ОНЛАЈН БИБЛИОТЕКА Watchtower
ОНЛАЈН БИБЛИОТЕКА
Watchtower
романе (Македонија) кирилица
  • БИБЛИЈА
  • ПУБЛИКАЦИЕ
  • СОСТАНОКИЈА
  • w25 Мај стр. 8-13
  • О Јехова нека овел тли утеха

Нане видео башо акава дело.

Жал аменге, иси грешка, нашти пхраваја о видео.

  • О Јехова нека овел тли утеха
  • Стражарско кула објавинела е Јеховаскоро Царство (Башо проучибе) 2025
  • Поднасловија
  • Слично материјали
  • О ЈЕХОВА МИЛОСТИВО ПРОСТИНЕЛА АМЕНГЕ
  • О ЈЕХОВА ДЕЛА АМЕН НАДЕЖ
  • О ЈЕХОВА ПОМОЖИНЕЛА АМЕН ТЕ НА ДАРА
  • О Јехова „сасљарела адален сој пхаге вилеа“
    Стражарско кула објавинела е Јеховаскоро Царство (Башо проучибе) 2024
  • Скромно прифатин кај иси буќа со на џанеа
    Стражарско кула објавинела е Јеховаскоро Царство (Башо проучибе) 2025
  • Никогаш на сием коркори
    Стражарско кула објавинела е Јеховаскоро Царство (Башо проучибе) 2025
  • Одлуке кола со сикавена кај иси амен доверба ко Јехова
    Амаро живото хем служба сар христијања — листија спремибаске (2023)
Дикх побутер
Стражарско кула објавинела е Јеховаскоро Царство (Башо проучибе) 2025
w25 Мај стр. 8-13

СТАТИЈА ПРОУЧИБАСКЕ 20

ГИЛИ 7 О Јехова тано амари сила

О Јехова нека овел тли утеха

Нека овел фалимо о Дад сој милостиво хем о Девел секоле утехакоро (2. КОР. 1:3)

СО КА СИКЉОВА

Ка дикха со шај те сикљова таро адава сар о Јехова утешинѓа е Евреен со сине ко Вавилон.

1. Саво сине о живото е Евреенгоро кола со сине робија ко Вавилон?

ЗАМИСЛИН ТУКЕ сар осетинена пе сине о Евреија кола со сине робија ко Вавилон. Ола пле јакхенцар дикхле сар о Вавилонција уништинена ленгири пхув. Башо ленгере гревија хем о гревија ленгере парапапонгере, о Евреија сине ленде сар робија ко Вавилон (2. Лет. 36:15, 16, 20, 21). Точно, џи негде ола шај сине те живинен нормално живото (Ерем. 29:4-7). Сепак, ленгоро живото на сине локхо хем ола сигурно коркори на би биринена сине те живинен аѓаар. Сар осетинѓе пе адалеске со сине ки асавки ситуација? Приметин со вакерѓа јекх лендар: „Узо вавилонска реке бешаја сине хем роваја сине кеда сетинаја амен сине ко Сион“ (Пс. 137:1). Е Евреенге чаче ваљани сине утеха. Ама кој шај сине те утешинел лен?

2-3. а) Со керѓа о Јехова е Евреенге кола со сине ко ропство? б) Башо со ка кера лафи ки акаја статија?

2 О Јехова тано „о Девел секоле утехакоро“ (2. Кор. 1:3). Ов мангела пле слуген хем спремно дела лен и утеха со ваљани ленге. О Јехова џанља кај несаве робија ко Вавилон ка прифатинен лескоро укор хем кај ка почминен те служинен леске ко исправно начин (Иса. 59:20). Адалеске, повише таро 100 берш англедер те овен ленде сар робија ко Вавилон, о Јехова пле силаја поттикнинѓа е пророко е Исаија те пишинел о лил кова со пхиравела лескоро анав. Соске сине пишимо адава лил? О Исаија пишинѓа: „’Утешинен, утешинен мле народо!‘ — вакерела тумаро Девел“ (Иса. 40:1). Преку о лил Исаија, о Јехова денѓа и утеха со ваљанѓа е Евреенге кола со сине робија.

3 Исто сар адале Евреенге, аменге да понекогаш ваљани утеха. Ки акаја статија ка дикха трин начинија сар о Јехова утешинѓа адален со сине ко ропство: 1) ветинѓа кај ка простинел околенге со ка каинен пе, 2) денѓа надеж пле слугенге хем 3) поможинѓа ленге те на даран. Џикоте кераја лафи башо акала буќа, приметин сар шај амен да те овел амен корист таро е Јеховаскере утешна лафија.

