Пучиба таро читателија

Дали ко Проповедник 5:8 керела пе лафи башо манушикане владетелија или башо Јехова?

Ко акава интересно стихо пишинела: „Ако дикхеа кај негде ки тли пхув малтретиринена е чороле хем чхинавена лестар и правда ко судо хем понашинена пе леа неправедно, ма чудин тут. Соске околе со постапинела аѓаар дикхела ле некој сој тано побаро лестар, а иси јавера да сој тане панда побаре лендар“ (Проп. 5:8).

Акала стихија шукар опишинена е манушен сој ки власт. Ама, ако размислинаја повише башо акава, ко акала лафија иси чачипе башо Јехова кова со дела амен утеха.

О стихо таро Проповедник 5:8 керела лафи башо владетели кова со мучинела е чоролен хем чхинавела лендар и правда. О владетели на смејнела те бистрел кај шај дикхела ле некој сој тано ки побари положба лестар или кас со иси побари власт лестар. Уствари, шај иси јавера да кола сој тане ки панда побари положба лендар. Жално тано адава кај, ко са о манушикане владе шај те овел корупција, хем и власт злоупотребинела пе ко различна начинија, а о обично народо мора те трпинел о последице таро адава.

Ама, чак ако дикхјола кај нане надеж, утешно тано те џана кај о Јехова дикхела околен со иси лен бари положба ко манушикане владе. Амен шај те молина амен е Девлеске те поможинел аменге хем те вакера леске со мучинела амен (Пс. 55:22; Фил. 4:6, 7). Џанаја кај „о Јехова пле јакхенцар родела ки цело пхув те сикавел пли сила ки корист околенге со служинена леске цело вилеа“ (2. Лет. 16:9).

Спрема адава, о Проповедник 5:8 потсетинела амен кај ко свето ко кова со живинаја секогаш иси некој со иси ле побари власт таро некој јавер. А панда поважно, акава стихо потсетинела амен кај е Јехова иси ле и најбари власт, или ов тано о Најбаро Владетели. Ов акана владинела преку пло Чхаво, о Исус Христос, кова тано Цари ко е Девлескоро Царство. О Семоќно Девел, кова со дикхела са, хем лескоро Чхаво, тане апсолутно праведна.