Шај ли панда те сикљове таро основна библиска сикљојба?

1. Сар влијајнѓе упри туте о библиска сикљојба кеда дознајнѓан о чачипе?

О ОСНОВНА библиска сикљојба менинѓе амаро живото. На пример, кеда дознајнѓем кај о Девел викинела пе Јехова, керѓем о прво чекори те шај те ова леа амала (Иса. 42:8). Откеда дознајнѓем со овела некасаја кеда мерела, чхинавѓем те пуча амен дали амаре мангле кола со муле цидена муке (Проп. 9:10). А кеда дознајнѓем е Девлескоро ветување башо рај ки пхув, више на сием сине секириме баши амари иднина. Уверинѓем амен кај шај те живина, на само кратко — 70 или 80 берш — него засекогаш (Пс. 37:29; 90:10).

2. Сар о лафија таро 2. Петарескоро 1:12, 13, сикавена кај чак е зрела христијанен шај те овел лен корист таро основна библиска сикљојба?

² Никогаш на смејнаја ко основна библиска сикљојба те дикха сар нешто со нане добором важно. Ко пло дујто писмо, о апостол Петар пишинѓа е христијаненге кола со сине „цврсто увериме ко чачипе“. (Читин 2. Петарескоро 1:12, 13.) Ама ко адава време ко собрание сине духовна опасностија, машкар коленде со сине о ховавне учителија хем о мануша со на верујнена сине ко Девел (2. Пет. 2:1-3). О Петар мангља те зојракерел пле пхрален хем пхењен те шај те боринен пе против адала опасностија. Адалеске, сетинкерѓа лен ко несаве таро сикљојба кола со више џанена лен сине. Адала сикљојба ка поможинен ленге сине те ачховен верна е Јеховаске џи ко крајо.

3. Соске ваљани са о христијања понадари да хор те размислинен башо основна библиска сикљојба? Вакер пример.

³ Џикоте напредујнаја ки христијанско зрелост, шај те дикха неве поуке тано основна библиска сикљојба. Те вакера јекх споредба: Јекх искусно хем јекх нево готвачи шај користинена о иста основна состојке кеда спреминена несаво хајбе. Ама сар накхена о берша, о искусно готвачи сиклило сар најшукар те користинел адала состојке хем користинела лен те шај те спреминел лен ко неве хем интересна начинија. Слично, е Јеховаскере слуге кола со бершенцар служинена леске хем о интересентија, шај ко основна библиска чачипа дикхена таро различна аспектија. Амаре околностија хем задаче ки служба башо Јехова веројатно нане иста сар кеда крстинѓем амен. Ако о сикљојба со дознајнѓем лен англедер бут берша применинаја лен ки амари моментално ситуација, шај те открина неве хем практична поуке. Те дикха со шај те сикљовен о зрела христијања таро трин основна библиска сикљојба.

О ЈЕХОВА ТАНО СТВОРИТЕЛИ

4. Сар влијајнѓа упри аменде адава со дознајнѓем кај о Јехова тано Створители?

⁴ „Окова со керѓа са тано о Девел“ (Евр. 3:4). Џанаја кај амари планета хем о живото ки лате сине створиме таро јекх најмудро хем семоќно Створители. Адалеске со створинѓа амен, ов бут шукар пенџарела амен. Освен адава, ов грижинела пе аменге. Ов џанела сој тано најшукар аменге. Акава едноставно чачипе, кај о Јехова тано Створители, бут влијајнѓа упро амари живото хем керѓа те овел амен чачутно смисла.

5. Кова чачипе поможинела аменге те развина понизност? (Исаија 45:9-12).

⁵ Таро чачипе кај о Јехова тано Створители шај те сикљова нешто баши понизност. Откеда о Јов превише концентриринѓа пе ки песте хем ко јавера мануша, о Јехова сетинкерѓа ле кај ов тано о семоќно Створители (Јов 38:1-4). Акава поможинѓа е Јовеске те хаљовел кај о начин сар о Девел постапинела тано бут пошукар таро начин сар о мануша постапинена. Поврзимо акалеа, о пророко о Исаија покасно пишинѓа: „Зарем и глина ка вакерел е Грнчареске: ’Со кереа?‘“ (Читин Исаија 45:9-12.)

6. Кеда тано посебно важно те размислина кобор мудро хем баро тано амаро Створители? (Дикх хем о слике.)

⁶ Сар со овела поискусно, јекх христијани шај те почминел те овел ле побари доверба ко пло мислење наместо те родел водство таро Јехова хем таро лескоро Лафи (Јов 37:23, 24). Ама со ако некој хор размислинела башо адава кобор тано мудро хем баро лескоро Створители? (Иса. 40:22; 55:8, 9). Акава основно чачипе ка поможинел леске те ачховел понизно хем те овел ле исправно стави ко адава сар ов дикхела ко буќа.

7. Со керѓа и Рахела те шај те прифатинел јекх промена ки организација?

