Роде помош таро старешине

1. Сар о Јехова сикавѓа кај лескере бакхре тане скапоцена леске?

О ЈЕХОВА мангела пле бакхрен, ола тане скапоцена леске. О Јехова кинѓа лен е Исусескере ратеа хем ко собранија чхивѓа старешине те шај те грижинен пе башо лескоро стадо (Апо. 20:28). О Јехова мангела о старешине те постапинен љубезно лескере бакхренцар. О старешине шунена е Исусескоро водство аѓаар со охрабринена е пхрален хем е пхењен хем поможинена ленге те ачховен верна е Јеховаске (Иса. 32:1, 2).

2. Каске посебно о Јехова грижинела пе? (Езекиел 34:15, 16).

² О Јехова бут грижинела башо са пле слуге, ама посебно мангела те поможинел лен кеда цидена муке. О Јехова преку о старешине поможинела околенге со мучинена пе адалеске со керѓе грешке. (Читин Езекиел 34:15, 16.) Сепак, ов мангела амен те рода помош кеда адава ваљани аменге. Ко асавке ситуацие, освен со ваљани таро вило те молина амен е Девлеске те поможинел амен, ваљани те рода помош таро окола сој „пастирија хем учителија ко собрание“ (Еф. 4:11, 12).

3. Сар шај саринен амен те овел амен корист таро адава со ка дикха сави улога иси е старешинен?

³ Ки акаја статија ка дикха повише башо адава сар о Јехова користинела е старешинен те шај те поможинел некаске со духовно слабонѓа. Ка добина одговор ко акала пучиба: Кеда ваљани те рода помош таро старешине? Соске ваљани те кера адава? Хем сар о старешине поможинена амен? Чак ако моменти сием духовно зорале, о одговор ко акала пучиба ка бајрарел амари благодарност башо адава сар о Јехова користинела е старешинен хем ка поможинел амен те дознајна со ваљани те кера кеда ка ваљани аменге ленгири помош.

КЕДА ВАЉАНИ ТЕ ВИКИНА Е СТАРЕШИНЕН?

4. Котар џанаја кај о стихија таро Јаков 5:14-16, 19, 20 керена лафи башо духовно насвалипе? (Дикх хем о слике.)

⁴ О ученико о Јаков објаснинѓа сар о Јехова користинела е старешинен те шај те поможинел амен. О Јаков пишинѓа: „Ако некој тано насвало машкар туменде, нека викинел е старешинен таро собрание“. (Читин Јаков 5:14-16, 19, 20.) Таро контекст шај те дикха кај о Јаков керѓа лафи башо духовно насвалипе. На пример, ов вакерѓа кај о насвало ваљани те викинел е старешинен баши помош таро собрание, а на несаве докторе. Исто аѓаар, о Јаков објаснинѓа кај о насвало ка сасљол кеда лескере гревија ка овен простиме. О буќа со ваљани некој те керел лен те шај духовно те сасљол тане слична е буќенцар со ваљани те керел лен некој те шај физички те сасљол. Кеда насваљоваја обично џаја ко доктори хем објаснинаја леске со осетинаја хем кераја сар со вакерела о доктори. Слично, кеда сием насвале ко духовно поглед, ваљани те џа ко јекх старешина, те вакера леске амари ситуација хем те постапина спрема о библиска советија со добинаја лен.

5. Сар шај те џана дали амаро амалипе е Јеховаја тано ки опасност?

⁵ Ко Јаков поглавје 5 сием поттикниме те кера лафи е старешиненцар секогаш кеда осетинаја кај ваљани аменге помош ко духовно поглед. Ама, посебно тано важно те рода лендар помош англедер те румина амаро амалипе е Девлеа! Мора те ова искрена коркори аменцар. И Библија предупрединела амен кај шај те мислина кај сием духовно зорале, а уствари на сием (Јак. 1:22). Баш акава случинѓа пе несаве христијаненге ко Сард, ама о Исус вакерѓа ленге кај ола повише на керена е Јеховаскири волја (Отк. 3:1, 2). Сар шај те испитина кобор сием паше е Јеховаја? Јекх начин тано аѓаар со ка споредина саве чувствија сине амен башо Јехова кеда крстинѓем амен хем саве чувствија иси амен баши лесте акана (Отк. 2:4, 5). Шај те пуча амен: „Дали панда уживинава те читинав и Библија хем хор те размислинав башо адава со читинѓум? Дали сиум присутно ко са о состанокија хем дали редовно спреминава ман баши ленде? Дали сиум ревно ки служба сар англедер? Дали побаро дело таро време трошинава ле башо материјална буќа или башо нешто јавер? Дали акана повише размислинава башо адала буќа него англедер?“ Ако о одговор ко несаве таро акала пучиба тано оја, адава шај те овел знако кај амаро амалипе е Јеховаја слабонѓа хем веројатно и ситуација ка овел панда полошно ако на кераја нешто башо адава. Ако нашти коркори те кера амаро амалипе позорало е Јеховаја или ако више пхаглем несаве таро е Девлескере мерилија, ваљани те рода помош таро старешине.

