СТАТИЈА ПРОУЧИБАСКЕ 42
Бахтале тане окола сој беспрекорна е Јеховаске
Бахтале тане окола со живинена беспрекорно, окола со живинена спрема е Јеховаскоро закони (ПС. 119:1)
ГИЛИ 124 Секогаш те ова верна
БАШО СО КА КЕРА ЛАФИa
Несаве таро амаре пхраља хем пхења со сине или тане панда пханле соске поддржинена е Јеховаскоро право те владинел. (Дикх ко пасусија 1-2.)
1-2. а) Сар несаве властија противинена пе е Јеховаскере народоске, ама сар реагиринена ола? б) Соске шај те ова бахтале чак кеда сием прогониме? (Коментирин хем и слика тари насловно страна.)
МОМЕНТАЛНО амаре активностија тане ограничиме или забраниме ко повише таро 30 пхувја ко свето. Ко несаве таро адала пхувја амаре пхраља хем пхења тане пханле ко затвор. Дали керѓе нешто лошно? О Јехова ни хари на дикхела аѓаар. Ола на керѓе ништо лошно освен со читинена хем проучинена и Библија, вакерена е јаверенге ко со верујнена хем џана ко состанокија. Исто аѓаар на мангена те мешинен пе ки политика. Иако иси лен баро прогонство акала верна слуге ачховена беспрекорна аѓаар сој тане послушна е Јеховаске ко са хем адава керела лен бахтале!b
2 Веројатно дикхљан несаве слике таро акала храбра сведокија хем приметинѓан кај ола асана. Ола тане бахтале соске џанена кај керена е Јеховаскири волја адалеа со ачхона леске беспрекорна (Пс. 15:1, 2). О Исус вакерѓа: „Бахтале тане окола сој прогониме адалеске со керена адава сој праведно... Овен бахтале хем бут радујнен тумен соске бари тани тумари награда“ (Мат. 5:10-12).
ЈЕКХ ШУКАР ПРИМЕР АМЕНГЕ
О Петар хем о Јован тане шукар пример башо христијања авдиве кола со мора те икљовен ко судо хем те бранинен пумари вера (Дикх ко пасусија 3-4)
3. Спрема Дела 4:19, 20, со керѓе о апостолија кеда сине прогониме хем соске керѓе адава?
3 Амаре пхраља хем пхења накхена таро исто со накхле о апостолија ко прво веко кеда сине прогониме. О судие таро еврејско судо бут пути „нарединѓе ленге те на керен више лафи ко е Исусескоро анав“ (Дела 4:18; 5:27, 28, 40). Со керѓе о апостолија? (Читин Дела 4:19, 20.) Ола сине свесна кај некој со иси ле побаро авторитети заповединѓа ленге те проповединен е манушенге хем те ден темелно сведоштво башо Христос (Дела 10:42). Адалеске о Петар хем о Јован храбро вакерѓе кај повише ка шунен е Девле наместо е судиен хем исто аѓаар вакерѓе кај нане те чхинавен те керен лафи башо Исус. Уствари сар ка пхене вакерѓе ленге „мислинена ли кај иси тумен побаро авторитети таро Девел?“
4. Спрема Дела 5:27-29, со керѓе о апостолија хем сар шај амен те џа пало ленгоро пример?
4 Са о чачутне христијања џана пало е апостоленгоро шукар пример аѓаар со повише шунена е Девле него е манушен. (Читин Дела 5:27-29.) Откеда о апостолија сине марде баши пумари беспрекорност „ола геле песке таро Судско совет хем сине бахтале со сине достојна те овен лаџакерде башо [е Исусескоро] анав“ хем продолжинѓе те проповединен! (Дела 5:40-42).
5. Башо кола пучиба ваљани аменге одговор?
5 Кеда размислинаја башо е апостоленгоро пример тегани шај пучаја амен: Сар шај сине о апостолија те шунен повише е Девле а ко исто време те овен послушна ки библиско заповед те овен подложна е властенге? (Рим. 13:1). Сар шај амен те ова послушна е властенге хем околенге со иси лен авторитети баш сар со вакерѓа о Павле, а ко исто време те ачхова беспрекорна е Девлеске сар амаро Најбаро Владетели? (Тит 3:1).
