Бут тано корисно те проучине и Библија. Ама, адава шај нане те овел туке секогаш локхо те кере. Понекогаш шај ка пуче тут: „Дали шај те продолжинав те проучинав и Библија?“ Соске врединела понадари да те трудине тут те проучине и Библија? Со ка поможинел туке те истрајне чак кеда туке пхаро?

1. Соске врединела те проучине и Библија?

„Е Девлескоро Лафи тано џивдо хем силно“ (Евреите 4:12). И Библија тани бут скапоцено адалеске со сикавела со осетинела хем со мислинела о Девел баши туке. Ој на само со поможинела туке те сикљове бут буќа башо Девел, него исто аѓаар дела тут чачутни мудрост хем надеж. Ама сој панда поважно, и Библија поможинела туке те ове е Јеховаскоро амал. Кеда проучинеа и Библија, ту мукхеа ој те влијајнел упри туте хем те керел тло живото пошукар.

2. Соске тано важно те хаљове кобор тано вредно о чачипе тари Библија?

О чачипа тари Библија тане сар скапоцено барвалипе. Адалеске и Библија охрабринела амен те кина о чачипе хем никогаш те на бикина ле (Изреки 23:23). Ако хаљоваја кобор тане вредна о чачипа тари Библија, ка трудина амен понадари да те проучина ла, чак кеда ка појавинен пе аменге несаве предизвикија. (Читин Изреки 2:4, 5.)

3. Сар шај те поможинел туке о Јехова понадари да те проучине?

Сар семоќно Створители хем тло амал, о Јехова џанела тут најшукар хем мангела те поможинел туке те сикљове баши лесте. Ов шај те дел тут „сила“ те проучине лескоро Лафи. (Читин Филипјаните 4:13.) Адалеске, ако понекогаш шај нане те овел тут волја те проучине или ка овел туке пхаро те применине адава со сикљовеа, о Јехова ка поможинел туке. Исто аѓаар, ов шај те дел тут побари сила те накхаве о предизвикија или о противибе. Редовно молин е Јехова те поможинел туке понадари да те проучине и Библија (1. Солуњаните 5:17).

ДОЗНАЈН ПОВИШЕ

4. Сар шај те сикаве кај туке бут важно тло библиско курси?

Понекогаш шај те мислина кај сием бут зафатиме хем кај нане амен време те проучина и Библија. Со шај те поможинел аменге тегани? Читин Филипјаните 1:10, а пало адава керен лафи башо акала пучиба:

• Со мислинеа, кола тане несаве таро најважна буќа ко живото?

• Сар шај те сикаве кај туке бут важно тло библиско курси?

1. (1) Ако прво пхереа и кофа пошикаја, а пало адава чхивеа о бара тегани о бара нане те ресен андре

2. (2) Ако прво чхивеа о бара ки кофа, тегани ка овел повише тхан те кхедел и пошик да андре. Слично аѓаар, ако чхивеа ко прво тхан о најважна буќа ко тло живото, ка овел тут време те кере на само адала буќа, него хем јавера да

Амен сар мануша иси амен потреба те пенџара хем те обожавина е Девле. Ако на кераја адава нашти те ова бахтале. Адалеске, ваљани те проучина и Библија. Читин Матеј 5:3, а пало адава керен лафи башо акава пучибе:

• Соске тано важно о проучибе те чхива ле ко прво тхан?

5. Ачхов цврсто кеда ка овел тут противибе

ВИДЕОКЛИПИ: Наградимо баши мли истрајност (5:22)

• Сар реагиринѓе е Франческоскири дај хем лескере амала кеда вакерѓа ленге со сикљовела?

• Сар сине наградимо башо адава со ачхило истрајно?

Читин 2. Тимотеј 2:24, 25, а пало адава керен лафи башо акала пучиба:

• Со мислинела тли фамилија хем тле амала башо адава со сикљовеа?

• Спрема акала стихија, сар ваљани те реагирине кеда некој нане бахтало башо адава со проучинеа и Библија, хем соске?

6. Роде помош таро Јехова

ВИДЕОКЛИПИ: О Јехова поможинела аменге те кера промене (3:56)

• Саве промене керѓа о Џим те шај те овел послушно е Јеховаске?