6. Со ваљани те керен окола со керѓе сериозно грево?

⁶ Нормално, ако некој керѓа сериозно грево башо кова со шај те овел цидимо таро собрание, ваљани те керел лафи несаве старешинаја (1. Кор. 5:11-13). Секој со керела сериозно грево, ваљани леске помош те шај палем те овел амал е Јеховаја. Те шај о Јехова те простинел некаске преку и откупнина, мора те керел буќа коленцар со ка сикавел кај каинела пе (Апо. 26:20). Ко адала буќа тано вклучимо те вакера е старешиненге ако керѓем сериозно грево.

7. Каске јавереске ваљани помош таро старешине?

⁷ О старешине на поможинена само околенге со керѓе сериозно грево, него хем околенге сој слаба ко духовно поглед (Апо. 20:35). На пример, шај туке пхаро те борине тут е погрешна желбенцар. Шај туке посебно пхаро ако англедер те ове Сведоко сиан сине зависно тари дрога, дикхеа сине порнографија или живинеа сине неморално живото. Ма мислин кај коркори ваљани те борине тут акале искушениенцар. Шај те кере лафи несаве старешинаја касаја со осетинеа тут слободно или касте со иси тут доверба кај ка шунел тут, ка дел тут практична советија хем ка уверинел тут кај о Јехова бут ка радујнел пе ако понадари да боринеа тут против о погрешна желбе (Проп. 4:12). Ако сиан разочаримо башо адава со панда иси тут погрешна желбе, о старешине ка сетинкерен тут кај о Јехова радујнела пе адалеске со родинѓан помош. Адава сикавела кај туке важно тло амалипе е Јеховаја хем кај нане тут бут бари доверба ки туте (1. Кор. 10:12).

8. Дали ваљани те кера лафи е старешиненцар баши секоја грешка со ка кера ла? Објаснин.

⁸ На ваљани те џа ко старешине баши секоја грешка со ка кера ла. На пример, те претпоставина аменге кај поврединѓан несаве пхрале или пхења, или шај чак нашти контролиринѓан тли холи ко адава моменти. Наместо те џа ко несаво старешина, ка овел шукар те применине е Исусескоро совет хем те смирине тут тле пхралеа или тле пхењаја (Мат. 5:23, 24). Шај те истражине баши особине сар сој кроткост, стрпливост хем самоконтрола те шај те сикаве лен панда повише ки иднина. Ама џанѓола пе, ако панда нашти те решине о проблеми, шај те роде помош таро несаво старешина. Кеда и Еводија хем и Синтихија нашти сине те решинен о проблеми со сине лен машкар песте, о апостол Павле замолинѓа јекхе пхрале таро собрание те поможинел лен. Слично, шај те поможинел тут несаво старешина таро тло собрание (Фил. 4:2, 3).

СОСКЕ ВАЉАНИ ТЕ ВИКИНА Е СТАРЕШИНЕН?

9. Соске на ваљани те мукха и лаџ те чхинавел амен те викина е старешинен? (Изреки 28:13).

⁹ Ваљани аменге вера хем храброст те шај те рода помош таро старешине кеда керѓем сериозно грево или кеда нашти те борина амен е погрешна желбенцар. На ваљани те мукха и лаџ те чхинавел амен те викина е старешинен. Соске? Адалеске со о Јехова денѓа амен е старешинен те шај те поможинен амен понадари да те овел амен паше амалипе леа. Значи, кеда кераја лафи е старешиненцар, сикаваја кај иси амен доверба ко Јехова хем кај сием леске послушна. Свесна сием кај ваљани аменге помош те шај понадари да те кера адава сој исправно (Пс. 94:18). Ама ако керѓем грево, шај те ова сигурна кај о Јехова ка простинел аменге ако вакераја е старешиненге со керѓем хем ако чхинаваја те кера адава сој погрешно. (Читин Изреки 28:13.)

10. Со шај те случинел пе ако пробинаја те гарава амаре гревија?

