Сави гаранција дела о Јехова кај и пхув ка овел рај?

1. Саво хабери вакерѓа о пророко о Исаија е Израелцонге?

О ПРОРОКО о Исаија вакерела кај о Јехова тано о „Девел е чачипаскоро“. О лафи сој преведимо сар „чачипа“ буквално значинела „амин“ (Иса. 65:16). „Амин“ значинела „нека овел аѓаар“ или „чаче тано аѓаар“. Кеда о лафи „амин“ користинела пе ки Библија поврзимо е Јеховаја или е Исусеа, адава тано гаранција кај нешто тано чаче. Значи, о Исаија мангља те вакерел е Израелцонге кај секогаш кеда о Јехова пророкујнела нешто, адава овела чаче. Уствари, о Јехова докажинѓа адава адалеа со исполнинела секова јекх таро пле ветувања.

2. Соске шај те овел амен доверба ко е Јеховаскере ветувања баши иднина, хем башо кола пучиба ка кера лафи?

² Дали шај те овел амен и исто доверба кај ка исполнинен пе е Јеховаскере ветувања баши иднина? Околу 800 берша пало Исаија, о апостол Павле објаснинѓа соске шај те ова сигурна кај е Девлескере ветувања секогаш исполнинена пе. О Павле вакерѓа: „О Девел нашти те ховавел“ (Евр. 6:18). Исто сар со таро јекх извор нашти те тхавдел лондало пани хем пани пијбаске, аѓаар о Јехова, о извор е чачипаскоро, нашти те ховавел. Адалеске шај те овел амен доверба ко са со вакерела о Јехова, коте сој вклучиме хем о ветувања баши амари иднина. Ки акаја статија ка дикха акала пучиба: Со ветинѓа о Јехова кај ка дел амен ки иднина? Хем сар о Јехова уверинела амен кај адава со ветинѓа чаче ка овел?

СО ВЕТИНЃА О ЈЕХОВА?

3. а) Кова ветување тано посебно скапоцено е Девлескере народоске? (Откровение 21:3, 4). б) Сар реагиринена несаве кеда вакераја ленге башо акава ветување?

³ О ветување баши колеске ка кера лафи тано бут скапоцено са е Девлескере слугенге. (Читин Откровение 21:3, 4.) О Јехова ветинела кај ка авел време кеда „мерибе нане те овел више, ни жалибе, ни ројбе, ни дукха“. Бут џене амендар читинаја акава ветување ки служба кеда мангаја те објаснина саво ка овел о живото ко рај. Сар реагиринена несаве мануша кеда шунена акава ветување? Ола шај ка вакерен: „Акате бут шукар пишинела, ама на верујнава кај акава ка овел чаче“.

4. а) Кеда денѓа о Јехова о ветување башо рај, со џанља? б) Освен со денѓа о ветување, со јавер керѓа о Јехова?

⁴ Кеда о Јехова водинѓа е Јоване те пишинел акава ветување башо рај, ов џанља кај ко амаро време ка вакера акаја надеж е јаверенге кеда ка проповедина о шукар хабери. Исто аѓаар о Јехова џанља кај ка овел пхаро буте манушенге те верујнен кај асавке промене ка случинен пе ки иднина (Иса. 42:9; 60:2; 2. Кор. 4:3, 4). Тегани, сар шај те уверина е јаверен, хем коркори амен, кај о благословија сој пишиме ко Откровение 21:3, 4 ка исполнинен пе? О Јехова на само со денѓа акава бут шужо ветување, ов исто аѓаар денѓа силна причине соске шај те верујна ки лесте. Кола причине денѓа амен?

О ЈЕХОВА ДЕЛА ГАРАНЦИЈА КАЈ ЛЕСКОРО ВЕТУВАЊЕ КА ИСПОЛНИНЕЛ ПЕ

5. Кола причине иси амен те овел амен доверба ко е Јеховаскоро ветување башо рај, хем коте шај те аракха ле?

⁵ Ко следна стихија со ка читина аракхаја силна причине те овел амен доверба ко е Јеховаскоро ветување башо рај. Адари пишинела: „Окова со бешела ко престол вакерѓа: ’Дикх! Керава са о буќа неве!‘ Исто аѓаар вакерѓа: ’Пишин, соске ко акала лафија шај те верујнел пе хем тане чачутне!‘ Хем ов вакерѓа манге: ’Ола исполнинѓе пе! Ме сиум алфа хем омега, о почеток хем о крајо‘“ (Отк. 21:5, 6а).

6. Соске о лафија таро Откровение 21:5, 6 бајрарена амари доверба ко е Јеховаскоро ветување?

