Сар влијајнѓа упри лате адава со о пхраља сине љубезна? Ој вакерела: „Осетинѓум кај о Јехова поможинела ман палем те овав среќно“. Кеда трудинаја амен те охрабрина саринен о Христос шај те користинел амен те шај те дел неви сила околенге сој уморна хем со иси лен пхарипе (Мат. 11:28, 29).

15. Ко саво јавер начин шај те кера јекхипе? (Дикх хем и слика.)

¹⁵ Јавер начин сар шај те кера јекхипе тано амаре лафенцар. Ко Јов 12:11 пишинела: „Зарем о кан на испитинела о лафија сар со и чхиб пробинела о хајбе?“ Англедер те чхивел хајбаске јекх шукар готвачи секогаш пробинела те шај те овел сигурно кај тано вкусно. Слично, амен да ваљани шукар те размислина англедер те вакера нешто (Пс. 141:3). Амари цел ваљани секогаш те овел те уверина амен кај адава со мангаја те вакера ле ка изградинел, ка охрабринел хем кај ка овел корисно околенге со шунена амен (Еф. 4:29).

16. Кој посебно ваљани те трудинел пе пле лафенцар те охрабринел е јаверен?

¹⁶ Посебно о рома хем о родителија ваљани те трудинен пе пле лафенцар те изградинен е јаверен (Кол. 3:19, 21; Тит 2:4). О старешине да ваљани те охрабринен хем те утешинен е јаверен џикоте сар пастирија грижинена пе башо е Јеховаскоро стадо (Иса. 32:1, 2; Гал. 6:1). Јекх библиско изрека вакерела: „О лафи вакердо ко право време — кобор тано шукар!“ (Изр. 15:23).

ТЕ МАНГА АМЕН „ПОСТАПКЕНЦАР ХЕМ ЧАЧИПАЈА“

17. Сар шај те ова сигурна кај амаро мангипе спрема о пхраља хем о пхења авела таро вило?

¹⁷ О апостол Јован вакерѓа „те на манга амен само лафенцар или само чхибјаја, него постапкенцар хем чачипаја“ (1. Јов. 3:18). Мангаја амаро мангипе спрема о пхраља хем о пхења те авел таро амаро вило. Сар шај те кера адава? Кобор повише накхаваја време амаре пхраленцар хем пхењенцар добором попаше ка ова ленцар хем панда повише ка манга амен јекх јекхеа. Адалеске роде прилике те ове е јаверенцар ко состанокија хем ки служба. Одвојн туке време те џа ко тле пхраља хем ко тле пхења. Ако кераја акала буќа тегани ка дикхјол кај сием сикавде таро Девел те манга амен јекх јекхеа (1. Сол. 4:9). Аѓаар понадари да ки амари кожа ка осетина „кобор тано шукар хем пријатно кеда о пхраља живинена заедно ко јекхипе!“ (Пс. 133:1).