О мангипе хем и правда ко христијанско собрание (дујто дело)

1. Ко кола дуј буќа шај те ова сигурна?

О ЈЕХОВА отсекогаш мангела сине пле слуген хем секогаш ка мангел лен. Ов исто аѓаар мангела и правда (Пс. 33:5). Адалеске шај те ова сигурна ко дуј буќа: 1) О Јехова осетинела бари дукх кеда некој постапинела неправедно лескере слугенцар хем 2) ов ветинела кај ка казнинел околен со постапинена неправедно ленцар. Ки прво таро акала штар статиеb дикхлем кај о Закони со денѓа ле о Девел преку о Мојсеј е Израелцонге темелинела пе сине ко мангипе. Адава закони поттикнинела сине е Израелцон те постапинен праведно сариненцар, чак околенцар со нашти сине коркори те заштитинен пе (5. Мој. 10:18). Е Мојсеескоро закони сикавела кобор баро мангипе иси е Јехова спрема пле слуге.

2. Башо кола пучиба ка кера лафи?

² Е Мојсеескоро закони чхинавѓа те важинел ко 33 берш а.е., кеда сине кердо о христијанско собрание. Дали о христијања ачхиле бизи заштита која со дела ла сине о закони со темелинела пе сине ко мангипе хем сине праведно? На! Е христијанен сине лен нево закони. Ки акаја статија прво ка дикха сој тано адава закони. Пало адава ка дикха о одговорија ко акала пучиба: Соске шај те вакера кај акава закони темелинела пе ко мангипе? Соске шај те вакера кај тано секогаш праведно? Спрема акава закони, сар ваљани те постапинен е јаверенцар окола со иси лен авторитети?

СОЈ ТАНО „Е ХРИСТОСЕСКОРО ЗАКОНИ“?

3. Сој тано вклучимо ко „е Христосескоро закони“ кова сој спомнимо ко Галатите 6:2?

³ Читин Галатите 6:2. Е христијаненге важинела „е Христосескоро закони“. О Исус на денѓа пле следбениконге списако законенцар, него денѓа лен упатствија, заповедија хем начелија спрема кола со ваљани те живинен. Ко „е Христосескоро закони“ тано вклучимо са адава со сикавѓа о Исус. Акана, те дикха нешто повише башо акава закони.

4-5. Ко саве начинија хем кеда сикавела сине о Исус е манушен?

⁴ Ко саве начинија сикавела сине о Исус е манушен? Прво, ов сикавела лен сине пле лафенцар. Адава со вакерела сине о Исус сине ле баро влијание соске вакерела сине о чачипе башо Девел, сикавела сине баши чачутни смисла е животоскири хем башо адава кај е Девлескоро Царство ка решинел са о проблемија е манушенгере (Лука 24:19). Дујто, о Исус сикавела сине пле примереа. Пле животоја ов сикавѓа пле следбениконге сар ваљани те живинен (Јован 13:15).

⁵ Кеда сикавела сине о Исус? Џикоте трајнела сине лескири служба ки Пхув (Мат. 4:23). Ов исто аѓаар, сикавела сине пле следбеникон кратко откеда воскреснинѓа. На пример, појавинѓа пе пле учениконге кола со шај сине повише таро 500 џене, хем денѓа лен заповед те керен ученикија (Мат. 28:19, 20; 1. Кор. 15:6). Сар поглавари е собраниескоро, о Исус понадари да дела сине упатствија пле учениконге откеда иранѓа пе ко небо. На пример, околу 96 берш а.е., о Христос денѓа упатство е Јованеске те охрабринел хем те дел совет е христијаненге со сине помазаникија (Кол. 1:18; Отк. 1:1).

6-7. а) Коте тане пишиме е Исусескере сикајба? б) Сар сикаваја кај шунаја е Христосескоро закони?

⁶ Коте тане пишиме е Исусескере сикајба? Ко штар евангелија тане пишиме бут буќа со вакерѓа хем керѓа о Исус ки Пхув. А о јавер дело таро Христијанска грчка списија поможинела аменге те хаљова сар размислинела сине о Исус. Адава тано аѓаар соске окола со пишинѓе лен сине водиме таро свети дух хем размислинена сине сар о Христос (1. Кор. 2:16).

