Сој тано о грево?
Со вакерела и Библија:
О грево тано постапка, чувство или мисла сој тане против е Девлескере мерилија. Ко е Девлескере јакхја грево тано секоја погрешно хем неправедно постапка колаја со пхагена пе лескере законија (1. Јованово 3:4; 5:17). Исто аѓаар, спрема и Библија, грево тано ако на кереа адава сој тано исправно (Јаков 4:17).
Ко чхибја коленде со сине пишими и Библија, о лафија со користинена пе башо грево значинена „те промашине и цел“. На пример, баши јекх група војникија ко пурано Израел вакерела пе сине кај секова јекх лендар прецизно фрдела сине бареа хем на промашинела сине и цел. О лафија „на примашинела сине и цел“, шај дословно те превединен пе сар „на керела сине грево“ (Судиите 20:16). Значи, ако некој керела грево, промашинела и цел, јавере лафенцар е Девлескере совршена мерилија.
О Девел тано амаро Створители хем адалеске иси ле право те чхивел аменге мерилија (Откровение 4:11). Хем секова јекх амендар тано одговорно англо Девел башо пле постапке (Римјаните 14:12).
Дали шај никогаш те на кера грево?
На. И Библија вакерела кај „сарине грешинѓе хем нашти те ресен е Девлескири слава“ (Римјаните 3:23; 1. Царевите 8:46; Проповедник 7:20; 1. Јованово 1:8). Соске?
О прва мануша, о Адам хем и Ева, сине совршена, бизо грево, керде спрема е Девлескоро лико (1. Мојсеева 1:27). Ама, ола нашавѓе пумари совршеност адалеске со на сине послушна е Девлеске (1. Мојсеева 3:5, 6, 17-19). Кеда добинѓе чхаве, о грево хем о несовршенство, пренесинѓе ленге да (Римјаните 5:12). О цари о Давид потврдинѓа адава кеда вакерѓа: „Ко грево сиум бијамо“ (Псалм 51:5).
Дали иси разлика машкар о гревија?
Оја. На пример, башо мануша таро пурано Содом, и Библија вакерела кај сине лошна хем грешникија хем кај ленгоро грево сине бут пхаро (1. Мојсеева 13:13; 18:20). Те дикха трин буќа кола со одрединена кобор пхаро тано јекх грево.
Кобор тано сериозно о грево. И Библија предупрединела амен те аракха амен таро акала сериозна гревија сар сој, сексуално неморал, идолопоклонство, чорибе, маќојбе, те ла силаја е јаверенгере буќа, те мудара хем те кера спиритизам (1. Коринќаните 6:9-11; Откровение 21:8). И Библија керела разлика машкар акала гревија хем непромислена, ненамерна гревија, сар сој лафија или постапке со поврединена е јаверен (Изреки 12:18; Ефешаните 4:31, 32). Сепак, и Библија поттикнинела амен те на дикха несериозно ко нијекх грево соске адава шај те чхивел амен те кера побаре гревија сој тане против е Девлескере законија (Матеј 5:27, 28).
Таро кола мотивија тано кердо. Несаве мануша керена гревија соске на џанена со о Девел очекујнела лендар (Дела 17:30; 1. Тимотеј 1:13). Иако и Библија на оправдинела асавке гревија, сепак, ој керела разлика машкар ленде хем кеда некој намерно пхагела е Девлескере законија (4. Мојсеева 15:30, 31). О намерна гревија авена таро јекх лошно вило (Еремија 16:12).
Кобор често керела пе. И Библија керела разлика машкар адава дали несаво грево керела пе јекх пути или повторинела пе (1. Јованово 3:4-8). Окола со намерно грешинена, иако џанена сој тано исправно, ка овен осудиме таро Девел (Евреите 10:26, 27).
Окола со керѓе сериозно грево шај те овел ленге бут пхаро башо адава. На пример, о цари о Давид пишинѓа: „Мле гревија тане упро мло шеро сар бут пхаро товари, бут тане пхаре со нашти те пхиравав лен“ (Псалм 38:4). Сепак, и Библија, дела амен надеж акале лафенцар: „О румимо мануш нека мукхел пло дром хем о лошно мануш пле мисле, нека иранел пе ко Јехова, кова со ка сикавел леске милост, ко амаро Девел, соске ов спремно ка простинел леске“ (Исаија 55:7).