Сар те поможина е јаверенге те икерен е Христосескере заповедија

1. Спрема Матеј 28:18-20, која заповед денѓа о Исус пле учениконге?

ОТКЕДА о Исус воскреснинѓа, ов појавинѓа пе пле учениконге кола со сине кхедиме ки Галилеја. Ваљани сине те вакерел ленге нешто важно. Со сине адава? Лескере лафија шај те аракха лен ко Матеј 28:18-20. (Читин.)

2. Кола пучиба ка дикха?

² Е Исусескири заповед те керен пе ученикија важинела са е Девлескере слугенге авдиве. Адалеске те дикха трин пучиба кола сој тане поврзиме е задачаја со денѓа ла аменге о Исус. Прво, освен со сикаваја е неве ученикон со родела лендар о Девел, со панда ваљани те кера? Дујто, сар шај са о објавителија ко собрание те поможинен е интересентенге духовно те напредујнен? Трито, сар шај те поможина околенге сој неактивна палем те почминен те керен ученикија?

СИКАВ ЛЕН ТЕ ИКЕРЕН Е ИСУСЕСКЕРЕ ЗАПОВЕДИЈА

3. Кова посебно упатство вклучинѓа о Исус ки пли заповед?

³ Е Исусескере упатствија сине јасна. Мора те сикава е манушен адава со ов заповединѓа. Ама, на ваљани те бистра јекх важно детали. О Исус на вакерѓа: „Сикавен лен са со заповединѓум туменге“. Наместо адава, ов вакерѓа: „Сикавен лен те икерен са со заповединѓум туменге“. Те шај те шуна акава упатство, на ваљани само те сикава е интересентен со те керен, него исто аѓаар ваљани те сикава лен сар те керен адава (Дела 8:31). Соске?

4. Сар шај те поможина некаске те икерел е Христосескере заповедија? Вакер пример.

⁴ Те „икерел пе“ несави заповед значинела те овел пе послушно. Сар шај те сикава некас те овел послушно ко адава со заповединѓа о Исус? О следно пример ка поможинел аменге те хаљова со ваљани те кера. Сар јекх инструктори возибаске сикавела јекхе ученико те икерел пе ко сообраќајна правилија? О инструктори прво сикавела ле башо правилија ко сообраќај џикоте тане ки училница. Ама, те шај те сикавел ле сар те икерел адала правилија, ваљани те керел панда нешто. Ов мора те овел е ученикоја џикоте возинела хем те дел ле упатствија сар те применинел адава со сиклило. Со сикљоваја таро акава пример?

5. а) Спрема Јован 14:15 хем 1. Јованово 2:3, со ваљани те сикава е интересентен те керен? б) Сар шај амен те поможина е интересентенге те применинен о библиска начелија?

⁵ Кеда проучинаја и Библија е јаверенцар, амен сикаваја лен со родела амендар о Девел. Ама, мора те кере нешто повише. Мора те сикава е интересентен сар те применинен ко пло живото адава со сикљовена. (Читин Јован 14:15; 1. Јованово 2:3.) Амаре примереа, шај те сикава е интересентен сар те икерен о основна библиска мерилија ки школа, ки бути хем кеда биринена рекреација. Шај те вакера ленге нешто со случинѓа пе аменге ко живото те шај те сикава ленге сар адава со применинаја о библиска упатствија заштитинела амен хем поможинела аменге те ана мудра одлуке. Кеда сием е интересентенцар, шај те молина амен е Јеховаске хем те рода лестар те водинел лен пле свети духоја (Јован 16:13).

6. Сој вклучимо ко адава те сикава е јаверен те икерен е Исусескере заповедија?

⁶ Сој вклучимо ко адава те сикава е јаверен те икерен е Исусескере заповедија? Амен ваљани те поможина амаре интересентенге те овел лен желба те керен ученикија. Несаве интересентија шај дарана те џан те проповединен. Адалеске ваљани те ова стрплива џикоте поможинаја ленге пошукар те хаљовен о библиска чачипа те шај те овел лен зорали вера. Тегани адава ка кхувел ленге ко вило хем ола ка овен мотивириме те проповединен. Со шај те кера те поможина е интересентенге те овел лен желба те проповединен о шукар хабери?

