ЛЕКЦИЈА 26
Соске иси лошнипе хем муке?
Кеда случинена пе несаве трагедие нормално тано те пуча амен: „Соске случинена пе асавке буќа?“ Кобор сием бахтале со и Библија дела јасно одговор ко акава пучибе!
1. Сар о Сатана керѓа те овел лошнипе ко свето?
О Сатана бунинѓа пе против о Девел. Ов мангља те владинел упро јавера, адалеске влијајнѓа упро прва мануша, о Адам хем и Ева, ола да те бунинен пе против о Девел. Те шај те успејнел ко адава, ов вакерѓа ховајбе е Еваке (1. Мојсеева 3:1-5). Ов керѓа ој те мислинел кај о Јехова на мангела те дел ла нешто шукар хем кај о мануша ка овен побахтале ако на шунена е Девле. Адалеа со вакерѓа е Еваке кај нане те мерел, о Сатана вакерѓа о прво ховајбе. Адалеске и Библија вакерела кај о Сатана тано „ховавно хем дад е ховајбаскоро“ (Јован 8:44).
2. Со одлучинѓе те керен о Адам хем и Ева?
О Јехова сине бут дарежливо е Адамеа хем е Еваја. Ов вакерѓа кај шај те хан таро секова каш ки Еденско градина освен таро јекх (1. Мојсеева 2:15-17). Сепак, ола одлучинѓе те хан баш таро адава каш колеске со о Јехова вакерѓа те на хан. И Ева леља таро каш „хем хаља“. Пало адава, о Адам да „хаља“ (1. Мојсеева 3:6). Ола солдуј на шунѓе е Девле. Адалеске со ола сине совршена, ленге сине природно те керен адава сој исправно, а на адава сој неисправно. Ама, кеда свесно хем намерно одлучинѓе те на шунен е Девле ола сикавѓе кај на мангена више ов те вакерел ленге со те керен. Адаја одлука анѓа ленге баре муке (1. Мојсеева 3:16-19).
3. Сар влијајнѓа е Адамескири хем е Евакири одлука упри аменде?
Кеда о Адам хем и Ева грешинѓе, ола уле несовршена. Адалеске со сием ленгере потомција наслединѓем лендар и несовршеност. Башо Адам и Библија вакерела: „Преку јекх мануш о грево кхувѓа ко свето хем преку о грево о мерибе, хем аѓаар о мерибе ширинѓа пе ко са о мануша“ (Римјаните 5:12).
Амен цидаја муке таро различна причине. Понекогаш цидаја муке адалеске со анѓем лошна одлуке. Понекогаш цидаја муке адалеске со о јавера анѓе лошна одлуке. А понекогаш цидаја муке адалеске со сием ко погрешно тхан хем ко погрешно време. (Читин Проповедник 9:11.)
ДОЗНАЈН ПОВИШЕ
Дикх соске о Девел нане одговорно башо лошнипе хем о муке со иси авдиве ко свето хем дикх сар ов осетинела пе кеда амен цидаја муке.
4. Кој тано одговорно башо амаре муке?
Бут џене верујнена кај о Девел владинела акале светоја. Ама, дали адава тано чаче? Дикх о ВИДЕОКЛИПИ.
Читин Јаков 1:13 хем 1. Јованово 5:19, а пало адава керен лафи башо акава пучибе:
Дали о Девел тано одговорно башо лошнипе хем о муке?
5. О последице таро е Сатанаскоро владибе
Читин 1. Мојсеева 3:1-6, а пало адава керен лафи башо акала пучиба:
Кова ховајбе вакерѓа о Сатана? (Дикх о стихија 4 хем 5.)
Сар о Сатана керѓа и Ева те мислинел кај о Јехова гаравела нешто шукар таро мануша?
Спрема о Сатана, дали о Јехова ваљани те владинел е манушенцар те шај те овен бахтале?
Читин Проповедник 8:9, а пало адава керен лафи башо акава пучибе:
Со случинела пе адалеске со о Јехова на владинела е светоја?
1. О Адам хем и Ева сине совршена хем живинена сине ко рај. Ама, ола шунѓе е Сатана хем бунинѓе пе против о Јехова
2. Пали адаја побуна, ко свето ширинѓе пе о грево, о муке хем о мерибе
3. О Јехова ка чхивел крајо е гревоске, е мукенге хем е мерибаске. О мануша палем ка овен совршена хем ка живинен ко рај
6. Е Јеховаске нане са јекх кеда цидаја муке
Соске шај те ова сигурна кај е Јеховаске нане са јекх кеда цидаја муке? Дикх со вакерѓе о цари о Давид хем о апостол Петар башо акава. Читин Псалм 31:7 хем 1. Петрово 5:7, а пало адава керен лафи башо акава пучибе:
Сар осетинеа тут кеда џанеа кај о Јехова дикхела тле муке хем мангела те поможинел туке?
7. О Девел ка чхивел крајо са е мукенге
Читин Исаија 65:17 хем Откровение 21:3, 4, а пало адава керен лафи башо акава пучибе:
Соске тано утешно те џана кај о Јехова ка чхинавел са о муке со доживинена авдиве о мануша?
Дали џанљан?
Кеда о Сатана вакерѓа о прво ховајбе, ов клеветинѓа е Јехова аѓаар со тврдинѓа кај ов нане праведно хем љубезно Владетели. Адалеа ов каљарѓа е Јеховаскоро анав хем керѓа о мануша те мислинен лошно башо Јехова. Кеда о Јехова панда хари ка чхинавел са о лошнипе хем о муке, ов ка докажинел кај ле иси ле право те владинел хем ка сикавел кај лескоро владибе тано најшукар. Те славинел пе е Јеховаскоро анав тани и најважно бути ко цело универзум (Матеј 6:9, 10).
НЕСАВЕ ШАЈ ВАКЕРЕНА: „О лошнипе хем о муке авена таро Девел соске ов аѓаар искушинела амен“.
Со ка вакере ту?
СО СИКЛИЛЕМ
О Сатана хем о прва дуј мануша тане највише одговорна башо лошнипе со иси ко свето. Е Јеховаске нане са јекх кеда амен цидаја муке хем ов панда хари ка чхинавел лен.
Сар ка одговорине?
Кова ховајбе вакерѓа о Сатана е Еваке?
Сар адава со о Адам хем и Ева бунинѓе пе против о Девел влијајнѓа упри аменде?
Котар џанаја кај е Јеховаске нане са јекх кеда цидаја муке?
ИСТРАЖИН
Сикљов со вакерела и Библија башо адава сој тано о грево.
Читин повише башо адава со тврдинѓа о Сатана ки Еденско градина.
„Зошто Бог ги допушта страдањата?“ (Стражарска кула таро 1 јануари 2014)
Дикх о одговор ко јекх пучибе со мучинела буте манушен.
Дикх сар и Библија поможинѓа јекхе манушеске кова со цидинѓа бут муке.