• Со свиџинела пе туке највише таро лескоро пример?

Читин Евреите 11:6, а пало адава керен лафи башо акала пучиба:

• Со ка керел о Јехова околенге „со родена ле ревно“, јавере лафенцар, околенге со трудинена пе те пенџарен ле хем те овен леске послушна?

• Со сикљовеа таро акава башо адава сар осетинела пе о Јехова кеда дикхела кај трудинеа тут те проучине и Библија?

СО СИКЛИЛЕМ

Иако нане секогаш локхо, о проучибе и Библија шај те поможинел туке те ове бахтало засекогаш. Понадари да роде помош таро Јехова хем ов ка наградинел тут.

Сар ка одговорине?

• Соске о библиска чачипа тане туке скапоцена?

• Сар шај те сикаве кола буќа тане туке најважна?

• Соске ваљани те роде помош таро Јехова те шај понадари да те проучине и Библија?

ИСТРАЖИН

Дикх штар методе со поможинѓе буте манушенге мудро те користинен пумаро време.

„Дали си во трка со времето?“ (Разбудете се! таро февруари 2014)

Дикх сар о Јехова поможинѓа јекхе ромњаке колакоро ром на хаљола сине адава со ој керела башо Девел.

О Јехова дела амен сила те издржина (5:05)

Дикх сар јекхе роме сине ле корист таро адава со лескири ромни сине истрајно.

Испитинѓум о чачипе (6:30)

Понекогаш несаве кривинена е Јеховаскере сведокон кај растуринена о фамилие. Ама, дали адава тано чаче?

„Дали е Јеховаскере сведокија растуринена о фамилие или керена лен позорале?“ (интернет статија)

Сарине ваљани те ана одлуке. О одлуке со анаја лен иси лен баро влијание упри аменде хем упро амаро однос е Јеховаја. На пример, шај ваљани те одлучина коте ка живина, сар те грижина амен башо амаре финансиска потребе хем дали те кхува ко брако или на. Кеда анаја шукар одлуке, амен шај те овел амен бахтало живото хем те кера е Јехова бахтало.

1. Сар шај и Библија те поможинел туке те ане шукар одлуке?

Англедер те ане несави одлука, молин е Јехова баши помош хем истражин ки Библија те шај те хаљове сар о Јехова дикхела ки адаја бути. (Читин Изреки 2:3-6.) Башо несаве буќа, о Јехова денѓа јасно заповед. Ко асавке ситуацие најшукар тано те шуна адаја заповед.

Ама, со ако нане јасно заповед ки Библија башо адава со ваљани те кере? О Јехова тегани да ка водинел тут „ко друмо колесте со ваљани те џа“ (Исаија 48:17). Сар? Преку о начелија со аракхљовена ко лескоро Лафи. О библиска начелија тане основна библиска чачипа кола со поможинена аменге те хаљова со мислинела о Девел хем со осетинела башо несаве буќа. Бут пути таро несаво извештај ки Библија шај те сикљова со о Јехова мислинела баши несави бути. Кеда џанаја сар о Јехова дикхела ки несави бути, ка шај те ана одлуке со ка керен ле бахтало.

2. Башо со ваљани те размислине англедер те ане одлука?

Ки Библија пишинела: „О паметно пазинела ко секова пло чекори“ (Изреки 14:15). Адава значинела кај англедер те ане несави одлука ваљани те одвојне време хем те размислине саве опцие иси тут. Џикоте кереа адава, пуч тут: „Кола библиска начелија важинена ки акаја ситуација? Која одлука ка анел манге андруно мир? Сар мли одлука ка влијајнел упро јавера? А сој најважно, дали мли одлука ка керел бахтало е Јехова?“ (5. Мојсеева 32:29).

О Јехова иси ле право те вакерел аменге сој тано шукар, а сој тано лошно. Кеда запознајнаја шукар лескере законија хем начелија хем кеда сием решиме те икера амен ки ленде, тегани ка развина шукар совест. И совест тани чувство со иси амен андре ки аменде башо адава сој тано исправно, а сој погрешно (Римјаните 2:14, 15). Јекх шукар школујми совест ка поможинел аменге те ана шукар одлуке.

