Ценин и слободно волја со денѓа тут о Девел

1, 2. а) Со вакерена о мануша баши слободно волја? б) Со сикавела амен и Библија баши слободно волја, хем кола пучиба ка дикха?

КЕДА ваљанѓа те анел одлука, јекх манушни вакерѓа пле амалинкаке: „Ма чхив ман те размислинав, него вакер манге со те керав. Аѓаар и полокхо“. Акаја манушни мангља јавер некој те вакерел лаке со те керел, наместо те користинел пли слободно волја, о скапоцено поклон таро лакоро Створители. Сар и тано туја? Дали мангеа коркори те ане одлуке, или мангеа јавера те анен туке одлуке? Сар дикхеа ки слободно волја?

² О мануша вакерена различна буќа баши слободно волја. Несаве вакерена кај нане амен слободно волја соске о Девел англедер одлучинѓа сар ка постапина. Јавера вакерена кај шај те овел амен слободно волја само ако иси амен целосно слобода. Ама, и Библија сикавела амен кај о Девел денѓа амен способност хем слобода коркори те ана одлуке. (Читин Исус Навин 24:15.) Ки Библија исто аѓаар шај те аракха одговорија башо акала пучиба: Дали амари слободно волја тани ограничими? Сар ваљани те користина ла кеда анаја одлуке? Сар амаре одлукенцар сикаваја кобор чаче мангаја е Јехова? Сар шај те сикава кај поштујнаја е јаверенгере одлуке?

СО ШАЈ ТЕ СИКЉОВА ТАРО ЈЕХОВА ХЕМ ТАРО ИСУС?

3. Сар користинела о Јехова пли целосно слобода?

³ Е Јехова иси ле целосно слобода, хем амен шај те сикљова лестар сар користинела пли слобода. На пример, о Јехова биринѓа е Израелцон те овен лескоро народо, „лескири најмангли сопственост“ (5. Мој. 7:6-8). Е Јехова сине ле причина соске биринѓа лен. Ов мангља те икерел пло ветување со денѓа ле пле амалеске е Авраамеске (1. Мој. 22:15-18). Исто аѓаар, о Јехова секогаш тано праведно хем сикавела мангипе кеда користинела пли слобода. Адава шај те дикха ле таро начин сар воспитинела сине е Израелцон кеда сине леске непослушна. Кеда сине ленге чаче жал башо адава со керена сине, о Јехова сикавела ленге сине мангипе хем милост. Ов вакерѓа: „Ка сасљарав ленгири неверност. Ка мангав лен таро мло вило“ (Оси. 14:4). Адалеа со користинѓа пли слобода те поможинел е јаверенге, о Јехова денѓа амен шукар пример!

4, 5. а) Каске прво о Девел денѓа и слободно волја, хем сар ов користинѓа ла? б) Со ваљани секој амендар те пучел пе?

⁴ Кеда керѓа е ангелен хем е манушен, о Јехова одлучинѓа те дел лен слободно волја. Ов прво керѓа е Исусе. О Исус сине кердо спрема е Девлескоро лико хем сине ле слободно волја (Кол. 1:15). Сар о Исус користинѓа пли слобода? Англедер те авел ки Пхув, о Исус биринѓа те ачховел верно е Девлеске хем те на овел тари е Сатанаскири страна. Кеда о Исус ало ки Пхув, ов биринѓа те отфрлинел е Сатанаскере искушенија (Мат. 4:10). И рат англедер те мерел, о Исус вакерѓа пле Дадеске кај мангела те керел лескири волја. Ов вакерѓа: „Мо Дад, ако мангеа циде акаја чаша мандар. Ама, ма те овел сар ме со мангава, нека овел сар ту со мангеа“ (Лука 22:42). Дали шај амен да те ова сар о Исус хем те користина амари слободно волја те славина е Јехова хем те кера лескири волја?