7. Сар шај те поможина е интересентеске те развинел желба те вакерел о шукар хабери е јаверенге?

⁷ Шај те пуча е интересенте пучиба сар сој акала: „Сар тло живото уло пошукар адалеске со применинеа о библиска сикљојба? Дали мислинеа кај о јавера да ваљани те шунен о шукар хабери? Со шај те кере те поможине ленге?“ (Изр. 3:27; Мат. 9:37, 38). Сикав е интересентеске о трактатија сој тане дело таро главна публикацие службаке хем мукх ов те биринел несаве лендар со мислинела кај ка поможинел некаске тари лескири фамилија, амала хем колеге.b Де е интересентеске некобор таро акала трактатија. Вежбин леа сар шај ко тактично начин те нудинел о трактатија е јаверенге. Џанѓола пе, откеда о интересенти ка овел некрстено објавители, амен ваљани те проповедина леа те шај те поможина леске (Проп. 4:9, 10; Лука 6:40).

САР ШАЈ О СОБРАНИЕ ТЕ ПОМОЖИНЕЛ Е ИНТЕРЕСЕНТЕНГЕ ТЕ НАПРЕДУЈНЕН

8. Соске тано важно о интересенти те бајрарел пло мангипе спрема о Девел хем спрема о пашутне? (Дикх и рамка „Сар те поможина е интересентенге повише те манген е Девле“.)

⁸ Ма бистре кај о Исус денѓа амен упатство те сикава е јаверен „те икерен са“ со заповединѓа. Ко адава сигурно тане вклучиме о дуј најбаре заповедија — те манга е Девле хем те манга е пашутнен (Мат. 22:37-39). Ако поможинаја е интересентеске те овел послушно ко акала дуј заповедија, тегани поможинаја леске те проповединел. Соске вакераја адава? Ако иси ле баро мангипе спрема о Девел хем спрема о јавера, тегани ка мангел те проповединел. Нормално тано адава со несаве интересентија дарана кеда мислинена кај ваљани те проповединен. Ама, амен шај те охрабрина лен кај о Јехова ка поможинел ленге хем хари по хари ка нашавен и дар (Пс. 18:1-3; Изр. 29:25). И рамка ки акаја статија опишинела кола чекорија ваљани те кера те шај те поможина е интересентеске те бајрарел пло мангипе спрема о Девел. Освен адава, со шај те керел о собрание те шај те поможинел е интересентеске те сикавел побаро мангипе?

9. Сар окова со сикљовела те возинел шај те хаљол важна поуке?

⁹ Те размислина палем баши споредба е ученикоја со сикљовела те возинел. Џикоте возинела ко сообраќај, о инструктори бешела узи лесте, а о ученико сикљовела на само адалеа со шунела пле инструкторе него исто аѓаар со дикхела е јавере возачен. На пример, о инструктори шај те сикавел леске несаве возаче со љубезно дела предност јавере возаческе. Или сикавела леске јавере возаче со исклучинела о дугачка светлија те на којрарел е јавере возачен. Таро акала примерија о ученико сикљовела скапоцена лекцие со шај коркори те применинел лен џикоте возинела.

10. Со ка поможинел е интересентеске духовно те напредујнел?

¹⁰ Слично аѓаар, о интересенти со почминела те служинел е Јеховаске, на сикљола само таро објавители со проучинела леа него таро шукар примерија таро јавера слуге е Јеховаскере. Адалеске, со ка поможинел е интересентеске духовно те напредујнел? Те авел ко состанокија. Соске? Адава со ка шунел ко состанокија ка поможинел леске те сикљовел повише, те бајрарел пли вера хем те бајрарел пло мангипе спрема о Девел (Дела 15:30-32). Исто аѓаар, ко состанокија о објавители со проучинела леа шај те запознајнел е интересенте е пхраленцар хем е пхењенцар сој тане слична леа ко бут буќа. О интересенти ка дикхел о шукар примерија таро пхраља хем пхења кола со сикавена мангипе ко собрание. Те дикха о следна ситуацие.

11. Саве примерија шај о интересентија те дикхен ко собрание, хем сар адава шај те влијајнел упри ленде?

¹¹ Јекх интересентка со коркори бајрарела пле чхавен дикхела сар јекх пхен ко собрание тани ки слично ситуација. Погодинела ла кеда дикхела кобор акаја пхен трудинела пе те анел пле тикне чхавен ки дворана. Јекх интересенти со боринела пе те чхинавел пушибаја запознајнела јекхе пхрале кова со боринѓа пе исто проблемеа хем успејнѓа. О објавители вакерела е интересентеске сар лескоро мангипе спрема о Јехова поттикнинѓа ле те овел послушно ко лескере заповедија (2. Кор. 7:1; Фил. 4:13). О пхрал вакерела е интересентеске сар чхинавѓа е пушибаја хем охрабринела ле: „Ту да шај те чхинаве“. О интересенти тано охрабримо хем верујнела кај ов да шај те успејнел. Јекх терни интересентка дикхела јекхе терне пхења која со уживинела ко живото сар Сведоко. Кеда и интересентка дикхела кобор тани бахтали акаја терни пхен, ој мангела те џанел соске тано адава аѓаар.

12. Соске шај те вакера кај секова јекх ко собрание шај нешто те керел те поможинел е интересентенге?

¹² Кеда о интересентија запознајнена пе различна верна објавителенцар, ола сикљовена таро ленгоро пример со значинела те икерел пе е Исусескири заповед те мангел пе е Девле хем е пашутнен (Јован 13:35; 1. Тим. 4:12). Хем сар со сине вакердо поангле, о интересенти шај те сикљовел таро објавителија кола со иси лен слична проблемија сар лесте. О интересенти таро асавке примерија хаљовела кај ваљани те керел о потребна промене те шај те овел е Христосескоро ученико (5. Мој. 30:11). Секова јекх ко собрание шај ко несаво начин те поможинел е интересентеске духовно те напредујнел (Мат. 5:16). Сар ту лично охрабринеа е интересентен со авена ко состанокија?

ПОМОЖИН ОКОЛЕНГЕ СОЈ НЕАКТИВНА ПАЛЕМ ТЕ ПРОПОВЕДИНЕН

13-14. Сар о Исус постапинѓа пле апостоленцар кеда сине разочариме?

¹³ Амен мангаја те поможина амаре пхраленге хем пхењенге сој неактивна палем те почминен те проповединен хем те керен ученикија. О начин сар о Исус постапинела сине пле апостоленцар кеда сине разочариме сикавела аменге сар ваљани амен да те постапина авдиве.

¹⁴ Англедер о Исус те овел мудардо, лескере апостолија мукхле ле коркори хем нашле (Мар. 14:50; Јован 16:32). Со керѓа о Исус кеда лескере апостолија сине обесхрабриме? Кратко пало лескоро воскресение, о Исус вакерѓа несаве учениконге: „Ма даран! Џан, вакерен мле пхраленге [кај воскреснинѓум]“ (Мат. 28:10а). О Исус на откажинѓа пе таро пле апостолија. Иако ола мукхле ле, ов понадари да викинела лен сине ’мле пхраља‘. Исто сар о Јехова, о Исус да сине милостиво хем простинела сине (2. Цар. 13:23).

15. Сар ваљани те дикха ко адала со чхинавѓе те проповединен?

¹⁵ Слично аѓаар, амен да грижинаја амен околенге со чхинавѓе те џан ки служба. Ола тане амаре пхраља хем пхења, хем амен бут мангаја лен! Амен на бистраја са со керѓе поангле акала пхраља хем пхења башо Јехова. Несаве сој тане акана неактивна, служинѓе е Јеховаске бершенцар (Евр. 6:10). Чаче бут фалинена аменге! (Лука 15:4-7). Исто сар о Исус, сар шај амен да те сикава кај грижинаја амен ленге?

16. Сар сикаваја кај грижинаја амен амаре неактивна пхраленге хем пхењенге?