ДОЗНАЈН ПОВИШЕ

3. Мукх и Библија те водинел тут

ВИДЕОКЛИПИ: Мукх те водинен тут о библиска начелија (5:54)

• Сој тани и слободно волја?

• Соске о Јехова денѓа амен слободно волја?

• Со денѓа амен о Јехова те шај те ана шукар одлуке?

Те шај те дикхе јекх пример башо библиско начело читин Ефешаните 5:15, 16, а пало адава керен лафи башо акала пучиба. Сар шај шукар те користине тло време...

• те шај те успејне те читине редовно и Библија?

• те ове пошукар брачно партнери, родители, чхаво или чхај?

• те ове присутно ко состанокија?

4. Школујн тли совест те шај те анел шукар одлуке

ВИДЕОКЛИПИ: „Нека овел тут чисто совест“ (5:13)

• Со керѓа и пхен ко видеоклипи те шај те школујнел пли совест хем те анел одлука која со ка керел бахтало е Јехова?

Соске на ваљани те рода о јавера те анен одлуке наместо аменде? Читин Евреите 5:14, а пало адава керен лафи башо акала пучиба:

• Иако шај аменге полокхо о јавера те анен одлука наместо амен, сепак со ваљани секој амендар те сикљовел те керел?

• Со шај те поможинел туке те школујне тли совест хем те ане шукар одлуке?

5. Поштујн е јаверенгири совест

Сарине амен сием различна хем адалеске на анаја о иста одлуке. Сар шај те сикава кај поштујнаја е јаверенгири совест? Те дикха дуј ситуацие:

1. Ситуација: Јекх пхен која со мангела те шминкинел пе селинела пе ко јекх јавер собрание коте со буте пхењенге адава сметинела.

Читин Римјаните 15:1 хем 1. Коринќаните 10:23, 24, а пало адава керен лафи башо акала пучиба:

• Спрема акала стихија, која одлука шај те анел и пхен? Со би ту кереа, ако тли совест дозволинела туке нешто те кере, ама сиан некасаја каскири совест на дозволинела леске те керел адава?

2. Ситуација: Јекх пхрал канимо тано ко дружибе коте со о пхраља пиена умерено алкохол. Ов џанела кај и Библија на забранинела умерено те пиел пе алкохол, ама сепак ов одлучинела те на пиел ни најхари.

Читин Проповедник 7:16 хем Римјаните 14:1, 10, а пало адава керен лафи башо акала пучиба:

• Спрема акала стихија, која одлука шај те анел о пхрал? Со би ту кереа, ако дикхеа кај некој керела нешто со тли совест на дозволинела туке?

Кола чекорија ка поможинен туке те ане шукар одлуке?

1. Молин е Јехова те поможинел туке те шај те џане со те кере (Јаков 1:5).

2. Истражин ки Библија хем ко амаре публикацие башо библиска начелија со шај те поможинен туке ки адаја ситуација. Исто аѓаар, шај те кере лафи јекхе зрело христијанеа.

3. Размислин сар тли одлука ка влијајнел упри тли хем е јаверенгири совест.

СО СИКЛИЛЕМ

Амен шај те ана шукар одлуке кеда сикљоваја сар о Јехова дикхела ки несави бути хем кеда лаја ко обзир сар амаре одлуке ка влијајнен упро јавера.

Сар ка одговорине?

• Сар шај те ане одлуке кола со ка керен бахтало е Јехова?

• Сар шај те школујне тли совест?

• Сар шај те сикаве кај поштујнеа е јаверенгири совест?

ИСТРАЖИН

Сар шај те ане одлуке кола со ка керен позорало тло амалипе е Девлеа?

„Донесувај одлуки со кои ќе го славиш Бог“ (Стражарска кула таро 15 април 2011)

Сар шај те ова послушна е Јеховаске кеда ко лескоро Лафи на пишинела со ваљани те кера?

„Дали секогаш ти треба библиска заповед?“ (Стражарска кула таро 1 декември 2003)