Сар те победина ки борба против о погрешна желбе

1. Солеа боринена пе са о несовршена мануша?

ДАЛИ некогаш сине тут бари желба те кере нешто со о Јехова на мангела? Ако оја, ма мислин кај тло искушение тано побаро таро е јаверенгере искушенија. И Библија вакерела: „Секова искушение со иси тумен, сине е јаверен да“ (1. Кор. 10:13). Акава значинела кај бизи разлика саве погрешно желбаја боринеа тут, е јаверен да иси исто проблеми. Ту на сиан коркори, о Јехова ка поможинел тут те победине ки адаја борба.

2. Саве искушениенцар шај боринена пе несаве христијања хем о мануша кола со проучинена и Библија? (Дикх хем о слике.)

² И Библија исто аѓаар вакерела: „Секова јекх тано искушимо аѓаар со цидела ле хем ховавела ле лескири желба“ (Јак. 1:14). Адава сој тано искушение јекхеске, на значинела кај тано искушение јавереске да. На пример, несаве христијања шај тане ко искушение те керен неморал некасаја таро спротивно пол, а јавера некасаја таро исто пол. Окола со чхинавѓе те дикхен порнографија, шај иси лен бари желба палем те иранен пе ки адаја навика. Бут џене со чхинавѓе те користинен дрога или те пиен бут алкохол, иси лен слично проблеми. Акала тане само некобор желбе коленцар со боринена пе несаве христијања хем мануша кола со проучинена и Библија. Понекогаш, секова јекх амендар веројатно осетинѓа пе сар о апостол Павле кова со пишинѓа: „Кеда мангава те керав адава сој шукар, о лошнипе тано ки манде“ (Рим. 7:21).

3. Сар шај те влијајнел упри некасте адава со цело време боринела пе несаве погрешно желбаја?

³ Ако цело време боринеа тут несаве погрешно желбаја, шај мислинеа туке кај нане тут сила те борине тут против о искушение, сар те пхене нашти те кере адава сој исправно. Исто аѓаар, шај мислинеа кај о Јехова на дикхела шукар ки туте само адалеске со иси тут асавки погрешно желба. Ов уверимо кај нијекх таро акала дуј буќа нане точно! Те шај те објаснина соске, ки акаја статија ка дикха акала дуј пучиба: 1) Соске шај те појавинен пе асавке чувствија? 2) Сар шај те победине ки борба против о погрешна желбе?

САР МАНГЕЛА О САТАНА ТЕ ОСЕТИНА АМЕН

4. а) Со мангела о Сатана те мислина кеда сием ко искушение? б) Соске шај те ова сигурна кај шај те овел амен сила те борина амен против о искушение?

⁴ О Сатана мангела те мислина кај нане те овел амен сила те борина амен кеда ка аракхљова ко искушение. О Исус јасно вакерѓа кај о Сатана ка пробинел те искушинел амен кеда сикавѓа пле следбеникон те молинен пе: „Ма мукх те пера ко искушение, него спасин амен таро Бенг“ (Мат. 6:13). О Сатана вакерела кај о мануша нане те овен послушна е Јеховаске кеда ка аракхљовен ко искушение (Јов 2:4, 5). Уствари, ов вакерела аѓаар соске ов сине о прво со дозволинѓа лескири желба те ховавел ле хем на мангља те ачхол верно е Јеховаске. Адалеске, ов мислинела кај амен да сием сар лесте — кај локхе ка мукха е Јехова кеда ка аракхљова ко искушение. О Сатана мислинѓа кај чак е Девлескоро совршено Чхаво ка перел ко несаво искушение! (Мат. 4:8, 9). Ама размислин башо акава: Дали чаче нане амен сила те борина амен против о погрешна желбе? Ни хари нане аѓаар! Сложинаја амен е лафенцар со пишинѓа лен о апостол Павле: „Са шај те керав, соске поможинела манге окова со дела ман сила“ (Фил. 4:13).

5. Котар џанаја кај о Јехова тано уверимо кај шај те победина ки борба против о погрешна желбе?

