Дали о Бенг чаче постојнела?
Со вакерела и Библија:
Оја, о Бенг чаче постојнела. И Библија баши лесте вакерела кај тано „владетели е светоскоро“, јекх духовно суштество кова со уло лошно хем кова со бунинѓа пе против о Девел (Јован 14:30; Ефешаните 6:11, 12). И Библија исто аѓаар користинела јавера да анава кола со сикавена кој тано ов чаче:
Сатана, кова со значинела „Противнико“ (Јов 1:6).
Бенг, кова со значинела „Клеветнико“ (Откровение 12:9).
Сап, колеа со ки Библија мислинела пе башо „Измамнико“ (2. Коринќаните 11:3).
Окова со искушинела (Матеј 4:3).
Окова со ховавела (Јован 8:44).
О Бенг нане о лошнипе ко мануша
Несаве мислинена кај о Сатана о Бенг тано о лошнипе со постојнела андре ки аменде. Ама, адава нане точно соске ки Библија пишинела јекх разговор машкар о Девел хем о Сатана. Џанаја кај о Девел тано совршено хем ки лесте нане ни хари лошнипе. Тегани, сар шај о Девел те керел лафи е лошнипаја ки песте? (5. Мојсеева 32:4; Јов 2:1-6). Освен адава, о Сатана керѓа е Исусеа да лафи, кова со исто аѓаар тано совршено (Матеј 4:8-10; 1. Јованово 3:5). Значи, и Библија сикавела кај о Бенг тано чачутни личност, а на само о лошнипе ки аменде.
Дали ваљани те изненадинел амен адава со бут мануша на верујнена кај о Бенг постојнела сар личност? Ни хари. И Библија вакерела кај о Сатана ховавела е манушен те шај те исполнинел пле намере (2. Солуњаните 2:9, 10). Јекх таро лескере најбаре ховајба тано кај ов на постојнела, хем буте џене чхивѓа лен те верујнен ко акава (2. Коринќаните 4:4).
Погрешно мислибе башо Бенг
Погрешно мислибе: Луцифер тано панда јекх анав со иси е Бенге.
Чачипе: О хебрејско лафи кова со ко несаве Библие тано преведимо сар Луцифер значинела „ту со светинеа“ (Исаија 14:12). О контекст таро акава стихо сикавела кај акале лафеа мислинела пе ки династија таро вавилонска царија колен со о Девел ваљани сине те понижинел лен адалеске со сине бут горда (Исаија 14:4, 13-20). Откеда пели акаја династија, асана сине ленге хем тегани користинѓа пе о лафи „ту со светинеа“.
Погрешно мислибе: О Сатана тано е Девлескоро слуга кова со искушинела е манушен те шај те поможинел е Девлеске те судинел ленге.
Чачипе: О Бенг нане е Девлескоро слуга него лескоро душмани. Ов противинела пе, вакерела ховајба хем кривинела е манушен кола со служинена е Девлеске (1. Петрово 5:8; Откровение 12:10).