„О ВЛАСТИЈА“
6. а) Кој тане о „властија“ сој спомниме ко Римјаните 13:1, хем сави одговорност иси амен спрема ленде? б) Саво авторитети иси са е манушикане владетелен?
6 Читин Римјаните 13:1. Ко акава стихо е лафеа „властија“ мислинела пе ко манушикане владетелија колен со иси лен моќ хем контрола упро јавера. О христијања мора те овен послушна акале манушикане властенге. Ола икерена о мир, родена таро мануша те икерен о законија, хем понекогаш чак бранинена е Јеховаскере народо (Отк. 12:16). Адалеске заповедимо аменге те да лен данокија хем давачке хем те сикава ленге чест (Рим. 13:7). Ама адала световна властија иси лен авторитети само адалеске со о Јехова дозволинѓа ленге те овел лен. О Исус јасно вакерѓа акава кеда сине англо о римско управители о Понтиј Пилат. Кеда о Пилат вакерѓа леске кај ле иси ле авторитети те одлучинел дали ка ачхол ко живото или ка овел мудардо, тегани о Исус вакерѓа леске: „На би овела тут сине нисави власт упри манде те на овел туке сине денди упралдан“ (Јован 19:11). О авторитети са е манушикане властенгоро хем е политичаренгоро авдиве тано ограничимо, исто сар со сине е Пилатескоро авторитети.
7. Кеда на ваљани те шуна е манушикане владетелен, хем баши која бути ола ваљани те овен свесна?
7 О христијања тане послушна е манушикане властенге са џикоте адава нане против е Девлескере законија. Ама амен нашти те шуна лен кеда родена амендар нешто со о Девел забранинела или кеда забранинена аменге нешто со о Девел родела амендар те кера. На пример, ола шај родена таро терне те џан ки војска.c Или шај те забранинен амари Библија хем о библиска публикацие хем те забранинен аменге те џа ки служба хем ко состанокија. Кеда о владетелија злоупотребинена пумаро авторитети сар на пример кеда прогонинена е Христосескере ученикон, тегани ола тане одговорна англо Девел. О Јехова дикхела лен! (Проп. 5:8).
8. Која тани и разлика машкар о Јехова хем о манушикане владетелија, хем соске ваљани адава те џана?
8 „О властија“ шај те овел лен авторитети, те керен шукарипе хем те овел лен моќ упро о јавера. Ама адава на значинела кај тане совршена хем кај иси лен апсолутно власт. Само јекх тано совршено хем ле иси ле апсолутно власт упри сариненде, адава тано о Јехова о Девел. Ки Библија башо Јехова повише пути вакерела пе „о Севишно“ (Дан. 7:18, 22, 25, 27).
„О СЕВИШНО“
9. Со дикхља ки визија о пророко о Даниел?
9 О Пророко о Даниел дикхља јекх визија која со сикавела кај е Јехова иси ле о најбаро авторитети. О Даниел прво дикхља штар баре ѕверија кола со претставинена штар светска силе таро пурано време. Адала тане о Вавилон, и Медо-Персија и Грција хем о Рим, хем исто аѓаар јекх светско сила таро амаро време и Англо-Америка (Дан. 7:1-3, 17). Пало адава о Даниел дикхља е Јехова сар бешела ко престол ко небо (Дан. 7:9, 10). Акава верно пророко дикхља нешто јавер да кова со ваљани те овел предупредување е владетеленге авдиве.
10. Спрема Даниел 7:13, 14, 27, каске о Јехова дела и власт ки пхув хем со сикавела акава баши лесте?
10 Читин Даниел 7:13, 14, 27. О Девел лела цели власт таро манушикане владетелија хем дела ла јаверенге кола сој помоќна хем повише заслужинена ла. Каске дела ла? Некаске сој „сар манушикано чхаво“, о Исус Христос хем е „света слугенге е Севишноскере“ о 144.000 кола со ка владинен ки цели вечност (Дан. 7:18). Јасно тано кај о Јехова тано о Севишно соске само ле иси ле авторитети те керел асавко нешто.