⁶ Соске акала библиска стихија бајрарена амари доверба ко е Девлескоро ветување? О лил Откровение — паше тано о баро крајо! башо акала стихија пишинела: „Акава тано исто сар те пхене о Јехова лично потпишинѓа е верна манушенге гаранција или потврда башо акала идна благословија“.b Е Девлескоро ветување пишимо тано ко Откровение 21:3, 4. Ама ко 5-то хем ко 6-то стихо, сар те пхене о Јехова чхивѓа пло потпис колеа со гарантиринела кај ка исполнинел пе лескоро ветување. Акана те дикха пошукар коле лафенцар о Јехова гарантиринела аменге кај ка исполнинел пло ветување.

7. Кој почминела те керел лафи ко 5-то пасус, хем соске акава тано посебно?

⁷ Е Девлескири гаранција почминела е лафенцар: „Окова со бешела ко престол вакерѓа“ (Отк. 21:5а). Акала лафија тане посебна соске ко лил Откровение о Јехова керела само трин пути лично лафи, а акава тано јекх таро адала трин ситуацие. Значи акаја гаранција на дела амен несаво моќно ангели, чак ни о воскреснимо Исус, него лично о Јехова! Акава панда повише бајрарела амари доверба ко лафија таро Откровение 21:5, 6. Соске? Адалеске со о Јехова „нашти те ховавел“ (Тит 1:2).

„ДИКХ! КЕРАВА СА О БУЌА НЕВЕ“

8. Со вакерела о Јехова те шај те истакнинел кај ка исполнинел пло ветување? (Исаија 46:10)

⁸ Пало адава, о Јехова вакерела: „Дикх!“ (Отк. 21:5). О грчко лафи сој аменде преведимо сар „дикх!“ тано користимо бут пути ко лил Откровение. Јекх прирачнико башо акава лафи вакерела кај користинела пе „те шај те вакерел околеске со читинела кај ваљани посебно те пазинел ко адава со ка вакерел пе следно“. А со сине о следно со вакерѓа о Девел? Ов вакерѓа: „Керава са о буќа неве“. Точно тано кај о Јехова керела лафи башо промене со ка керел лен ки иднина. Ама адалеске сој добором сигурно кај ка исполнинел пе акава ветување, ов башо адала промене вакерела кај више случинена пе. (Читин Исаија 46:10.)

9. а) Со значинена о лафија „ка керав са о буќа неве“? б) Со ка случинел пе е авдисутне „небоја“ хем „пхувјаја“?

⁹ Те дикха о следна лафија со аракхљовена ко Откровение 21:5: „Керава са о буќа неве“. Со значинела акава? Ко акава библиско поглавје, акале лафенцар мислинела пе ко дуј буќа со ка керел о Јехова — ов ка менинел хем ка обновинел. Прво, те дикха со ка менинел о Јехова. Ко Откровение 21:1 читинаја: „О пурано небо хем и пурани пхув нане више“. О „пурано небо“ тане о политичка владе упри коленде со влијајнела о Сатана хем лескере демонија (Мат. 4:8, 9; 1. Јов. 5:19). Кеда ки Библија користинела пе о лафи „пхув“ шај те мислинел пе ко мануша (1. Мој. 11:1; 1. Лет. 16:31). Спрема акава, и „пурани пхув“ тане о лошна мануша авдиве. О Јехова нане само те керел несаве промене ко акава „небо“ хем „пхув“, него скроз ка цидел лен. Ов ка заменинел лен е неве небоја хем е неве пхувјаја, адава значинела кај ка овел неви влада која со ка владинел упро праведна мануша.

10. Со ка керел о Јехова нево?

¹⁰ Ко Откровение 21:5, понадари читинаја со вакерела о Јехова башо буќа со ка керел лен неве. Приметин кај о Јехова на вакерѓа: „Ка керав са неве буќа“. Наместо адава ов вакерела: „Ка керав са о буќа неве“. О Јехова ка керел и пхув хем е манушен сар неве хем ка анел лен џи ко совршенство. Исто сар со пророкујнѓа о Исаија, о Јехова ка керел и пхув јекх бут шужо тхан слично сар и еденско градина. Исто аѓаар секова јекх амендар ка овел обновимо, јавере лафенцар целосно сасљардо. О сакатија, о короле хем о кашуке ка овен састе хем чак о муле ка овен ираме ко живото (Иса. 25:8; 35:1-7).

