Дали о Девел тано присутно сегде хем ко са?
Со вакерела и Библија:
О Девел шај те дикхел са хем те дејствујнел коте со мангела (Изреки 15:3; Евреите 4:13). Ама, и Библија на вакерела кај о Девел тано присутно сегде околу аменде хем ко са. Наместо адава, ој вакерела кај ов тано личност хем кај иси ле пло тхан коте со живинела.
Сар изглединела. О Девел тано духовно личност (Јован 4:24). О мануша нашти те дикхен ле (Јован 1:18). О визие сој тане пишиме ки Библија сикавена кај о Девел живинела ко јекх одредимо тхан. Нијекх лендар на сикавела кај ов тано присутно сегде (Исаија 6:1, 2; Откровение 4:2, 3, 8).
Коте живинела. О Девел живинела ко духовно подрачје, кова сој одвојмо таро са сој материјално. Ки Библија пишинела кај о Девел живинела ко небо (1. Царевите 8:30). Исто аѓаар, ки лате читинаја кај, ки јекх прилика, о духовна суштествија тердиле англо Јехова,a хем адава сикавела кај ов аракхљола ко одредимо тхан (Јов 1:6).
Ако о Девел нане присутно сегде хем ко са, дали шај те грижинел пе манге лично?
Оја. О Девел интересинела пе башо секова мануш. Иако аракхљола ко духовно подрачје, ов приметинела са е манушен ки Пхув со мангена те овен леске послушна, хем спремно тано те поможинел ленге (1. Царевите 8:39; 2. Летописи 16:9). Те дикха сар о Јехова грижинела пе околенге сој леске верна.
Кеда молинеа тут. О Јехова шај те шунел тли молитва ко исто моменти кеда вакереа ла (2. Летописи 18:31).
Кеда сиан обесхрабримо. „О Јехова тано паше узо адала сој пхаге вилеа хем спасинела адален сој пхаге духоја“ (Псалм 34:18).
Кеда ваљани туке водство. О Јехова ветинела: „Ка дав тут разборитост хем ка сикавав тут“ (Псалм 32:8). Ов керела адава преку пло Лафи, и Библија.
Погрешна хаљојба башо е Девлескоро присуство
Погрешно хаљојбе: О Девел тано присутно ко са адава со створинѓа.
Чачипе: О Девел на живинела ни ки Пхув ни ко било кова јавер тхан ко материјално универзум (1. Царевите 8:27). Точно тано кај о черења хем о јавера буќа со створинѓа „објавинена е Девлескири слава“ (Псалм 19:1). Ама, исто сар со јекх уметнико на живинела ки слика со цртинѓа, аѓаар о Девел да на живинела ко адава со створинѓа. Сепак, и слика шај те вакерел аменге нешто башо адава со цртинѓа ла. Слично, о материјално да свето вакерела аменге нешто башо е Девлескере особине, на пример лескири моќ, мудрост хем мангипе (Римјаните 1:20).
Погрешно хаљојбе: Те шај те џанел са хем те овел семоќно, о Девел мора те овел присутно сегде хем ко са.
Чачипе: Те шај те влијајнел, о Девел користинела пло свети дух, јавере лафенцар пли сила. Преку о свети дух, о Девел шај те дикхел са хем те керел са со мангела, коте мангела хем кеда мангела, бизо те овел ов лично присутно (Псалм 139:7).
Погрешно хаљојбе: О Псалм 139:8 вакерела кај о Девел тано присутно сегде хем ко са соске ко акава стихо пишинела: „Те укљав хем ко небо, ту би овеа сине адатхе, кеда би буљарава сине ми постела ко гробо, дикх, ту би овеа сине адатхе да“.
Чачипе: Акава стихо на керела лафи башо адава коте живинела о Девел. Наместо адава, поетска лафенцар сикавела кај о Девел шај те поможинел аменге коте хем те ова, соске ни јекх тхан нане леске бут дур.
a Јехова тано о анав е Девлескоро, кова со дознајнаја ле тари Библија.