Џа пало пример е верна ангеленгоро

1-2. а) Ко со разликујнаја амен таро ангелија? б) Со иси амен заедничко е ангеленцар?

САР Јеховаскоро народо, амен сием дело тари јекх фамилија која со служинела леске. Ки адаја фамилија тане амаре пхраља хем пхења таро цело свето, ама хем милиоња ангелија да (Дан. 7:9, 10). Кеда размислинаја башо ангелија, шај одма мислинаја ко адава кај тане бут различна амендар. На пример, о ангелија сине створиме бут време англедер о мануша (Јов 38:4, 7). Ола тане бут помоќна амендар. Исто аѓаар, ола тане света хем праведна добором бут со амен сар несовршена мануша, нашти те реса адава (Лука 9:26).

² Иако сием различна лендар, амен сепак иси амен бут заедничка буќа е ангеленцар. На пример, исто сар о ангелија, амен да шај те сикава о бут шуже особине со иси е Јехова. Амен иси амен слободно волја исто сар со иси е ангелен. Секова јекх лендар иси ле пло анав, различно карактер хем различна задаче ки служба башо Јехова, о исто тано аменцар да. Хем, слично сар о ангелија, амен да иси амен потреба те обожавина амаре Створителе (1. Пет. 1:12).

3. Со шај те сикљова таро верна ангелија?

³ Адалеске со иси амен бут заедничка буќа е ангеленцар, таро ленгоро шукар пример шај те охрабрина амен хем те сикљова бут важна буќа. Ки акаја статија ка дикха сар шај исто сар о верна ангелија амен да те ова понизна, те манга е манушен, те ова истрајна хем те трудина амен о собрание те ачховел чисто.

О АНГЕЛИЈА ТАНЕ ПОНИЗНА

4. а) Сар о ангелија сикавена кај тане понизна? б) Соске о ангелија тане понизна? (Псалм 89:7).

⁴ О верна ангелија тане понизна. Иако иси лен бут баро искуство хем тане бут моќна хем мудра, ола шунена е Јеховаскере упатствија (Пс. 103:20). Кеда керена пумаре задаче со дела лен о Јехова, о ангелија никогаш на фалинена пе адалеа, а ни палем на користинена пли моќ те истакнинен пе. Ола радосно керена са адава со родела лендар о Јехова, чак ако о јавера никогаш нане те џанен ленгере анаваa (1. Мој. 32:24, 29; 2. Цар. 19:35). Ола на мангена те сикавел пе ленге било сави чест која со припадинела само е Јеховаске. Соске о ангелија тане добором понизна? Адалеске со мангена е Јехова хем хор поштујнена ле. (Читин Псалм 89:7.)

5. Сар јекх ангели сикавѓа понизност кеда испрајнѓа е Јоване? (Дикх хем и слика.)

⁵ Размислин баши јекх ситуација која со сикавела кај о ангелија тане понизна. Околу 96-то берш а.е., јекх ангели колескоро анав на џанаја, сикавѓа јекх бут интересно визија е апостол Јованеске (Отк. 1:1). Сар реагиринѓа о Јован? Ов пело англи лесте те шај те поклонинел пе леске. Ама о ангели сигате чхинавѓа ле, е лафенцар: „Ма кер адава! Ме да сиум само робо сар ту хем тле пхраља... Поклонин тут е Девлеске!“ (Отк. 19:10). Кобор сине понизно акава ангели! Ов на мангља те добинел чест хем слава, него одма вакерѓа е Јованеске те концентриринел пе ко Јехова. Ама, исто аѓаар, о ангели на мислинѓа кај о Јован тано похари вредно лестар. Иако о ангели служинѓа е Јеховаске бут повише време хем сине бут помоќно таро Јован, сепак понизно вакерѓа леске кај ов да тано робо сар лесте. Иако ваљанѓа те испрајнел ле, о ангели на понашинѓа пе леа грубо. Наместо адава, ов керѓа леа лафи љубезно. Ов веројатно халило кај о Јован мангља те поклонинен пе леске адалеске со сине воодушевимо таро адава со дикхља.

6. Сар шај те ова понизна сар о ангелија?

⁶ Сар шај те ова понизна сар о ангелија? Амен да шај те кера о задаче ки служба башо Јехова, бизо те фалина амен хем бизо те кера нешто те шај о јавера те фалинен амен башо адава со керѓем (1. Кор. 4:7). Освен адава, на ваљани те мислина кај сием пошукар таро јавера адалеске со служинаја е Јеховаске повише време лендар или адалеске со иси амен задаче кола со лен нане лен. Уствари, кобор повише одговорностија иси амен, добором повише ваљани те дикха ки аменде сар потикне таро јавера (Лука 9:48). Исто сар о ангелија, амен мангаја те служина е јаверенге. На мангаја те чхива е јаверен те мислинен кај сием поважна лендар.