⁵ Оја, шај те ова сар о Исус адалеске со амен да сием керде спрема е Девлескоро лико (1. Мој. 1:26). Ама, нане амен целосно слобода сар со иси е Јехова. Е Девлескоро Лафи вакерела кај о Јехова ограничинѓа амари слобода хем кај ов аџикерела амендар те прифатина акала ограничувања. На пример, о ромња ваљани те овен подложна пумаре роменге хем о чхаве пумаре родителенге (Еф. 5:22; 6:1). Адалеске ваљани те пуча амен: „Сар акала ограничувања влијајнена ко начин сар користинава мли слободно волја?“ О одговор башо акава пучибе ка влијајнел упри амари иднина.

САР ШАЈ ТЕ КОРИСТИНЕЛ ПЕ И СЛОБОДНО ВОЛЈА

6. Вакер јекх пример со сикавела кобор тано важно амари слобода те овел ограничими.

⁶ Дали шај и слобода сој ограничими те овел чачутни слобода? Оја, шај! Соске? Соске о ограничувања шај те заштитинен амен. На пример, шај мангаја те возина џи ки јекх диз сој подур. Ама, замислин туке кај ко друмо нане нисаве сообраќајна правилија хем секој шај коркори те одлучинел кобор сигате ка возинел хем која страна таро друмо ка овел. Дали ка осетине тут безбедно те возине ко адава друмо? Сигурно на. О ограничувања ваљанена аменге те шај сарине те уживина ки чачутни слобода. Те дикха несаве примерија тари Библија со сикавена сар шај те овен аменге корисна о ограничувања со денѓа лен о Јехова.

7. а) Која сине јекх разлика машкар о Адам хем о животне? б) Вакер јекх начин сар о Адам користинѓа пли слободно волја.

⁷ Кеда о Јехова керѓа е прво мануше, е Адаме, ов денѓа ле исто поклон сар со денѓа е ангелен — и слободно волја. Ама, о Девел на денѓа слободно волја е животненге. Сар о Адам шукар користинѓа пли слободно волја? Јекх начин сине со денѓа анава е животненге. О Девел „анела сине лен англо мануш те шај те дикхел саво анав ка дел ов секоле јекхеске“. Кеда о Адам ка дикхел сине секоле животно, ов дела ле сине анав со одговоринела леске. О Јехова на менинѓа нијекх анав со одлучинѓа о Адам те чхивел ле. Наместо адава, „саво анав о мануш ка дел сине секоле јекхеске, секоле џивде душаке, адава овела сине лескоро анав“ (1. Мој. 2:19).

8. Сар о Адам погрешно користинѓа пли слободно волја, хем саве сине о последице?

⁸ О Јехова денѓа е Адамеске и одговорност те керел и Пхув рај кеда вакерѓа леске: „Те овел тумен пхердо чхаве хем те овен бут џене, пхерен и пхув хем керен ла бути, хем владинен упро мачхе сој ко море, упро суштествија со летинена ко небо хем упро са о суштествија со пхирена ки пхув“ (1. Мој. 1:28). Ама, о Адам биринѓа те хал таро забранимо плоди хем кериндор адава ов на поштујнѓа о ограничувања со денѓа лен о Јехова. О Адам погрешно користинѓа пли слободно волја, адалеске о мануша цидена мукхе бут берша (Рим. 5:12). Никогаш ма те бистра о лошна последице тари одлука со анѓа ла о Адам. Адава ка поттикнинел амен те користина амари слободно волја ко шукар начин хем те прифатина о ограничувања со денѓа амен о Јехова.

9. Саво избор денѓа о Јехова е Израелцонге хем со вакерѓе леске ола?

⁹ Са о мануша наслединѓе и несовршеност хем о мерибе таро Адам хем и Ева. Ама тари јавер страна, панда иси амен право те користина о поклон таро Девел, и слободно волја. Адава шај те дикха ле таро начин сар о Јехова постапинѓа е Израелцонцар. О Јехова мукхља лен те одлучинен дали ка овен лескири сопственост или на (2. Мој. 19:3-6). О Израелција биринѓе те овен е Девлескоро народо хем прифатинѓе о ограничувања со денѓа лен о Девел. Ола вакерѓе: „Са со вакерѓа о Јехова ка кера“ (2. Мој. 19:8). Жално тано адава со пало несаво време ола биринѓе те на керен адава со вакерѓе. Амен шај те сикљова нешто бут важно таро акава пример. Те ценина секогаш о поклон со иси амен, и слободно волја, хем понадари да те ачхова паше узо Јехова хем те шуна лескере заповедија (1. Кор. 10:11).