О ЈЕХОВА МИЛОСТИВО ПРОСТИНЕЛА АМЕНГЕ

4. Сар о Јехова сикавѓа кај тано милостиво Девел? (Исаија 55:7).

4 О Јехова тано „Дад сој милостиво“ (2. Кор. 1:3). Ов сикавѓа акаја особина кеда простинѓа е Евреенге со сине ко Вавилон кола со каинѓе пе. (Читин Исаија 55:7.) О Јехова вакерѓа кај башо пло верно мангипе ка овел милостиво спрема ленде (Иса. 54:8, фус.). Сар о Јехова ка сикавел ленге сине милост? Точно, адалеске со о Евреија на сине послушна сар казна ваљани сине бут берша те овен ко Вавилон. Ама, о Јехова ветинѓа ленге кај нане те ачховен адатхе засекогаш (Иса. 40:2). Акава сигурно бут утешинѓа е Евреен кола со каинѓе пе хем кола со мангле те радујнен е Јехова!

5. Соске амен шај те ова панда посигурна таро Евреија со сине робија ко Вавилон кај о Јехова простинела аменге?

5 Со сикљоваја таро акава? О Јехова тано спремно целосно те простинел пле слугенге. Амен авдиве шај те ова панда посигурна ко акава таро Евреија кола со сине ко Вавилон. Соске? Адалеске со џанаја со керѓа о Јехова те шај те простинел аменге. Веконцар откеда сине пишимо о пророштво е Исаијаскоро, о Јехова бичхалѓа пле мангле Чхаве ки пхув те шај те дел откупнина башо са о грешникија кола со каинена пе. Адалеске со о Исус муло аменге, о Јехова шај те „косел“, јавере лафенцар целосно те простинел амаре гревија (Апо. 3:19; Иса. 1:18; Еф. 1:7). Кобор милостиво тано о Девел колеске со служинаја!

6. Соске тано утешно те размислина баши е Јеховаскири милост? (Дикх хем и слика.)

6 О лафија е Јеховаскере сој пишиме ко Исаија 55:7 шај те утешинен амен ако понадари да осетинаја амен претерано крива баши несави грешка со керѓем ла англедер, чак хем откеда каинѓем амен. Акава шај те случинел пе посебно ако панда трпинаја о последице тари амари грешка. Ама, ако признајнѓем амаре гревија хем ако чхинавѓем те кера адава сој погрешно, шај те ова сигурна кај о Јехова простинѓа аменге. А кеда о Јехова простинела ов одлучинела те на сетинел пе више ко амаро грево. (Споредин Еремија 31:34.) Значи, ако о Јехова на размислинела више башо гревија со керѓем лен англедер, ни амен на ваљани те размислина баши ленде. Е Јеховаске тано важно со кераја акана, а на саве грешке керѓем англедер (Езек. 33:14-16). Исто аѓаар, панда хари амаро милостиво Дад ка ослободинел амен целосно таро последице со иси амен адалеске со грешинѓем.

Јекх пхрал пхирела сигурна чекоренцар. Слике: Ко слике дикхјола и разлика машкар адава со керела сине англедер хем со керела акана. О грешке со керѓа лен англедер: 1. Кхелѓа насилна видеоигре. 2. Пиља хем пушинѓа. 3. Дикхља непристојна буќа ко пло компјутери. Со керела акана: 1. Чистинела и дворана. 2. Керела лафи јекхе попхуре пхењаја. 3. Џала ки служба.

Е Јеховаске тано важно со кераја акана, а на саве грешке керѓем англедер (Дикх ко пасус 6)


7. Со шај те поттикнинел амен те рода помош ако гараваја кај керѓем грево?

