Поможинен тумаре чхавенге кеда живинена ки јавер пхув

1, 2. а) Саве проблемија иси буте чхавен со ленгере родителија тане емигрантија? б) Башо кола пучиба ка кера лафи ки акаја статија?

„КЕДА сиум сине тикно, кхере хем ко собрание керава сине лафи ки чхиб мле родителенгири кола сој емигрантија“ вакерела о Џошуа.a (Дикх и фуснота.) „Ама, кеда почминѓум те џав ки школа, користинава сине повише и чхиб со керела пе лафи ко адава тхан. Пало некобор берша, само ки адаја чхиб керава сине лафи. На хаљовава сине ништо ко состанокија хем на осетинава ман сине дело тари мле родителенгири култура.“ Бут јавера да осетинена пе исто сар о Џошуа.

² Авдиве, повише таро 240 милионија мануша на живинена ки пхув коте сој бијаме. Ако сиан родители кова сој емигранти, сар шај најшукар те поможине те чхавенге те манген е Јехова хем „те живинен спрема о чачипе“? (3. Јов. 4). Сар шај о јавера да те поможинен?

О РОДИТЕЛИЈА ВАЉАНИ ТЕ ДЕН ШУКАР ПРИМЕР

3, 4. а) Сар шај о родителија те ден шукар пример пле чхавенге? б) Со на ваљани о родителија те аџикерен таро пле чхаве?

³ Сар родителија, тумаро пример тано бут важно ако мангена тумаре чхаве те овен паше е Јеховаја хем те живинен вечно. Кеда о чхаве дикхена сар тумен чхивена о Царство ко прво тхан, ола сикљовена те овел лен доверба кај о Јехова ка грижинел пе башо ленгере потребе (Мат. 6:33, 34). Нека овел туменге и служба башо Јехова најважно, а на о материјална буќа. Живинен скромно хем трудинен тумен ма те кхувен ко дугија. Роден „барвалипе ко небо“, јавере лафенцар, те овел тумен шукар анав англо Јехова, наместо те роден паре или те фалинен тумен о мануша. (Читин Марко 10:21, 22; Јован 12:43.)

⁴ Никогаш ма овен добором бут зафатиме со нане те овел тумен време тумаре чхавенге. Вакерен ленге кај радујнена тумен со одлучинѓе те чхивен е Јехова ко прво тхан, наместо те прастан пали кариера или паре, бизи разлика дали песке или туменге. Избегинен о погрешно стави со иси буте џенен кај о чхаве ваљани те керен поудобно о живото пле родителенгоро. Ма бистрен, „о чхаве на ваљани те стекнинен имот пле родителенге, него о родителија пле чхавенге“ (2. Кор. 12:14).

САР ШАЈ О РОДИТЕЛИЈА ТЕ РЕШИНЕН О ПРОБЛЕМИ Е ЧХИБЈАЈА

5. Соске о родителија мора често те керен лафи башо Јехова пумаре чхавенцар?

⁵ Сар сој пророкујмо ки Библија, авдиве мануша „таро са о чхибја хем нацие“ авена ки е Јеховаскири организација (Зах. 8:23). Ама, ако тумаре чхаве на хаљовена шукар тумари чхиб, тегани шај те овел туменге пхаро те сикавен лен башо чачипе. Ола тане о најважна интересентија со некогаш ка овел тумен, хем дали ка овел лен вечно живото зависинела таро адава дали шукар ка пенџарен е Јехова (Јован 17:3). Те шај тумаре чхаве те сикљовен башо Јехова, тумен мора често те вакерен ленге баши лесте. (Читин 5. Мојсеева 6:6, 7.)

6. Сави корист иси е чхавен кеда сикљовена тумари чхиб? (Дикх и слика ко почеток тари статија.)

⁶ Тумаре чхаве веројатно ки школа или јаверендар ка сикљовен и чхиб со керела пе лафи ко адава тхан коте со живинена. Ама, ола сикљовена тумари чхиб кеда редовно керена ленцар лафи. Ако тумаре чхаве керена лафи ки тумари да чхиб, тегани ка овел ленге полокхо те керен туменцар лафи хем те вакерен туменге сар осетинена пе. Исто аѓаар, адава анела ленге јавера да користија. Кеда о чхаве џанена повише тари јекх чхиб, тегани пошукар размислинена хем адава поможинела ленге те хаљовен сар о јавера размислинена. Исто аѓаар дела лен прилика те керен нешто повише ки служба. И Каролина, каскере родителија тане емигрантија, вакерела: „Адава со сиум ко собрание коте со керела пе јавер чхиб лафи тано бут интересно. Те поможине адари коте со иси побари потреба, тано бут шукар“.

