Со вакерела и Библија башо адава со нане доволно пани пијбаске ко цело свето?
Сариненге аменге ваљани чисто пани те шај те живина. Ама, о генерално секретари таро ОН, о Антонио Гутереш, вакерѓа кај „адалеске со са повише ваљани пани иси амен сериозно криза пањеске“. Милијарде манушен ко свето нане лен доволно пани пијбаске.
Strdel/AFP via Getty Images
Дали некогаш ка овел доволно пани сариненге? Или, секогаш ка овел криза пањеске? Со вакерела и Библија?
Со ветинела и Библија башо адава кобор пани ка овел
Тари Библија дознајнаја кај јекх диве нане те овел проблеми е пањеа. Уствари, ка овел бут чисто пани пијбаске.
„Ки пустина ка појавинен пе бут пања хем ки шуки пхув потокија. И тхари пхув ка претворинел пе ко езеро, а и жедно пхув — ко изворија пањеа“ (Исаија 35:6, 7).
Соске шај те овел амен доверба ко акава ветување тари Библија? Те дикха кова детали спомнинела и Библија башо начин сар тани створими амари планета.
Со вакерела и Библија баши пхув хем башо кружно тек е пањескоро
„[О Девел] на створинѓа и пхув џабе, него керѓа ла те живинел пе ки лате“ (Исаија 45:18).
Адалеске со створинѓа и пхув аѓаар со шај ој коркори те икерел о живото ки песте, о Девел керѓа те овен природна процесија кола со керена те овел бут пани пијбаске.
„[О Девел], кхедела о капке пани ко уче тхана, хем ола цединена пе упралдан сар бршим хем сар лескири магла, хем тегани о облакија тхавдена, перела баро бршим упро мануша“ (Јов 36:27, 28).
Ко акала стихија, тано едноставно лафенцар пишимо јекх природно систем кова со керѓа о Девел колеа со шај о пани нонстоп те кружинел хем секогаш те овел доволно пани. О пани испаринела тари пхув хем таро море, кондензиринела хем пало адава перела сар бршим. Адалеске секогаш шај те овел чисто пани пијбаске е манушенге хем е животненге (Проповедник 1:7; Амос 5:8).
„Ка дав тумен бршим ко право време хем и пхув ка бијанел пло плоди, хем о кашта ки ливади ка ден пле плодија“ (3. Мојсеева 26:4).
О Девел ветинѓа е Израелцонге таро пурано време кола со сине земјоделција кај ко ленгере ниве ка дел лен баро плоди аѓаар со редовно ка дел лен пани. Ов џанља кај те шај и пхув те дел хајбаске ваљани доволно бршим ко право време.
Адава со о Девел керѓа е Израелцонге англедер, панда хари ка керел хем баши цели пхув (Исаија 30:23). Џикоте авела адава време ко бут делија таро свето и криза башо пани са повише бајрола, а јекх причина тани адаја со иси са похари бршим. Со јавер вакерела и Библија башо адава сар ка решинен пе о авдисутне проблемија е пањеа?
Сар ка чхинавел пе и криза е пањеа
Тари Библија откринаја кај о Девел преку пло Царство ка решинел о проблемија кола со влијајнена упри амари планета, машкар коленде сој хем и криза е пањеа (Матеј 6:9, 10). Е Девлескоро Царство тани влада ко небо која со ка владинел упри пхув (Даниел 2:44; Откровение 11:15). Освен адава, е Девлескоро Царство ка керел адава со о манушикане владе нане способна те керен — ка цидел о причине башо проблемија е пањеа.
Проблеми: О климатска проблемија керена те на овел рамнотежа ко кружно тек е пањескоро. Адалеске иси баре суше хем баре поплаве бизи разлика дали тане адалеске со дела песке бут бршим или адалеске со уштела о пани ко море.
Решение: Е Девлескоро Царство ка поправинел са и штета сој керди ки амари околина те шај те обновинел пе амари планета. О Девел ветинѓа: „Дикх! Керава са о буќа неве!“ (Откровение 21:5). Ки шуки пхув ка овел бут пани пијбаске хем аѓаар ка овел живото адатхе коте со авдиве нашти те овел (Исаија 41:17-20). Исто аѓаар, е Девлескоро Царство, коте со о Исус Христос тано Цари, ка контролиринел са о природна силе ки пхув.
Кеда сине ки пхув, о Исус смиринѓа јекх бари бура хем аѓаар сикавѓа кобор бари моќ денѓа ле о Девел (Марко 4:39, 41). Кеда ка владинел о Исус нане више те овен природна катастрофе. О мануша ка живинен ко чачутно мир хем ка осетинен пе сигурна, бизо те даран тари било сави катастрофа.
Проблеми: О мануша кола со на размислинена башо последице таро пле постапке хем о алчна компание загадинена о реке, о езерија хем о изворија тели пхув хем аѓаар ола да иси лен дело ко адава те на овел доволно чисто пани.
Решение: О Девел ка чистинел и пхув хем ка поправинел са и штета сој керди ко реке, ко езерија, ко море хем ки пхув. И пхув ка овел рај. Ко јекх поетско начин ки Библија тано опишимо акава: „Ка радујнен пе и пустина хем и пхув бизо пани, ка радујнел пе и пхув сој пусто хем ка цветонел сар шафрани“ (Исаија 35:1).
А со ка овел околенцар со на грижинена пе е околинаке хем е манушенге? О Девел ветинѓа кај ка „уништинел околен со уништинена и пхув“ (Откровение 11:18; Изреки 2:21, 22).
Проблеми: О мануша користинена о чисто пани ко погрешно начин хем адалеске посигате трошинела пе о пани а попохари пхерела пе.
Решение: Адалеске со ка владинел е Девлескоро Царство, ки пхув ка керел пе е Девлескири волја, а на и волја е манушенгири кола сој себична (Матеј 6:9, 10). Е Девлескоро Царство ка дел о најшукар образование пле слугенге ки пхув. Ко Исаија 11:9 вакерела: „И пхув ка овел пхерди пенџарибаја башо Јехова“.a Адалеске со ка овел лен асавко пенџарибе хем таро баро мангипе спрема о Девел хем спрема са о буќа со керѓа лен, о мануша совршено ка грижинен пе баши амари шужи планета хем башо са адава со авела тари природа.
Те шај те дознајне нешто повише башо адава со ка керел е Девлескоро Царство, читин и статија „Со ка керел е Девлескоро Царство?“
Читин о 35-то поглавје таро библиско лил Исаија те шај те дознајне сар и пхув ка овел рај.
Дикх о видеоклипи Соске о Девел керѓа и пхув? те шај те дознајне нешто повише баши е Девлескири намера е пхувјаја хем е манушенцар.
a Јехова тано о анав е Девлескоро (Псалм 83:18). Читин и статија „Кој тано о Јехова?“