¹⁶ Љубезно канин лен ко состанокија. Јекх начин сар о Исус охрабринѓа пле ученикон кеда сине разочариме тано аѓаар со викинѓа лен ко јекх состанок (Мат. 28:10б; 1. Кор. 15:6). Слично авдиве да, амен охрабринаја е неактивна објавителен те авен палем ко состанокија. Џанаја кај те шај те авен, веројатно ка ваљани некобор пути те канина лен. Сигурно о Исус сине бахтало кеда лескере ученикија прифатинѓе и покана. (Споредин Матеј 28:16 хем Лука 15:6.)

17. Со ваљани те кера кеда јекх неактивно ка авел ко состанокија?

¹⁷ Доџакер лен таро вило. Кеда о Исус дикхља пе пле учениконцар, ов керѓа те осетинен пе шукар. На аџикерѓа ола те авен ки лесте, него ов гело те керел ленцар лафи (Мат. 28:18). Со ваљани те кера ако некој таро неактивна авела ки дворана? Амен ваљани те џа ки лесте хем љубезно те поздравина ле. Ко почеток шај нане те џана со те вакера. Ама, те на осетинел пе незгодно, шај едноставно те вакера кај сием бахтале со дикхаја ле.

18. Сар шај те охрабрина е неактивна објавителен?

¹⁸ Охрабрин лен. Е Исусескере ученикија шај мислинѓе кај нане способна те проповединен ко цело свето. Ов охрабринѓа пле ученикон адалеа со вакерѓа ленге: „Ме сиум туменцар ко са о диве“ (Мат. 28:20). Дали акава поможинѓа е учениконге? Оја. Кратко пало адава, ола „сикавена сине хем вакерена сине о шукар хабери“ (Дела 5:42). Е неактивна објавителенге да ваљани охрабрување. Ола шај дарана палем те почминен те проповединен. Амен шај те охрабрина лен адалеа со ка вакера ленге кај ола нане коркори те проповединен. Кеда ка осетинен пе спремна, амен шај те џа заедно ленцар ки служба. Сигурно ола ка ценинен амари помош кеда палем ка почминен те проповединен о шукар хабери. Кеда дикхаја ки ленде сар амаре пхраља хем пхења хем понашинаја амен ленцар аѓаар, ола шај палем те овен активна, а адава ка анел бахталипе ко собрание.

МАНГАЈА ТЕ ЗАВРШИНА И ЗАДАЧА СО ДЕНЃА ЛА АМЕНГЕ О ИСУС

19. Која тани амари бари желба, хем соске?

¹⁹ Џи кеда ка продолжина те проповедина хем те кера ученикија? Џикоте на авела о крајо акале светоскоро (Мат. 28:20). Дали ка шај те проповедина хем те кера ученикија џи тегани? Решиме сием те кера адава! Амен спремно трошинаја амаро време, сила хем материјална буќа те шај те аракха адален „со исправно дикхена ко вечно живото“ (Дела 13:48). Кеда кераја акава, амен џаја пало е Исусескоро пример. Ов вакерѓа: „Мло хајбе тано те керав и волја околескири со бичхалѓа ман хем целосно те завршинав и бути со денѓа ла манге“ (Јован 4:34; 17:4). Адаја тани амари бари желба. Мангаја те завршина и задача со сине аменге денди (Јован 20:21). Хем мангаја о јавера да, коте сој тане вклучиме о неактивна да, те истрајнен заедно аменцар ки акаја задача (Мат. 24:13).

20. Спрема Филипјаните 4:13, соске шај те исполнина и задача со денѓа ла аменге о Исус?

²⁰ Чаче, нане локхо те керел пе адава со заповединѓа аменге о Исус те кера. Ама, акаја задача на кераја ла коркори. О Исус ветинѓа кај ка овел аменцар. Кеда кераја ученикија амен сием „е Девлескере соработникија“ хем сием „ко јекхипе е Христосеа“, адалеске о Јехова хем о Исус ка поможинен аменге (1. Кор. 3:9; 2. Кор. 2:17). Тари адаја причина шај те успејна ко адава. Иси амен бари предност хем чест те исполнина акаја задача хем те поможина е јаверенге те керен исто адава! (Читин Филипјаните 4:13.)