¹⁰ Кеда вакераја е старешиненге о гревија со керѓем лен, о Јехова шај те простинел аменге хем шај палем те ова амала леа. Ама ако пробинаја те гарава амаре гревија, и ситуација шај те овел само полошно. Кеда о цари о Давид пробинѓа те гаравел пле гревија, мучинела пе сине ко духовно, емоционално па чак хем ко физичко поглед (Пс. 32:3-5). Сар со јекх повреда или насвалипе ко физичко поглед бут пути шај те овел полошно ако на кераја нешто одма, исто шај те случинел пе ако иси амен проблемија ко духовно поглед. О Јехова на мангела те случинел пе адава, адалеске ов поттикнинела амен „те расчистина леа“ аѓаар со ка кера лафи е старешиненцар колен со ов користинела лен те шај те поможинен амен те сасљова ко духовно поглед (Иса. 1:5, 6, 18).

11. Сар шај те влијајнел упро јавера ако на вакераја е старешиненге башо несаво сериозно грево?

¹¹ Ако гараваја кај керѓем сериозно грево, адава шај те влијајнел лошно упро јавера. О Јехова шај те на дел више пло благослов ко собрание, а исто аѓаар шај те ана ки опасност о мир ко собрание (Еф. 4:30). Тари јавер страна ако дознајнаја кај некој таро собрание керѓа сериозно грево ваљани те поттикнина ле те керел лафи е старешиненцар башо адава. Ако дикхаја кај на керела адава ко несаво разумно време, тегани амен ваљани те вакера е старешиненге. Ако на кераја адава, амен да ка ова крива англо Јехова (3. Мој. 5:1). О мангипе хем и верност спрема о Јехова ваљани те поттикнинен амен те џа ко старешине хем те вакера ленге о чачипе. Аѓаар ка поможина о собрание те ачхол чисто, а околеске со керѓа грево поможинаја палем те овел амал е Јеховаја.

САР ПОМОЖИНЕНА АМЕН О СТАРЕШИНЕ?

12. Сар о старешине поможинена околенге сој слаба ко духовно поглед?

¹² И Библија поттикнинела е старешинен те поможинен околенге сој слаба ко духовно поглед (1. Сол. 5:14). Ако керѓан несаво грево о старешине шај ка пучен тут пучиба те шај те хаљовен сар осетинеа тут хем сар размислинеа (Изр. 20:5). Шај нане туке локхо те кере лафи е старешиненцар адалеске со сиан лаџутно или шај туке незгодно башо адава со случинѓа пе. Ама, шај те поможине ленге ако искрено вакереа ленге солеа боринеа тут. Ма дара кај ка вакере нешто кова со о јавера ка хаљовен ле погрешно (Јов 6:3). О старешине нане сигате те осудинен адава со вакереа, него ола ка трудинен пе шукар те шунен тут хем те овел лен и целосно слика англедер те ден тут совет (Изр. 18:13). О старешине тане свесна кај ваљани време те шај те поможинен некаске. Адалеске џанена кај понекогаш ка ваљани те керен туја лафи повише пути те шај те поможинен туке.

13. Сар о старешине шај те поможинен аменге пумаре молитвенцар хем е советенцар тари Библија? (Дикх хем о слике.)

¹³ Кеда ка викине е старешинен, ола ка трудинен пе те на керен те осетине тут панда повише криво башо адава со керѓан. Наместо адава, ола ка молинен пе туке. Шај ка изненадине тут кобор „бари сила“ шај те овел ленгере молитвен. Исто аѓаар, ола ка поможинен тут „аѓаар со ка макхен [тут] маслоја е Јеховаске ко анав“ (Јак. 5:14-16). Акава „масло“ тано о чачипе таро е Девлескоро Лафи. Адалеа со шукар ка користинен и Библија, о старешине шај те смиринен тут, те утешинен тут хем те поможинен туке палем те ове паше е Јеховаја (Иса. 57:18). О советија со ка ден тут тари Библија шај те керен те ове панда поодлучно понадари да те кере адава сој исправно англо Јехова. Преку о старешине шај те шуне е Јеховаскоро гласо сар вакерела туке: „Адава тано о друмо, џан ки лесте!“ (Иса. 30:21).

14. Спрема Галатјања 6:1, сар о старешине поможинена некаске со гело „ко погрешно друмо“? (Дикх хем о слике.)

