Yan Zabolotnyi/stock.adobe.com
АЧХОВЕН ЏАНГАВДЕ!
О лошнипе бајрола ко цело свето — Со вакерела и Библија?
О насилна банде керена бут баре штете ко Хаити. О мануша тари Јужноафриканско Република цидена бут муке таро криминал хем насилство, а исто аѓаар о мануша таро Мексико хем о јавера пхувја ки Латинско Америка. Чак ко пхувја коте со нане бут баро насилство, о мануша живинена ки дар хем на осетинена пе сигурна адалеске со о јавера са повише чорена, керена намерно штета хем керена те овел пожарија.
Со вакерела и Библија башо лошнипе со случинела пе ко свето?
Саве пророштвија иси ки Библија башо лошнипе
Ки Библија тано пророкујмо кај о лошнипе ка овел дело таро знако „башо крајо акале светоскоро“ (Матеј 24:3). Кеда вакерѓа саве настанија ка овен дело таро знако, о Исус Христос вакерѓа:
„О лошнипе ка бајрол, буте џененгоро мангипе ка шудрол“ (Матеј 24:12).
Ки Библија тано пророкујмо кај „ко последна диве“ о мануша „нане те контролиринен пе, [ка овен] сурова, нане те манген о шукарипе“ (2. Тимотеј 3:1-5).
Ама иси надеж. И Библија ветинела кај панда хари о лошнипе нане више те постојнел.
„Само панда хари, о лошно нане те овел више. Ка роде ле ко лескоро тхан, а ов нане те овел адатхе. А о кротка ка наслединен и пхув, хем ка уживинен ко баро мир“ (Псалм 37:10, 11).
Дознајн нешто повише баши надеж со дела амен и Библија хем соске шај те ове уверимо кај о буќа со случинена пе авдиве исполнинена о библиска пророштвија. Дикх о следна статие: