Дали џанљан?

Соске о Исус е трговцонге со бикинена сине животне ко храми вакерѓа кај тане чора?

КО МАТЕЈ пишинела: „О Исус кхувѓа ко храми хем палдинѓа саринен со бикинена сине хем кинена сине ко храми, иранѓа о астаља адаленгере со менинена сине паре хем о клупе околенгере со бикинена сине гулубија. Хем ов вакерѓа ленге: ’Пишимо тано: Мло кхер ка викинел пе кхер е молитвакоро, а тумен лестар керѓен кхер е чоренгоро!‘“ (Мат. 21:12, 13).

И историја сикавела кај о трговција ко храми чхивена сине бут баре цене. На пример, о гулубија обично сине добором ефтина со о чороле да шај сине те кинен хем те ден лен сар жртва. Спрема ко пуране еврејска записија, ко прво веко а.е., дуј гулубија коштинена сине јекх златно динари. Те шај те заработинел добором паре, јекх работнико ваљани сине те керел 25 диве бути. О гулубија уле добором скупа со о чороле мануша нашти сине те кинен лен (3. Мој. 1:14; 5:7; 12:6-8). Хољамо бут башо акава, о рабини Симеон бен Гамалиел тикњарѓа о број башо жртве со ваљани сине те ден пе. Одма пало адава, и цена башо дуј гулубија сине шел пути потикни.

Дикхјола пе кај о трговција ко храми сине алчна хем искористинена сине е манушен со кинена лендар. Адалеске о Исус вакерѓа ленге кај тане чора.