10. Кола примерија таро Евреите 11 поглавје сикавена кај о несовршена мануша шај те користинен пли слободно волја те славинен е Девле? (Дикх и слика ко почеток тари статија.)

¹⁰ Ко Евреите 11 поглавје, пишинела о анава таро 16 верна мурша хем џувља кола со биринѓе те поштујнен о ограничувања со денѓа лен о Јехова. Адалеске, ола добинѓе бут берекетија хем бут шужи надеж баши иднина. На пример, е Ное сине ле бари вера хем биринѓа те шунел е Девлескере лафија те керел арка хем аѓаар те спасинел пле фамилија хем о генерацие со авена (Евр. 11:7). О Авраам хем и Сара спремно шунѓе е Девле хем геле ки пхув која со ветинѓа о Девел кај ка дел ла ленге. Иако сине лен прилика палем те иранен пе ки диз Ур, ола на иранѓе пе соске концентриринѓе пе ко адава со ветинѓа ленге о Јехова (Евр. 11:8, 13, 15, 16). О Мојсеј на мангља о барвалипа таро Египет хем биринѓа „те овел малтретиримо заедно е Девлескере народоја, а на те уживинел ко моментална грешна задоволствија“ (Евр. 11:24-26). Те трудина амен те овел амен вера сар со сине адале верна муршен хем џувљен хем те ценина амаро поклон, и слободно волја, аѓаар со ка користина ла те кера е Девлескири волја.

11. а) Кова тано јекх таро најбаре берекетија со анела и слободно волја? б) Со поттикнинела тут те користине тли слободно волја ко шукар начин?

¹¹ Шај ка мислина кај тано полокхо кеда некој јавер ка анел одлуке наместо аменде, ама тегани никогаш нане те доживина јекх таро најбаре берекетија со иси амен тари слободно волја. Кова тано адава берекети? И Библија вакерела баши лесте ки 5. Мојсеева 30:19, 20. (Читин.) Ко 19 стихо, читинаја кај о Девел денѓа е Израелцонге те биринен. Ко 20 стихо, сикљоваја кај о Јехова денѓа лен прилика те сикавен кобор мангена ле. Амен да шај те бирина те служина е Јеховаске. Хем амен да иси амен посебно прилика те користина амари слободно волја те славина е Јехова хем те сикава леске кобор мангаја ле!

МА КОРИСТИН КО ПОГРЕШНО НАЧИН И СЛОБОДНО ВОЛЈА

12. Сар на ваљани те користина амари слободно волја?

¹² Замислин туке кај деа јекх вредно поклон несаве амалеске. Сар ка осетине тут ако ов фрдела ко ѓубре о поклон со денѓан ле, или, сој панда полошно, користинела о поклон те керел лошнипе некаске? Сигурно ка осетине тут повредимо. О Јехова денѓа амен јекх поклон, и слободно волја. Сигурно осетинела пе повредимо кеда дикхела сар о мануша ко погрешно начин користинена пли слобода хем анена лошна одлуке или керена лошнипе е јаверенге. И Библија вакерела кај ко „последна диве“ о мануша „нане те овен благодарна“ (2. Тим. 3:1, 2). Сар шај амен те сикава кај сием благодарна башо амаро скапоцено поклон таро Јехова? Хем сар шај те на користина акава поклон ко погрешно начин?

13. Кова тано јекх начин сар на ваљани погрешно те користина амари слобода?

¹³ Саринен иси амен слобода те бирина амаре амален, и забава, хем сар ка урава амен хем ка дотерина амен. Ама, шај те користина амари слобода сар изговор те ана одлуке со на мангела лен о Девел или те постапина сар о мануша таро свето. (Читин 1. Петрово 2:16.) Наместо те користина амари слобода те кера адава сој лошно, амен ваљани те користина ла те славина е Девле (1. Кор. 10:31; Гал. 5:13).