7. Со шај те керен ако е чхавенге тано пхаро те керен тумари чхиб лафи?

⁷ Кеда о чхаве сикљовена и чхиб хем и култура таро тхан коте со живинена, несаве лендар шај више те на овел лен желба или способност те керен лафи ки чхиб која со керена ленгере родителија. Ако тано акава случај тумаре чхавенцар, шај ли те трудинен тумен те сикљовен и чхиб која со керена лафи тумаре чхаве? Ка овел туменге полокхо те воспитинен тумаре чхавен сар христијања ако хаљовена лен со керена лафи, сар забавинена пе, со сикљовена ки школа хем ако шај те керен лафи ленгере наставниконцар. Точно тано кај ваљани време, труд хем понизност те шај те сикљове неви чхиб. Ама, адава врединела. На пример, ако иси тут чхаво со нашти те шунел, нане ли те трудине тут те сикљове и знаковно чхиб те шај те хаљове тут леа? Исто грижа заслужинена о чхаве да сој ленге полокхо те керен лафи ки јавер чхиб.b (Дикх и фуснота.)

8. Сар шај те поможине тле чхавен ако на џанеа шукар и чхиб таро адава тхан коте со живинена?

⁸ Несаве родителенге сој емигрантија шај те овел пхаро шукар те сикљовен и неви чхиб со керена ла лафи ленгере чхаве. Акава керела те овел пхаро е родителенге те поможинен пле чхавенге те хаљовен е Девлескоро Лафи (2. Тим. 3:15). Ако тумари ситуација тани асавки, тумен шај понадари да те поможинен тумаре чхавен те пенџарен хем те манген е Јехова. Јекх старешина со викинела пе Шен, вакерела: „Амари дај со бајрарѓа амен коркори, на хаљовела сине шукар и чхиб ки која со амен пошукар кераја сине лафи, а ме хем ме пхења на џанаја сине шукар те кера ки лакири чхиб лафи. Ама, кеда дикхаја ла сине кај проучинела, молинела пе хем дела пестар са те шај секова курко те овел амен и Фамилијарно рат, халилем кај тано бут важно те пенџара е Јехова“.

9. Сар шај о родителија те поможинен е чхавен со ваљани те проучинен ко дуј чхибја?

⁹ Несаве чхаве шај ваљани те сикљовен башо Јехова ко дуј чхибја. Соске? Адалеске со ки школа керена јекх чхиб лафи, а кхере јавер чхиб. Тари адаја причина, несаве родителија користинена литература, аудиоснимке хем видеофилмија ко солдуј чхибја. Акава јасно сикавела кај о родителија сој емигрантија ваљани панда повише те трудинен пе те шај те поможинен пумаре чхавенге те овен попаше е Јеховаја.

КО САВО СОБРАНИЕ ВАЉАНИ ТЕ ЏАН?

10. а) Кој мора те одлучинел ко саво собрание ка џан? б) Со ваљани те керен о поглаварија англедер те анен одлука?

¹⁰ Ако о емигрантија живинена дур таро пхраља со керена ленгири чхиб лафи, тегани ваљани те џан ко собрание коте со керела пе лафи ки чхиб таро адава тхан (Пс. 146:9). Ама, ако иси паше собрание коте со керела пе ленгири чхиб лафи, о поглавари мора те одлучинел ко кова собрание ка овел најшукар те џал пле фамилијаја. Англедер те анел одлука, ов шукар ка размислинел хем ка молинел пе башо адава. Ов исто аѓаар ваљани те керел лафи пле ромњаја хем чхавенцар (1. Кор. 11:3). Башо кола буќа ваљани те размислинел? Кола библиска начелија шај те поможинен ле те анел одлука?

11, 12. а) Сар и чхиб влијајнела ко адава кобор о чхаво ка сикљовел ко состанокија? б) Соске несаве чхаве на мангена те сикљовен и чхиб пле родителенгири?