7 Со ваљани те кера ако мучинела амен амари совест адалеске со гараваја кај керѓем несаво сериозно грево? И Библија поттикнинела амен те рода помош таро старешине (Јак. 5:14, 15). Сепак, шај нане те овел аменге локхо те признајна амаро грево. Ама, ако каинаја амен хем на бистраја кај о Јехова користинела акале пхрален те шај те поможинел аменге хем кај ола ка постапинен аменцар милостиво хем мангипаја, адава ка поттикнинел амен те кера ленцар лафи. Те дикха сар о Јехова користинѓа е старешинен те шај те утешинел јекхе пхрале со викинела пе Артурa коле со мучинела ле сине бут и совест. Ов вакерела: „Околу јекх берш дикхљум порнографија. Ама, откеда шунѓум јекх говор баши совест, признајнѓум мло грево ме ромњаке хем е старешиненге. Откеда керѓум ленцар лафи, конечно локхиљум, ама понадари да мучинела ман сине мли совест башо адава со керѓум. О старешине сетинкерѓе ман кај о Јехова понадари да мангела те овав лескоро амал. Ов укоринела амен адалеске со мангела амен. О љубезна лафија е старешиненгере погодинѓе ман ко вило хем поможинѓе манге те хаљовав кај о Јехова чаче простинѓа манге“. Авдиве, о Артур служинела сар пионери хем слуга-помошнико. Бут тано утешно те џана кај о Јехова секогаш тано спремно те простинел аменге ако каинаја амен башо грешке со керѓем лен!

О ЈЕХОВА ДЕЛА АМЕН НАДЕЖ

8. а) Сави надеж денѓа о Јехова е Евреенге со сине робија? б) Спрема Исаија 40:29-31, сар шај сине те влијајнел и надеж упро Евреија кола со каинѓе пе?

8 Аменге е манушенге шај те изглединел кај е Евреенге со сине ко Вавилон на сине нисави надеж. Сар светско сила, о Вавилон сине пенџардо пало адава кај на ослободинела пле робон (Иса. 14:17). Ама, о Јехова денѓа надеж пле слугенге. Ов ветинѓа кај ка ослободинел лен хем ништо нашти сине те чхинавел ле ко адава (Иса. 44:26; 55:12). Е Јеховаске о Вавилон сине сар право (Иса. 40:15). Ваљани само јекх пути те пхуде хем о право нане више те овел. Добором локхо сине е Јеховаске те ослободинел пле слуген таро Вавилон. Сар шај сине акаја надеж те влијајнел упро Евреија? Шај сине те утешинел лен, ама шај сине исто аѓаар те керел нешто бут повише таро адава. О Исаија пишинѓа: „Окола со надинена пе ко Јехова добинена неви сила“. (Читин Исаија 40:29-31.) Асавки надеж ка дел лен сине неви сила хем ка овен сине „сар орлија [кола со] ваздена пе ко пака“.

9. Саво доказ сине е Евреен кај о ветувања е Јеховаскере ка исполнинен пе?

9 О Јехова исто аѓаар денѓа е Евреенге доказ кај адава со ветинѓа ка исполнинел пе. Саво доказ денѓа лен? Размислин башо пророштвија коленге со ола џанле кај више исполнинѓе пе. На пример, ола џанле кај и Асирија освојнѓа о Царство таро деш племија Израел хем ингарѓа е народо ко ропство (Иса. 8:4). Ола дикхле сар о Вавилонција уништинена о Ерусалим хем ингарена е манушен ко ропство (Иса. 39:5-7). Освен адава, сине џивде кеда о Вавилонско цари корјарѓа е царе е Седекија хем ингарѓа ле ко Вавилон (Ерем. 39:7; Езек. 12:12, 13). Са со пророкујнѓа о Јехова исполнинѓа пе (Иса. 42:9; 46:10). Са акава сигурно керѓа позорали ленгири вера кај ка исполнинел пе хем е Јеховаскоро ветување кај ка ослободинел лен!

10. Со ка поможинел аменге амари надеж те ачховел силно ко акала последна диве?

10 Со сикљоваја таро акава? Кеда сием разочариме, и надеж баши иднина шај те утешинел амен хем те дел амен сила. О условија ко свето овена са полошна, а исто аѓаар противинена пе аменге бут моќна душмања. Ама, на смејнаја те ова претерано разочариме. О Јехова дела амен јекх бут шужи надеж кај ка живина ко рај коте со ка овел чачутно мир хем сигурност. Мора цело време те икера ки годи акаја надеж. Ако на кераја адава, шај те случинел пе амари надеж те замаглинел хем те овел сар те пхене дикхаја јекх бут шужи природа таро мелало џами. Сар шај „те чистина о џами“, јавере лафенцар те икера амари надеж силно? Шај редовно те одвојна аменге време те шај те замислина кобор шужо ка овел о живото ко нево свето. Шај те читина статие, те дикха видеоклипија хем те шуна гиља со керена лафи баши амари надеж. Исто аѓаар, ки молитва шај те вакера е Јеховаске саве ветувања едвај аџикераја те исполнинен пе ко рај.

