Панда хари, о Јехова преку пло Царство ка решинел са амаре проблемија. Акава шукар хабери на ваљани те гарава ле само аменге. О Исус мангља лескере следбеникија те вакерен акава хабери сариненге! (Матеј 28:​19, 20). Сар е Јеховаскере сведокија икерена адава со заповединѓа о Исус?

1. Сар о лафија таро Матеј 24:14 исполнинена пе авдиве?

О Исус пророкујнѓа: „Акава шукар хабери башо Царство ка проповединел пе ко цело свето“ (Матеј 24:14). Е Јеховаскере сведокија тане бахтале со шај те учествујнен ко акава проповедничко дело. Амен проповединаја о шукар хабери ко цело свето хем адава ко повише таро 1.000 чхибја! Те шај те керел пе акава бут баро дело ваљани бут време, сила хем ваљани шукар те организиринел пе. Бизо е Јеховаскири помош акава нашти те керел пе.

2. Со са кераја те шај те проповедина е манушенге?

Амен проповединаја сегде коте со шај те аракха мануша. Исто сар со керена сине о христијања таро прво веко, амен да проповединаја „таро кхер ко кхер“ (Дела 5:42). Преку акава начин амен шај те кера лафи милиоња манушенцар секова берш. Адалеске со нашти е манушен секогаш те аракха кхере, амен исто аѓаар проповединаја ко бут прометна тхана. Секогаш родаја прилике те вакера е јаверенге башо Јехова хем башо адава со ов ка керел е манушенге.

3. Кој ваљани те проповединел о шукар хабери?

Са е чачутне христијанен иси лен одговорност те проповединен о шукар хабери е јаверенге. Амен сериозно дикхаја ки акаја задача. Адалеске со сием свесна кај акава хабери шај те спасинел е манушенгоро живото, даја амендар са те проповедина кобор со шај спрема амаре околностија. (Читин 1. Тимотеј 4:16.) Амен на добинаја паре башо адава со проповединаја, соске и Библија вакерела: „Бизо паре добинѓен, бизо паре ден“ (Матеј 10:7, 8). Иако бут мануша на мангена те шунен, амен понадари да проповединаја соске аѓаар служинаја е Јеховаске хем кераја ле бахтало.

ДОЗНАЈН ПОВИШЕ

4. Амен бут трудинаја амен те реса џи ко са о мануша

ВИДЕОКЛИПИ: Проповедибе ко „најдур тхана ки Пхув“ (7:33)

• Со мислинеа башо адава со е Јеховаскере сведокија бут трудинена пе те проповединен?

Читин Матеј 22:39 хем Римјаните 10:13-15, а пало адава керен лафи башо акала пучиба:

• Сар адава со проповединаја сикавела кај мангаја амаре пашутнен?

• Сар дикхела о Јехова ко окола со проповединена о шукар хабери? (Дикх о стихо 15.)

5. Амен сием е Девлескере соработникија

Бут искуствија сикавена кај о Јехова водинела амаро проповедибе. На пример, џикоте проповединела сине палоручко таро кхер ко кхер, о пхрал о Пол таро Нов Зеланд аракхља јекхе џувља. Адаја џувли сабајле молинѓа пе е Девлеске те бичхалел некас таро пле слуге. Ки молитва ој користинѓа е Девлескоро анав, Јехова. О Пол вакерела: „Трин саатија покасно ме аљум ко лакоро удар“.

Читин 1. Коринќаните 3:9, а пало адава керен лафи башо акава пучибе:

• Сар сикавена о искуствија, сар на пример адава таро Нов Зеланд, кај о Јехова водинела о проповедибе?

Читин Дела 1:8, а пало адава керен лафи башо акава пучибе:

• Соске ваљани аменге е Јеховаскири помош те шај те проповедина?

Дали џанљан?

Секова курко ко јекх таро амаре состанокија амен сикљоваја сар те проповедина. Ако сиан сине присутно ко јекх асавко состанок, со мислинеа ту баши адаја обука со добинаја?

6. Послушна сием ки е Девлескири заповед те проповедина

Ко прво веко о противникија мангле те чхинавен е Исусескере следбеникон те проповединен. Ама, о прва христијања англо закони бранинѓе пумаро право те проповединен о шукар хабери (Филипјаните 1:7). Авдиве, е Јеховаскере сведокија керена о исто.a

ВИДЕОКЛИПИ: Законско потврдимо амаро право те проповединел пе (2:28)

Читин Дела 5:27-42, а пало адава керен лафи башо акава пучибе:

• Соске нане те чхинава те проповедина? (Дикх о стихија 29, 38 хем 39.)

СО СИКЛИЛЕМ

О Исус вакерѓа пле следбениконге те проповединен о шукар хабери ко цело свето. О Јехова поможинела пле народо те керел адаја задача.

Сар ка одговорине?

• Сар проповединела пе о шукар хабери ко цело свето?

• Соске амаро проповедибе сикавела кај мангаја амаре пашутнен?

• Со мислинеа, дали о проповедибе шај те керел амен бахтале? Соске мислинеа аѓаар?

ИСТРАЖИН

Дознајн саво бахталипе анѓа јекхе пхењаке адава со посветинѓа цело пло живото ко проповедибе.

Бахтали сиум со биринѓум акава живото (6:29)

Читин башо несаве важна судска одлуке кола со керѓе полокхо те проповединел пе о шукар хабери.

„Законско потврдување на нашето право да проповедаме“ (Божјето Царство владее!, поглавје 13)

О Исус вакерѓа кај ваљани те крстина амен ако мангаја те ова христијања. (Читин Матеј 28:19, 20.) Ама, сој тано о крстибе? Хем со ваљани некој те керел те шај те ресел џи ко крстибе?

