Дали е Јеховаскере сведокија тане о чачутне христијања?

Амен сар е Јеховаскере сведокија верујнаја кај сием о чачутне христијања. Соске? Ки акаја лекција ка дознајне некобор причине. Ка дикха ко со темелинена пе амаре верувања, соске пхираваја о анав е Јеховаскере сведокија хем дали машкар аменде иси мангипе.

1. Ко со темелинена пе е Јеховаскере сведоконгере верувања?

О Исус вакерѓа: „[Е Девлескоро] лафи тано чачипе“ (Јован 17:17). Исто сар о Исус, амен да сар е Јеховаскере сведокија секогаш темелинѓем амаре верувања ки Библија. На пример, дикх сар керѓем адава ко почеток тари амари современо историја. Ко крајо таро 19-то веко јекх група искрена мануша почминѓе шукар те проучинен и Библија заедно, те шај те откринен со ој чаче сикавела. Ола темелинѓе пумаре верувања ки Библија, иако адава сине различно таро адава со сикавела сине и црква. Пало адава, ола почминѓе те вакерен е јаверенге адава со сиклиле тари Библија.a

2. Соске пхираваја о анав е Јеховаскере сведокија?

О Јехова башо пле слуге вакерела кај тане лескере сведокија, соске ола вакерена о чачипе баши лесте (Евреите 11:4—12:1). На пример, ко пурано време о Девел вакерѓа пле народоске: „Тумен сиен мле сведокија“. (Читин Исаија 43:10.) Башо Исус вакерела пе кај тано „Верно сведоко“ (Откровение 1:5). Адалеске, ко 1931 берш, амен лелем о анав е Јеховаскере сведокија. Бахтале сием со пхираваја адава анав.

3. Сар е Јеховаскере сведокија сикавена мангипе сар со сикавѓа о Исус?

О Исус мангља пле ученикон добором бут со ола сине леске сар фамилија. (Читин Марко 3:35.) Исто аѓаар, иако сием ко цело свето, амен да сар е Јеховаскере сведокија сием сар јекх сложно фамилија. Адалеске викинаја јекх јекхе пхрала хем пхене (Филимон 1, 2). Исто аѓаар, шунаја и заповед: „Манген са е пхрален“ (1. Петрово 2:17). Амен сикаваја амаро мангипе ко разна начинија. На пример, аѓаар со поможинаја амаре пхраленге хем пхењенге кеда ваљани ленге помош.

ДОЗНАЈН ПОВИШЕ

4. Амен темелинаја амаре верувања ки Библија

О Јехова пророкујнѓа кај ка авел време кеда лескере слуге пошукар ка хаљовен о чачипе тари Библија. Читин Даниел 12:4, а пало адава керен лафи башо акава пучибе:

• Со „ка бајрол“ машкар е Девлескоро народо?

Дикх сар јекх група мануша, колендар со јекх викинела пе сине Чарлс Расел, проучинѓе е Девлескоро Лафи. Дикх о ВИДЕОКЛИПИ, а пало адава керен лафи башо акава пучибе:

ВИДЕОКЛИПИ: Палем откримо о библиско чачипе (7:45)

• Ко кова начин о Расел хем лескере соработникија проучинѓе и Библија?

Дали џанљан?

Понекогаш керѓем промене ко амаре верувања. Соске? Те вакера јекх пример. Кеда икљола о кхам, лескири светлина хари по хари керела појасно те дикха о буќа сој околу аменде. Аѓаар о Девел хари по хари поможинела аменге пошукар те хаљова лескоро Лафи. (Читин Изреки 4:18.) Кеда менинаја несаве амаре верувања, адава нане соске и Библија менинѓа пе, него соске амен пошукар хаљоваја ла.

5. Амен живинаја спрема о анав со пхираваја

ВИДЕОКЛИПИ: Анав кова со претставинела амен (2:40)

• Соске одговоринела аменге о анав е Јеховаскере сведокија?

Соске о Девел биринѓа манушен те овен лескере сведокија? Адалеске со иси бут ховајба башо Девел, лескере сведокија вакерена о чачипе баши лесте. Те дикха дуј таро адала ховајба башо Девел.

Несаве религие сикавена кај о Девел мангела те користина слике хем јавера предметија кеда обожавинаја ле. Ама, дикх со вакерела и Библија. Читин 3. Мојсеева 26:1, а пало адава керен лафи башо акава пучибе:

• Дали чаче о Девел мангела те користина слике хем јавера предметија кеда обожавинаја ле?

Несаве верска водачија сикавена кај о Исус тано о Девел. Ама, дикх со вакерела и Библија. Читин Јован 20:17, а пало адава керен лафи башо акала пучиба:

• Дали о Исус чаче тано о Девел?

• Сар осетинеа тут башо адава со о Девел бичхалѓа пле Сведокон те вакерен туке о чачипе баши лесте хем баши лескоро Чхаво?

6. Амен сикаваја мангипе јекх јекхеске

И Библија спорединела е христијанен е различна делонцар таро манушикано тело. Читин 1. Коринќаните 12:25, 26, а пало адава керен лафи башо акала пучиба:

• Со ваљани те керен о чачутне христијања кеда некој лендар трпинела неволје?

• Дали дикхљан сар е Јеховаскере сведокија сикавена мангипе јекх јекхеске?

Кеда е Јеховаскере сведокија ко јекх дело тари Пхув иси лен неволје, о јавера Сведокија таро цело свето одма поможинена ленге. Те шај те дикхе јекх асавко пример, дикх о ВИДЕОКЛИПИ, а пало адава керен лафи башо акава пучибе:

ВИДЕОКЛИПИ: Сар о пхраља ко Хаити преживинѓе о урагани Метју (5:29)

• Сар е Јеховаскере сведокија поможинѓе јекх јекхеске пали јекх природно катастрофа?

СО СИКЛИЛЕМ

Е Јеховаскере сведокија тане о чачутне христијања. Ко цело свето иси е Јеховаскере сведокија хем машкар аменде иси мангипе. Амаре верувања темелинена пе ки Библија хем амен проповединаја о чачипе башо Јехова.

Сар ка одговорине?

• Соске викинаја амен е Јеховаскере сведокија?

• Сар понашинаја амен јекх јекхеа?

• Со мислинеа, дали е Јеховаскере сведокија тане о чачутне христијања?

ИСТРАЖИН

Сикљов повише баши амари историја.

Јеховините сведоци — вера на дело, 1. дел: Излез од темнината (1:00:53)

Дикх сар е Јеховаскере сведокија откринѓе јекх ховавно сикљојбе.

Народо кова со славинела е Девлескоро анав (7:08)

Добин о одговорија ко најчеста пучиба башо е Јеховаскере сведокија.

„Најчеста пучиба башо е Јеховаскере сведокија“ (дело ки амари интернет-страница)

О Стивен мрзинѓа добором бут е манушен таро јавера расе со чак нападинѓа лен. Читин со поможинѓа леске те менинел пе откеда запознајнѓа е Јеховаскере сведокон.

„Животот ми стануваше сѐ полош“ (Стражарска кула таро 1 јули 2015)