⁷ Со сикљоваја: Е Исусескере сикајба поможинена аменге ко са о аспектија таро амаро живото. Значи, е Христосескоро закони влијајнела ко са со кераја кхере, ки бути, ки школа хем ко собрание. Акава закони сикљоваја ле кеда читинаја о Христијанска грчка списија хем размислинаја баши ленде. Сикаваја кај шунаја акава закони аѓаар со живинаја спрема о упатствија, о заповедија хем о начелија кола со аракхљовена ко адава дело тари Библија. Кеда шунаја е Христосескоро закони, сием послушна е Јеховаске, кова со грижинела пе аменге хем кастар со авела са адава башо со сикавѓа о Исус (Јован 8:28).

ЗАКОНИ КОВА СО ТЕМЕЛИНЕЛА ПЕ КО МАНГИПЕ

8. Ко со темелинела пе е Христосескоро закони?

⁸ Окола со живинена ко јекх стабилно кхер кова сој градимо ко зорало темели осетинена пе безбедна. Слично аѓаар, окола со живинена спрема јекх шукар закони сој градимо упро зорало темели осетинен пе безбедна. Е Христосескоро закони тано чхивдо упро најшукар темели — о мангипе. Соске шај те вакера адава?

9-10. Кола примерија сикавена кај о Исус керела сине са таро мангипе, хем сар шај те џа пало лескоро пример?

⁹ Прво, са со керела сине о Исус сине таро мангипе. О сочувство тано јекх начин сар сикавела пе мангипе. Адалеске со сине леске жал башо мануша, о Исус сикавѓа буте манушен, сасљарѓа е насвален, парварѓа е бокхален хем воскреснинѓа е мулен (Мат. 14:14; 15:32-38; Мар. 6:34; Лука 7:11-15). Иако адала буќа лена сине лестар бут време хем сила, о Исус спремно чхивела сине е јаверенгере потребе англедер пле. Ама, о најважно начин сар сикавѓа мангипе о Исус тано аѓаар со денѓа пло живото е јаверенге (Јован 15:13).

¹⁰ Со сикљоваја: Шај те џа пало е Исусескоро пример аѓаар со е јаверенгере потребе ка чхива англедер амаре. Исто аѓаар, шај те џа пало лескоро пример адалеа со ка сикљова те сикава повише сочувство е манушенге ко амаро подрачје. Амен шунаја е Христосескоро закони кеда таро сочувство спрема о мануша проповединаја о шукар хабери хем сикаваја лен башо Девел.

11-12. а) Со сикавела кај о Јехова бут мангела амен? б) Сар шај те сикава сар е Јеховаскоро мангипе?

¹¹ Дујто, о Исус поможинѓа пле следбениконге те хаљовен кај лескоро Дад бут мангела лен. Џикоте трајнела сине лескири служба ки Пхув, о Исус ко бут начинија сикавѓа кобор бут мангела о Јехова пле слуген. На пример, о Исус сикавѓа кај секова јекх амендар тано скапоцено амаре Дадеске сој ко небо (Мат. 10:31). О Јехова тано бут бахтало кеда несаво таро лескере бакхре со нашавдило каинела пе хем иранела пе ко собрание (Лука 15:7, 10). О Јехова сикавѓа пло мангипе аѓаар со денѓа пле Чхаве сар откупнина аменге (Јован 3:16).

¹² Со сикљоваја: Сар шај те сикава сар е Јеховаскоро мангипе? (Еф. 5:1, 2). Са амаре пхраља хем пхења тане аменге скапоцена хем бахтале доџакераја секоле јекхе со палем иранела пе ко Јехова (Пс. 119:176). Амаро мангипе спрема о пхраља хем о пхења сикаваја ле адалеа со даја амаро време хем сила те шај те поможина ленге, посебно кеда ка ваљани ленге (1. Јов. 3:17). Кеда сикаваја мангипе спрема о јавера, амен шунаја е Христосескоро закони.

13-14. а) Спрема Јован 13:34, 35, сави заповед денѓа о Исус пле следбениконге, хем соске ој тани неви? б) Сар сикаваја кај шунаја и неви заповед?

¹³ Трито, о Исус заповединѓа пле следбениконге те сикавен самопожртвувано мангипе. (Читин Јован 13:34, 35.) Ки сави смисла акаја заповед е Исусескири сине неви? Ов родинѓа те сикава мангипе ко начин кова со на родела пе сине ко е Мојсеескоро закони: те манга амаре пхрален исто сар о Исус со мангља амен. Те шај те кера адава, ваљани те сикава самопожртвувано мангипе.c Ваљани те манга амаре пхрален хем пхењен чак повише амендар. Мора те манга лен добором бут со ка ова спремна те да амаро живото баши ленде, исто сар о Исус со денѓа пло живото аменге.