⁵ Спротивно таро Сатана, о Јехова тано целосно уверимо кај шај те борина амен против о погрешна желбе. Котар џанаја адава? О Јехова пророкујнѓа кај јекх баро мноштво мануша ка ачховен верна хем ка преживинен и бари неволја. Размислин со значинела акава. О Јехова кова со нашти те ховавел, вакерѓа кај бут мануша — а на само некобор џене — ка кхувен ко рај „уравде ко парне шеја“, јавере лафенцар ка овен чиста (Отк. 7:9, 13, 14). Акава сикавела аменге кај о Јехова на мислинела кај нане амен сила те борина амен против о погрешна желбе.

6-7. Со јавер о Сатана мангела те мислина?

⁶ Освен о Сатана со мангела те мислина кај нане амен сила те борина амен против о искушение, ов исто аѓаар мангела те мислина кај о Јехова на дикхела шукар ки аменде само адалеске со иси амен погрешна желбе. Ама ма те бистра соске ов уствари мангела амен те мислина аѓаар. О Сатана тано адава касте со о Јехова никогаш нане те дикхел шукар хем каске со судинѓа кај ов на заслужинела вечно живото (1. Мој. 3:15; Отк. 20:10). Шај те ова сигурна кај о Сатана мангела те мислина кај о Јехова аменде да на дикхела шукар, посебно адалеске со амен иси амен прилика те добина о благослов кова со ов нашавѓа ле. Ама амен ни најхари на сием ки исто ситуација сар лесте. Уствари, и Библија уверинела амен кај о Јехова мангела те поможинел аменге, а на те осудинел амен. Ов „на мангела никој те овел уништимо него саринен те овел лен прилика те каинен пе“ (2. Пет. 3:9).

⁷ Значи, ако мислинаја кај нане амен сила те борина амен против о погрешна желбе или кај о Јехова на дикхела шукар ки аменде адалеске со иси амен погрешна желбе, тегани размислинаја аѓаар сар со мангела о Сатана те размислина. Адава со ка хаљова акава, ка поможинел амен те ова панда поодлучна те противина амен леске (1. Пет. 5:8, 9).

САР ШАЈ ТЕ ОСЕТИНА АМЕН АДАЛЕСКЕ СО СИЕМ НЕСОВРШЕНА

8. Со јавер шај те керел те мислина кај нане амен сила те борина амен против о погрешна желбе хем кај о Јехова на дикхела шукар ки аменде? (Псалм 51:5; дикх хем „Објаснимо лафи“.)

⁸ Освен о Сатана, иси панда јекх бути соске шај те мислина кај нане амен сила те борина амен против о погрешна желбе хем кај о Јехова на дикхела шукар ки аменде. Сој тано адава? О грево кова со сарине наслединѓем ле таро амаре прва родителијаa (Јов 14:4; читин Псалм 51:5).

9-10. а) Сар влијајнѓа о грево упро Адам хем и Ева? (Дикх хем и слика.) б) Сар влијајнена о грево хем и несовршеност упри аменде?

⁹ Размислин сар о грево влијајнѓа упро Адам хем и Ева. Откеда грешинѓе е Јеховаске ола гаравѓе пе хем пробинѓе те учхарен пумаро тело. Башо акава ко Увид ко Света лила пишинела: „Откеда керѓе грево, почминѓе те осетинен пе крива, те секиринен пе, те овен несигурна хем те лаџан“. Адава сине сар те пхене о Адам хем и Ева сине пханле ко јекх кхер ки колесте со иси само акала штар собе. О Адам хем и Ева шај сине само те џан тари јекх соба ки јавер, ама нашти сине те икљон аври таро кхер. Ола нашти сине те нашен тари пли несовршеност.

¹⁰ Џанѓола пе, амен на сием ки скроз исто ситуација сар со сине о Адам хем и Ева. И откупнина — која со на важинела ленге — шај те чистинел амен таро грево хем те дел амен чисто совест (1. Кор. 6:11). Сепак, амен наслединѓем о грево хем и несовршеност. Адалеске, на изненадинела амен адава со амен да осетинаја амен крива, секириме, несигурна хем лаџаја. Уствари, и Библија вакерела кај о грево понадари да бут влијајнела упро мануша. Адава тано случај чак околенцар кола „со на грешинѓе сар со грешинѓа о Адам“ (Рим. 5:14). Кобор хем те обесхрабринел амен акаја бути, на ваљани те мислина кај нане амен сила те борина амен хем кај о Јехова на дикхела шукар ки аменде. Амен шај те отфрлина асавке негативна чувствија. Сар?