1. Сар ваљани некој те крстинел пе?

О грчко лафи сој тано преведимо сар „крстибе“ значинела „те потопинел пе“ тело пани. Кеда о Исус крстинѓа пе, ов сине потопимо ко пани ки река Јордан хем пало адава „иклило таро пани“ (Марко 1:9, 10). Исто сар о Исус, о чачутне да христијања крстинена пе аѓаар со овена целосно потопиме тело пани.

2. Со сикавела о крстибе?

Кеда некој крстинела пе, ов сикавела кај денѓа лафи е Јеховаске кај ка служинел леске. Англедер о крстибе, ки јекх лично молитва ов вакерела е Јеховаске кај мангела те служинел леске засекогаш. Ов ветинела кај ка служинел само е Јеховаске хем кај најважно бути ко живото ка овел леске те керел е Девлескири волја. Ов одлучинѓа те откажинел пе пестар хем те џал пало Исус, аѓаар со ка икерел лескере сикљојба хем ка џал пало лескоро пример (Матеј 16:24). Адалеа со дела лафи кај ка служинел е Јеховаске хем со крстинела пе овела паше амал е Јеховаја хем лескере народоја.

3. Со ваљани те керел некој те шај те крстинел пе?

Англедер те крстине тут, бут тано важно те сикљове башо Јехова хем те градине вера ки лесте. (Читин Евреите 11:6.) Кобор повише сикљовеа баши лесте хем кобор повише бајровела тли вера ки лесте, добором повише ка бајровел тло мангипе спрема о Јехова. Тегани ка манге те проповедине баши лесте хем те живине спрема лескере мерилија (2. Тимотеј 4:2; 1. Јованово 5:3). Кеда некој живинела живото сој достојно е Јеховаске хем аѓаар целосно угодинела леске, ов шај те одлучинел те дел лафи е Девлеске кај ка служинел леске хем те крстинел пе (Колошаните 1:9, 10).a

ДОЗНАЈН ПОВИШЕ

4. Со сикљоваја таро адава сар сине крстимо о Исус?

Читин Матеј 3:13-17 те шај те дикхе повише деталија башо е Исусескоро крстибе, а пало адава керен лафи башо акала пучиба:

• Дали о Исус сине бебе кеда крстинѓа пе?

• Сар сине крстимо о Исус? Дали сине само прскимо пањеа?

Откеда сине крстимо, о Исус почминѓа те керел и посебно задача која со сине леске денди таро Девел. Читин Лука 3:21-23 хем Јован 6:38, а пало адава керен лафи башо акава пучибе:

• Која задача сине е Исусеске најважно пало лескоро крстибе?

5. Ту шај те ресе и цел те крстине тут

Шај мислинеа туке кај никогаш ка нашти те успејне те де лафи е Јеховаске кај ка служине леске хем те крстине тут. Ама, ако понадари да сикљовеа башо Јехова хем запознајнеа ле пошукар, тегани ка ове посигурно те ане асавки важно одлука. Те шај те дикхе сар несаве мануша успејнѓе ко адава дикх о ВИДЕОКЛИПИ.

ВИДЕОКЛИПИ: Ов паше е Јеховаја (1:11)

Читин Јован 17:3 хем Јаков 1:5, а пало адава керен лафи башо акава пучибе:

• Со ка поможинел некаске те овел спремно башо крстибе?

1. 1. Англедер те крстина амен, ки молитва даја лафи е Јеховаске кај ка служина леске цело живото

2. 2. Кеда крстинаја амен, сикаваја е јаверенге кај денѓем лафи е Јеховаске кај ка служина леске цело живото

6. Кеда крстинаја амен оваја дело тари е Јеховаскири фамилија

Кеда крстинаја амен, оваја дело тари јекх бут бари фамилија сој тани ко цело свето. Иако живинаја ко различна тхана хем аваја таро различна културе, амен сием ко јекхипе адалеске со иси амен иста верувања хем живинаја спрема о иста морална мерилија. Читин Псалм 25:14; 133:1, а пало адава керен лафи башо акава пучибе:

• Саво ка овел амаро однос е Јеховаја хем околенцар со служинена леске откеда ка крстина амен?

СО СИКЛИЛЕМ

О Исус вакерѓа кај о христијања ваљани те крстинен пе. Англедер некој те крстинел пе, ваљани те градинел зорали вера ко Јехова, те живинел спрема лескере мерилија хем те дел лафи кај ка служинел леске цело живото.

Сар ка одговорине?

• Сар ваљани некој те крстинел пе хем соске о крстибе тано важно?

• Која тани и разлика машкар адава те да лафи е Јеховаске кај ка служина леске цело живото хем о крстибе?

• Со ваљани те кере англедер те де лафи е Јеховаске кај ка служине леске цело живото хем те крстине тут?

ИСТРАЖИН

Сикљов сој тано, а со нане о крстибе.

„Сој тано о крстибе?“ (интернет статија)

Дознајн кола буќа ка поможинен туке те ресе џи ко крстибе.

„О мангипе спрема о Јехова ка поттикнинел тут те крстине тут“ (Стражарско кула таро март 2020)

Читин со поттикнинѓа јекхе мануше те крстинел пе.

„Сакаа сам да ја откријам вистината“ (Стражарска кула таро 1 февруари 2013)

Дознајн соске врединела те крстине тут хем сар шај те спремине тут башо адава.

„Дали да се крстам?“ (Младите прашуваат — делотворни одговори (том 2), поглавје 37)