Ко цело свето тано бут потато таро нормално — Со вакерела и Библија?

Ко јули 2022 берш, ко цело свето башо баре температуре сине известимо акава:

• „Дујто пути акава масек, ки Кина сине предупредиме о мануша кај ко 70 дизја ка овел претерано тато о време“ (CNN Wire Service, 25 јули 2022).

• „Адалеске со ки цело Европа тано бут тато, ко бут пхувја тхабљона бут шуме“ (The Guardian, 17 јули 2022).

• „Недела ко бут дизја ко САД, сине бут баре температуре сар никогаш англедер. О тато време астарѓа о источно брего хем несаве делија таро југ хем о средно запад“ (The New York Times, 24 јули 2022).

Со значинела са акава? Дали више ка шај те живинел пе ки пхув? Со вакерела и Библија?

Дали о тато време тано пророкујмо ки Библија?

Оја. О бут баро татипе согласинела пе адалеа со пророкујнела и Библија башо амаро време. О Исус пророкујнѓа кај „адава со ка дикхен о мануша ка даравел лен хем ка овен баре знакија таро небо“ (Лука 21:11). Адалеске со ко цело свето бут бајрона о температуре, бут мануша дарана кај адава со керела пе ки Пхув, шај те анел џи адава те нашти те живинел пе ки лате.

Дали и Пхув ка овел тхан коте со ка нашти те живинел пе?

На. О Девел керѓа и пхув те шај о мануша те живинен ки лате засекогаш (Псалм 115:16; Проповедник 1:4). Ов нане те дозволинел о мануша те уништинен и пхув. Наместо адава, ов ветинела кај ка „уништинел околен со уништинена и пхув“ (Откровение 11:18).

Дикх акала дуј пророштвија кола со сикавена аменге со панда ветинела о Девел:

• „Ка радујнен пе и пустина хем и пхув бизо пани, ка радујнел пе и пхув сој пусто хем ка цветонел сар шафрани“ (Исаија 35:1). О Девел нане те дозволинел и Пхув те овел пустина, наместо адава ов ка поправинел са и штета сој лаке керди.

• „Ту грижинеа тут е пхувјаке хем керѓан ој те дел бут плодија хем те овел барвали“ (Псалм 65:9). О Девел ка керел и пхув те овел рај.

Те шај те дознајне соске шај те ова сигурна кај и Пхув нане те овел уништими хем сар о Девел ка обновинел ла, читин и статија „Дали човекот ќе ја уништи Земјата?“