⁷ И Рахела која со живинела ки Словенија, размислинѓа башо пло Створители хем адава поможинѓа лаке те прифатинел јекх промена ки организација. Ој признајнела: „Сине ситуацие кеда на сине манге локхо те прифатинав о одлуке таро окола со предводинена. На пример, иако дикхљум о Извештај бр. 8 таро Водечко тело башо 2023 берш, сепак сиум сине шокирими кеда прво дикхљум пхрале брадаја сар икерела говор. Адалеске молинѓум ман е Јеховаске те поможинел ман те прифатинав акаја промена“. И Рахела халили кај о Јехова кова со керѓа о небо хем и пхув ко совршено начин водинела пли организација ко исправно друмо. Ако туке пхаро те прилагодине тут ко несаво нево хаљојбе или те прифатине несаво нево упатство, одвојн туке време хор те размислине башо адава кобор мудро хем моќно тано амаро Створители (Рим. 11:33-36).

СОСКЕ О ДЕВЕЛ МУКХЕЛА ТЕ ОВЕН МУКЕ

8. Сар користинела аменге адава со дознајнѓем соске о Девел мукхела те овен муке?

⁸ Соске о Девел мукхела те овен муке? Несаве кола со на џанена о одговор ко акава пучибе хољанена е Девлеске или мислинена кај ов ни на постојнела (Изр. 19:3). Различно лендар, ту дознајнѓан кај адалеске со наслединѓем о грево хем сием несовршена, цидаја муке, а на кај о Јехова тано криво башо адава. А исто аѓаар, дознајнѓан кај адалеске со о Јехова тано стрпливо е манушенцар, милиоња шај те запознајнен ле хем коркори те уверинен пе кај ов ка чхивел крајо башо муке (2. Пет. 3:9, 15). Акала чачипа утешинѓе тут хем керѓе те ове паше леа.

9. Ко кола ситуацие посебно ваљани те размислина башо причине соске о Јехова мукхела те овен муке?

⁹ Свесна сием кај ваљани те ова стрплива џикоте аџикераја о Јехова те чхивел крајо башо муке. Сепак кеда амен, или амаре пашутне доживинаја неволја, неправда или нашаваја нешто, шај пучаја амен соске о Јехова на керела нешто одма (Авак. 1:2, 3). Ко асавке моментија ка овел мудро те размислина башо причине соске о Јехова мукхела о праведна те циден мукеa (Пс. 34:19). Исто аѓаар, шај те размислина баши лескири намера те чхивел крајо башо муке јекх пути засекогаш.

10. Со поможинѓа јекхе пхењаке те аракхел утеха откеда мули лакири дај?

¹⁰ О чачипе башо муке шај те поможинел аменге те истрајна. И Ен која со живинела ко остров Мајоте, ко Индиско океани, вакерела: „Кеда мули ми дај англедер некобор берша адава бут разочаринѓа ман. Ама, цело време размислинава башо адава кај о Јехова нане криво башо амаре муке. Ов едвај аџикерела те цидел са о причине башо муке хем те воскреснинел амаре пашутнен со муле. Кеда размислинава башо акала чачипа осетинава андруно мир, нешто со бут пути чудинела ман“.

11. Сар адава со џанаја соске о Јехова мукхела те овен муке, шај те поможинел аменге понадари да те проповедина?

¹¹ О чачипе башо адава соске о Девел мукхела те овен муке, шај те поттикнинел амен понадари да те проповедина. Откеда објаснинѓа кај е Јеховаскири стрпливост значинела спасение околенге со каинена пе, о Петар пишинѓа: „Тумаре постапке нека овен света хем нека сикавен кај тумен сиен верна е Девлеске ко са“ (2. Пет. 3:11). Јекх таро постапке колендар со дикхјола пе кај обожавинаја само е Девле тано о проповедибе. Исто сар амаро Дад, амен да мангаја е манушен. Мангаја ола те живинен ко е Девлескоро праведно нево свето. О Јехова тано стрпливо хем е манушенцар таро тло подрачје хем дела лен прилика те почминен те обожавинен ле. Кобор бари чест тани те ове е Девлескоро соработнико хем те поможине буте манушенге те сикљовен баши лесте англедер те авел о крајо (1. Кор. 3:9).

ЖИВИНАЈА „КО ПОСЛЕДНА ДИВЕ“

12. Сар користинела аменге адава со дознајнѓем кај живинаја ко последна диве?

¹² И Библија точно објаснинела саве ка овен о мануша „ко последна диве“ (2. Тим. 3:1-5). Доволно тано само те дикха околу аменде те шај те хаљова сар акава пророштво исполнинела пе. Џикоте дикхаја сар о ставија е манушенгере овена са полошна, поувериме сием таро било кеда англедер кај адава со пишинела ко е Девлескоро Лафи тано точно (2. Тим. 3:13-15).

13. Кеда размислинаја баши е Исусескири споредба таро Лука 12:15-21, со шај те пуча амен?

