Дали џанљан?

Сар о мануша ко пурано време тхарена сине јаг кеда патујнена сине?

ЈЕКХ диве, о Девел вакерѓа е Авраамеске те џал ко јекх дур тхан хем адари те дел жртва. Ки 1. Мојсеева 22:6 пишинела: „О Авраам леља о кашта баши жртва со ваљани те тхарел пе хем денѓа пле чхавеске е Исакоске те пхиравел лен. Хем леља пеја јаг хем чхурик, хем солдуј џене геле заедно“.

И Библија на вакерела аменге сар о мануша ко пурано време тхарена сине јаг. Дали о Авраам хем о Исак тхарѓе јаг хем ингарѓе ла пеа цело време? Јекх библиско изучувачи вакерѓа кај и јаг веројатно нашти сине „те тхабљол цело време џикоте пхирѓе адава баро друмо“. Наместо адава, о Авраам хем лескоро чхаво шај леле са со ваљани ленге те шај те тхарен јаг.

Ама, јавера мислинена кај ко адава време на сине локхо те тхарел пе јаг. Адалеске, секогаш кеда шај сине, о мануша тхарена сине јаг аѓаар со лена сине жарија тари јаг која со тхабљола сине, шај таро комшие. Бут изучувачија мислинена кај о Авраам леља жарија англедер те цидел ко друмо. Шај чхивѓа о жарија ко несаво чаро кова со висинела сине ко синџирија, хем ингарела ле сине пеја џикоте патујнела сине (Иса. 30:14). Тегани, шај сине те чхивел шуке кашта ко жарија хем аѓаар те тхарел јаг.