11. Со јавер пишинѓа о Даниел со сикавела кај е Јехова иси ле о најбаро авторитети упро сарине?
11 О буќа со дикхља о Даниел ки визија потврдинена адава со вакерѓа англедер. Ов вакерѓа кај о Девел „цидела царен хем чхивела царен“. Ов исто аѓаар пишинѓа кај „о Севишно владинела упро манушикано царство хем дела ле каске ов мангела“ (Дан. 2:19-21; 4:17). Дали сине ситуацие коте со о Јехова цидинѓа или чхивѓа владетелен? Оја.
О Јехова леља о царство таро Валтазар хем денѓа ле е Медијцонге хем е Персијцонге (Дикх ко пасус 12)
12. Вакер пример коте со о Јехова цидинѓа царен ко пурано време. (Дикх и слика.)
12 О Јехова јасно сикавѓа кај ле иси ле о најбаро авторитети упро са о јавера властија. Те дикха трин примерија со сикавена адава. О египетско фараони заробинѓа е Јеховаскере народо хем бут пути одбинѓа те мукхел лен. Ама о Девел ослободинѓа пле народо хем мударѓа е фараоне ко Црвено Море (2. Мој. 14:26-28; Пс. 136:15). О вавилонско цари о Валтазар керѓа јекх прослава хем „ваздинѓа пе против о небесно господари“ хем „фалинѓа е девлен таро сребро хем злато“ наместо е Јехова (Дан. 5:22, 23). Ама о Девел понижинѓа адале гордо царе. Адаја рат о Валтазар сине мудардо хем лескоро царство сине дендо ко васта е Медијцонге хем е Персијцонге (Дан. 5:28, 30, 31). О цари о Ирод Агрипа I тари Палестина, мударѓа е Јакове хем чхивѓа е Петаре ко затвор соске ле да мангља те мударел ле. Ама о Јехова чхинавѓа ле ки лескири намера, „е Јеховаскоро ангели кхувѓа ле“ хем ов муло (Дела 12:1-5, 21-23).
13. Вакер пример башо адава сар о Јехова побединѓа повише владетелен таро јекх пути.
13 О Јехова исто аѓаар сикавѓа кај иси ле авторитети упро повише владетелија. Ов боринѓа пе е израелцонге хем поможинѓа ленге те уништинен 31 ханаанска царија хем те освојнен баре делија тари Ветими пхув (Ис. Нав. 11:4-6, 20; 12:1, 7, 24). О Јехова исто аѓаар поможинѓа е израелцонге целосно те побединен е царе Вен-Адад хем 32 јаверен сириска владетелен кола со боринѓе пе против о Израел (1. Цар. 20:1, 26-29).
14-15. а) Со вакерѓе о царија о Навуходоносор хем о Дариј баши е Јеховаскири власт? б) Со вакерѓа о псалмисти башо Јехова хем башо лескоро народо?
14 О Јехова секогаш сикавѓа кај тано Севишно. Ки јекх прилика о вавилонско цари о Навуходоносор фалинѓа пе кај тано баро, моќно хем славно. Адалеске со на сине понизно хем на признајнѓа кај само о Девел заслужинела и слава, о Јехова керѓа те делинѓовел. Откеда састило, о Навуходоносор „славинѓа е Севишно“ хем признајнѓа кај „е Јеховаскири власт тани вечно власт“. Исто аѓаар вакерѓа: „Нане никој со шај те чхинавел ле“ (Дан. 4:30, 33-35). Откеда е Даниелескири беспрекорност сине испитими хем о Јехова спасинѓа ле таро лавија, о цари о Дариј објавинѓа: „О народо те дарал таро Девел е Даниелескоро, соске ов тано џивдо Девел хем ов ка ачхол засекогаш. Лескоро Царство нане никогаш те овел уништимо, хем лескири власт ка трајнел вечно“ (Дан. 6:7-10, 19-22, 26, 27).
