Кова тано о шукар хабери?

1. Кова тано о шукар хабери таро Девел?

О Девел мангела о мануша те уживинен ко џивдипе. Адалеске со мангела е манушен Ов керѓа и Пхув хем са со иси ки лате. Панда хари Ов ка анел пошукар џивдипе са е манушенге ки цели Пхув. Ка чхинавел са о буќа со анена дукха. Читин Еремија 29:11.

Нијекх влада џи акана на чхинавѓа о насилство, о насвалипе хем о мерибе. Ама, иси јекх шукар хабери. Панда хари, е Девлескоро Царство ка цидел са о манушикане владе. Тегани окола со мангена ов те владинел ка уживинен ко мир хем ко шукар састипе. Читин Исаија 25:8; 33:24; Даниел 2:44.

2. Соске тано важно те џана о шукар хабери?

Кеда о Девел ка уништинел е лошна манушен тегани нане те овен дукха (Софонија 2:3). Кеда ка овел адава? И Библија англедер вакерѓа кај авдиве ка овел пхаро те џивдинел пе. О лошна буќа со овена авдиве сикавена кај панда хари о Девел ка анел ленге крајо. Читин 2. Тимотеј 3:1-5.

3. Со ваљани те кера?

Ваљани те сикљова башо Девел таро лескоро Лафи, и Библија. Ој тани сар лил со јекх дад пишинѓа пле мангле чхавенге. Ој вакерела аменге сар те џивдина пошукар авдиве хем сар те овел амен вечно џивдипе. Чаче и адава кај несаве нане те манген со ту сикљовеа тари Библија. Ама, о вечно џивдипе тано најбари награда, ма мукх никој те чхинавел ту те добине ла. Читин Изреки 29:25; Откровение 14:6, 7.