Која тани и смисла е животоскири?

Со вакерела и Библија:

О пучибе баши смисла е животоскири шај те пучел пе ко различна начинија. Сар на пример: „Соске сиум акате?“ или „Дали мле живото иси ле смисла?“ Спрема и Библија, и смисла е животоскири тани те запознајна е Девле хем те ова амала леа. Аке некобор важна чачипа со потврдинена адава.

• О Девел тано амаро Створители. И Библија вакерела: „О Девел тано адава со керѓа амен, а на амен коркори“ (Псалм 100:3; Откровение 4:11).

• Са со створинѓа о Девел, створинѓа ле несаве намераја. Адава вклучинела о манушикано живото да (Исаија 45:18).

• О Девел створинѓа амен те овен амен „духовна потребе“. Ко адава тано вклучими хем и желба те аракха и смисла е животоскири (Матеј 5:3). Ов мангела те задоволина адаја желба (Псалм 145:16).

• Шај те задоволина амаре духовна потребе аѓаар со ка ова попаше е Девлеа. Иако несаве мислинена кај нашти те овел пе амал е Девлеа, и Библија поттикнинела амен: „Овен паше е Девлеа, хем ов ка овел паше туменцар“ (Јаков 4:8; 2:23).

• Те шај те ова амала е Девлеа, мора те живина ко склад лескере намераја. И Библија вакерела аменге со ваљани те кера: „Нека овел тут дар таро чачутно Девел хем икер лескере заповедија, соске адава тано са о мануш со ваљани те керел“ (Проповедник 12:13).

• Ки иднина, о Девел ка исполнинел пли намера со сине ле башо мануша. Ов ка чхивел крајо са е мукенге хем ка дел вечно живото околенге сој тане леа паше хем верно служинена леске (Псалм 37:10, 11).