15 О псалмисти вакерѓа: „О Јехова руминела е народонгере намере, чхинавела лен те керен пумаре планија“. Исто аѓаар додајнѓа: „Бахтало тано о народо каскоро Девел тано о Јехова, о мануша кола со ов биринѓа лен те овен лескири сопственост“ (Пс. 33:10, 12). Акаја тани бут шукар причина те ачхова беспрекорна е Јеховаске!
И ПОСЛЕДНО ВОЈНА
Е Јеховаскири небесно војска бут локхе ка побединел е коалиција таро народија (Дикх ко пасусија 16-17)
16. Ко со шај те ова увериме кеда ка авел и бари неволја хем соске? (Дикх и слика.)
16 Џи акана дикхлем со керѓа о Јехова ко пурано време. А со шај те очекујна кај ка керел панда хари? Шај те ова увериме кај о Јехова ка спасинел пле верна слуген кеда ка авел и бари неволја (Мат. 24:21; Дан. 12:1). Ов ка керел акава кеда и коалиција таро народија пенџарди сар Гог таро Магог, ка нападинел ко цело свето околен сој верна е Јеховаске. Чак ки адаја коалиција те овен са о 193 членке таро Обединета нацие ка нашти те боринен пе против о Севишно хем лескири небесно војска! О Јехова ветинела: „Ка бајрарав мли слава, ка посветинав ман хем ка објавинав ман англо јакхја буте народонгере хем тегани ка џанен кај ме сиум о Јехова“ (Езек. 38:14-16, 23; Пс. 46:10).
17. Со вакерела и Библија кај ка случинел пе е царенцар тари пхув, а со ка овел околенцар со ка ачховен беспрекорна?
17 Кеда о Гог ка нападинел, адава ка анел џи ки војна Армагедон коте со о Јехова ка уништинел „е царен таро цело свето“ (Отк. 16:14, 16; 19:19-21). Тари јавер страна „само о праведна ка живинен ки пхув хем окола сој беспрекорна ка ачховен ки лате“ (Изр. 2:21).
МОРА ТЕ АЧХОВА БЕСПРЕКОРНА
18. Со сине спремна бут христијања те керен хем соске? (Даниел 3:28).
18 Ки цело историја бут чачутне христијања ризикујнѓе пумари слобода, па чак пумаро живото адалеске со мангена е Јехова сар пумаро Севишно владетели. Адала христијања тане одлучна те ачховен верна е Јеховаске. Ола тане сар о трин Евреија кола со иако сине фрдиме ки печка јагаја ачхиле верна околеске со спасинѓа лен. (Читин Даниел 3:28.)
19. Спрема со ка судинел о Јехова пле народоске, хем со мора амен те кера?
19 О псалмисти о Давид пишинѓа кобор тано важно те ачхова беспрекорна: „О Јехова ка објавинел осуда са е народонге. Судин ман Јехова спрема мли праведност хем спрема мли беспрекорност“ (Пс. 7:8). Ов исто аѓаар пишинѓа: „И беспрекорност хем и праведност нека аракхен ман“ (Пс. 25:21). О најшукар начин те живинел пе тано секогаш те ачхова верна е Јеховаске бизи разлика со ка случинел пе! Тегани ка осетина амен исто сар о псалмисти кова со пишинѓа: „Бахтале тане окола со живинена беспрекорно, окола со живинена спрема е Јеховаскоро закони“ (Пс. 119:1).
ГИЛИ 122 Овен зорале!
a И Библија вакерела е христијаненге те овен послушна околенге со иси лен побаро авторитети јавере лафенцар — е властенге таро акава свето. Ама несаве властија противинена пе е Јеховаске хем лескере слугенге. Сар шај те ова послушна е манушикане владетеленге, а сепак те ачхова беспрекорна е Јеховаске?
b ОБЈАСНИМО ЛАФИ: Те ова беспрекорна значинела секогаш те ова верна е Јеховаске хем те поддржина лескоро право те владинел чак кеда адава тано пхаро.
c Дикх и статија таро акава број „Соске амен да на џаја ко војне сар со керена сине адава о Израелција ко пурано време?“