¹¹ О родителија ваљани те размислинен саве тане о потребе е чхавенгере. Те шај те хаљовен шукар и Библија, е чхавенге ваљани повише духовно храна, а на само некобор саатија ко курко те сикљовен тари Библија ко состанокија. Ама, размислинен баши акаја да бути: Кеда о чхаве џана ко состанокија со икерена пе ки чхиб со најшукар хаљовена ла, ола шај те сикљон бут адалеа со ка овен присутна ки ленде, шај чак повише таро адава сој свесна о родителија. Акава нане те овел аѓаар ако о чхаве на хаљовена шукар и чхиб. (Читин 1. Коринќаните 14:9, 11.) И чхиб која со керена о родителија лафи шај нане те влијајнел упро е чхавенгере мисле хем чувствија. Несаве чхаве шај те сикљовен те ден коментарија, те икерен презентацие хем говорија ки чхиб ленгере родителенгири, ама адава шај те керен ле механички а на таро вило.

¹² Упро е чхавескоро вило влијајнена повише буќа, а на само и чхиб. Акава сине случај е пхралеа, о Џошуа. Лескири пхен и Естер вакерела: „Упро терне чхаве влијајнена и чхиб, и култура хем и религија ленгири родителенгири.“ Ако о чхаве на осетинена пе дело тари култура пле родителенгири, тегани шај нане те манген те сикљовен ленгири чхиб или религија. Со шај те керен о родителија?

13, 14. а) Соске јекх брачно пари геле ко собрание коте со керела пе лафи ки чхиб таро адава тхан? б) Сар ачхиле о родителија духовно зорале?

¹³ О родителија сој христијања чхивена е чхавенгере потребе англедер пле желбе (1. Кор. 10:24). Е Џошуаскоро хем е Естеракоро дад, о Самоил, вакерела: „Ми ромни хем ме трудинаја амен сине те приметина ки која чхиб о чачипе шај те ресел амаре чхавенге ко вило хем молинаја амен сине баши мудрост. О одговор на сине адава амен со мангаја сине. Дикхлем кај нане лен бари корист таро состанокија ки амари чхиб, адалеске одлучинѓем те џа ко собрание коте со керела пе лафи ки чхиб таро адава тхан. Заедно џаја сине редовно ко состанокија хем ки служба. Исто аѓаар, канинаја сине е пхрален таро адава собрание ко ручко хем џаја сине те пхира ленцар. Са адава поможинѓа амаре чхавенге те пенџарен пошукар е пхрален хем е Јехова, на само сар ленгоро Девел него исто аѓаар сар ленгоро Дад хем Амал. Акава сине бут поважно него те сикљовен амари чхиб“.

¹⁴ О Самоил вакерела: „Те шај те ачхова духовно зорале, ме хем ми ромни џаја сине исто аѓаар ко состанокија ки амари чхиб. Сием сине бут зафатиме хем уморна. Ама, сием благодарна е Јеховаске со денѓа амен берекетија. Амаре трин чхаве служинена е Јеховаске ки полновремено служба“.

СО ШАЈ ТЕ КЕРЕН О ТЕРНЕ

15. Соске и Кристина мислинела сине кај ка овел пошукар те џал ко собрание коте со керела пе лафи ки чхиб со хаљовела ла пошукар?

¹⁵ Кеда ка бајрон, о чхаве шај ка хаљовен кај пошукар ка служинен е Јеховаске ко собрание коте со керела пе лафи ки чхиб која со најшукар хаљовена ла. Ако одлучинѓе аѓаар, о родителија на ваљани те мислинен кај ленгере чхаве на мангена лен. И Кристина вакерела: „Пенџарава сине о основна буќа тари чхиб мле родителенгири, ама кеда сиум сине ко состанокија, сине манге пхаро те хаљовав. Кеда сине ман 12 берш, сиум сине ко јекх конгрес со икерѓа пе ки чхиб сар со керава сине лафи ки школа. Прво пути халиљум кај адава со шунава тано о чачипе! Јавер шукар промена сине кеда почминѓум те молинав ман ки чхиб сар со керава сине лафи ки школа. Тегани, шај сине те керав е Јеховаја лафи таро вило!“ (Дела 2:11, 41). Кеда пхерѓа 18 берш, и Кристина керѓа лафи пле родителенцар башо акава хем одлучинѓа те џал ко собрание коте со хаљовела и чхиб пошукар. Ој вакерела: „Адава со сикљовава башо Јехова ки чхиб со хаљовава ла пошукар поттикнинела ман те керав нешто повише“. И Кристина ули општо пионерка хем тани бут бахтали.

16. Соске тани благодарно и Надја со ачхили ко собрание коте со џана сине лакере родителија?