„КО АКАЛА ЛАФИЈА ШАЈ ТЕ ВЕРУЈНЕЛ ПЕ ХЕМ ТАНЕ ЧАЧУТНЕ... ОЛА ИСПОЛНИНЃЕ ПЕ!“

11. Со вакерѓа о Јехова е Јованеске те керел, хем соске?

¹¹ Со јавер тано дело тари е Девлескири гаранција? О Јехова вакерѓа е Јованеске: „Пишин, соске ко акала лафија шај те верујнел пе хем тане чачутне!“ (Отк. 21:5). О Јехова на заповединѓа леске само те пишинел, него вакерѓа леске хем и причина. Ов вакерѓа: „Ко акала лафија шај те верујнел пе хем тане чачутне“. Адава значинела кај шај те овел амен доверба ко е Девлескере лафија хем кај тане точна. Сием благодарна со о Јован шунѓа и заповед те пишинел адава со вакерѓа леске о Јехова. Адалеске амен шај те читина е Девлескоро ветување башо рај хем те размислина башо шуже благословија со аџикерена амен ки иднина.

12. Соске о Јехова шај те вакерел: „Ола исполнинѓе пе“?

¹² Со вакерела понадари о Девел? „Ола исполнинѓе пе!“ (Отк. 21:6). Акате о Јехова керела лафи сар те пхене са о буќа со ветинѓа лен башо рај више исполнинѓе пе. Уствари, ле иси ле право те вакерел аѓаар соске ништо нашти те чхинавел ле те исполнинел пли намера. Пало адава о Јехова вакерела панда нешто со уверинела амен кај лескоро ветување чаче ка исполнинел пе. Сој тано адава?

„МЕ СИУМ АЛФА ХЕМ ОМЕГА“

13. Соске о Јехова вакерѓа: „Ме сиум алфа хем омега“?

¹³ Сар со вакерѓем англедер, о Јехова трин пути лично керѓа лафи ко визие со денѓа е Јованеске (Отк. 1:8; 21:5, 6; 22:13). Ко сотрин прилике о Јехова вакерѓа о исто: „Ме сиум алфа хем омега!“ И буква алфа тани и прво буква тари грчко азбука, а омега и последно. Адалеа со користинела о букве алфа хем омега, о Јехова поможинела амен те хаљова кај кеда почминела нешто, ов сигурно ка завршинел адава.

14. а) Вакер пример кеда о Јехова вакерѓа ки несави смисла „алфа“ хем кеда ка вакерел „омега“? б) Која гаранција аракхаја ки 1. Мојсеева 2:1-3?

¹⁴ Откеда о Јехова створинѓа е Адаме хем е Ева, ов вакерѓа ленге сави намера иси ле е манушенцар хем е пхувјаја. Ки Библија пишинела: „О Девел благословинѓа лен хем вакерѓа ленге: ’Те овел тумен пхердо чхаве хем те овен бут џене, пхерен и пхув хем владинен упри лате‘“ (1. Мој. 1:28). Кеда о прво пути вакерѓа пли намера, о Јехова сар те пхене вакерѓа „алфа“. Ка авел време кеда е Адамескере хем е Евакере послушна хем совршена потомција ка пхерен и пхув хем ка керен ла рај. Тегани о Јехова сар те пхене ка вакерел „омега“. Откеда завршинѓа створибаја о небо хем и пхув хем са сој ки ленде, о Јехова вакерѓа нешто сој сар гаранција. Адава тано пишимо ки 1. Мојсеева 2:1-3. (Читин.) О Јехова одвојнѓа о ефтато диве сар свето. Со значинела акава? Акава значинела кај ов посветинѓа о ефтато диве те шај те исполнинел пли намера е манушенцар хем е пхувјаја. Лескири намера целосно ка исполнинел пе џи ко крајо таро адава диве.

15. Соске шај о Сатана мислинѓа кај успејнѓа те чхинавел е Девле ки пли намера?

¹⁵ Откеда о Адам хем и Ева бунинѓе пе, ола уле грешна хем аѓаар о грево хем о мерибе кхувѓа ко ленгере чхаве (Рим. 5:12). Адалеске шај дикхјола сине кај о Сатана успејнѓа те руминел е Девлескири намера те пхерел и пхув совршена хем послушна манушенцар. Дали о Сатана успејнѓа те чхинавел е Јехова некогаш те вакерел „омега“? Шај мислинѓа песке кај е Јехова нане ле бут опцие. Јекх опција сине о Јехова те уништинел е Адаме хем е Ева хем те створинел јавер совршено пари колеа со ка исполнинел пли намера. Ама те керел сине адава, о Сатана ка шај сине те вакерел кај о Девел ховавела. Соске? Адалеске со о Јехова, сар сој пишимо ки 1. Мојсеева 1:28, вакерѓа кај е Адамескере хем е Евакере чхаве ка пхерен и пхув.