¹⁴ Со сикљоваја: Сар сикаваја кај шунаја и неви заповед? Аѓаар со ка кера жртве амаре пхраленге хем пхењенге. Добором бут мангаја лен со сием спремна чак те мера ленге. Ама спремна сием те кера потикне жртве да. На пример, шунаја е Христосескоро закони кеда трудинаја амен те поможина несаве попхуре пхралеске или пхењаке те авел ко состанокија, кеда спремно откажинаја амен таро нешто со мангаја те шај те кера бахтало несаве пхрале или кеда користинаја амаро одмор тари бути те шај те поможина кеда иси природно катастрофа. Исто аѓаар, поможинаја о собрание те овел тхан коте со секова јекх ка осетинел пе безбедно хем пријатно.

ЗАКОНИ КОВА СОЈ СЕКОГАШ ПРАВЕДНО

15-17. а) Сар таро постапке е Исусескере дикхела пе лескоро чувство баши правда? б) Сар шај те џа пало е Исусескоро пример?

¹⁵ Кеда ки Библија користинела пе о лафи „правда“, главно мислинела пе те кере адава со о Девел вакерела кај тано исправно хем те на ове пристрасно џикоте кереа адава. Соске шај те вакера кај е Христосескоро закони тано праведно?

¹⁶ Прво, размислин сар таро е Исусескере постапке дикхела пе лескоро чувство баши правда. Ко лескоро време, о еврејска верска водачија мрзинена сине адален со на сине Евреија, е обично народо со сине Евреија дикхена лен сине потеле пестар хем на поштујнена сине е џувлен. Ама, о Исус секогаш постапинела сине праведно сариненцар хем на сине пристрасно. Ов прифатинѓа адален кола со сине лен вера ки лесте иако на сине Евреија (Мат. 8:5-10, 13). Ов проповединела сине сариненге бизо предрасуде — хем е барваленге хем е чороленге (Мат. 11:5; Лука 19:2, 9). Никогаш на постапинела сине грубо е џувљенцар хем на вреџинела лен сине. Наместо адава, ов поштујнела лен сине хем сине љубезно ленцар, чак околенцар кола со сине отфрлиме таро јавера (Лука 7:37-39, 44-50).

¹⁷ Со сикљоваја: Амен да шај те џа пало е Исусескоро пример адалеа со нане те ова пристрасна хем ка проповедина са е манушенге со мангена те шунен о шукар хабери — бизи разлика дали тане барвале или чороле, или тари сави религија тане. О пхраља џана пало лескоро пример адалеа со сикавена поштовање е џувленге. Кеда кераја акала буќа, сикаваја кај шунаја е Христосескоро закони.

18-19. Со сикавела сине о Исус баши правда, хем со сикљоваја таро адава?

¹⁸ Дујто, размислин со сикавела сине о Исус баши правда. Ов сикавела сине пле следбеникон башо начелија кола со шај сине те поможинен ленге те постапинен праведно е јаверенцар. На пример, размислин башо Златно правило (Мат. 7:12). Сарине мангаја о јавера те постапинен аменцар праведно. Адалеске амен да ваљани те постапина ленцар праведно. Тегани, шај ола да ка овен поттикниме те постапинен праведно аменцар. Ама со ако доживинаја несави неправда? О Исус сикавѓа пле ученикон те овел лен доверба кај о Јехова ка „керел те добинен правда [окола] со родена ле диве хем рат“ (Лука 18:6, 7). Акала лафија тане, уствари, јекх ветување: амаро праведно Девел тано свесно саве испитија иси амен ко акала последна диве, хем ко време со ов одрединѓа ле ка грижинел пе те добина правда (2. Сол. 1:6).

¹⁹ Со сикљоваја: Ако живинаја спрема о начелија баши кола со сикавела сине о Исус, ка постапина праведно е јаверенцар. А ако доживинѓем несави неправда ко акава свето е Сатанаскоро, шај те утешинел амен адава со џанаја кај о Јехова ка керел те добина правда.

САР ВАЉАНИ ТЕ ПОСТАПИНЕН Е ЈАВЕРЕНЦАР АДАЛА СО ИСИ ЛЕН АВТОРИТЕТИ?

20-21. а) Сар ваљани адала со иси лен несаво авторитети те постапинен е јаверенцар? б) Сар шај јекх ром те сикавел самопожртвувано мангипе? в) Сар ваљани јекх дад те постапинел пле чхавенцар?