11. Сар ваљани те реагирина кеда мислинаја кај нане амен силе успешно те борина амен против о погрешна желбе, хем соске? (Римјања 6:12).

¹¹ Кеда мислинаја кај нане амен силе успешно те борина амен против о погрешна желбе, ко адава шај те дикха сар те пхене амари несовршеност „вакерела“ аменге адава, а ла на ваљани те шуна ла. Соске? И Библија вакерела кај шај те чхинава о грево понадари да „те владинел сар цари“ упри аменде. (Читин Римјања 6:12.) Акава значинела кај амен шај те бирина те на постапина спрема о погрешна желбе (Гал. 5:16). О Јехова тано уверимо кај шај те борина амен против о искушенија. Те на овел сине адава аѓаар, о Јехова на би родела сине адава амендар (5. Мој. 30:11-14; Рим. 6:6; 1. Сол. 4:3). Јасно тано кај иси амен силе те борина амен против о погрешна желбе.

12. Сар ваљани те реагирина кеда мислинаја кај о Јехова на дикхела шукар ки аменде, хем соске?

¹² Слично, кеда мислинаја кај о Јехова на дикхела шукар ки аменде, сар те пхене осудинела амен само адалеске со иси амен погрешна желбе, шај ко адава те дикха сар те пхене амари несовршеност „вакерела“ аменге адава, а ла на ваљани те шуна ла. Соске? И Библија вакерела кај о Јехова хаљола кај сием грешна (Пс. 103:13, 14). Ов џанела са баши аменде, ов исто џанела сар упро секоле јекхесте аменде влијајнела о грево кова со наслединѓем ле (1. Јов. 3:19, 20). Са џикоте боринаја амен против о погрешна желбе хем те на кера адава сој погрешно, о Јехова ка дикхел амен сар чиста. Соске шај те ова увериме ко адава?

13-14. Дали адава со иси амен погрешна желбе значинела кај нашти те ова амала е Јеховаја? Објаснин.

¹³ И Библија керела разлика машкар о погрешна постапке (кола со шај те контролирина лен) хем о погрешна желбе (кола со шај те појавинен пе аменге таро јекх пути). На пример, несаве таро прва христијања ко Коринт англедер сине хомосексуалција. О Павле пишинѓа: „А несаве тумендар сине асавке“. Дали акава значинела кај лен никогаш више на сине лен желба башо хомосексуална односија? Адава на би овела сине реално, адалеске со асавке желбе бут пути мукхена хор коренија ки некасте. Ама е христијанен со сине лен самоконтрола хем на постапинена сине спрема пле желбе, о Јехова прифатинѓа лен сар пле амала. Ов ки ленде дикхела сине сар чиста (1. Кор. 6:9-11). О исто шај те важинел туке да.

¹⁴ Бизи разлика саве погрешна желбенцар боринеа тут, ту шај те победине лен. Чак хем ако на успејнеа целосно те циде лен, шај те сикаве самоконтрола хем те на кере адава со мангела о тело хем о мисле (Еф. 2:3). Сар шај те кере адава хем аѓаар те победине ки борба против о погрешна желбе?

САР ТЕ ПОБЕДИНЕ

15. Ако мангаја те победина и борба против о погрешна желбе, соске ваљани те ова искрена коркори аменцар?

¹⁵ Те шај те победине ки борба против о погрешна желбе, ваљани те ове искрено коркори туја башо тле слабостија. Ма ховав тут (Јак. 1:22). Ако тикњареа о проблеми, аѓаар со мислинеа: „О јавера пиена повише мандар“, или кривинеа е јаверен аѓаар со вакереа: „На би овава сине ко искушение те дикхав порнографија ако ми ромни сикавела манге повише мангипе“, адава ка керел само полокхе те пере ко искушение. Адалеске ма оправдин тле погрешна постапке чак ни ко тле мисле. Прифатин и одговорност башо тле постапке (Гал. 6:7).

16. Сар шај те ове панда поодлучно те кере адава сој исправно?

¹⁶ Освен со ка ове искрено коркори туја башо тле слабостија, ваљани хем те ове панда поодлучно те на пере ки ленде (1. Кор. 9:26, 27; 1. Сол. 4:4; 1. Пет. 1:15, 16). Приметин кола буќа анена туке опасност хем кеда. Адава шај те овел несаво искушение колеа сој туке пхаро те борине тут. Или шај туке попхаро те борине тут е искушениеа ко одредено време таро диве, на пример кеда сиан уморно или касно раќате. Очекујн о искушение хем одлучин сар ка постапине. Најшукар време те кере акава тано англедер те појавинел пе о искушение (Изр. 22:3).

