Дали сетинеа тут?

Дали внимателно читинѓан о броја тари Стражарско кула акале бершеске? Дикх дали шај те одговорине ко акала пучиба.

Со значинела те менина амаро начин сар размислинаја? (Рим. 12:2).

Ваљани те кера нешто повише него само некобор шукар буќа. Мора те испитина саве мануша сием чаче хем те кера о потребна промене те шај панда повише те живина спрема е Јеховаскере мерилија(w23.01, стр. 8-9).

Сар шај те ова урамнотежена џикоте дикхаја со случинела пе ко свето?

Шукар тано те интересина амен сар о светска настанија исполнинена о пророштвија. Ама на ширинаја амаро лично мислење башо адалеске со на мангаја те кера поделбе ко собрание. Наместо адава, вакераја информацие со темелинена пе ко амаре публикацие (1. Кор. 1:10; w23.02, стр. 16).

Сар о крстибе е Исусескоро разликујнела пе таро крстибе лескере следбениконгоро?

Ов на ваљанѓа те дел завет е Јеховаске соске сине бијамо ки нација колаја со о Девел керѓа завет. Ов на ваљани сине те каинел пе башо несаво грево соске сине совршено, бизо грево (w23.03, стр. 4).

Сар шај те поможина е јаверенге те коментиринен ко состанокија?

Ваљани те трудина амен амаре коментарија те овен кратка те шај те овел време повише џене те коментиринен. Исто аѓаар, на ваљани те вакера са о мисле таро пасус. Аѓаар ка да прилика е јаверенге те овел лен со те коментиринен (w23.04, стр. 23).

Со претставинела о симболично „Свето Друмо“, кова сој спомнимо ко Исаија 35:8?

Акале симболично друмоја прво мислинела пе сине ко друмо таро Вавилон џи ко Ерусалим, кова со о Евреија мора сине те пхирен ле. А со претставинела акава друмо ко современо време? Веконцар англедер 1919 берш, сине керде о потребна подготовке башо акава друмо, машкар кола со сине о преведибе хем о печатибе е Библијакоро. Е Девлескоро народо авдиве патујнела ко акава „Свето Друмо“ хем ов поможинела амен те ова ко духовно рај акана хем те добина о благословија со ка анел лен е Девлескоро Царство (w23.05, стр. 15-19).

Башо кола дуј симболична џувља керела пе лафи ко 9 поглавје таро лил Изреки?

Јекх симболично џувли колаке со пишинела ко Изреки тани „и глупаво џувли“ колакири со покана ингарела ко „гробо“. И јавер симболично џувли тани „и чачутни мудрост“ колакири со покана ингарела „ко друмо е хаљојбаскоро“ хем ко живото (Изр. 9:1, 6, 13, 18; w23.06, стр. 22-24).

Сар таро начин сар о Јехова постапинѓа е Јовеа дикхела пе лескири понизност хем разумност?

О Јехова вакерѓа е Лотеске те нашел таро Содом ко планине. Кеда о Лот молинѓа е Јехова те мукхел ле те нашел ко Зигор, ов дозволинѓа леске адава (w23.07, стр. 21).

Со шај те керел јекх ромни ако лакоро ром дикхела порнографија?

На ваљани те мислинел кај ој тани криво. Ваљани те концентриринел пе ко пло амалипе е Девлеа хем те размислинел башо несаве библиска извештаија башо џувља со сине лен проблемија хем кола со родинѓе утеха таро Јехова. Шај те поможинел пле ромеске те избегинел ризична ситуацие (w23.08, стр. 14-17).

Сар шај о хаљојбе, јавере лафенцар и проникливост те поможинел аменге кеда некој мангела те распрајнел пе аменцар башо амаре верувања?

Кеда некој ка пучел амен нешто, ко адава ваљани те дикха сар прилика те дознајна сој леске важно. Адава ка поможинел аменге те одговорина леске љубезно хем кротко (w23.09, стр. 16-17).

Со шај те сикљова тари Марија башо адава сар те добина и сила со ваљани аменге?

Кеда дознајнѓа кај ка овел и дај е Месијаскир, ој родинѓа помош таро јавера. О Габриел хем и Елисавета охрабринѓе ла преку о пророштвија со аракхљона ко е Девлескоро Лафи. Амен да шај те добина сила таро амаре пхраља хем пхења (w23.10, стр. 15).

Сар шај о Јехова те одговоринел ко амаре молитве?

О Јехова ветинела кај ка шунел амаре молитве хем на бистрела пли намера (Ерем. 29:12). О Јехова шај те одговоринел ко слична молитве ко различна начинија, ама шај те ова сигурна кај секогаш ка поможинел амен (w23.11, стр. 21-22).

Соске ко Римјања 5:4 палем спомнинела пе „и надеж“ кеда тани више спомними ко 2-то стихо?

Кеда некој шунела о шукар хабери, шај те добинел надеж башо вечно живото ко рај ки пхув. Ама кеда иси ле неволје, кеда истрајнела ки ленде хем кеда дикхела кај о Јехова тано задоволно леа, лескири надеж овела са позорали хем повише ценинела ла (w23.12, стр. 12-13).