¹⁴ Читин Галатјања 6:1. Кеда јекх христијани џала „ко погрешно друмо“, ов на постапинела спрема е Девлескере праведна мерилија. Кеда некој џала ко погрешно друмо, адава шај те значинел кај анѓа несави одлука со нане мудро или кај керѓа несаво сериозно грево. Адалеске со о старешине мангена адале пхрале или пхења, ола трудинена пе те испрајнен ле „ко јекх кротко начин“. О грчко лафи сој преведимо сар „испрајнен“, користинела пе сине те шај те опишинел сар јекх доктори испрајнела јекх пхаго кокало те шај правилно те сасљол. Јекх шукар доктори ка пазинел бут кеда пробинела те испрајнел о кокало те шај со похари те дукхал е пациенте џикоте керела адава. Слично, кеда о старешине пробинена те испрајнен јекхе пхрале кова со гело ко погрешно друмо, ола на мангена те керен леске панда побари дукх. Наместо адава, ола керена са со шај те ден совет е пхралеске ко јекх љубезно начин. Исто аѓаар, и Библија вакерела е старешиненге те пазинен ки песте џикоте керена адава. Џикоте поможинена некаске те применинел о библиско совет, о старешине никогаш на бистрена кај ола да тане несовршена хем керена грешке. Наместо те мислинен кај ола тане поправедна адалестар со грешинѓа хем колеске со пробинена те поможинен, о старешине трудинена пе те овен понизна хем те сикавен сочувство (1. Пет. 3:8).

15. Со шај те кера ако иси амен несаво проблеми?

¹⁵ Шај те овел амен доверба ко старешине таро амаро собрание. О Јехова сикавѓа лен кај на ваљани те вакерен е јаверенге башо амаре лична буќа. Исто аѓаар, ола сиклиле те ден совет тари Библија наместо те вакерен аменге со ола мислинена кај тано исправно. Хем сиклиле кај ваљани понадари да те поможинен амен те икљова ко крајо амаре проблеменцар (Изр. 11:13; Гал. 6:2). Секоле старешина иси ле различна особине хем искуство, ама шај те кера лафи било коле старешинаја кеда иси амен несаво проблеми. Џанѓола пе, амен нане те џа таро старешина ко старешина хем те рода совет са џикоте на аракхаја некас со ка вакерел аменге адава со мангаја те шуна. Ако кераја адава, ка ова сар окола кола со повише мангена о јавера те вакерен ленге „адава со ола ка манген те шунен“, наместо те шунен „о корисно сикљојбе“ таро е Девлескоро Лафи (2. Тим. 4:3). Кеда ка кера лафи јекхе старешинаја башо несаво проблеми, шај ов ка пучел амен дали више керѓем лафи јавере старешиненцар башо адава хем саво совет денѓе амен. А и скромност шај ка поттикнинел адале старешина те родел совет таро јавер старешина (Изр. 13:10).

АМАРИ ОДГОВОРНОСТ

16. Сави одговорност иси амен?

¹⁶ Иако грижинена пе аменге сар Девлескере бакхренге, о старешине на вакерена аменге со те кера. Секова јекх амендар тано одговорно пле животоја те сикавел кај тано верно само е Девлеске. Секој амендар ка одговоринел англо Девел башо пле лафија хем постапке, а ов ка поможинел аменге те ана мудра одлуке хем те ачхова леске верна (Рим. 14:12). Адалеске, о старешине на вакерена аменге со те кера, него користинена и Библија те шај те поможинен аменге те хаљова сар о Јехова дикхела ки несави бути, а пало адава мукхена коркори те ана одлука. Кеда размислинаја башо библиска советија со дена амен хем применинаја лен, амен сикљоваја те користина амари способност те размислина те шај те ана мудра одлуке (Евр. 5:14).

17. Ко со ваљани те ова одлучна?

¹⁷ Бут сием благодарна е Јеховаске башо адава со мангипаја грижинела пе аменге, сар јекх шукар пастири со грижинела пе пле бакхренге! О Јехова бичхалѓа е Исусе, е шукар пастире, те платинел и откупнина баши аменге те шај те живина вечно (Јован 10:11). Исто аѓаар, о Јехова денѓа амен старешине ко собранија кола со грижинена пе аменге, баш сар со ветинѓа: „Ка дав тумен пастирија спрема мло вило хем ола ка парварен тумен пенџарибаја хем хаљојбаја“ (Ерем. 3:15). Адалеске, кеда духовно сием слаба или насвале, на ваљани те мислина амен дали те рода помош таро старешине. Те ова одлучна те користина целосно и помош со дела амен о Јехова преку о старешине ко собрание.