Дали о христијања ваљани те поддржинен и војна — Со вакерела и Библија?

Џикоте трајнела и војна ки Украина, бут христијанска религиозна водачија поттикнинена е манушен те поддржинен ла. Дикх сар несаве религиозна водачија поддржинена јекх страна, а о јавера и јавер страна:

• „Бари чест хем благодарност башо са амаре војникија кола со бранинена пумари пхув и Украина таро амаро душмани... Амаре виле, искрена молитве хем амари поддршка тане секогаш туменцар“ (Акава вакерѓа ле о Киевско метрополит Епифаниј I башо The Jerusalem Post ко 16 март 2022 берш).

• „Џикоте и Москва продолжинела е војнаја ки Украина, о поглавари тари Руско православно црква икерѓа богослужба башо руска војникија коте со поттикнинѓа лен те бранинен пумари држава ’сар со јекх русинцо шај те керел адава‘ (Reuters, 3 април 2022 берш).

Дали о христијања ваљани те поддржинен и војна? Со вакерела и Библија башо адава?

Со чаче вакерела и Библија

И Библија сикавела кај окола со чаче џана пало Исус на учествујнена ки војна.

• „Иран о мачи ко лескоро тхан, соске сарине со ка лен мачи ко вас, ка мерен таро мачи“ (Матеј 26:52).

  Дали јекх мануш кова со поддржинела и војна или учествујнела ки лате чаче икерела пе ко е Исусескере лафија?

• „Дава тумен неви заповед: манген тумен јекх јекхеа! Сар ме со мангљум тумен, аѓаар тумен да манген тумен јекх јекхеа. Аѓаар сарине ка џанен кај сиен мле ученикија, ако иси тумен мангипе машкар туменде“ (Јован 13:34, 35).

  Дали јекх мануш кова со поддржинела и војна сикавела мангипе пало кова со пенџарѓовена е Исусескере следбеникија?

Башо повише информацие читин и статија „Дали христијаните треба да војуваат?“

О христијања хем и војна авдиве

Дали тано разумно те очекујна о христијања авдиве те на учествујнен ки војна? Оја. И Библија вакерела кај ко „последна диве“, адава тано о време коте со живинаја акана, ка овен мануша таро са о нацие кола со „нане повише те сикљовен те марен пе“ (Исаија 2:2, 4). Акала мануша ка постапинен ко склад адалеа со сикавѓа о Исус.

• Те шај те дознајне повише, читин и Стражарска кула е насловеа „Како гледа Бог на војните?“

Панда хари о Јехова,a „о Девел кова со дела мир“, ка користинел пли небесно влада те спасинел е манушен „таро малтретирибе хем насилство“ (Филипјаните 4:9; Псалм 72:14).

• Те шај те дикхе сар ка керел адава, дикх о видеоклипи Сој е Девлескоро Царство?