²⁰ Спрема е Христосескоро закони, сар ваљани адала со иси лен несаво авторитети те постапинен е јаверенцар? Адалеске со акава закони темелинела пе ко мангипе, акала пхраља мора те сикавен поштовање хем мангипе околенге упри касте со иси лен авторитети. Ола на ваљани те бистрен кај о Христос мангела те сикава мангипе ко са со кераја.

²¹ Ки фамилија. Јекх ром ваљани те мангел пле ромња сар со мангела о Христос е собрание (Еф. 5:25, 28, 29). О ром ваљани те џал пало е Исусескоро пример хем те сикавел самопожртвувано мангипе пле ромњаке адалеа со ка чхивел лакере потребе хем желбе англедер пле. Несаве роменге шај тано пхаро те сикавен асавко мангипе. Шај бариле ки средина коте со о мануша на постапинена е јаверенцар праведно хем мангипаја. Шај ленге пхаро те циден пестар о лошна навике, ама мора те керен акала промене те шај те сикавен кај шунена е Христосескоро закони. Ако о ром сикавела самопожртвувано мангипе, тегани и ромни повише ка поштујнел ле. Јекх дад кова со чаче мангела пле чхавен никогаш на поврединела лен ни лафенцар ни постапкенцар (Еф. 4:31). Наместо адава, ов сикавела пле чхавенге мангипе хем внимание, хем адалеске ола осетинена пе безбедна, мангена ле хем иси лен доверба ки лесте.

22. а) Спрема 1. Петрово 5:1-3, каскоро тано о „стадо“? б) Сар ваљани о старешине те постапинен е „стадоја“?

²² Ко собрание. О старешине ваљани те на бистрен кај о „стадо“ нане ленгоро (Јован 10:16; читин 1. Петрово 5:1-3). О лафија „е Девлескоро стадо“ хем „е Девлескири сопственост“ сетинкерела е старешинен кај о стадо тано е Јеховаскоро. Ов мангела лескере бакхренцар те постапинел пе нежно хем мангипаја (1. Сол. 2:7, 8). О старешине кола со мангипаја керена пле одговорностија сар пастирија, керена бахтало е Јехова. Исто аѓаар, керена те овел полокхо е јаверенге те манген лен хем те поштујнен лен.

23-24. а) Сави улога иси е старешинен кеда некој ка керел сериозно грево? б) Кеда о старешине решинена асавке случаија, башо кола буќа ваљани те размислинен?

²³ Сави улога иси е старешинен кеда некој ка керел сериозно грево? Ленгири улога разликујнела пе тари е судиенгири хем е старешиненгири кола со икерена пе сине ко Закони со денѓа ле о Девел е Израелцонге. Спрема о Закони, о мурша со сине именујме сине лен одговорност те решинен о проблемија со сине поврзиме е чачутне обожавибаја, хем исто аѓаар те решинен о несогласувања машкар о Израелција хем о случаија кеда керела пе сине несаво криминал. Ама, спрема е Христосескоро закони, кеда некој ка керел сериозно грево, е старешинен иси лен одговорност те решинен само адала аспектија таро грево со влијајнена упро лескоро однос е Девлеа хем е собраниеа. Ола џанена кај о Девел денѓа право е властенге те решинен о граѓанска хем криминална случаија. Ко адава тано вклучимо хем ленгоро право те чхивен парична или затворска казне (Рим. 13:1-4).

²⁴ Сар ваљани те постапинен о старешине кеда некој ко собрание ка керел сериозно грево? Ола разглединена о случај хем анена одлуке аѓаар со користинена и Библија. Исто аѓаар, на бистрена кај е Христосескоро закони темелинела пе ко мангипе. О мангипе поттикнинела лен те размислинен башо акала буќа: Со ваљани те керен те шај те поможинен некаске ко собрание кова со сине жртва таро некаскоро грево? А башо окова со керѓа о грево, о мангипе поттикнинела лен те размислинен башо акала буќа: Дали каинела пе? Дали шај те поможинен леске палем те овел паше е Јеховаја?

25. Со ка дикха ки наредно статија?

²⁵ Бут сием благодарна со ваљани те икера амен ко е Христосескоро закони! Кеда сарине даја са амендар те шуна акава закони, кераја секова јекх ко собрание те осетинел пе мангло, ценимо хем безбедно. Сепак, живинаја ко свето коте со о лошна мануша овена „таро лошна ко полошна“ (2. Тим. 3:13). Адалеске мора те пазина. Сар шај о христијанско собрание те сикавел сар е Девлескири правда кеда решинена пе случаија сар сој о сексуално злоупотребибе чхавен? О одговор ка добина ки наредно статија.