14. Соске ваљани те овел амен доверба ко Јехова кеда користинаја амари слободно волја?

¹⁴ О Јехова вакерѓа: „Ме о Јехова, сиум тло Девел, кова со сикавела тут башо тло шукарипе, окова со водинела тут ко друмо колесте со ваљани те џа“ (Иса. 48:17). Ваљани те овел амен доверба ко Јехова хем те прифатина о ограничувања со дела амен те шај те ана шукар одлуке. Амен понизно признајнаја кај „е манушескоро друмо нане ки лескири власт. О мануш кова со пхирела нашти те управинел пле друмоја“ (Ерем. 10:23). О Адам хем о Израелција кола со на сине верна, биринѓе те на поштујнен о ограничувања со денѓа о Јехова хем те овел лен доверба ки песте. Те сикљова таро ленгоро лошно пример. Наместо те потприна амен ки аменде, те овел амен „доверба ко Јехова цело [амаре] вилеа“ (Изр. 3:5).

ПОШТУЈН Е ЈАВЕРЕНГИРИ СЛОБОДНО ВОЛЈА

15. Со сикљоваја таро начело сој пишимо ко Галатите 6:5?

¹⁵ Амен ваљани исто аѓаар те поштујна и слобода е јаверенгири те анен песке одлуке ко живото. Адалеске со саринен иси амен слободно волја, нашти секогаш те ана иста одлуке. Акава исто аѓаар важинела е одлукенге поврзиме амаре понашибаја хем обожавибаја. Те сетина амен ко начело таро Галатите 6:5. (Читин.) Кеда хаљоваја кај секова христијани тано одговорно башо пле одлуке, тегани ка поштујна е јаверенгири слободно волја.

16, 17. а) Саво проблеми иклило ко Коринт? б) Сар о Павле поможинѓа акале пхрален, хем со шај амен те сикљова таро адава?

¹⁶ Те дикха јекх библиско пример кова со сикавела соске ваљани те поштујна амаре пхраленгири слободно волја. О христијања таро Коринт распрајнѓе пе башо адава дали ваљани те хал пе мас кова со сине дендо е идоленге, а пало адава бикимо ко пазари. Некаскири совест мукхела ле сине те хал асавко мас соске леске о идолија на значинена сине ништо. Ама, адала со англедер обожавинена сине идолија, мислинена сине кај ако хале асавко мас, адава ка овел исто сар те обожавинен е идолен (1. Кор. 8:4, 7). Адава сине баро проблеми кова со шај сине те керел поделба ко собрание. Сар о Павле поможинѓа е христијаненге те решинен акава баро проблеми?

¹⁷ Прво, о Павле сетинкерѓа лен кај о хајбе нане те анел лен попаше е Девлеа (1. Кор. 8:8). Дујто, о Павле предупрединѓа лен те пазинен адалеа со иси лен право те анен одлука, те на поврединен и совест адаленгири сој слаба (1. Кор. 8:9). Пало адава, ов вакерѓа адаленге со иси лен слабо совест те на осудинен адален со ка одлучинен те хан таро адава мас (1. Кор. 10:25, 29, 30). Значи, ки акаја важно ситуација сој поврзими е обожавибаја, секова христијани ваљанѓа коркори те анел песке одлука. Ако адава тано аѓаар ко важна ситуацие, тегани на ваљани ли те поштујна е пхраленгири слобода те анен коркори одлуке чак башо тикне буќа да? (1. Кор. 10:32, 33).

18. Сар ка сикава кај ценинаја амаро поклон, и слободно волја?

¹⁸ О Јехова денѓа амен јекх поклон, и слободно волја, која со дела амен чачутни слобода (2. Кор. 3:17). Амен ценинаја адава поклон соске шај те ана одлуке коленцар со сикаваја кобор мангаја е Јехова. Понадари да те ана одлуке кола со славинена ле, хем те поштујна е јаверенгоро право те биринен сар мангена те користинен пло скапоцено поклон.