7. Сар шај те сикава понизност кеда ваљани те испрајна некас или те да совет?

⁷ Понизност шај те сикава хем кеда ваљани те испрајна некас или те да совет, на пример несаве пхралеске или амаре чхавеске. Понекогаш ваљани те да директно совет. Ама исто сар о ангели кова со љубезно испрајнѓа е Јоване, амен да шај те да директно совет, бизо те обесхрабрина е јавере. Ако на мислинаја кај сием пошукар таро јавера, адава ка поможинел аменге те да библиско совет ко начин со ка сикавел ка поштујнаја е јавере хем ка ова љубезна (Кол. 4:6).

О АНГЕЛИЈА МАНГЕНА Е МАНУШЕН

8. а) Спрема Лука 15:10, сар о ангелија сикавена кај мангена е манушен? б) Сави улога иси е ангелен ко проповедибе? (Дикх хем и слика.)

⁸ О ангелија на игнориринена адава со случинела пе аменге, а ни на мислинена кај на сием важна. Ола мангена е манушен. О ангелија радујнена пе кеда несаво грешнико ка каинел пе, јавере лафенцар кеда несаво бакхро со нашавдило, ка иранел пе ко Јехова или кеда некој ка менинел о начин сар живинела хем ка прифатинел о чачипе. (Читин Лука 15:10.) Исто аѓаар, о ангелија активно учествујнена ко проповедибе (Отк. 14:6). Иако на проповединена директно е манушенге, ола шај те водинен амен џи некасте со мангела те сикљовел башо Јехова. Џанѓола пе, нашти сигурно те вакера кај о ангелија водинѓе амен ки секоја конкретно ситуација. О Јехова шај те користинел хем јавера да начинија — на пример пли сила — те шај те поможинел е манушенге те дознајнен баши лесте или те водинел пле слуген џи ленде (Апо. 16:6, 7). Сепак, ов бут користинела пле ангелен да. Адалеске, кеда проповединаја о шукар хабери, шај те ова сигурна кај о ангелија тане акате те поможинен аменге. (Дикх и рамка „Ола добинѓе одговор ко пумаре молитве“.)b

9. Сар шај те манга е манушен сар о ангелија?

⁹ Сар шај те манга е манушен сар о ангелија? Кеда ка шуна известување кај некој палем тано ирамо ко собрание, шај те радујна амен исто сар со радујнена пе о ангелија. Шај те вакера околеске сој ирамо кај мангаја ле хем кај сием радосна со палем служинела е Јеховаске (Лука 15:4-7; 2. Кор. 2:6-8). Панда јекх начин сар шај те џа пало пример е ангеленгоро тано аѓаар со ка да амаро најшукар те шај те проповедина (Проп. 11:6). Хем, исто сар о ангелија со поддржинена амен џикоте вакераја о шукар хабери, амен да шај те аракха начинија те поддржина амаре пхрален хем пхењен ки служба. На пример, шај те планирина те џа ки служба несаве поневе објавителеа. Или, шај те поможина е пхраленге хем е пхењенге сој попхуре или со иси лен проблемија састипаја те учествујнен ки служба.

10. Со шај те сикљова таро е Саракоро искуство?

¹⁰ Со ако амаре околностија на дозволинена аменге те кера ки служба башо Јехова добором кобор со мангаја? Шај те аракха јавера начинија те соработина е ангеленцар ко проповедибе. Размислин башо искуство е Саракоро,c јекх пхен тари Индија. Откеда служинѓа сар пионери околу 20 берш, и Сара насвалили хем повише нашти сине те уштел таро кревети. Ој сине бут разочарими. Ама, пало несаво време, и Сара палем ули радосно адалеске со поможинена ла сине о пхраља хем о пхења таро собрание хем адалеске со редовно читинела сине и Библија. Џанѓола пе, ој ваљанѓа те аракхел неве начинија те шај те керел пли служба. Адалеске со нашти сине ни те бешел те шај те пишинел писмија, и Сара шај сине те сведочинел само преку телефони. Адалеске, ој јавинѓа пе ко пле повторна посете, а ола вакерѓе лаке башо јавера кола со шај би мангена те проучинен и Библија. Со уло пало адава? Башо само некобор масекија, е Сара сине ла 70 библиска курсија. Ој нашти сине те ресел те проучинел сариненцар, адалеске замолинѓа несавен таро собрание те проучинен некоборе џененцар. Бут џене таро адала со проучинена акана џана ко амаре состанокија. Сигурно о ангелија тане бут радосна кеда соработинена пхраленцар хем пхењенцар сар сој и Сара, кола со керена са со шај те учествујнен ко проповедибе!

О АНГЕЛИЈА ТАНЕ ИСТРАЈНА

11. Сар о верна ангелија сикавѓе кај тане истрајна?