16. Соске шај о Сатана мислинѓа кај о Јехова нане те успејнел те исполнинел пли намера?

¹⁶ Која јавер опција шај о Сатана мислинѓа песке кај ачхили е Девле? Шај мислинѓа кај о Јехова ка дозволинел е Адамеске хем е Еваке те овел лен чхаве кола со никогаш нане те овен совршена (Проп. 7:20; Рим. 3:23). Ко адава случај о Бенг ка шај сине те вакерел кај о Јехова на успејнѓа ки пли намера — и пхув те овел совршена манушенцар.

17. Сар успејнѓа о Јехова те решинел о проблеми е Сатанаја хем е прва манушенцар, хем со ка случинел пе ко крајо? (Дикх хем и слика.)

¹⁷ О Сатана никогаш нашти сине те претпоставинел со ка керел о Јехова. Е Јехова сине ле о најшукар решение сар те исполнинел пли намера, иако о Сатана, о Адам хем и Ева бунинѓе пе (Пс. 92:5). О Јехова дозволинѓа е Адамеске хем е Еваке те овел лен чхаве, аѓаар ачхило ко пло лафи хем докажинѓа кај на ховавела. Исто аѓаар, о Јехова сикавѓа кај ништо нашти те чхинавел те исполнинел пли намера. Ов керѓа са те шај те исполнинел ла аѓаар со преку јекх „потомство“ ка спасинел е послушна чхавен со авена таро Адам хем и Ева (1. Мој. 3:15; 22:18). О Сатана никогаш на очекујнѓа кај о Јехова ка решинел акаја ситуација ко асавко начин. Соске? Адалеске со и откупнина темелинела пе ко несебично мангипе (Мат. 20:28; Јован 3:16). Асавки особина нашти те аракха ко Сатана соске ов тано себично. Значи, со ка случинел пе адалеске сој денди и откупнина? Ко крајо таро милја берша коте со ка владинел о Христос, о совршена хем о послушна мануша со авена таро Адам хем и Ева ка живинен ко рај ки пхув, баш сар со сине е Јеховаскири намера ко почеток. Тегани о Јехова сар те пхене ка вакерел „омега“.

САР БАЈРАРАЈА АМАРИ ДОВЕРБА КО Е ЈЕХОВАСКОРО ВЕТУВАЊЕ БАШО РАЈ?

18. Кола трин гаранцие дела амен о Девел? (Дикх хем и рамка „Трин причине соске шај те овел амен доверба ко е Јеховаскоро ветување“.)

¹⁸ Ки акаја статија дикхлем некобор причине соске шај те ова сигурна кај и пхув ка овел рај. Со шај те вакера е јаверенге те шај те уверина лен кај акава ка овел чаче? Прво, о Јехова лично денѓа акава ветување. Ко лил Откровение пишинела: „Окова со бешела ко престол вакерѓа: ’Дикх! Керава са о буќа неве‘“. Ле иси ле мудрост, сила хем желба те исполнинел пло ветување. Дујто, о Јехова тано добором сигурно кај ка исполнинел пе акава ветување со керела лафи сар те пхене више исполнинѓа пе. Ов вакерѓа: „Ко акала лафија шај те верујнел пе хем тане чачутне!... ола исполнинѓе пе“. Трито, ништо нашти те чхинавел е Јехова те завршинел адава со почминѓа, адалеске ов вакерѓа: „Ме сиум алфа хем омега“. О Јехова ка докажинел кај о Сатана тано ховавно хем кај на успејнѓа те чхинавел е Јехова те исполнинел пли намера.

19. Со шај те кере кеда е манушенге тано пхаро те верујнен ко е Девлескоро ветување башо рај?

¹⁹ Ма бистре, секогаш кеда вакереа е јаверенге сави гаранција дела о Јехова кај ка исполнинел пле ветувања, адалеа ту панда повише бајрареа тли доверба ко лескере ветувања. Значи, кеда о следно пути ка читине некаске о шужо ветување башо рај со аракхљола ко Откровение 21:4 хем ов вакерела туке: „Акате бут шукар пишинела, ама на верујнава кај акава ка овел чаче“, тегани со шај те кере? Шај те читине хем те објаснине о 5-то хем о 6-то стихо. Објаснин сави гаранција денѓа о Јехова кај ка исполнинел пло ветување адалеа со, сар те пхене, чхивѓа пло потпис (Иса. 65:16).