¹³ Адава со џанаја кај живинаја ко последна диве поможинела аменге те концентририна амен ко адава сој чаче важно. Те дикха со шај те сикљова тари споредба е Исусескири сој пишими ко Лука 12:15-21. (Читин.) Соске башо барвало мануш вакерѓа пе кај тано „глупаво“? На адалеске со сине барвало, него адалеске со на чхивѓа о поважна буќа ко прво тхан. Ов кхединѓа барвалипе песке а на сине барвало англо е Девлескере јакхја. Соске адава на сине мудро? О Девел вакерѓа адале манушеске: „Акаја рат ка мере“. Авдиве сар со авела попаше о крајо акале светоскоро шај те пуча амен: „Дали мле целија сикавена кај концентриринава ман ко адава сој најважно? Саве целија поможинава те чхивен песке мле чхаве? Дали користинава мле финансиска средствија, сила хем време те шај најангле те кхедав барвалипе манге или те кхедав барвалипе ко небо?“

14. Сар о искуство е пхењакоро, сикавела соске тано мудро те размислина башо библиска доказија кај живинаја ко последна диве?

¹⁴ Кеда размислинаја башо доказија кај живинаја ко последна диве адава шај целосно те менинел амаро стави сар дикхаја ко живото. Адава случинѓа пе јекхе пхењаке со викинела пе Мики. Ој раскажинела: „Кеда завршинѓум средно школа, бут мангава сине те истражинав башо животне хем мангљум адава те овел мли професија. Исто аѓаар, сине ман цел те овав општо пионери хем те служинав коте со иси побари потреба. Несаве зрела амала поттикнинѓе ман шукар те размислинав дали таро реално те керав манге световно кариера хем ко исто време те исполнинав мле духовна целија. Ола сетинкерѓе ман кај панда хари ка авел крајо акале светоске. Тари јавер страна, ко нево свето ка овел ман цели вечност те шај те истражинав е животнен. Адалеске, одлучинѓум те џав ко кратко практично курси. Адава поможинѓа манге те аракхав бути колаја со шај сине те овав општо пионери, а покасно хем те селинав ман ко Еквадор коте со иси побари потреба“. И Мики хем лакоро ром акана служинена ки покраинско служба ки адаја пхув.

15. Сар е Јаковескоро пример сикавела соске на ваљани те откажина амен таро мануша кола со панда на сикавѓе интерес башо шукар хабери? (Дикх хем о слике.)

¹⁵ На ваљани те обесхрабрина амен кеда о мануша на прифатинена о шукар хабери. Ола шај те менинен пе. Размислин башо е Јаковескоро пример, е Исусескоро пхрал. Ов дикхља сар о Исус бајрола, овела о Месија хем сикавела сар нијекх мануш англедер. Сепак, бершенцар о Јаков на уло е Исусескоро ученико. Чак откеда о Исус воскреснинѓа о Јаков уло ученико — хем адава ревно ученико!b (Јован 7:5; Гал. 2:9). Адалеске, бут тано важно те на откажина амен тари фамилија која со панда на сикавела интерес хем палем те проповедина околенге со на мангле те шунен. Ма бистре кај живинаја ко последна диве хем кај амаро проповедибе тано итно. Адава со ка вакере ленге авдиве, шај те влијајнел упри ленде покасно, шај чак откеда ка почминел и бари неволја.c

ОВ БЛАГОДАРНО БАШО ВАЖНА ПОУКЕ СО ДОБИНЕА ЛЕН ТАРО ЈЕХОВА

16. Сар користинена туке о поуке таро Јехова? (Дикх хем и рамка „Користин о библиска чачипа те шај те поможине е јаверенге“.)

¹⁶ Дело тари духовно храна со добинаја ла тани спремими е манушенге кола со никогаш на шунѓе башо основна библиска чачипа. На пример, о јавна говорија со икерена пе секова курко, несаве статие хем видеоклипија ки jw.org хем амаре списанија баши јавност главно тане башо мануша кола со нане Сведокија. Сепак, амен да иси амен корист таро акала поуке. Ола поможинена аменге те бајрара амаро мангипе спрема о Јехова, те зојракера амари вера ко лескоро Лафи хем те сикљова сар шај пошукар те сикава е јаверен башо основна чачипа (Пс. 19:7).

17. Ко кола ситуацие шај те размислине башо основна библиска сикљојба?

¹⁷ Сар Јеховаскере сведокија, радосна сием кеда добинаја појасно хаљојбе башо несаво библиско чачипе. Сепак, амен исто аѓаар сием бут благодарна башо основна библиска сикљојба кола со ко почеток привлечинѓе амен ко чачипе. Ако некогаш аракхљоваја ко искушение упорно те ачхова ко амаро мислење наместо те прифатина о водство тари е Јеховаскири организација, шај понизно те сетина амен кој водинела адаја организација — о семоќно хем о најмудро Створители. Кеда амен или некој таро амаре пашутне иси амен несави неволја, шај те ова стрплива хем те размислина башо адава соске о Јехова мукхела те овен муке. А кеда одлучинаја сар те користина о материјална буќа со иси амен хем амаро време шај те сетина амен кај живинаја ко последна диве. Е Јеховаскере поуке понадари да нека зојракерен амен, поттикнинен амен хем нека ден амен мудрост.