Сар изглединела о библиско курси со нудинена е Јеховаскере сведокија?
Е Јеховаскере сведокија нудинена библиско курси коте со шај те сикљове со сикавела и Библија. Акава библиско курси шај те поможинел туке:
Те овел тут среќно живото
Те ове е Девлескоро амал
Те дознајне со ветинела и Библија баши иднина
Акате ка дознајне:
Ако прифатинава библиско курси, ка ваљани ли те овав е Јеховаскоро сведоко?
Ако англедер проучинѓум и Библија е Јеховаскере сведоконцар, дали шај палем те проучинав?
Дали шај коркори те проучинав и Библија бизо некој те сикавел ман?
Сар изглединела јекх библиско курси?
Јекх таро е Јеховаскере сведокија ка поможинел туке те запознајне тут пошукар е Библијаја, аѓаар со ка дикхен тема по тема. Е публикацијаја Ов бахтало засекогаш ка шај хари похари те дознајне со сикавела и Библија хем сар шај ој те поможинел туке. Ако мангеа повише те дознајне, дикх акава видеоклипи.
Дали ваљани те платинав башо акава библиско курси?
На. Е Јеховаскере сведокија икерена пе ко лафија со вакерѓа лен о Исус пле учениконге: „Добинѓен бизо паре, бизо паре ден“ (Матеј 10:8). Исто аѓаар, бесплатна тане и Библија хем и публикација Ов бахтало засекогаш, кола со користинена пе башо библиско курси.
Кобор време трајнела о курси?
Башо цело курси иси 60 лекцие. Тутар зависинела кобор сигате ка обработинен о лекцие. Буте џененге одговоринела те проучинен јекх или повише лекцие ко курко.
Сар те родав библиско курси?
1. Пхер о онлајн формулари. Тле лична податокија ка користина лен само те шај јекх таро е Јеховаскере сведокија те контактиринел тут.
2. Некој таро е Јеховаскере сведокија ка контактиринел тут. Ов ка објаснинел туке нешто повише башо курси хем ка одговоринел ко пучиба со иси тут.
3. Ту хем окова со ка проучинел туја шај те договоринен тумен кеда хем коте те проучинен. Шај те договоринен тумен те аракхен тумен лично или те проучинен преку телефони, видео конференција, писмо или имејл. О курси шај те трајнел околу јекх саати, ама шај те овел хем похари или повише, зависинела сар туке ка одговоринел.
Дали шај прво те дикхав сар изглединела о курси?
Оја. Башо адава ваљани те пхере о онлајн формулари. Кеда јекх таро е Јеховаскере сведокија ка контактиринел тут, вакер кај мангеа прво те дикхе сар изглединела о библиско курси хем те дикхе дали ка свиџинел пе туке. Ов ка користинел и брошура Ов бахтало засекогаш, која со иси ла трин лекцие. Пало адава ка дикхе дали ка манге те продолжине те проучине.
Ако прифатинава библиско курси, ка ваљани ли те овав е Јеховаскоро сведоко?
На. Е Јеховаскере сведокија мангена те сикавен е јаверен баши Библија, ама никогаш силаја на чхивена некас те авел ки ленгири религија. Наместо адава, објаснинена со вакерела и Библија хем поштујнена секаскоро право те одлучинел ко со ка верујнел (1. Петрово 3:15).
Шај ли те користинав мли Библија?
Оја, шај те користине кова мангеа превод тари Библија. Амен користинаја о превод Нов свет, кова сој тано точно хем полокхо хаљојбаске. Ама, свесна сием кај бут џене мангена те користинен превод кова со ола пенџарена.
Шај ли те канинав јаверен ко курси?
Оја. Шај те овел присутно некој тари тли фамилија или било кова амал со ка канине ле.
Ако англедер проучинѓум и Библија е Јеховаскере сведоконцар, дали шај палем те проучинав?
Оја. Уствари акана шај панда повише те уживине ко проучибе, соске са тано кердо спрема адава сој тано потребно е манушеске хем иси бут видеоклипија.
Дали шај коркори те проучинав и Библија бизо некој те сикавел ман?
Оја. Иако повише таро адала со проучинена и Библија мангена некој те поможинел ленге ко адава, сепак несаве мангена коркори те проучинен. Ко дело Помош проучибаске и Библија иси буќа истражибаске кола со ка поможинен туке коркори те проучине и Библија. Аке несаве лендар:
Библиска видеоклипија. Акала кратка видеоклипија сикавена несаве основна библиска сикљојба.
Одговор башо библиска пучиба. Ко акала статие ка аракхе бут одговорија кола со аракхљовена ки Библија.