11. Со дела сила јекхе пхењаке кола со иси ла сериозна проблемија састипаја?

11 Размислин сар и надеж утешинела хем дела сила јекхе пхења со викинела пе Џој, кола со повише време иси ла проблемија састипаја. Ој вакерела: „Кеда осетинава ман уморно таро мле проблемија, вакерава е Јеховаске мле најхор чувствија хем џанава кај ов хаљовела ман. Ко асавке моментија, о Јехова дела ман ’сила, која со накхавела и нормално‘“ (2. Кор. 4:7). И Џој исто аѓаар замислинела пе ко нево свето коте со „нијекх со живинела ки пхув нане те вакерел: ’Насвало сиум‘“ (Иса. 33:24). Ако амен да вакераја е Јеховаске амаре најхор чувствија хем ако концентриринаја амен ки амари надеж, ка овел амен сила те истрајна ко неволје.

12. Соске шај те овел амен доверба кај ка исполнинен пе е Јеховаскере ветувања? (Дикх хем и слика.)

12 Исто сар со сине е Евреенцар ко Вавилон, о Јехова денѓа аменге да бут причине те овел амен доверба ко лескере ветувања. Размислин башо пророштвија кола со дикхаја кај исполнинена пе. На пример, дикхаја е англо-американско светско сила колатар со јекх дело тано зорало, а о јавер дело тано слабо (Дан. 2:42, 43). Исто аѓаар, шунаја башо „земјотресија ко разна тхана“ хем проповединаја о шукар хабери са е народонге (Мат. 24:7, 14). Адава со исполнинѓе пе акала хем бут јавера пророштвија, уверинела амен кај ка исполнинел пе са адава да со ветинѓа о Јехова баши иднина.

Јекх пхен читинела хем размислинела башо библиска пророштвија. Слике: 1. Јекх брачно терѓола ки количка сведочибаске хем керела лафи јекхе манушеа. 2. Јекх дад хем јекх чхаво дикхена ко рушевине со уле тари јекх природно катастрофа. 3. Јекх бар кхувела ко пре таро кипи со дикхља ле о Навуходоносор ко суно кова сој пишимо ко Даниел поглавје 2. 4. О мануша уживинена ко рај ки пхув.

О пророштвија кола со исполнинена пе авдиве поможинена аменге те овел амен доверба кај ка исполнинен пе е Јеховаскере ветувања (Дикх ко пасус 12)


О ЈЕХОВА ПОМОЖИНЕЛА АМЕН ТЕ НА ДАРА

13. а) Саве проблемија сине е Евреен ко време кеда ваљани сине те овен ослободиме? б) Спрема Исаија 41:10-13, сар о Јехова утешинѓа е Евреен кола со сине робија ко Вавилон?

13 Иако о Јехова утешинѓа е Евреен аѓаар со денѓа лен јекх бут шужи надеж, ов џанља кај ко време кеда ка ослободинел лен ка овен лен проблемија. О Јехова пророкујнѓа кај кратко англедер о Евреија те овен ослободиме, јекх моќно цари прво ка нападинел е народон околу о Вавилон, а пало адава ка кхувел хем ко Вавилон (Иса. 41:2-5). Дали о Евреија ваљани сине те даран? Бут берша англедер те случинел пе акава, о Јехова утешинѓа пле народо. Ов вакерѓа: „Ма дара, соске ме сиум туја! Ма ов секиримо, соске ме сиум тло Девел!“ (Читин Исаија 41:10-13.) Со мангља те вакерел о Јехова е лафенцар: „Ме сиум тло Девел“? Адалеа на мангља те сетинкерел е Евреен кај ваљани те обожавинен ле, соске ола више џанена сине адава. Уствари, мангља те сетинкерел лен кај ов панда тано тари ленгири страна (Пс. 118:6).

14. Ко саво јавер начин о Јехова поможинѓа е Евреенге те на даран?

14 Исто аѓаар, о Јехова поможинѓа е Евреенге те на даран аѓаар со сетинкерѓа лен кај иси ле моќ бизи граница хем кај џанела са. Ов вакерѓа ленге те дикхен ко черења. Вакерѓа ленге кај на само со керѓа о черења него исто кај џанела секоле јекхакоро анав (Иса. 40:25-28). Ако о Јехова џанела секоле черењакоро анав, тегани шај те ова увериме кај џанела секоле јекхе слугаскоро да анав! Освен адава, ако е Јехова сине ле моќ те керел о черења, тегани сигурно иси ле моќ те поможинел пле народоске. Чаче, о Евреија со сине робија ко Вавилон на ваљани сине таро ништо те даран.

15. Сар о Девел спреминѓа е Евреен со сине ко Вавилон башо адава со ваљани сине те случинел пе?

15 О Јехова исто аѓаар, спреминѓа пле слуген башо адава со ваљани сине те случинел пе. Преку о лил Исаија, о Девел вакерѓа пле народоске: „Кхувен ко тумаре собе коте со ка овен ко сигурно хем пханден о удара пали туменде, гаравен тумен хари џикоте накхела и холи!“ (Иса. 26:20). Акава стихо шај прво пути исполнинѓа пе кеда о цари о Кир освојнѓа о Вавилон. О грчко историчари о Ксенофон пишинѓа кај кеда о Кир кхувѓа ко Вавилон, „заповединѓа [пле војниконге] те мударен секоле јекхе со ка аракхен ле аври“. Замислин туке кобор сине ки дар о мануша таро Вавилон! Ама, о Евреија со сине адатхе веројатно сине заштитиме адалеске со шунѓе о упатствија таро Јехова.

16. Соске на ваљани те дара таро адава со ка случинел пе ки бари неволја? (Дикх хем и слика.)

16 Со сикљоваја таро акава? Панда хари, ка ваљани те накха тари најбари неволја ки манушикани историја. Кеда ој ка почминел, о мануша ко свето ка даран хем ка овен буниме. Ама на хем е Јеховаскоро народо. Амен џанаја кај о Јехова тано амаро Девел. Ка ова храбра соске ка џана кај паше тано о време кеда о Девел ка спасинел амен (Лука 21:28). Чак кеда јекх коалиција таро са о народија ка нападинел амен, амен понадари да ка овел амен доверба ко Јехова. О Јехова ка заштитинел амен преку о ангелија хем ка дел амен упатствија кола со ка спасинен амаро живото. Сар ка добина адала упатствија? Мора те аџикера те шај те дикха. Ама, асавке упатствија веројатно ка добина преку амаре собранија. Шај ола ка овен амаре „собе“ коте со ка ова ко сигурно. Сар шај те спремина амен башо адава со ка случинел пе? Мора те ова панда попаше амаре пхраленцар хем пхењенцар, те ова послушна ко теократска упатствија хем те ова увериме кај о Јехова водинела амари организација (Евр. 10:24, 25; 13:17).

Пхраља хем пхења заедно читинена и Библија ки јекх соба ки бари неволја. Ола дикхена таро џами џикоте јекх таро пхраља сикавела ко небо раќате.

Адава со ка размислина баши е Јеховаскири моќ хем баши лескири способност те спасинел амен, ка поможинел аменге те на дара ки бари неволја (Дикх ко пасус 16)b


17. Сар шај о Јехова те овел тли утеха?

17 Иако е Евреенгоро живото ко Вавилон на сине локхо, о Јехова денѓа лен и утеха со ваљанѓа ленге. Ов ка керел адава аменге да. Адалеске, бизи разлика со ка доживине ки иднина, понадари да о Јехова нека овел тли утеха. Нека овел тут доверба кај ов чаче простинела пле верна слугенге хем кај грижинела пе туке. Икер тли надеж зорали. Хем никогаш ма бистре кај нане состар те дара соске о Јехова тано тло Девел!

САР АКАЛА СТИХИЈА УТЕШИНЕНА ТУТ?

  • Исаија 55:7

  • Исаија 40:29-31

  • Исаија 41:10-13

ГИЛИ 3 Амари надеж, сила хем доверба

a Несаве анава тане мениме.

b ОБЈАСНИМИ СЛИКА: Јекх тикни група таро Сведокија тане кхедиме заедно. Ола тане увериме кај е Јехова иси ле моќ хем способност те заштитинел пле слуген бизи разлика коте живинена.

    Публикацие ко Романе (Македонија) Кирилица (2013 — 2025)
    Одлогирин тут
    Логирин тут
    • романе (Македонија) кирилица
    • Споделин
    • Местин
    • Copyright © 2025 Watch Tower Bible and Tract Society of Pennsylvania
    • Условија користибаске
    • Полиса баши приватност
    • Опцие баши приватност
    • JW.ORG
    • Логирин тут
    Споделин