¹¹ О верна ангелија тане бут шукар пример баши истрајност. Ола више бут берша трпинена и неправда хем о лошнипе. О ангелија дикхле сар о Сатана хем бут јавера духовна суштествија, кола со англедер служинѓе е Јеховаске заедно ленцар, бунинѓе пе против о Девел (1. Мој. 3:1; 6:1, 2; Јуда 6). Тари Библија џанаја кај јекх верно ангели мора сине дивенцар те боринел пе јекхе моќно демонеа (Дан. 10:13). Исто аѓаар, таро време е Адамескоро хем е Евакоро па џи авдиве, о ангелија дикхена кај само хари мануша биринена те служинен е Јеховаске. Сепак, акала верна ангелија понадари да служинена е Јеховаске радосно хем ревно. Ола џанена кај о Девел ко право време ка цидел са о неправде.

12. Со шај те поможинел амен те истрајна?

¹² Сар шај те ова истрајна сар о ангелија? Исто сар ленде, амен да шај ка дикха неправде или ка доживина противибе. Ама, амен да сием сигурна кај о Девел ко право време ка цидел са о лошнипе. Адалеске, исто сар о верна ангелија, на откажинаја амен „те кера шукарипе“ (Гал. 6:9). А о Девел да ветинела аменге кај ка поможинел амен те истрајна (1. Кор. 10:13). Шај те молина е Јехова те дел амен пли сила која со ка поможинел аменге те ова стрплива хем радосна (Гал. 5:22; Кол. 1:11). Со ако иси тут противибе? Нека овел тут целосно доверба ко Јехова хем ма дара. О Јехова секогаш ка поможинел туке хем ка дел тут сила (Евр. 13:6).

О АНГЕЛИЈА ПОМОЖИНЕНА О СОБРАНИЕ ТЕ АЧХОВЕЛ ЧИСТО

13. Која посебно задача иси е ангелен џикоте трајнена о последна диве? (Матеј 13:47-49).

¹³ Милиоња мануша ко цело свето интересинена пе башо шукар хабери. Несаве таро акала мануша керена промене те шај те овен чачутне христијања, а јавера на. Џикоте трајнена о последна диве, о Јехова денѓа е ангеленге јекх посебно задача — те „одвинен е лошна манушен таро праведна“. (Читин Матеј 13:47-49.) Значи, е ангелен иси лен задача те поможинен о собрание те ачховел чисто. Ама, адава на значинела кај секој со чхинавѓа те проучинел хем те дружинел пе е Јеховаскере народоја тари било сави причина, никогаш ка нашти те иранел пе ко собрание. А ни на значинела кај ко собрание никогаш нане те овен проблемија. Сепак, шај те ова сигурна кај о ангелија бут трудинена пе те шај амаре собранија те ачховен чиста.

14-15. Сар шај амен да сар о ангелија те поможина о собрание те ачховел чисто ко морално хем духовно поглед? (Дикх хем о слике.)

¹⁴ Сар шај амен да сар о ангелија те поможина о собрание те ачховел чисто? Аѓаар со ка кера амаро дело те шај о собрание те ачховел чисто ко морално хем духовно поглед. Адалеске, биринаја амала кола со мангена е Јехова хем цидаја амен таро са со шај те руминел амаро амалипе леа (Пс. 101:3). Исто аѓаар, шај те поможина амаре пхраленге те ачховен верна е Јеховаске. На пример, со ваљани те кера ако дознајнаја кај некој керѓа сериозно грево? Адалеске со мангаја ле, ка поттикнина ле те керел лафи е старешиненцар. Ако ов на керела адава, амен ваљани те вакера е старешиненге башо адава со случинѓа пе. Амен мангаја со посигате те поможинел пе амаре пхралеске кова со руминѓа пло амалипе е Јеховаја (Јак. 5:14, 15).

¹⁵ Жално тано со несаве кола со керѓе сериозно грево ваљани те овен цидиме таро собрание. Тегани, амен чхинаваја те дружина амен асавкенцарd (1. Кор. 5:9-13). Акава поможинела о собрание те ачховел чисто. Исто аѓаар, адалеа со на дружинаја амен околенцар сој цидиме таро собрание, амен уствари сикаваја ленге мангипе. Амаро цврсто стави шај те поможинел лен те хаљон кај ваљани те иранен пе ко Јехова. Ако керена адава, амен ка радујна амен заедно е Јеховаја хем лескере ангеленцар (Лука 15:7).

16. Ко саве начинија ка трудине тут те џа пало пример е ангеленгоро?

¹⁶ Аменге тани бари чест адава со о Јехова дозволинела те дознајна нешто повише башо ангелија хем те соработина ленцар! Те џа пало ленгоро пример аѓаар со амен да сар ленде ка трудина амен те ова понизна, ка манга е манушен, ка ова истрајна хем ка поможина о собрание те ачховел чисто ко морално хем духовно поглед. Ако џаја пало пример е верна ангеленгоро, амен да ка шај те служина е Јеховаске сар дело тари лескири фамилија ки цели вечност.