¹⁶ Тернален, дали мангена те џан ко собрание коте со керела пе лафи ки чхиб таро тхан коте со живинена? Ако мангена, пучен тумен соске. Те гелен ко асавко собрание, дали адава ка поможинел тумен те овен попаше е Јеховаја? (Јак. 4:8). Или ка џан адалеске со на мангена тумаре родителија те дикхен тумен са со керена или шај адалеске со на мангена те трудинен тумен повише? И Надја, која со акана служинела ко Бетел, вакерела: „Кеда ме, мо пхрал хем ме пхења сием сине тинејџерија, манглем те џа ко собрание коте со керела пе лафи ки чхиб таро тхан коте со живинаја сине“. Ама, лакере родителија џанена сине кај ако геле ко јавер собрание, адава нане те влијајнел шукар упри е чхавенгири духовност. „Акана сием благодарна со амаре родителија трудинѓе пе те сикавен амен пумари чхиб хем со ачхилем ко собрание ки адаја чхиб. Акава керѓа амаро живото пошукар хем денѓа амен повише прилике те поможина е јаверен те пенџарен е Јехова“.

САР ШАЈ О ЈАВЕРА ТЕ ПОМОЖИНЕН

17. а) Каске денѓа о Јехова и одговорност те воспитинен е чхавен? б) Кој шај те поможинел е родителенге те сикавен пумаре чхавен башо чачипе?

¹⁷ О Јехова денѓа одговорност е родителенге те сикавен пумаре чхавен башо чачипе. На денѓа акаја одговорност е папонге, е бабенге или некаске јавереске. (Читин Изреки 1:8; 31:10, 27, 28.) Ама, понекогаш несаве родителија на џанена и чхиб со керела пе лафи ко тхан коте со живинена, адалеске шај ка ваљани ленге помош те ресен џи ко вило пле чхавенгоро. Кеда о родителија родена помош, адава на значинела кај нашена тари пли одговорност те воспитинен пумаре чхавен, него кај трудинена пе те воспитинен лен сар со мангела о Јехова (Еф. 6:4). На пример, о родителија шај те пучен е старешинен башо предлогија сар те икерен и Фамилијарно рат хем сар шај те аракхен пумаре чхавенге шукар амала.

18, 19. а) Сар шај о јавера христијања те поможинен е тернен? б) Со ваљани о родителија понадари да те керен?

¹⁸ Те шај те поможинен пумаре чхавен, о родителија шај понекогаш те канинен јаверен кеда иси лен и Фамилијарно рат. Исто аѓаар, бут терне сикљовена таро јавера пхраља кеда џана ленцар ки служба хем кеда дружинена пе ко слободно време (Изр. 27:17). О Шен вакерела: „Сетинава ман шукар ко пхраља со грижинѓе пе манге. Ола поможинѓе ман кеда ваљани сине те овен ман говорија ко состанокија, хем секогаш сикљовава сине нешто нево лендар. Уживинава сине кеда дружинаја амен сине ко слободно време“.

¹⁹ Окола сој тане бириме таро родителија те поможинен ленгере чхавен, ваљани секогаш те трудинен пе те поттикнинен е чхавен те поштујнен пле родителен. Акава шај те керен ле аѓаар со ка керен позитивно лафи башо родителија хем нане ола те лен е родителенгири одговорност те воспитинен пумаре чхавен. Исто аѓаар, адала со поможинена е чхавенге ваљани те пазинен те на ден причина некаске таро собрание или аври лестар те мислинел кај ола керена нешто сој погрешно ко морално поглед (1. Пет. 2:12). Иако о родителија шај те роден помош таро јавера, ленгири тани и одговорност те сикавен о чачипе пумаре чхавен. Ола мора те џанен сар о јавера поможинена ленгере чхавен.

20. Сар шај о родителија те поможинен е чхавенге те служинен е Јеховаске?

²⁰ Тумен со сиен родителија, молинен е Јехова баши помош хем ден тумендар са. (Читин 2. Летописи 15:7.) Најважно нека овел туменге тумаре чхавенгоро амалипе е Јеховаја, а на тумаре желбе. Керен са со шај е Девлескоро Лафи те ресел џи ко ленгоро вило. Никогаш ма нашавен и надеж кај тумаре чхаве шај те овен е Јеховаскере слуге. Кеда ола шунена е Девлескоро Лафи хем дикхена тумаро шукар пример, ка осетинен тумен исто сар о апостол Јован кова со вакерѓа: „Манге нане побари радост таро адава те шунав кај мле чхаве живинена спрема о чачипе“ (3. Јов. 4).