17. Со шај те сикљова таро е Јосифескоро пример? (1. Мојсеева 39:7-9; дикх хем о слике.)

¹⁷ Размислин сар реагиринѓа о Јосиф кеда е Петефријаскири ромни пробинѓа те завединел ле. Ов одма реагиринѓа хем одлучно одбинѓа ла. (Читин 1. Мојсеева 39:7-9.) Со сикавела акава? Панда англедер е Петефријаскири ромни те пробинел те завединел ле, о Јосиф сине одлучно те керел адава сој исправно. Слично, шај те ове панда поодлучно те кере адава сој исправно панда англедер те аракхљове ки ситуација те ове ко искушение. Адава ка керел туке полокхо те постапине аѓаар сар со више одлучинѓан.

РЕДОВНО ИСПИТИН ТУТ

18. Сар шај те победине ки борба против о погрешна желбе? (2. Коринќања 13:5).

¹⁸ Те шај те победине ки борба против о погрешна желбе ка ваљани те испитине коркори тут. (Читин 2. Коринќања 13:5.) Редовно дикх башо со размислинеа хем сар постапинеа хем кер о промене со ваљани те кере лен. На пример, чак хем кеда ка успејне те борине тут несаве искушениеа, шај те пуче тут: „Кобор време ваљанѓа манге те вакерав ’на‘?“ Ако халиљан кај на сиан сине одлучно те вакере одма „на“, ма обесхрабрин тут. Наместо адава, размислин сар шај јавер пути пошукар те постапине. Шај те пуче тут акала пучиба: „Кеда ка појавинен пе манге погрешна мисле, дали шај посигате те цидав лен? Дали и забава со биринава ла керела манге попхаро те боринав ман е искушениеа? Кеда ка појавинел пе несави неморално сцена, дали одма цидава мле јакхја? Дали хаљовава кај е Јеховаскере мерилија тане секогаш мле шукарипаске, чак кеда родела пе мандар бут те трудинав ман те сикавав самоконтрола?“ (Пс. 101:3).

19. Сар шај о тикне одлуке со мислинаја кај нане добором важна те керен аменге пхаро те борина амен против о погрешна желбе?

¹⁹ Исто аѓаар, ма пробин те оправдине тле погрешна постапке. И Библија вакерела: „О вило тано поховавно таро било со јавер хем спремно тано ко са“ (Ерем. 17:9). О Исус вакерѓа кај лестар „икљона лошна мисле“ (Мат. 15:19). На пример, некој со чхинавѓа те дикхел порнографија, пало несаво време шај те мислинел песке кај нане опасно те дикхел слике кола со бајрарена о сексуална желбе само адалеске со ки ленде нане нанѓе мануша. Или шај те мислинел песке: „Нане ништо погрешно ко адава те фантазиринав манге башо погрешна буќа са џикоте на керава лен“. Ако размислинела ко асавко начин, лескоро ховавно вило англедер планиринела сар те задоволинел о желбе е телоскере (Рим. 13:14). Сар шај те на кере адава? Пазин те на ане тикне одлуке со нане мудра кола со ка ингарен тут џи ко адава те ане баре одлуке со нане мудра, сар на пример те почмине те постапине погрешно.b Циде тутар са о „лошна мисле“ кола со шај те анен тут џи ко адава те оправдине о погрешно постапибе.

20. Со ка случинел пе е погрешна желбенцар ки иднина, хем сави помош иси амен панда авдиве?

²⁰ Сар со дикхлем, кеда о Јехова поможинела амен, ка овел амен сила те борина амен е искушениенцар. Исто аѓаар, адалеске со о Јехова сикавела аменге милост, иси амен надеж башо вечно живото ко нево свето. Кобор шукар ка овел те служина е Јеховаске чисто гоѓаја хем вилеа! Џи тегани, ма мислин кај нане тут сила те борине тут против о погрешна желбе хем кај о Јехова на дикхела шукар ки туте. Шај те ова сигурна кај адалеске со о Јехова дела амен пло благослов, шај те победина ки адаја борба!