Со вакерела и Библија башо дејбе?
Со вакерела и Библија:
И Библија охрабринела амен те да доброволно, таро вило хем таро исправна мотивија. Ој вакерела аменге кај солдуј џене ка овен бахтале, хем окова со дела хем окова со приминела (Изреки 11:25; Лука 6:38). О Исус вакерѓа: „Повише иси бахталипе кеда дела пе него кеда лела пе“ (Дела 20:35).
Кеда о дејбе керела е Девле бахтало?
О Девел тано бахтало кеда даја доброволно хем таро вило. И Библија вакерела: „Секој нека керел сар со одлучинѓа ко пло вило, на бизи волја, ни силаја, соске о Девел мангела адале сој бахтало кеда дела“ (2. Коринќаните 9:7).
Ако мангаја те обожавина е Девле сар ов со мангела тегани амен ваљани те ова спремна те да таро исправна мотивија (Јаков 1:27, фуснота). Кеда некој великодушно поможинела околенге со иси лен потреба, тегани угодинела е Девлеске хем адалеа сар те пхене дела е Девлеске заем (Изреки 19:17). И Библија вакерела кај ов ка наградинел асавке мануше (Лука 14:12-14).
Кеда о Девел нане задоволно таро адава со даја?
Ако даја таро неисправна, себична мотивија. Сар на пример:
те сикава амен англо јавера (Матеј 6:2).
те овел амен корист таро адава (Лука 14:12-14).
те „кина“ аменге спасение (Псалм 49:6, 7).
Ако адава со даја користинела пе башо нешто со осудинела о Девел. На пример, би овела сине погрешно те да паре несаве манушеске со ка кхелел комари или ка трошинел лен баши дрога или алкохол (1. Коринќаните 6:9, 10; 2. Коринќаните 7:1). Освен адава, нане исправно те да околенге со шај коркори те издржинен пе ама на мангена те керен бути (2. Солуњаните 3:10).
Ако даја е јаверенге, а нане доволно амаре фамилијаке. И Библија вакерела кај о поглавари ки фамилија ваљани те грижинел пе башо о потребе пле кхерутненгере (1. Тимотеј 5:8). На би овела сине шукар те дел добором бут е јаверенге а пле фамилијаке те на ачхол ништо. О Исус осудинѓа е манушен кола со дена сине „поклонија е Девлеске“ ама на грижинена пе сине пумаре пхуре родителенге (Марко 7:9-13).